Jisas, au heseyei meni owane pefine aꞌi nomo lo ne.
8
Peri sitewi, nomo fene maꞌe au teꞌesiya ape apou au teꞌesiya. Nomo au heseyei lo meni owane pefine ironamisiya ape, siye soꞌoruwesiya. Le Owane Sitewi waraꞌi pefine aꞌi lo me tutoꞌu tutawe, omo hire sahe ironamisiya ape, eyate feni maꞌe onunamisiya. 2 Le au heseyei lo meni owane lo wiyawi, Owane Sitewi lo tewi wesi waraꞌi aꞌi sahe taꞌanenamisiya. Tewi wesi ape waraꞌi pefine aꞌi ne. Owe lu tamo lai wesi ape taꞌane taꞌame. Ahowa Owane Sitewi lai wesi ape taꞌaneye. 3 Au heseyei lu owane erasi werese, Owane Sitewi lai lowe etiri tamo, ayei tamo topo le maꞌe au heseyei ne ariariyeye. Serai au heseyei lo meni owane pefine aꞌi nomo lo, le etiri tamo Owane Sitewi maꞌe aiwawe aꞌi pei au hesere. 4 Hi awei sato au heseyei lu owane tomu neꞌese aꞌi irosiya. Lowe Moses lo yo peri werese tote umasinamisiyawe, etiri neri aꞌi apou ape tamo Owane Sitewi maꞌe au hesenamiteye. Serai Jisas hi awei sato iroteye su, le au heseyei lo meni owane ta henerai taꞌame. Ahowa, le Owane Sitewi lo omo hire sahe ironamisiya. Serai wiyawi lo ape tereꞌe taꞌanesiya. 5 Wiyawi ape hi awei sahe au heseyei lu owane taꞌaneteye ape, Owane Sitewi lo omo hire sahe irosiya wou ape hawese taꞌaneteye. Apou aiwawe aꞌi Moses lo wiyawi taꞌaneteye. Owane Sitewi le maꞌe omo Sainai sahe au teꞌeteye su, le Moses maꞌe apou eiye,“Ne taꞌuwe wesi ipari tahe se taꞌanere. Marepi ano, ane ne maꞌe au teꞌesiya ape, ne etiri werese se umasite.” Kis 25:40
6 Ahowa, pereye nowe eite se Owane Sitewi lai Jisas maꞌe wiyawi tereꞌe ta auwe. Wiyawi ape le irosiya ape, le wiyawi lowe lo ape mo hi ani ararowe. Sosu aiwawe aꞌi Owane Sitewi lo marepi heꞌi aꞌi ape Jisas lu taune werese maꞌe aitai ape, Owane Sitewi lo marepi heꞌi aꞌi lai Moses lo marepi weriyei hi ani ararowe. Piyene awere? Marepi heꞌi aꞌi lo sitewi apou aꞌi totesiya. Owane Sitewi lo peri teꞌe naneiyei ape wisere pefine aꞌi ne.a 7 Sosu marepi weriyei, Owane Sitewi tu naifa lu taune maꞌe auwe ape, wisere pefine aꞌi su, Owane Sitewi lai marepi heꞌi aꞌi lowe maꞌe aureme taꞌama. Ahowa, marepi weriyei ape ne, lu taune werese wanu umasirowata. Serai Owane Sitewi lai marepi heꞌi aꞌi lowe maꞌe auwe. 8 Ahowa, Owane Sitewi lai marepi weriyei luwaru aꞌi siye soꞌoruweye. Le lu taune werese lo, lo yo seni luwaru aꞌi amerame aꞌi siye soꞌoruweye. Serai le one towe lo sahe apou eiye,
“Ane Meni Owane Pefine aꞌi apou teꞌesiya. Nowe ta su henerairowa. Ane marepi heꞌi aꞌi Israel lo lu taune, sosu Juda lo lu taune maꞌe lese aurowa.
9 Marepi heꞌi aꞌi, ane lowe maꞌe lese aurowa ape, marepi weriyei ape, ane yaꞌariyei lowe lo maꞌe auwe ape, wou taꞌama. Nowe ape se ane ereti ano se omo pani Isip sahe hene taꞌuwetai su, marepi weriyei ano, ane lowe maꞌe auwe ape, lowe mi mi werese arisinamiteye. Serai ane lowe ne meꞌiyeni maꞌe atati aruteye.
10 Meni Owane Pefine aꞌi aiwawe aꞌi eiye. Nowe meꞌiye ta su, ane marepi heꞌi aꞌi Israel lo lu taune werese maꞌe lese aurowa. Ane yo peri werese ano marepi hepene lowe lo papu furowa. Sosu ane yo peri ano marepi lowe lo maꞌe au leserowa. Ane Owane Sitewi lowe lo henerairowawe, lowe lu tewi pefine aꞌi ano henerairowa.
11 Serene nowe ape se lowe lu tewi towafi lowe lo, sosu kaiyemo mo tereꞌe au teꞌe atuaturowata. Piyene awere? Lowe ane ne siye soꞌoruwerowa. Lu taune yahowaꞌi, sosu lu taune iyape se, lowe werese ane ne siye soꞌoruwerowa. Serai lowe peri eite apou teꞌe atuaturowata. ‘Fene Meni Owane Pefine aꞌi ne wanu soꞌoruwete.’
12 Ane yo seni luwaru aꞌi lowe lo au ani sasari pamowerowawe, etiri luwaru aꞌi lowe ironamiteye ape, ane mi mi pasi pasi weriyei etiri werese ape mo tote iꞌanerowa.” Jer 31:31-34
13 Peri eite se Owane Sitewi lai marepi heꞌi aꞌi lo ne teꞌesiya. Le marepi weriyei lo ape au luwaruwe poꞌuteye. Marepi werese weriyei niye papaꞌu wou aꞌi ne. Etiri ape mo witane aꞌi luwaruwe poꞌuterowa.