Au heseyei lu owane weriyei fe fisaꞌi au heseteye.
9
Sosu aꞌi pe Owane Sitewi marepi tutawe lo ape au leseye su, le Israel lo lu taune maꞌe apou eiye, “Fene ane ne au teꞌe wisereye nineꞌiyei su, fene yo peri ano fa umasite.” Sosu au heseyei meni owane ta ane ne au teꞌe nineꞌiyei ne taꞌaneyei su, fene marepi ano tote umasite. 2 Serai lowe taꞌuweyei wesi ipari tahe se Owane Sitewi ne au teꞌe nineꞌiteyei ne taꞌaneye. Taꞌuweyei wesi ape ponei sahe, lowe ipari tahe erasi aꞌi ta heriye. Tewi wesi hesi aꞌi iroteye. Tewi wesi tutawe iyape tewi wesi waraꞌi aꞌi ne. Tewi wesi ape sahe yehe erei ereti feni werese feni hesi aꞌi (7 aiwawe aꞌi) me teniwe yehe aiwawe wou ti metesiye ape, wari sahe fuwe. Sosu aiwawe aꞌi lowe metei wari ta wesi tewi ape sahe fuwe. Metei ape hire sahe lowe nau taꞌase Owane Sitewi maꞌe au heseteye.a 3 Sosu wesi tewi toꞌuresi ape, ipari tahe erasi aꞌi sahe heriye ape, lo iyape apou eiye, Wesi tewi Waraꞌi aꞌi Pefine aꞌi ne.b 4 Wesi tewi ape papu sahe wari ta irosiya. Lowe wari ape tapiye gol se ani napetu tawesiye. Wari ape sahe au heseyei lu owane tamo etiri heneri wisere aꞌi Owane Sitewi maꞌe au heseyei ne yehe ti meteye. Sosu aiwawe aꞌi omoto erasi ape iroteye. Omoto ape lai tapiye gol ani napetu tawesiye. Omoto ape papu sahe etiri hesi heta asiteye. Tapiye gol paꞌare ta nau taꞌase ape tu naifa weriyei Owane Sitewi omo hire maꞌe eimawe arosai. Sosu Aron lo me epi omoto ape papu asiteye. Me epi ape tu naifa weriyei motowe emi heꞌi peratirai. Sosu Owane Sitewi lo yo peri tapiye potu hesi aꞌi ape sahe leseye ape Moses maꞌe auwe ape, omoto ape papu sahe asiteye.c 5 Omoto ape hire sahe Owane Sitewi lo ipari hesi aꞌi haipi se, lowe nihari hepene hawowou lowesi lo taꞌaneye ape, fuwe. Ipari hesi aꞌi ape, lu taune maꞌe Owane Sitewi sato irosiya ape, au atuatuteye. Ipari hesi aꞌi lo haipi omoto ape tesi napetu tawesiteye. Me tutoꞌu ape sahe, Owane Sitewi onuteye ape, le lu taune lo yo seni luwaru aꞌi au sasariteyewe, lowe si tame ete hene aniye. Ahowa, nowe eite se ane fene maꞌe peri lo sitewi au teꞌerowata.d 6 Sosu etiri werese ape mo taꞌuweye wesi tewi hesi papu sato iroteye su, au heseyei lu owane lai mi mi werese wesi tewi tutawe papu wiyawi lowe lo taꞌaneyei ne wiye.e 7 Ahowa, au heseyei lo meni owane pefine aꞌi lai iyu menei taꞌi ta se poweiye taꞌi wesi tewi waraꞌi aꞌi papu wiye. Le wesi tewi waraꞌi aꞌi ape papu wiyei su, le fe bulmakau lo fisaꞌi Owane Sitewi maꞌe au heseyei ne aiti. Le fisaꞌi ape yo seni luwaru aꞌi topo lo ne Owane Sitewi maꞌe au heseyei ne au heserowa. Sosu moꞌo le lu taune werese lo yo seni luwaru aꞌi ape mo ne, lowe aiheiye aꞌi iroteyei ape, au heserowa.f 8 Ahowa, Owane Sitewi lo Hepene Waraꞌi aꞌi lai nomo maꞌe apou au teꞌe atuatu areiyesiya. Wesi tewi tutawe irosiya su, sosu au heseyei lu owane wesi tewi ape sahe wiyawi towafi lowe lo taꞌanesiya su, lu taune werese wesi tewi waraꞌi pefine aꞌi papu wirowata. 9 Au heseyei lu owane wiyawi lowe lo taꞌaneteye su, nomo peri anowe yaru pereye nowe eite se siyesiya. Ahowa, au heseyei lu owane etiri tamo, sosu fe sipsip ape mo Owane Sitewi maꞌe au heseteyei ne aine teraꞌeye su, etiri hesi ape mo lai marepi hepene nomo lo aseyaro aꞌi au henerairowata.g 10 Etiri ape mo ne, ayei tamo nomo ene ateye ape, saꞌi ene nomo ayei ene ateye ape, sosu tahe paꞌare nomo lo, nomo saꞌi se au huteye apou ape, etiri ape mo yo peri tamo umasiteye. Ahowa, lowe yo peri ape mo tote umasiteye su, lowe tahe paꞌare lowe lo aꞌi ne iroteye. Serai Owane Sitewi etiri werese heꞌi aꞌi aurowa su, etiri weriyei ape mo poꞌuteyei.Krais Jisas fisaꞌi topo lo Owane Sitewi maꞌe au heseye.
11 Ahowa, Meni Owane Krais au heseyei lo meni Owane pefine aꞌi henerai. Le nomo maꞌe etiri werese wisere aꞌi hi awei sahe, auwei ne fai. Taꞌuweyei wesi ape sahe, le wiyawi lo taꞌanesiya ape, taꞌuweyei wesi ape wisere pefine aꞌi tene. Owe lu tamo taꞌuweyei wesi ape taꞌane taꞌame. Taꞌuweyei wesi ape hi awei sahe iro te taꞌame. Ahowa, taꞌuwe wesi ape omo hire sahe ironamisiya. 12 Serai Krais taꞌuweyei wesi tewi tutawe ape nowe taꞌi ta se aweraꞌiyenatiyewe, Wesi Tewi Waraꞌi Pefine aꞌi papu wiye su, le fe meme, fe bulmakau lo fisaꞌi se Wesi Tewi Waraꞌi aꞌi Owane Sitewi maꞌe au heseyei ne wi taꞌame. Ahowa, le fisaꞌi topo lo se nomo ne au heseyei ne wiye. Serai le nomo ne si tame ete hene aniyewe, nomo maꞌe marepi hepene norohuwe heꞌi aꞌi mi mi pasi pasi weriyei ironamitorowa ape, auwe. 13 Sosu lu taune yo seni luwaru aꞌi ironamiteye su, yo seni lowe lo Owane Sitewi lo nihe se unou aꞌi ironamiteye. Serai lowe, yo seni unou aꞌi iroteye ape ne, au heseyei lu owane maꞌe fai. Au heseyei lu owane tamo fe bulmakau lo yene aine touwewe, yehe lei seroꞌowe. Lowe fe yene ape yehe yesi paremi sahe fe meme, fe bulmakau aite lo fisaꞌi mase taꞌuwe ani apariye. Lowe fisaꞌi sosu yesi paremi ani apariye su, lowe lu taune hire maꞌe ani teroso ereye. Serai yesi paremi fisaꞌi ape lai yo seni luwaru aꞌi lowe lo, iroteye ape, ani napetu tawesiteye. Ahowa, marepi lowe lo unou aꞌi ironamiteye.h 14 Serene Meni Owane Krais temeniyeye su, fisaꞌi topo lo ape ani teroso arosai. Krais yo seni luwaru aꞌi werese iro taꞌame. Serai le fe bulmakau aite ta aine teraꞌe taꞌame, sosu fisaꞌi lo Owane Sitewi maꞌe au hese taꞌame. Ahowa, Owane Sitewi lo Hepene Waraꞌi aꞌi mi mi pasi pasi ironamitorowa ape, le Krais au kairefiyeteye. Serai Krais me tapeꞌi sahe temeniyeye su, le fisaꞌi topo lo Owane Sitewi maꞌe au heseye. Au heseyei lo ape wisere pefine aꞌi tene! Tu naifa weriyei nomo fe bulmakau aite tamo Owane Sitewi maꞌe au hesenamiteye. Ahowa, fe bulmakau aite lo fisaꞌi marepi luwaru aꞌi nomo lo au sasari pamowerowata. Ahowa, Krais temeniyeye su, fisaꞌi lo marepi luwaru aꞌi nomo lo au hu sasari pamowenamiteye. Sosu marepi nomo lo Owane Sitewi lo nihe se waraꞌi aꞌi ironamitorowa. Serai Owane Sitewi, mi mi pasi pasi ironamisiya ape ne, nomo marepi werese lo tote umasinamitorowa.i
Krais lo fisaꞌi Owane Sitewi lo marepi heꞌi aꞌi au kairefiyeye.
15 Sosu nomo yo seni luwaru aꞌi ironamisiya su, Owane Sitewi lo marepi weriyei yo seni luwaru aꞌi nomo lo au sasari pamowerowata. Sosu nomo werese Owane Sitewi lo marepi weriyei unahi iroteye ape, nomo marepi unou aꞌi ironamiteye. Serai Krais lai apou toteye. “Ane lu taune lo yo seni luwaru aꞌi au sasari poꞌuteyei ne totesiya.” Serai le me tapeꞌi sahe temeniyeye su, le Owane Sitewi lo marepi heꞌi aꞌi, au iro henerai. Lu taune werese, Owane Sitewi au teꞌe ariariyeye ape, lowe marepi hepene norohuwe heꞌi aꞌi le lowe maꞌe au teꞌe naneiye ape, anirowa. Serai Krais temeniyeye su, le nomo ne ete hene aniyewe, nomo maꞌe marepi hepene norohuwe heꞌi aꞌi mi mi pasi pasi weriyei ironamitorowa ape auwe. Sosu lowe lu taune waraꞌi aꞌi Owane Sitewi lo nihe se ironamitorowa.
16-17 Fene etiri iyami lo one towe ne totere. Meni ta, marepi hepene norohuwe irosiya ape, le etiri werese topo lo ne one towe sahe fa lesere. Sosu meni ape temeniyeyei su, etiri iyami werese lo ape mo lu taune iyape one towe sahe leseye ape, lowe anirowa. Ahowa, meni ape temeniyeye su, lowe one towe ape marepi topo lo fa umasire. Serai lowe etiri iyami aniyei ne toteyei su, lowe meni ape wiyeme aꞌi temeniyeyei ne au atuaturowa. 18 Serene tu naifa weriyei apou aiwawe aꞌi. Moses fe sipsip ta aine teraꞌeteyewe, fisaꞌi lowe lo se Owane Sitewi maꞌe au heseteye. Serai fe sipsip ape mo temeniyeye su, Owane Sitewi lo marepi weriyei wiyeme pefine aꞌi henerai. 19 Tutawe, meni Moses Owane Sitewi lo yo peri werese, one towe sahe leseye ape, lu taune werese maꞌe au teꞌe fiyari areiyeye. Sosu moꞌo le fe bulmakau lo yene tamo, fe meme tamo lo fisaꞌi, saꞌi waraꞌi aꞌi mase ani awetowe. Sosu le me nei oso ta, iyape hisop, aniyewe, wafei ta farufaru aꞌi se ti tawesiteye. Sosu le me hisop aniyewe, fisaꞌi ape sahe ani aporu aniteyewe, lu taune sosu Owane Sitewi lo yo peri one towe ape sahe ani teroso ereteye. 20 Sosu le apou eiye,
“Fisaꞌi ape lai Owane Sitewi lo marepi au kairefiyesiya. Serai yo peri werese Owane Sitewi, fene maꞌe au teꞌeteye ape, fene yo peri werese fa umasite.” Kis 24:6-8
21 Sosu aiwawe aꞌi meni Moses fisaꞌi ape aniyewe, taꞌuweyei wesi ape hire ani teroso arowe. Sosu etiri siye awe werese, wesi ape sahe iroteye ape, lowe Owane Sitewi maꞌe au wisereye nineꞌiteye ape, le etiri werese ape mo sahe fisaꞌi ani teroso arowe.j 22 Wiyeme aꞌi tene! Sosu Owane Sitewi lo yo peri apou teꞌeye, “Fisaꞌi lai etiri werese aseyaroweye. Serai fisaꞌi ape ani teroso arowe su, Owane Sitewi lai yo seni luwaru aꞌi tote iꞌane arunati.”k
Krais lo au heseyei ape yo seni luwaru aꞌi ani sasari poꞌutesiya.
23 Wesi ape ipari tahe taꞌaneteye ape, sosu etiri werese papu irosiya ape mo, ane tu teꞌeye ape, lowe etiri pefine ape mo omo niꞌarawe hire sahe irosiya ape, hawese iroteye. Etiri werese hi awei sato irosiya ape mo, lowe fisaꞌi se au hu aseyaroweteye. Ahowa, etiri pefine ape mo omo niꞌarawe hire sahe irosiya ape, fe bulmakau lo yene lo fisaꞌi lai au hu aseyarowerowata. Ahowa, Owane Sitewi lai etiri wisere pefine aꞌi etiri ape mo fa au hu aseyarowete.l 24 Sosu hi awei sahe wesi tewi waraꞌi pefine aꞌi, taꞌuweyei wesi papu irosiya ape, lu tamo lai wesi tewi waraꞌi pefine aꞌi ape, omo niꞌarawe hire yaro irosiya ape, wou hawese taꞌaneye. Meni Krais lai wesi tewi ape wi taꞌame. Ahowa, wesi tewi waraꞌi pefine aꞌi omo niꞌarawe hire yaro ironamisiya ape, le lai wiye. Nowe pereye eite se le Owane Sitewi lo metete nihari sahe teinamisiyawe, nomo ne ei towerinamisiya. 25 Juda lo au heseyei meni owane pefine aꞌi lai Wesi Tewi Waraꞌi Pefine aꞌi, awei sahe irosiya ape, iyu menei ta lo nowe poweiye taꞌi ta se wiye. Le fe lo fisaꞌi wesi tewi papu ereti se aniteyewe, Owane Sitewi maꞌe au heseyei ne wiye. Ahowa, Krais lai fisaꞌi topo lo ape Owane Sitewi maꞌe nowe taꞌi aꞌi se au heseyei ne wiye. Le nowe tomu neꞌese au hese taꞌame. 26 Ei, wiyeme aꞌi ne. Le au heseyei lu owane lo marepi aiwawe aꞌi umasi taꞌame. Le nowe tomu neꞌese aꞌi fofowei erasi terite taꞌame. Ei. Le tu naifa weriyei nowe sitewi ape Owane Sitewi awei etiri werese taꞌaneye ape, sosu pereye nowe eite se le fofowei erasi aꞌi terite taꞌame. Ahowa, pereye nowe eite se, sosu nowe yeꞌewi ataheyeraiwa su, le hi awei maꞌe nowe taꞌi aꞌi se fisaꞌi topo lo Owane Sitewi maꞌe au heseyei ne itoraiyewe, yo seni luwaru werese aꞌi au sasari pamoweye.m 27-28 Lu taune werese nowe taꞌi ta se temeniyerowa. Sosu moꞌo lowe taꞌi taꞌi aꞌi temeniyerowa su, Owane Sitewi lai yo seni luwaru aꞌi lowe lo au hese ereirowa. Sosu apou aiwawe aꞌi Krais lai fisaꞌi topo lo me tapeꞌi sahe nowe taꞌi aꞌi se Owane Sitewi maꞌe au heseyei ne temeniyeye. Le temeniyeye su, le lu taune tomu neꞌese lo yo seni luwaru aꞌi au ani sasari pamoweye. Sosu meꞌiye su, le nowe toꞌuresi se si tame itorairowa. Le lai lu taune, le ne ninawenamirowa ape, hene anirowa. Nowe ape se le yo seni luwaru aꞌi nomo lo si tame au ani sasariyei ne itorairowata. Ahowa, le nomo omo hire maꞌe hene ani wiyei ne itorairowa.