Nowe tu naifa Juda lo marepi apou aꞌi ne. Owane Sitewi lai au heseyei lu owane tutawe tamo wiyawi lo taꞌaneyei ne ariariyeye. Lu ape mo lu owane erasi aꞌi henerai. Lu taune yo seni luwaru aꞌi irowe su, lowe fe sipsip ta Owane Sitewi maꞌe yo seni luwaru aꞌi lowe lo ape ne au heseyei ne aitai. Meni owane ape fe sipsip lowe ne Owane Sitewi maꞌe au heseyei ne aine teraꞌeye. Aiwawe aꞌi lu taune ape mo etiri tereꞌe tamo meni owane erasi ape maꞌe aitai. Sosu meni owane erasi ape lowe ne Owane Sitewi maꞌe au heseye. 2 Au heseyei meni owane mi mi weriyei yo seni luwaru aꞌi iroteye. Le lu taune tereꞌe tereꞌe werese aiwawe aꞌi ne. Serai lu taune ape mo le maꞌe yo seni luwaru aꞌi lowe lo au teꞌesai su, le lowe ne au ferafereiye. Lowe yo seni luwaru aꞌi irowe su, sosu marepi towafi lowe lo soꞌoru taꞌama su, le lowe ne au tote ferafereirowa. Au heseyei meni owane ape lowe ne marepi momotei aꞌi teriterowa. 3 Sosu au heseyei meni owane ape mi mi weriyei se yo seni luwaru aꞌi irosiya su, le fe sipsip ta yo seni luwaru aꞌi topo lo ne tu Owane Sitewi maꞌe au heseyei ne aine teraꞌeye. Sosu moꞌo le faraꞌu lu taune werese lo yo seni luwaru aꞌi ne fe sipsip ta Owane Sitewi maꞌe au heseyei ne aine teraꞌeye.^a 4 Owe meni ta lai marepi topo lo se au heseyei lo meni owane heneraiyei ne ariariyerowata. Ahowa, Owane Sitewi lai meni ta au heseyei lo meni owane heneraiyei ne ei ariariyerowa. Aiwawe aꞌi tu naifa weriyei Owane Sitewi lai meni Aron au heseyei lo meni owane ta heneraiyei ne ei ariariyeye.^b

6 One towe lo ape sahe le peri tereꞌe apou eiye,

7 Tu naifa Jisas hi awei sato iroteye su, le Owane Sitewi maꞌe teꞌe tiyatiteye. Sosu le etiri tamo ne le maꞌe ei toweriteye. Le Owane Sitewi maꞌe peri erasi aꞌi se, sosu marepi orese aꞌi nihe saꞌi se itowe ape, au teꞌe tiyatiteye. Le Owane Sitewi maꞌe apou teꞌeye, “Tai ano, ane temeniyeyei wou taꞌama. Ne ane ne au ferafereire.” Marepi lo momotei eresene aꞌi, sosu le mi mi weriyei Owane Sitewi lo marepi tote umasinamiteye su, Owane Sitewi lai peri lo wanuwe.^c 8 Le Owane Sitewi lo meni eime pefine aꞌi ne. Ahowa, le fofowei erasi aꞌi teriteteye su, le Owane Sitewi lo marepi pefine aꞌi siye soꞌoruweye. Serai le mi mi weriyei tai lo marepi wanu tote umasinamiteye. 9 Le fofowei erasi aꞌi teriteyewe me tapeꞌi sahe temeniyeye su, le marepi hepene heꞌi aꞌi lo sitewi nomo ne henerai. Serai lu taune peri lo wanu tote tawesi umasiyei su, le yo seni luwaru aꞌi lowe lo au ani sasari pamowerowawe, lowe maꞌe marepi hepene heꞌi aꞌi aurowa. Sosu lowe werese mi mi pasi pasi weriyei ironamitorowa. 10 Wiyeme aꞌi le fofowei werese lo terite tepaꞌasiye su, Owane Sitewi lai le ne au heseyei lo meni owane erasi pefine aꞌi heneraiyei ne ei ariariyeye. Apou aꞌi le meni Melkisedek lo lu tewi au heseyei lo meni owane erasi ta heneraiyei ne ei ariariyeye.