1-2 Sosu aꞌi pe nomo Owane Sitewi lo peri tutawe Krais lo wiyawi ape ne, arunatirowawe, sosu Owane Sitewi lo peri kairefi aꞌi wanu soꞌoruwerowa. Tu naifa fene Krais lo peri tutawe wanuwe su, lowe fene maꞌe teꞌeye, “Fene wiyawi sitewi taꞌama ape mo pei atati arunatite. Aiwawe aꞌi fene Owane Sitewi ne wanu tote tawesi umasinamite. Fene Krais lo peri sitewi owe ape tote iꞌanete!” Ahowa, fene peri kairefi heꞌi aꞌi wanu soꞌoruwete. Saꞌi se au huwei lo yo seni, sosu ereti lu taune hire maꞌe, u tahe se irosiya ape, fuwei lo yo seni, sosu lu taune temeniyeye ape, Owane Sitewi lai lowe si tame sineyei lo peri, sosu peri ape nowe yeꞌewi se yo seni luwaru aꞌi au hese ereirowa ape, fene peri werese ape mo arunatirowawe, sosu Owane Sitewi lo peri kairefi aꞌi tereꞌe pei wanu soꞌoruwe umasinamite. 3 Serai nomo aiwawe aꞌi Krais lo peri sitewi tote iꞌane taꞌame. Ahowa, nomo peri kairefi heꞌi aꞌi wanu soꞌoruwerowa. Nomo peri tutawe, fene tu wanuwe ape, arunatirowawe, sosu Owane Sitewi lo marepi apou aꞌi toteyei su, nomo peri kairefi heꞌi aꞌi ape pei wanu tote umasite. Piyene awere? 4 Wanure! Lu taune tamo Owane Sitewi ne tote tawesiye su, lowe Owane Sitewi lo peri pefine aꞌi siye soꞌoruweye. Sosu etiri ape, Owane Sitewi lai lu taune maꞌe neri aꞌi auwe ape, marepi lowe lo papu iroteye ape, sosu Owane Sitewi lo Hepene Waraꞌi aꞌi marepi hepene lowe lo papu iroteye. Lu taune ape mo tote tawesiyei lowe lo meꞌiyeni maꞌe atati arunatiyei su, owe piye meni ta lai lowe Owane Sitewi maꞌe si tame henetairowata. 5 Mi mi werese lowe Owane Sitewi lo peri wanu tote nineꞌiteye. Sosu lowe Owane Sitewi lo kairefi se lu taune au noweinoweisiya ape, siye soꞌoruweye. 6 Lu taune ape mo Owane Sitewi ne tote tawesiyei lowe lo meꞌiyeni maꞌe atati arunatiyei su, owe piye meni ta lai lowe Owane Sitewi maꞌe si tame henetairowata. Lowe yo seni luwaru aꞌi lowe lo meꞌiyeni maꞌe atati arunatirowata. Piyene awere? Lowe apou wou aꞌi ne. Lowe Owane Sitewi lo meni eime me tapeꞌi sahe tame wou aine teraꞌerowa. Sosu lowe lu taune tereꞌe meni Krais maꞌe teꞌe naruwei ne tatai anirowa.^a

15 Sosu Abraham peri teꞌe naneiyei ape wanuwe su, le Owane Sitewi ne marepi momotei aꞌi ironamiteye. Serene Owane Sitewi lai le maꞌe etiri ape, le teꞌe naneiyei ape, auwe. 16 Fene etiri ape wanu soꞌoruwesiya. Nomo peri teꞌe naneiyei au teꞌeyei su, nomo meni owane lo iyape se au teꞌe naneiyei. Meni owane ape lai le hi ani ararowe. Serai peri ape, le au teꞌe naneiyei ape, au arearerowata. 17 Serai lu taune tamo Owane Sitewi lo peri teꞌe naneiyei ape, wanu anirowa su, le teꞌe naneiyei ape au teꞌe kairefiyeye. Le mi mi pasi pasi weriyei marepi topo lo atati tote iꞌane arunatirowata. Serai le peri tereꞌe ta apou eiye, “Iyape ano se ane fene maꞌe peri teꞌe naneiyei ano wiyeme pefine aꞌi heneraiyei ne au atuatu areiyesiya.” 18 Owane Sitewi lo teꞌe naneiyei ape, sosu iyape kairefi aꞌi lo, etiri hesi ape atati tote iꞌane arunatirowata. Serai sosu Owane Sitewi lai etiri hesi ape ne peri wawero au teꞌerowata. Serai nomo yo seni luwaru aꞌi ape mo arunatiyewe, le maꞌe itero nate tawesinamiri. Le marepi wisere erasi aꞌi nomo maꞌe aunamiteye. Serene etiri werese Owane Sitewi au teꞌeye ape, nomo marepi papu tote tawesi kairefiyesiya.^d 19-20 Serai etiri werese le teꞌe naneiye ape mo ne, nomo lowe ne nate tawesinamisiya. Nomo le ne nate tawesiteyei su, nomo arunatirowata. Nomo le sahe tei kairefiyenamisiya. Jisas lai etiri werese Owane Sitewi au teꞌe naneiye ape mo, nomo maꞌe aitai. Le Owane Sitewi lo wesi tutawe omo hire maꞌe irosiya ape, tewi wesi papu wiye. Le tewi wesi sahe nomo ne au teꞌeyei ne wiye. Le au heseyei meni owane ta wou tewi wesi sahe wiye. Le wesi tewiye si papu wiyewe, ipari tahe yo sahe heriteye ape ani erauwiyewe, wiye. Owane Sitewi, tewi wesi lo sahe onunamiteye ape, le tu nihari metete lo sahe teirinamiteye. Le nomo ne wesi tewi wesi sahe wiyewe, au heseyei meni owane erasi pefine aꞌi mi mi pasi pasi weriyei henerai. Apou aꞌi meni Melkisedek lu tewi lo ne meni owane erasi henerai.^e