4 Mi mi weriyei ane fene ne totesiya su, ane Owane Sitewi ano maꞌe au teꞌe wisereyesiya. 5 Wiyeme! Ane lu taune tomu neꞌese lo peri wisere aꞌi fene ne wanuwe. Peri ape apou aꞌi teꞌesiya. Ne aꞌi lai Meni Owane Jisas lo marepi kairefi aꞌi se tote anite tawesisiya. Sosu aiwawe ne le maꞌe marepi erasi aꞌi tote wawesiyenamisiya. Sosu aiwawe ne aꞌi lai lu taune werese Jisas lo marepi umasiteye ape, marepi erasi aꞌi tote wawesiyenamisiya. Serai ane Owane Sitewi maꞌe ne ne au teꞌe wisereyesiya. 6 Ane Owane Sitewi maꞌe ne ne au ei towerisiya. Ne lai lu taune maꞌe Jisas lo peri au teꞌenamisiya. Lu taune peri no wanuwei su, lowe faraꞌu Jisas lo marepi umasinamiyei. Ne Owane Sitewi lo marepi lowe maꞌe au teꞌeyei su, marepi no au kairefiyeyei. 7 Ne ane ne marepi erasi aꞌi totenamisiya. Ne, kaiyemo, lu taune werese maꞌe Jisas lo peri wanu umasinamisiya ape, ne marepi lowe lo au kairefiyeye. Serai ane Owane Sitewi maꞌe ne ne au teꞌe wisereyesiya.^b

8 Ane ne ne marepi erasi aꞌi tote wawesiyesiya. Sosu ne Krais lo marepi umasiye su, ane faraꞌu Krais lo iyape se, sosu kairefi lo se ne maꞌe au teꞌeyei. Serai ne peri ano fu umasire. 9 Ahowa! Weiya! Ane lai ne maꞌe peri kairefi aꞌi se au teꞌe taꞌane. Ane ne maꞌe marepi eresene aꞌi se au teꞌesiya. Sosu ane Pol yaꞌariyei meni owane. Sosu kalabus wesi sahe ironamisiya ape, ane ne maꞌe ei toweriyei. 10 Ane ne maꞌe meni eime ano Onesimus ne ei towerisiya. Ane kalabus wesi sahe iroteye su, ane Jisas lo peri le maꞌe au teꞌeteye. Le Jisas lo peri wanuwe su, Jisas lo marepi umasinamiteye. Serai meni ape meni eime ano wou aꞌi henerai.^c 11 Tu, meni ape, Onesimus, le wiyawi yahowaꞌi aꞌi taꞌane siye meni no. Le wiyawi taꞌaneye su, le ne maꞌe au luwaruweye. Ahowa, pereye le ane maꞌe marepi wisere aꞌi au ferafereisiya. Sosu ne maꞌe aiwawe aꞌi le lai ne maꞌe etiri wisere aꞌi irowei. 12 Serai ane meni ape ne maꞌe si tame eimawesawiyei. Meni ape marepi ano wou aꞌi ne. 13 Tu marepi ano apou aꞌi toteye. Ane Onesimus ane aiwawe iroteyei ne einamiyei. Meni ape ane mase iroteyei su, le yaru no ane mase au pati ferafereiyei. Ane kalabus wesi sahe irosiya su, le ane maꞌe au pati ferafereirowa. 14 Ahowa, ane Onesimus einamiyei su, yo seni ano luwaru aꞌi heneraiyei. Serai ane marepi heꞌi aꞌi apou toteye. Tu ane ne maꞌe ei toweriyei, ne meni Onesimus faraꞌu ane maꞌe si tame pati ferafereiyei ne eimawesaire. Ane marepi no tatai anirowata. Ahowa, meni ape si tame aiyerowa su, ne marepi wisere aꞌi no se si tame eimawesaiyei.

15 Sosu aꞌi pe marepi ano tereꞌe apou totesiya. Onesimus lai ne, Filemon, wesi no nowe oso aꞌi se arunatiyewe fi. Etiri ape wisere aꞌi ne. Pereye nowe eite se, Onesimus Jisas lo peri wanu umasisiya. Serai Onesimus, ne, Filemon, si tame maꞌe iyei ne totesiya. Le mi mi pasi pasi ne aiwawe si tame iyei ne totesiya. 16 Le ne maꞌe heneraiyei su, le wiyawi meni yahowaꞌi no taꞌama. Ahowa, le aꞌi lai aꞌi kaiyemo wisere aꞌi no tene! Ane meni ape ne marepi erasi aꞌi tote wawesiyenamisiya. Sosu aiwawe ne meni ape marepi erasi wiyeme aꞌi tote wawesiyete. Meni ape ne maꞌe iyei su, le kaiyemo wiyeme aꞌi ne ne heneraiyei. Le etiri werese no ne maꞌe au pati taꞌaneyei. Ne, Onesimus aiwawe aꞌi, fenesi Jisas lo marepi umasinamisiya. Serai fenesi Jisas lo lu feni henerai tepaꞌasiye.^d 17 Serai ane ne etiri ta ei towerisiya. Ne aꞌi lai yereme ano irosiya su, meni ape aiyeyei su, ne le marepi wisere aꞌi se au feraferei anire. Apou aꞌi ane ne maꞌe aiyerowa su, ne ane marepi wisere aꞌi se eriteyei. 18 Sosu peri tereꞌe ane ne maꞌe au teꞌesiya. Meni ape ne ne au luwaruweye su, sosu etiri ta taꞌareiye su, ne etiri werese le taꞌareiye ape, iyape ano se etere. 19 Ane Pol one towe eite ereti ano aꞌi ne maꞌe lese ausawisiya. Ane etiri werese meni ape taꞌareiye ape, ne maꞌe itiyaꞌu auwei. Ane ne maꞌe peri ape au teꞌereme taꞌama. Tu naifa ane Jisas lo peri ne maꞌe au teꞌeye. Ne peri ano wanuwe su, ne Jisas lo marepi tote tawesi umasinamiteye. Serai, apou wou aꞌi ane marepi hepene heꞌi aꞌi auwe. Serai ne etiri ta ane maꞌe neri aꞌi itiyaꞌu pei aure. 20 Marepi ano apou aꞌi toteye. Kaiyemo ano, Jisas lo iyape se, ne lai marepi ano au kairefiyere. Serai ne marepi ano Krais lo kairefi se ne lai marepi ano au fetaneyere. 21 Ane etiri ape soꞌoruwesiya. Ne aꞌi lai peri ano umasiyei. Serai ane ne maꞌe one towe eite au lesesiya. Ne one towe siye teꞌeyei su, ne etiri werese papu irosiya ape, umasiyei. Wiyeme! Apou aꞌi ne etiri werese au irowei. Sosu etiri tereꞌe tereꞌe ne aꞌi lai meni Onesimus ne au wisereye irowe.

22 Sosu aꞌi pe ane peri tereꞌe ne maꞌe au teꞌesiya. Ne wesi oweriye ta au taꞌuwe naneire. Sosu ne mi mi weriyei Owane Sitewi maꞌe ane ne au ei towerisiya. Serai ane kalabus wesi arunatiyei su, ane ne sewiyeyei ne aiyerowa.^e 23 Sosu peri yeꞌewi au teꞌesiya. Meni tereꞌe iyape Epafras, ane aiwawe kalabus wesi sahe irosiya ape, ne maꞌe eritesawiyei. Meni ape Krais Jisas lo peri au teꞌe fiyariye. Sosu lu tamo meni ape kalabus wesi maꞌe hene ani fu arosawi.^f 24 Sosu aiwawe lu tamo tereꞌe ne maꞌe eritesawiyei. Meni Mak, meni Aristarkus, meni Demas, meni Luk. Lowe werese ne maꞌe eritesawiyei. Lu werese ape mo ane aiwawe wiyawi taꞌanesiya.^g 25 Sosu aꞌi pe ane Owane Sitewi maꞌe apou ei toweriyei, Meni Owane Krais Jisas lo marepi fetaneye aꞌi hepene no saro aiwawe ironamiteyei. One towe eite papera.