Melkisedek lai nomo maꞌe Krais ne au teꞌe atuatusiya.
7
Sosu aꞌi pe meni Melkisedek ne, tu naifa le awei lo meni owane tutawe ne. Le lu taune omo weniyei, Salem sahe iroteye ape au noweinoweiteye. Owane Sitewi pefine aꞌi lai le au heseyei meni owane erasi aꞌi heneraiyei ne au ariariyeye. Le lu taune ape mo ne Owane Sitewi maꞌe au teꞌeteye. Sosu meniAbraham awei lo lu owane tutawe hesiyo hesiyo ape mo ai atu tiyatiteyewe, lowe aine teraꞌeye. Abraham si tame aiyeteye su, meni Melkisedek le maꞌe yo sahe siye naituriyewe, le maꞌe au teꞌe wisereye nineꞌiteye.a 2 Abraham lu owane hesiyo hesiyo aine teraꞌe tepaꞌasiye su, le etiri tomu neꞌese lowe lo ape tesi aniye. Etiri werese lowe lo ape, le tesi aniye ape, le ereti hesi werese tomu taꞌi taꞌi au witi. Sosu le tomu taꞌi ta Melkisedek maꞌe auwe. Ane meni Melkisedek ne fene maꞌe teꞌesiya. Tutawe, iyape lo lo eti apou aꞌi ne. Meni owane tutawe lo yo seni aseyaro aꞌi ne. Le omo weniyei
Salem lo meni owane tutawe ne. Serai iyape eti lo tereꞌe apou aꞌi, meni owane tutawe lo marepi fetane aꞌi ne. 3 Owe meni ta lai Owane Sitewi lo one towe sahe Melkisedek lo lu tewi ne lese taꞌame. Nomo eimane auwe werese lo ne aiwawe aꞌi soꞌoru taꞌama. Eiwerou su mai lo auteiye awere? Eiwerou su le temeniyeye awere? Nomo soꞌoru taꞌama. Serai le Krais ne nomo maꞌe au teꞌe atuatusiya. Le Owane Sitewi lo meni eime aiwawe aꞌi ne. Le meni Krais au heseyei meni owane erasi ta mi mi pasi pasi weriyei Owane Sitewi sahe teinamitorowa.
4 Serai fene le ne siye soꞌoruwesiya. Le meni wisere erasi aꞌi ne. Abraham yaꞌariyei meni wisere weriyei nomo lo ne. Le awei lo lu owane tutawe hesiyo hesiyo tiyati ai atuwe su, etiri werese lo tesi aniye ape mo, le tomu taꞌi ta Melkisedek maꞌe auwe. 5 Juda lo lu taune ne, sosu lu werese yaꞌariyei Livai lo eimane meꞌiye henerai ape mo, Owane Sitewi lai lu ape mo au heseyei lu owane heneraiyei ne ariariyeye. Owane Sitewi lo peri lowe maꞌe apou teꞌeye, “Fene Livai lo lu tewi, fene me so werese taꞌaneyei awei sahe owe ape samete. Serai Israel lo lu tewi tereꞌe ayei lowe lo ani taꞌuwe lotowei su, lowe ereti hesi werese ani hese futi. Lowe ayei tomu taꞌi ta fene maꞌe aurowa.” Israel lo lu tewi lowe meni Abraham lo eimane auwe ne. Ahowa, lowe Livai lo lu tewi maꞌe ayei tomu taꞌi ta lowe maꞌe auwe.b 6 Meni Melkisedek le Abraham lo eimane auwe se taꞌama. Meni
Abraham yo sahe aiyeteye su, Melkisedek le yo se saro siye naituri. Melkisedek le maꞌe au teꞌe wisere nineꞌiye. Sosu Abraham etiri werese ani hese futi su, Melkisedek ne tomu taꞌi ta auwe. Tu naifa Owane Sitewi lai Abraham maꞌe peri teꞌe naneiyei lo ape mo au teꞌeye. 7 Serai nomo etiri ape siye soꞌoruwesiya. Meni ape, Melkisedek, peri wisere aꞌi au teꞌe nineꞌisiya ape, le meni owane erasi pefine aꞌi ne. Sosu meni ape, Abraham, peri teꞌe wisere nineꞌiyei ape anisiya su, le meni owane ape hi unahi sahe irosiya. 8 Lu au heseyei lu owane ape mo ne totere. Livai lo weneri sahe henerai ape, lowe werese temeniyerowa. Lowe etiri tomu taꞌi ta aniteye. Ahowa, meni Melkisedek ne le aiwawe aꞌi etiri tomu taꞌi ta aniye. Ahowa, Owane Sitewi lai one towe lo sahe apou lese taꞌame, “Melkisedek nowe poweiye ta temeniyeye.” Ahowa, Owane Sitewi lai peri ape one towe lo sahe lese taꞌame. Le apou wou aꞌi meni ta temeniye taꞌame. 9 Sosu lu tamo apou toteye, “Meni Abraham etiri tomu taꞌi ta Melkisedek maꞌe auwe su, meni Livai aiwawe aꞌi etiri tomu taꞌi ta le maꞌe auwe. Livai lo lu tewi, lowe etiri tomu taꞌi ta aninamiteye.” Piyene awere? 10 Nowe tu, Livai lo mai autei taꞌame su, meni ape Melkisedek Abraham yo se saro siye naituri. Peri anowe apou teꞌesiya. Serai Livai lo hepene norohuwe Abraham lo tahe paꞌare papu iroteye.
Jisas meni Melkisedek aiwawe wou aꞌi ne.
11 Sosu aꞌi pe Owane Sitewi lai yo peri lo ape Israel lo lu taune maꞌe auwe. Nowe ape se le Aron lo lu tewi au heseyei lu owane heneraiyei ne au ariariyeye. Ahowa, Owane Sitewi apou siye soꞌoruweye. Wiyawi werese Livai lo au heseyei lu owane taꞌaneteye ape, fe sipsip lu taune ne au heseyei ne aine teraꞌeye. Wiyawi ape mo yo seni luwaru aꞌi au sasarirowata. Serai Owane Sitewi lai au heseyei lo meni owane heꞌi aꞌi au ariariyeye. Au heseyei lo meni owane heꞌi aꞌi ape apou aiwawe aꞌi Melkisedek. Le Aron lo au heseyei lu owane ape apou wou taꞌama. 12 Serai au heseyei lo meni owane heꞌi aꞌi ape henerai su, le Livai lo au heseyei lu owane werese ariye aꞌi poꞌuteye. Sosu aiwawe aꞌi le Owane Sitewi lo yo peri weriyei ariye aꞌi poꞌuteye. Sosu yo peri heꞌi aꞌi ta fa heneraire. 13-14 Sosu Meni Owane Pefine aꞌi ne, nomo le ne teꞌesiya. Le lu tewi tereꞌe maꞌe henerai. Owane Sitewi lai mi mi weriyei meni ta, lu tewi lo maꞌe henerai ape, au heseyei lo meni owane ta heneraiyei ne au ariariye taꞌame. Meni ape Jisas ne, lu taune werese wanu soꞌoruwe tepaꞌasiye. Le Juda lo lu tewi maꞌe henerai. Sosu aiwawe aꞌi Moses lai au heseyei lu owane ne teꞌeteye su, le lu tewi ape ne teꞌe taꞌame.c
15 Sosu aꞌi pe peri ape amerame pefine aꞌi henerai. Sosu nomo apou toteyei su, Jisas au heseyei lo meni owane tereꞌe, Melkisedek aiwawe aꞌi henerai. Nomo faraꞌu peri sitewi wanu soꞌoruwerowa. 16 Owe meni ta lai Jisas maꞌe apou ei taꞌame, “Ne Juda lo lu tewi maꞌe henerai su, ne au heseyei lo meni owane henerairowata.” Ahowa, meni ta apou ei taꞌame. Ahowa, le mi mi pasi pasi norohuwe ironamitorowa su, kairefi topo lo se le au heseyei lo meni owane henerairowa. 17 Serai Owane Sitewi lo peri one towe sahe apou leseye.
“Ne au heseyei lo meni owane mi mi pasi pasi ironamitorowa. Ne meni Melkisedek aiwawe aꞌi henerairowa.” Sng 110:4
18-19 Sosu yo peri weriyei ape mo kairefi se taꞌama. Serai yo peri ape lu taune ne au ferafereirowata.
Serene Owane Sitewi lai yo peri weriyei ape hi ani ararowe. Yo peri weriyei ape, Owane Sitewi lai Moses auwe ape, yo peri ape lai lu taune maꞌe marepi hepene heꞌi aꞌi aurowata. Owane Sitewi lai etiri ta aiwawe aꞌi siye soꞌoruweye su, le nomo maꞌe etiri heꞌi wisere aꞌi ta auwe. Etiri wisere aꞌi ape, nomo ninawesiya ape, nomo faraꞌu Owane Sitewi maꞌe i ataheyerowa.d
20 Sosu ane peri tereꞌe ta fene maꞌe teꞌesiya. Owane Sitewi lai peri teꞌe naneiyei lo au kairefiyeye. Le apou eiye, “Iyape kairefi ano se ane fene maꞌe peri teꞌe naneiye.” Au heseyei lu owane tereꞌe werese henerai su, Owane Sitewi lai iyape kairefi lo se au ariariye taꞌame. 21 Ahowa, Jisas au heseyei lo meni owane henerai su, Owane Sitewi iyape kairefi lo se le maꞌe eiye,
“Meni Owane pefine aꞌi lai ne maꞌe peri teꞌe naneisiya. Ane marepi ano atati tote iꞌane arunatirowata. Ne au heseyei lo meni owane erasi pefine aꞌi mi mi pasi pasi weriyei ironamitorowa.” Sng 110:4
22 Owane Sitewi peri teꞌe naneiyei lo iyape kairefi lo se au teꞌeye su, nomo peri werese lo wiyeme pefine aꞌi wanu soꞌoruwesiya. Serai Jisas lai peri teꞌe naneiye ape lo meni sitewi ne. Sosu le Owane Sitewi lo marepi heꞌi aꞌi nomo maꞌe aitai.e
23 Sosu ane peri tereꞌe ta fene maꞌe teꞌesiya. Au heseyei lu owane tomu neꞌese iroteye. Lowe wiyawi lowe lo au taꞌaneteye. Sosu lowe werese taꞌi taꞌi aꞌi temeniyeye su, meni tereꞌe ta yaru lowe lo aniye. 24 Ahowa, Jisas mi mi pasi pasi weriyei ironamitorowa. Serai Owane Sitewi lai wiyawi werese lo meni tereꞌe maꞌe aurowata. 25 Serai lu taune werese, Jisas ne wanu tote tawesi umasisiya ape, Owane Sitewi maꞌe aiyeyei su, Jisas lai yo seni luwaru aꞌi lowe lo au sasari tepaꞌasiyewe, lowe maꞌe marepi hepene heꞌi aꞌi auwe. Pereye nowe eite se sosu nowe mi mi weriyei le lowe faraꞌu si tame taꞌane norohuwe hene anirowa. Le mi mi pasi pasi ironamitorowa su, le lowe ne Owane Sitewi maꞌe au pati aniyei ne teꞌe tiyatirowa.f
26 Sosu serai Jisas au heseyei lo meni owane pefine aꞌi ne. Le mi mi weriyei nomo ne au ferafereinamisiya. Le Owane Sitewi lo nihe se meni waraꞌi aꞌi ne. Yo seni werese lo farere aꞌi ne. Nomo mi mi weriyei yo seni luwaru aꞌi ironamisiya. Le nomo aiwawe wou taꞌama. Sosu Owane Sitewi lai le niꞌarawe hire pefine maꞌe ei ani arowenamisiya. 27 Le au heseyei lu owane tereꞌe wou taꞌama. Lowe mi mi werese yo seni luwaru aꞌi towafi lowe lo ne, fe sipsip Owane Sitewi maꞌe au heseyei ne aine teraꞌeye. Sosu moꞌo lu taune yo seni luwaru aꞌi iroteye ape ne, lowe fe sipsip ta Owane Sitewi maꞌe au heseyei ne aine teraꞌeye. Ahowa, Jisas nowe taꞌi ta lu taune werese ne temeniyeyewe, topo le Owane Sitewi maꞌe au heseyei ne temeniyeye.g 28 Peri eite mo wiyeme pefine aꞌi ne. Moses lo yo peri lai lu tamo yo seni farere aꞌi iro taꞌama ape, au heseyei lu owane erasi aꞌi heneraiyei ne au ariariyeye. Ahowa, Owane Sitewi lai peri teꞌe naneiyei lo iyape lo kairefi aꞌi se au teꞌeye. Peri teꞌe naneiyei lo iroteye. Sosu Moses lo yo peri moꞌo henerai. Peri teꞌe naneiyei lo lai meni eime lo maꞌe au heseyei lo meni owane pefine aꞌi heneraiyei ne ariariyeye. Meni eime lo ape lai Owane Sitewi lo nihe se waraꞌi aꞌi mi mi pasi pasi weriyei ironamitorowa.