Nomo Krais ne meꞌiyeni maꞌe owe ape atati arunatite.
2
Owane Sitewi lo meni eime iyape erasi pefine aꞌi aniye. Nomo peri ape wanu tepaꞌasiye. Nomo peri ape wanu tote anite tawesi umasinamite. Nomo peri ape wanu umasiyei ne onotaꞌanorowata. Sosu nomo le ne meꞌiyeni maꞌe atati arunatirowata. 2 Tu naifa weriyei Owane Sitewi lai ipari lo se peri lo yaꞌariyei nomo lo maꞌe au teꞌeteye. Peri ape wiyeme pefine aꞌi henerai. Lu taune peri ape wanu arisiye su, Owane Sitewi lai lowe maꞌe fofowei erasi aꞌi itiyaꞌu auwe. Piyene awere? Owane Sitewi lai yo seni luwaru aꞌi au hese ereiteyei su, yo seni werese lo farere pefine aꞌi ne.a 3 Ahowa, pereye nowe eite se Owane Sitewi lai yo seni luwaru werese aꞌi nomo lo au sasari pamoweyewe, nomo maꞌe marepi hepene heꞌi aꞌi weriyei weriyei auwe. Le yo seni luwaru nomo lo au ani sasari pamoweyei ne totesiya. Ferafereiyei lo erasi pefine aꞌi ne. Sosu nomo Owane Sitewi lo wiyawi ape ne meꞌiyeni maꞌe atati arunatirowa su, le lai nomo maꞌe fofowei erasi ape aweraꞌiyenatirowata. Tu naifa Meni Owane Jisas nowe tutawe lu taune maꞌe peri lo au teꞌe areiyeteye. Lu taune ape mo peri lo ape wanuteye ape, lowe nomo maꞌe au teꞌe atuatu areiyeye. “Peri ape Jisas ne wiyeme pefine aꞌi ne.”b 4 Sosu Owane Sitewi lai, lu feni lo tereꞌe aiwawe aꞌi, peri lo au teꞌeteye ape, nomo maꞌe peri ape, au teꞌe atuatuwei ne toteteye. Peri ape wiyeme pefine aꞌi tene! Le wiyawi erasi pefine tereꞌe tereꞌe iroteye. Hepene Waraꞌi aꞌi lo se le marepi topo lo se umasiteyewe, lu taune maꞌe kairefi tereꞌe tereꞌe neri aꞌi auwe.cJisas lu taune si ete hene aniye.
5 Sosu aꞌi pe ane omo pani heꞌi aꞌi ne, nowe meꞌiye henerairowa ape, teꞌesiya. Owane Sitewi lai ipari werese lo maꞌe, kairefiyeyei lo, lu taune ape mo, omo pani heꞌi aꞌi irorowa ape, au noweinoweiyei ne au taꞌame. Ahowa le meni eime topo lo maꞌe wiyawi ape lowe au noweinoweiyei ne auwe. 6 Meni ta Owane Sitewi lo one towe sahe apou leseye. Le apou eiye,
“Nomo lowe eiwerou mo awere? Ne piyene nomo ne marepi erasi aꞌi totesiya awere? Nomo werese yahowaꞌi irosiya. Ne piyene nomo au noweinoweinamisiya awere?
7 Ne nomo taꞌaneye su, nowe oso aꞌi lowe ipari werese unahi iroteye. Ne nomo wisere pefine aꞌi au taꞌaneteye. Sosu ne lu taune ne ei ani aroweteye.
8 Etiri werese Owane Sitewi lo taꞌaneye ape mo, lowe nomo unahi ironamiteye. Ne lowe maꞌe kairefiyeyei ta etiri werese ne au noweinoweiyei ne auwe.” Sng 8:4-6
Owane Sitewi lo one towe sahe apou teꞌesiya, “Owane Sitewi lai etiri werese nomo unahi sato funamiteye.” Le etiri werese ne teꞌeye su, le etiri werese werese lowe maꞌe unahi au ironamiteye. Ahowa, pereye nowe eite se nomo apou siye soꞌoruwesiya. Lu taune etiri werese au noweinowei se taꞌame. 9 Ahowa, nomo Jisas siye soꞌoruwesiya. Tu naifa weriyei Owane Sitewi lai lu taune werese au ferafereiyei ne toteteye. Le meni eime lo hi awei maꞌe eimawe arosai su, le meni eime lo ipari werese lo unahi fuwe. Le nowe oso aꞌi su lowe unahi sato au iroteye. Le meni pefine aꞌi henerai.
Serene Owane Sitewi lo ferafereiyei se, Jisas lu taune werese ne au temeniyeye. Sosu pereye nowe eite se nomo le Owane Sitewi lo mitaiyeyei erasi pefine aꞌi mase siyesiya. Piyene awere? Le temeniyeye su, Owane Sitewi lai le maꞌe iyape erasi pefine aꞌi ei ani arowenamitorowa.d
10 Owane Sitewi lo yo seni farere wisere aꞌi ne. Owane Sitewi lai, etiri werese taꞌaneye ape, sosu etiri werese, le ne au ironamisiya ape, le lu taune werese omo lo hire niꞌarawe maꞌe hene aniyei ne toteteye. Sosu lowe mi mi pasi pasi le mase ironamitorowa. Serai le Jisas hi awei maꞌe lu taune werese ne au temeniyeyei ne eimawe arosai. Le wiyawi ape, Jisas maꞌe auwe ape, taꞌane tepaꞌasiye. Serai le yo pefine aꞌi nomo maꞌe au atuatuteye. Nomo yo pefine aꞌi ape umasiyei su, Meni Owane Jisas lai nomo omo hire maꞌe hene ani wirowa. Sosu nomo Owane Sitewi lo marepi wisere aꞌi le mase aiwawe ironamitorowa. 11 Jisas temeniyeye su, le nomo lo yo seni luwaru aꞌi au sasari pamoweyewe, sosu Owane Sitewi lo nihe se nomo lu taune waraꞌi aꞌi ironamitorowa. Nomo eimane pefine aꞌi lo henerai. Serai nomo sosu Jisas aiwawe aꞌi Tai taꞌi aꞌi irosiya. Serene Jisas nomo werese ne neritase se taꞌama. Sosu nomo paꞌise ape mo lo wou henerai.e 12 Le Owane Sitewi maꞌe apou eiye,
“Ane paꞌise werese ano maꞌe iyape pefine aꞌi no ne, au teꞌe areiyerowa. Lowe ne maꞌe au teꞌe wisereyeyei ne taꞌuwerairowa su, ane ne maꞌe au teꞌe wisereye nineꞌirowa.” Sng 22:22
13 Le apou tame teꞌeye,
“Ane Owane Sitewi ne tote tawesi umasinamirowa.” Ais 8:17
Sosu le tame eiye,
“Lu taune werese Owane Sitewi lai ane maꞌe auwe ape, ane lowe mase ironamisiya.” Ais 8:18
14 Owane Sitewi lo eimane werese, nomo awei lo lu taune wou ne. Nomo tahe paꞌare, fisaꞌi irosiya. Jisas hi awei maꞌe itorai su, le awei lo meni wou henerai. Sepei luwaru aꞌi, iyape, Satan, le lai lu taune aine teraꞌeyei ne kairefiyesiya. Serene Jisas awei lo meni wou aꞌi henerai su, le sepei Satan luwaru pefine aꞌi lo kairefiyeyei ape, poꞌuteye.f 15 Sosu lu taune omo pani sahe irosiya ape, lowe mi mi werese temeniyeyei ne atoweiyesiya. Serene atoweiyeyei ape lai lowe werese ti tawesinamiteye. Serai Jisas temeniyeye su, le atoweiyeyei ape au taꞌane sasarisawiyewe, lu taune maꞌe temeniyeyei ne atoweiyesiya ape mo, le lowe maꞌe marepi fetane aꞌi auwe. 16 Sosu pefine aꞌi le Owane Sitewi lo ipari werese ne au ferafereiyei ne itorai taꞌame. Ahowa, Owane Sitewi lo peri one towe lo sahe apou teꞌesiya. “Meni Abraham Owane Sitewi ne tote tawesiteye ape ne, Owane Sitewi lai Abraham lo lu tewi ne au ferafereiyei ne fai.” 17 Serai peri ape lo sitewi apou teꞌesiya, meni ape, Jisas, le kaiyemo mo lo marepi, sosu yo seni werese aiwawe aꞌi fa heneraire. Serai le Owane Sitewi lo marepi tote umasiteye su, le lai Meni Owane, Owane Sitewi metete nihari sahe teisiya ape, henerairowa. Le fisaꞌi topo lo Owane Sitewi maꞌe nomo ne au au heseye su, Owane Sitewi lai yo seni luwaru werese nomo lo au sasari poꞌutesawirowa. Serai Owane Sitewi lo nihe se nomo lu taune waraꞌi aꞌi irorowa. 18 Sosu Jisas hi omo pani awei sahe iroteye su, yo seni luwaru werese aꞌi apou ape le maꞌe henerai. Yo seni luwaru apou ape le maꞌe henerai su, sosu le fofowei erasi aꞌi teritenamiteye su, le nomo ne au pati ferafereirowa. Ahowa, le mi mi werese yo seni luwaru werese aꞌi aweraꞌiyenatiteye.