Jisas meni Moses hi ani ararowe.
3
Sosu aꞌi pe fene, lu taune Krais ne tote tawesi umasisiya ape, Owane Sitewi lai fene ei aniye. Serai fene Jisas ne tote etite. Owane Sitewi lai Meni Owane ape, Owane Sitewi lo metete nihari sahe teisiya ape, nomo ne heneraiyei ne eimawe arosai. Le Owane Sitewi maꞌe tote tawesiyei nomo lo ne au teꞌe areiyetorowa.a 2 Owane Sitewi lai le wiyawi lo au taꞌaneyei ne ariariyeye. Mi mi pasi pasi weriyei le Owane Sitewi lo marepi tote umasinamiteye. Le meni Moses aiwawe aꞌi ne. Moses mi mi werese Israel lo lu taune ne au noweinoweiteye. Wiyawi lo ape Owane Sitewi lai le maꞌe taꞌaneyei ne ariariyeye.b 3-4 Meni yaꞌariyei aite nomo lo henerai. Serai nomo iyape lo ei ani arowesiya. Yaꞌariyei sitewi lo iyape erasi aꞌi iroteye. Ahowa, lu tewi ape yahowaꞌi aꞌi ne. Serai aiwawe aꞌi lu Jisas ne erasi pefine aꞌi teꞌe ani arowerowa. Piyene awere? Le meni Moses lo iyape hi ani araroteye. Yaꞌariyei sitewi lai lu tewi lo perati fuwe. Ahowa, Owane Sitewi lai etiri werese werese taꞌaneteye. 5-6 Mi mi werese Moses Owane Sitewi lo wiyawi yahowaꞌi siye meni ne. Le Owane Sitewi lo lu tewi ape mo ne au taꞌaneteye. Peri ape mo ne, Owane Sitewi nowe meꞌiye se au teꞌerowa ape, Moses lowe maꞌe au teꞌe areiyeteye. Ahowa, Meni Owane Krais lai Owane Sitewi lo meni eime pefine aꞌi tene. Le mi mi pasi pasi weriyei Owane Sitewi lo lu tewi werese au noweinoweinamitorowa. Nomo tote tawesi nomo lo tei kairefiyenamiteyei su, sosu Owane Sitewi lo peri teꞌe naneiyei werese ninawenamiteyei su, sosu nomo Owane Sitewi lo lu feni pefine aꞌi henerairowa.cFene Owane Sitewi lo peri owe ape arisinamite.
7-8 Sosu serai nomo Owane Sitewi lo Hepene Waraꞌi aꞌi lo peri fa wanu umasite. Le nomo maꞌe apou eisiya,
“Fene pereye nowe eite se, Owane Sitewi lo peri wanuwei su, fene marepi kairefi aꞌi owe ape totete. Tu naifa weriyei Israel lo lu tewi, yaꞌariyei fene lo, lowe Owane Sitewi lo peri werese arisiteye. Fene yo seni luwaru aꞌi lowe lo ape owe ape umasite. Lowe omo pani foroꞌo aꞌi sahe iroteye su, lowe Owane Sitewi ne apou toteye, ‘Wanure! Owane Sitewi kairefi se taꞌama. Nomo peri lo arisiyei su, le nomo maꞌe etiri luwaru aꞌi ta itiyaꞌu aurowata.’” Kis 17:7; Nam 20:2-5
9 Serai Owane Sitewi lai lowe ne apou teꞌeye,
“Iyu menei lu hesi werese i tepaꞌasiye su, ane nihe lowe lo se wiyawi erasi pefine aꞌi taꞌaneteye. Sosu lowe ane ne apou toteteye, Owane Sitewi kairefi se taꞌama. Nomo peri werese lo arisinamirowa. Le nomo maꞌe itiyaꞌu au luwaruwerowata.”
10 Serai Owane Sitewi lu tewi ape mo maꞌe ai marepi erasi aꞌi toteteye. Le apou eiye,
“Lowe mi mi weriyei ane meꞌiyeni maꞌe atati arunamisiya. Lowe peri kairefi werese aꞌi ano arisinamisiya.
11 Ane lowe maꞌe ai marepi toteyewe, lowe maꞌe apou teꞌe naneiye. Awei pani ano, ane lowe ne au ariariyeye ape maꞌe, ane lowe maꞌe au itawiye. Lowe omo pani ape wirowata. Lowe omo pani ape sahe onu fetaneyerowata.” Sng 95:7-11; Nam 14:21-23
12 Sosu aꞌi pe kaiyemo mo ano, fene Krais ne tote tawesisiya ape, fene tamo yo seni luwaru aꞌi ironamiyei su, fene weiyai! Meni ta, fene mase irosiya ape, yo seni luwaru aꞌi irowei su, sosu le Owane Sitewi ne tote tawesi taꞌame su, le lai Owane Sitewi, norohuwe ironamitesiya ape, meꞌiyeni maꞌe atati arunatirowa. Marepi apou ape ne, fene weiyai! 13 Sosu aiwawe aꞌi yo seni luwaru aꞌi lai fene maꞌe owe ape arearete. Marepi fene lo owe ape kairefiyete. Ahowa, fene mi mi werese lu taune maꞌe tiyati au ferafereite. Owane Sitewi one towe lo sahe peri ape “pereye nowe eite se” au teꞌesiya su, le nomo maꞌe peri au teꞌesiya. 14 Piyene awere? Tu naifa nomo Meni Owane Krais ne tote tawesi umasiteye su, nomo mi mi werese marepi erasi aꞌi le ne toteteye. Serai nomo mi mi werese marepi apou ape tote tawesite. Yo seni nomo lo lu taune werese maꞌe au atuatu areiyete. Sosu nomo marepi taꞌi aꞌi, Krais mase ironamitorowa ape, lowe maꞌe au atuatu areiyete. Nomo le ne apou aiwawe aꞌi tote tawesi umasisiya su, nomo le mase lefeifonamitorowa. 15 Owane Sitewi lai peri ta one towe lo sahe apou teꞌesiya.
“Fene pereye nowe eite se Owane Sitewi lo peri wanuwei su, fene le ne marepi kairefi aꞌi owe ape tote taꞌorete. Tu naifa weriyei yaꞌariyei fene lo Owane Sitewi ne marepi kairefi aꞌi toteteyewe, lowe peri werese lo arisinamiteye.” Sng 95:7-8
Serai fene yo seni lowe lo owe ape umasite.d 16 Lu taune ape mo ne eiwerai Owane Sitewi lo peri wanu arisiteyewe, le ne meꞌiyeni maꞌe atati arunatiteye awere? Lu taune ape lai, omo pani Isip sahe iroteye ape, lu taune ape mo Moses lai hene taꞌuweti.e 17 Iyu menei lu hesi werese i tepaꞌasiye su, lu taune eiwerai Owane Sitewi lai ai marepi totenamiteye awere? Le lu taune werese maꞌe, yo seni luwaru aꞌi iroteye ape, ai marepi toteteye. Lowe Owane Sitewi maꞌe yo seni luwaru aꞌi iroteye su, Owane Sitewi lai lowe awei pani foroꞌo aꞌi sahe aine teraꞌe poꞌuteye.f 18 Owane Sitewi peri teꞌe naneiyei kairefi aꞌi apou au teꞌeye, “Lowe omo pani ano maꞌe, ane lowe ne au ariariyeye ape, wirowata. Ane omo pani ano maꞌe aiyeyei ape au itawiye. Lowe mi mi weriyei awei pani ape sahe onu fetaneyerowata.” Owane Sitewi lai eiwerai ne teꞌesiya awere? Le lowe ne peri werese lo arisiteye ape mo, sosu le ne meꞌiyeni maꞌe atati arunatiteye ape, au teꞌeteye. 19 Serai nomo etiri ta siye soꞌoruwe tene! Lu tewi ape mo Owane Sitewi ne tote tawesi taꞌame su, lowe omo pani ape sahe mi mi weriyei wi onu fetaneyerowata.