HIBRU
Peri eite Hibru lo Lu Tewi maꞌe Lese Ausawi
Jisas Krais, le Owane Sitewi lo meni eime pefine aꞌi ne.
1
Tu naifa weriyei Owane Sitewi lai peri lo au teꞌe siye lu lo maꞌe au teꞌeteye. Nowe iyu menei tomu neꞌese se lowe yaꞌariyei nomo lo maꞌe Owane Sitewi lo peri au teꞌeteye. Lowe peri lo ape yo tereꞌe apou ape se au teꞌe fiyariteye. Ahowa, lowe, lowe maꞌe peri lo tewi aꞌi tewi aꞌi au teꞌe fiyariteye. 2 Ahowa, pereye nowe eite henerai su, le meni eime lo nomo maꞌe au teꞌeyei ne eimawe arosai. Tu naifa weriyei Owane Sitewi lai le maꞌe awei pani, etiri werese au taꞌaneyei ne auwe. Le nowe yeꞌewi se le etiri werese werese aꞌi ape mo aniyei ne ariariyeye.a 3 Meni eime lo lai Owane Sitewi lo mi erasi pefine aꞌi au tewi mitaiyenamiteye. Sosu Marepi werese lo ape, sosu yo seni waraꞌi werese aꞌi lo, lowe Owane Sitewi ne aiwawe pefine aꞌi tene! Kairefiyeyei erasi lo se le omo pani, etiri werese maꞌe au teꞌesiyawe, lowe peri lo wanu umasinamiteye. Le nomo au taꞌane fareraiyeye su, nomo lu taune aseyaro farere aꞌi henerai. Wiyawi ape taꞌane tepaꞌasiye su, le Owane Sitewi Pefine aꞌi lo ereti eyate feni sahe onunamiteyei ne wiye.bKrais lai ipari wisere werese aꞌi hi ani ararosiya.
4 Owane Sitewi lai meni eime lo erasi aꞌi ei ani aroweye. Le meni eime lo ape maꞌe iyape erasi pefine aꞌi auwe. Serai le Owane Sitewi lo ipari werese ape mo hi ani ararowe.c 5 Owane Sitewi meni eime lo maꞌe apou eiye,
“Ne meni eime ano ne. Pereye nowe eite se ane lu taune werese maꞌe amerame aꞌi au teꞌesiya.” Sng 2:7
Ahowa, le meni eime lo maꞌe apou eiye,
“Ane tai pefine aꞌi no henerai. Sosu ne meni eime pefine aꞌi ano henerai.” 2 Sml 7:14; 1 Sto 17:13
Ahowa, le peri ape ipari werese lo maꞌe ei taꞌame.d 6 Sosu aiwawe aꞌi le meni eime poto hi awei maꞌe eimawe arosai su, le ipari werese lo maꞌe apou eiye,
“Fene werese le maꞌe lowe uporo apeꞌi onurowawe, le maꞌe au teꞌe wisereye nineꞌinamite.” Lo 32:43
7 Ahowa Owane Sitewi lai ipari wisere aꞌi lo ne apou teꞌeye,
“Ane lowe fiyaru wou au iro henerairowa. Ane lowe wiyawi ano taꞌaneyei ne eimawe arosawirowa. Lowe wiyawi yahowaꞌi siye lu ano henerairowa. Lowe yehe mi wou aꞌi ne.” Sng 104:4
8 Ahowa le meni eime lo maꞌe apou teꞌeye,
“Ne lai Owane Sitewi aꞌi ne. Ne me tutoꞌu tutawe ape sahe mi mi pasi pasi weriyei onunamitorowawe, lu taune werese au noweinoweinamitorowa. Ne marepi farere aꞌi se lu taune werese lo yo seni au hese ereirowa.
9 Yo seni waraꞌi pefine aꞌi apou ape mo, ne lai tote wawesiyenamisiya. Ahowa, yo seni luwaru werese ape mo, ne lai ai marepi totenamisiya. Serene Owane Sitewi pefine aꞌi no lai ne ariariyeye. Le iyape no erasi pefine aꞌi ei ani aroweye. Iyape no lai lu feni no lo iyape hi ani ararowe. Serai le ne ne marepi au tote nineꞌinamisiya.” Sng 45:6-7
10 Le peri tereꞌe aiwawe aꞌi meni eime lo ne teꞌeye,
“Tu naifa, nowe sitewi weriyei se ne, Meni Owane Pefine aꞌi, ne lai omo pani, etiri werese taꞌaneye. Ereti no se, ne etiri werese, omo niꞌarawe hire sahe irosiya ape mo, taꞌaneye.
11 Etiri werese, ne taꞌaneye ape, lowe poꞌuterowa. Lowe werese uwaserowa. Apou aꞌi ipari tahe weriyei uwasesiya. Ahowa, ne taꞌi aꞌi mi mi pasi pasi ironamitorowa.
12 Ne etiri werese au noweriyei apou aꞌi ipari tahe weriyei au noweri fusawirowa. Meni ta ipari tahe weriyei ani erau fusawirowawe, ipari tahe heꞌi aꞌi ani asiyei. Ne aiwawe aꞌi etiri werese, ne taꞌaneye ape, ne ani fusawirowawe, etiri heꞌi aꞌi taꞌanerowa. Ahowa, ne aꞌi lai mi mi pasi pasi weriyei aiwawe aꞌi ironamitorowa. Sosu marepi hepene no temeniye poꞌuterowata.” Sng 102:25-27
13 Sosu aiwawe aꞌi Owane Sitewi lai meni eime lo maꞌe apou teꞌeye,
“Ne eyate feni ano sahe onura! Ane airame werese no hi ani ararorowa. Lowe no se airame werese aꞌi no hire sahe ato uwapoꞌu uweinamirowa.” Sng 110:1
Ahowa, Owane Sitewi lai ipari werese lo maꞌe peri ape au teꞌe taꞌame. 14 Serai Owane Sitewi lo ipari ne, lowe ape mo ne eiwerai awere? Lowe ipari aiwawe aꞌi ne. Lowe Owane Sitewi lo wiyawi au taꞌanesiya. Sosu aiwawe aꞌi le lowe hi awei maꞌe lu taune le ne tote tawesirowa ape, au pati ferafereiyei ne eimawe arosairowa.e