Meni ta Juda lo lu taune maꞌe lese ausawi. Eiwerai one towe eite leseye awere? Nomo soꞌoru taꞌama. Lu tamo apou aꞌi totesiya, “Pol one towe eite leseye.” Lu tereꞌe tamo apou aꞌi totesiya, “Meni tereꞌe ta one towe eite lese ausawi.” Juda lo lu taune tamo, Jisas ne tote tawesi umasiteye ape, lowe fofowei erasi aꞌi teritenamiteye. Serene lowe tomu neꞌese aꞌi tote tawesiyei lowe lo arunatirowawe, Juda lo yo seni si tame atati umasiteyei ne toteteye. Meni ape, one towe eite leseye ape, lowe maꞌe apou au teꞌe atuatuteye. Lowe Jisas ne tote tawesiyei su, lowe lu taune waraꞌi aꞌi Owane Sitewi lo nihe se henerairowa. Lowe Moses lo yo peri umasinamiteyei su, lowe marepi hepene heꞌi aꞌi anirowata. Serai lowe Juda lo yaꞌariyei lo yo seni fa atati arunatirowawe, Jisas ne tote tawesi umasinamite.