Owane Sitewi lo lu tewi pefine onu fetaneyetorowa.
4
Sosu aꞌi pe Owane Sitewi lai peri teꞌe naneiyei ape nomo maꞌe au teꞌeye. Peri teꞌe naneiyei ape apou teꞌesiya, “Nomo peri werese lo wanu tote umasiyei su, nomo omo hire ape sahe wirowawe, mi mi pasi pasi onu fetaneyerowa.” Serai nomo werese taꞌi taꞌi aꞌi weiyai! Nomo peri lo arisiyei su, Owane Sitewi lai yo seni luwaru aꞌi nomo lo au hese ereirowa. Serai nomo aiwawe aꞌi omo ape sahe onu fetaneyeyei ape anirowata. 2 Yaꞌariyei lu tewi ape mo Owane Sitewi lo peri heneruwe wanuteye. Sosu nomo aiwawe aꞌi Owane Sitewi lo peri heneruwe wanuteye. Ahowa, lowe peri ape wanu tote tawesi taꞌame. Serai lowe omo ape Owane Sitewi lowe maꞌe au teꞌe naneiye ape, wi taꞌame. 3 Sosu nomo Owane Sitewi ne tote tawesisiya ape, le peri teꞌe naneiyei ape nomo maꞌe au teꞌeye. Serai nomo tei kairefiyeyei su, nomo faraꞌu omo lo maꞌe wirowawe, onu fetaneyetorowa. Owane Sitewi apou eiye,“Ane lowe maꞌe ai marepi erasi aꞌi totenamiteye. Sosu ane peri teꞌe naneiyei ta lowe maꞌe au teꞌe kairefiyeyei. Omo pani ape sahe ane lowe au ariariyeye ape sahe, lowe mi mi weriyei wi onu fetaneyerowata.” Sng 95:11
Nowe ape se le peri teꞌe naneiyei ape au teꞌeye su, nowe sitewi se le awei etiri werese taꞌane tepaꞌasiye.a 4 Nomo etiri ape soꞌoruwe tepaꞌasiye. Owane Sitewi lai nowe poweiye toꞌu ne one towe lo sahe apou teꞌesiya,
“Owane Sitewi etiri werese taꞌaneye su, le wiyawi werese lo taꞌane tepaꞌasiye. Sosu nowe ape se le onu fetaneyeteye.” Stt 2:2
5 Nomo etiri ape soꞌoruwe tepaꞌasiye. Owane Sitewi lo peri aiwawe aꞌi ape one towe lo sahe apou tame leseye,
“Lowe mi mi weriyei omo pani ape sahe, ane lowe maꞌe au ariariyeye ape, wi onu fetaneyerowata.” Sng 95:11
6 Lu tewi ape, nowe tutawe Owane Sitewi lo peri heneruwe wanuwe ape, lowe peri ape ne wanu tote tawesi taꞌame. Serai lowe omo pani ape sahe wi onu fetaneye taꞌame. Peri teꞌe naneiyei ape pereye nowe eite se irosiya su, nomo tereꞌe tereꞌe faraꞌu omo pani ape sahe wi onu fetaneyerowa. 7 Peri ape nomo maꞌe au teꞌe atuatu areiyesiya. Owane Sitewi lai poweiye tereꞌe ariariyeye. Poweiye ape ne le apou eisiya, “Pereye nowe eite se.” Meꞌiye su, iyu menei tomu neꞌese i tepaꞌasiyei su, le meni Devit lo ahi se apou teꞌeye, nomo tu peri ape siye teꞌe tepaꞌasiye. Le apou eiye,
“Fene pereye nowe eite se Owane Sitewi lo peri wanuwei su, fene marepi kairefi aꞌi owe ape totenamite.” Sng 95:7-8
8 Omo pani ape sahe Owane Sitewi lowe maꞌe au ariariyeye ape ne, Josua lai lu tewi ape mo omo pani ape sahe hene wi onu fetaneyeye su, Owane Sitewi lai poweiye tereꞌe ta se, nowe meꞌiye henerairowa ape, au ariariye taꞌame.b 9 Serai nomo etiri ta soꞌoruwe tene! Josua lowe omo pani ape sahe hene wi onu fetaneye taꞌame. Serai peri teꞌe naneiyei lo ape nomo ne wei sato ironamisiya. Owane Sitewi lo lu feni pefine aꞌi omo pani ape sahe wi onu fetaneyerowa. Lowe onu fetaneyerowa su, apou aiwawe aꞌi Owane Sitewi poweiye toꞌu se onu fetaneyeye. 10 Owane Sitewi lai peri teꞌe naneiyei ape au teꞌeye su, lu taune tamo omo pani ape sahe wi onu fetaneyeyei ape, lowe wiyawi werese towafi lowe lo arunatirowawe, onu fetaneyerowa. Apou aꞌi Owane Sitewi wiyawi lo taꞌane tepaꞌasiye su, le onu fetaneyeye.c 11 Ahowa, nomo tamo Owane Sitewi lo peri arisiyei su, nomo Israel lo lu tewi aiwawe aꞌi henerairowa. Lowe Owane Sitewi ne tote tawesi taꞌame. Serai nomo Owane Sitewi lo omo pani onu fetaneyeriyei ne toteyei su, nomo peri werese lo ape mo wanu tote tawesi umasi etite.
12 Piyene awere? Owane Sitewi lo peri norohuwe kairefi aꞌi ironamisiya. Ipari meneꞌe aiwese hesi wou aꞌi ne. Meni ta ipari meneꞌe se meni tereꞌe ponei sahe aine tewiyei. Le paꞌare heteniyei aine tahe fiyariye. Sosu Owane Sitewi lo peri ipari meneꞌe ape wou aꞌi ne. Peri ape lai lu taune marepi hepene papu winamiyei. Peri ape se Owane Sitewi lai lu lo marepi, sosu yo seni lowe lo au hese ereirowa.d 13 Nomo etiri werese Owane Sitewi lo nihe sahe fareyarerowata. Etiri werese, Owane Sitewi taꞌaneye ape, nihe lo sahe amerame aꞌi siyenamisiya. Serai nomo werese Owane Sitewi lo nihari sahe teirowa. Marepi werese nomo lo, sosu yo seni werese nomo lo, nomo le maꞌe au atuatu areiyerowa. Sosu le nomo werese au hese ereirowa.
Jisas Krais Au heseyei Meni Owane Tutawe nomo lo ne.
14 Sosu aꞌi pe nomo Meni Owane Jisas ne tote tawesi umasisiya ape, nomo tote tawesiyei nomo lo ne, tei kairefiyenamite. Meni Owane tutawe ta Owane Sitewi lo nihari sahe wi teinamisiya ape, le nomo ne Owane Sitewi maꞌe teꞌe tiyatinamisiya. Meni ape lo iyape, Jisas, Owane Sitewi lo meni eime pefine aꞌi ne.e 15 Meni Owane tutawe nomo lo ape, Owane Sitewi lo nihari sahe teinamisiya ape, le tahe pereꞌe werese aꞌi nomo lo, sosu yo seni luwaru aꞌi nomo lo siye soꞌoruwe ewitesiya. Ei. Meni Owane tutawe nomo lo Sepei Satan lai yo seni luwaru aꞌi le maꞌe aresearese memeꞌiteye. Ahowa, Meni Owane nomo lo kairefiye teinamiteye. Le yo seni luwaru aꞌi iro taꞌame. 16 Serene nomo pei tei kairefiyete. Nomo faraꞌu Owane Sitewi lo me tutoꞌu tutawe maꞌe aiyeye. Le nomo maꞌe marepi ferafereiyei neri aꞌi aurowa. Serai nomo yo seni luwaru aꞌi irowei su, le nomo maꞌe au feraferei atuaturowawe, marepi fetane aꞌi neri aꞌi aurowa.f