Au heseyei ape mo lai yo seni luwaru aꞌi au sasarirowata.
10
Juda lo yo peri werese, poweiye sahe siyesiya ape, hawowou apou wou aꞌi ne. Nomo etiri ape amerame aꞌi siye areiye taꞌame. Etiri wisere aꞌi Krais lu taune maꞌe auwe ape, etiri werese ape mo wiyeme pefine aꞌi ne. Lowe hawowou ta iro taꞌame. Ahowa, au heseyei lu owane lai fe apou ape iyu menei weriyei Owane Sitewi maꞌe au hesenamiteye. Serai lowe yo peri ape umasinamiteyei su, lu taune lai au heseyei ape Owane Sitewi maꞌe aiyeyei ne totesiya ape, Owane Sitewi lo nihe se aseyaro aꞌi iro henerairowata. 2 Ahowa, lu taune, Owane Sitewi maꞌe au wisere nineꞌisiya ape mo, Krais lai yo seni luwaru aꞌi lowe lo au ani sasari pamoweyewe, sosu lowe Owane Sitewi lo nihe se waraꞌi aꞌi henerai su, lowe mi mi weriyei yo seni luwaru aꞌi ne marepi orese aꞌi terite taꞌame. Serai au heseyei lo marepi ape Owane Sitewi maꞌe au heseteye ape tepaꞌasi poꞌutenamirowa. 3 Ahowa, lu taune iyu menei taꞌi taꞌi aꞌi fe apou ape Owane Sitewi maꞌe au heseyei ne hene aitaisiya. Piyene awere? Lowe apou totesiya, “Iyu menei werese nomo yo seni luwaru aꞌi ironamisiya.” 4 Fe bulmakau aite, fe meme lo fisaꞌi, Owane Sitewi maꞌe au hesenamiteye ape, fisaꞌi lowe lo ape yo seni luwaru aꞌi au ani sasari pamowerowata.a5 Serene meni Krais tu naifa hi awei sahe nowe ataheye itorai su, le Owane Sitewi maꞌe apou eiye,
“Lu taune tamo fe ape mo aine teraꞌeye ape, sosu etiri tereꞌe tereꞌe au heseye ape, au heseyei lowe lo ape ne, ne lowe ne marepi no tote wisereye wou taꞌama. Ahowa, ne tahe paꞌare ta ane ne au taꞌuwe taꞌane naneiye. Serai ane tahe paꞌare topo ano ne maꞌe au heserowa.
6 Lowe fe werese ape mo, tapiye wari sahe au heseteye ape, yehe tiseroꞌo poꞌuteye. Sosu etiri tereꞌe tereꞌe tamo ne maꞌe au heseyei su, lowe apou toteye. Nomo etiri ape mo Owane Sitewi maꞌe au heseyei su, le yo seni luwaru aꞌi nomo lo au ani sasari pamowerowa. Ahowa, ne lai lowe ne marepi wisere nineꞌi tote taꞌame.
7 Sosu ane le maꞌe eiye, ‘Owane Sitewi ano, ane sato ahe irosiya. Ane marepi werese no umasinamirowa. Peri werese, ane ne, yo peri lo one towe no sahe leseteye ape, ane wanu umasinamirowa.’” Sng 40:6-8
8 Peri tutawe lo ape ne, Krais apou eiye, “Lowe fe ape mo ne maꞌe au heseyei su, ne lai siyeyei wou taꞌama. Lowe etiri tereꞌe tereꞌe tamo ne maꞌe au heseyei su, ne lowe ne nineꞌi taꞌame. Sosu aiwawe aꞌi lowe fe werese tamo tapiye wari sahe yo seni luwaru aꞌi lowe lo au ani sasariyei ne yehe ti seroꞌo poꞌuteye su, ne lowe ne nineꞌi taꞌame.” Le peri ape teꞌeye su, le etiri ape siye soꞌoruweye. Lowe etiri apou ape mo Owane Sitewi maꞌe au heseyei su, lowe yo peri werese tote umasiyei ne totesiya. 9 Sosu Krais apou eiye, “Owane Sitewi ano, Ane sato ahe irosiya. Ane marepi werese no tote umasinamirowa.” Serai Owane Sitewi lai fe lo au heseyei werese aꞌi ani sasari poꞌuteye. Serai le Jisas lo au heseyei ape yaru ape sahe au fuwe. 10 Piyene awere? Owane Sitewi lo marepi werese ne, Jisas Krais lai Owane Sitewi lo marepi werese aꞌi tote umasinamiteye. Serai Jisas me tapeꞌi sahe temeniyeye su, le nowe taꞌi aꞌi se tahe paꞌare topo lo Owane Sitewi maꞌe yo seni luwaru werese nomo lo ne au heseye. Serai nomo Owane Sitewi lo nihe se lu taune waraꞌi aꞌi henerai.b
11 Juda lo au heseyei lu owane werese ape mo, lowe mi mi werese wiyawi towafi lowe lo tei taꞌanenamisiya. Sosu le fe ape mo nowe tomu neꞌese se Owane Sitewi maꞌe au hesenamiteye. Ahowa, au heseyei ape mo, Owane Sitewi maꞌe au heseteye ape, au heseyei ape lai yo seni luwaru aꞌi au ani sasarisawirowata.c 12 Ahowa, Krais lai au heseyei taꞌi aꞌi Owane Sitewi maꞌe yo seni luwaru aꞌi ne au heseye. Le tahe paꞌare topo lo ape Owane Sitewi maꞌe au heseye su, au heseyei lo ape mi mi pasi pasi weriyei ironamitorowa. Sosu moꞌo le Owane Sitewi lo ereti eyate feni maꞌe onunamiteye. 13 Le Owane Sitewi lo eyate feni maꞌe onu ninawenamisiya. Owane Sitewi lai airame lu werese lo hi ani ararorowawe, lowe le unahi fu tawesirowa. Apou aiwawe aꞌi meni ta lowe topo lo me tutoꞌu oso aꞌi hire sahe fu tawesiye.d 14 Serai Jisas lai tahe paꞌare topo lo Owane Sitewi maꞌe nowe taꞌi aꞌi se au heseye su, lu taune, le ne tote tawesiteye ape, le yo seni luwaru aꞌi lowe lo au ani sasarisawi pamoweye. Serai lowe mi mi pasi pasi weriyei Owane Sitewi lo nihe se lu taune waraꞌi pefine aꞌi henerairowa.
15-17 Sosu aꞌi pe Owane Sitewi lo Hepene waraꞌi aꞌi lai nomo maꞌe peri wiyeme aꞌi ape au teꞌe atuatu areiyeye. Tutawe le Owane Sitewi lo one towe sahe apou eiye,
“Meni Owane pefine aꞌi apou eisiya, nowe meꞌiye ta su, ane lu taune maꞌe peri teꞌe naneiyei ta au teꞌe naneiyei. Ane yo peri pefine aꞌi ano lirewawe lowe lo sahe leserowa. Sosu yo peri ano marepi lowe lo sahe leserowa.” Jer 31:33
Sosu le peri tereꞌe ta apou eiye,
“Ane yo seni luwaru aꞌi lowe lo, sosu marepi luwaru aꞌi lowe lo mi mi pasi pasi weriyei tote iꞌanenamirowa.” Jer 31:34
18 Serai le lu taune werese lo yo seni luwaru aꞌi tote iꞌane arunati poꞌuteye su, au heseyei tereꞌe ta yo seni luwaru aꞌi au ani sasariyei ne tame au heserowata.
Nomo Owane Sitewi maꞌe ataheyeriyei.
19 Sosu aꞌi pe, kaiyemo mo ano, Jisas me tapeꞌi sahe temeniyeye su, le ipari tahe taꞌuweyei wesi ponei heriye ape ani erauwiye. Serai nomo wesi tewi waraꞌi pefine aꞌi ape, Owane Sitewi onunamisiya ape, papu faraꞌu winamitorowa. Nowe weriyei weriyei amou taꞌama.e 20 Wiyeme aꞌi tene! Le me tapeꞌi sahe temeniyeye su, le ipari tahe wesi tewi ponei sahe heriye ape ani toso erauwiye. Le ipari tahe ape ani toso erauwiye su, le yo heꞌi ani tosowe. Nomo yo heꞌi aꞌi ape umasiyei su, nomo marepi momotei fetane aꞌi ironamitorowa.f 21 Au heseyei lo meni owane erasi pefine aꞌi ape lai Owane Sitewi lo lu taune werese omo niꞌarawe hire sahe au noweinoweinamirowa. Le nomo ne au noweinoweinamirowa. 22 Piyene awere? Krais lai marepi lo orese luwaru aꞌi nomo lo au aseyaroweye. Le tote tawesiyei nomo lo au kairefiyeteye. Sosu marepi nomo lo wisere pefine aꞌi ne. Sosu aiwawe aꞌi tahe paꞌare nomo lo, le lai saꞌi waraꞌi aꞌi wou au huteye. Serai nomo Owane Sitewi lo nihe se lu taune waraꞌi aꞌi henerai su, nomo Owane Sitewi maꞌe pei ataheyerite.g
23 Owane Sitewi peri teꞌe naneiyei ta au teꞌeye su, peri teꞌe naneiyei ape wiyeme pefine aꞌi henerairowa. Serai le nomo maꞌe etiri wisere aꞌi tamo au teꞌe naneiye su, nomo peri teꞌe naneiyei lo ape mo tote iꞌanerowata. Peri teꞌe naneiyei lo werese ape mo, nomo lu taune tereꞌe maꞌe au teꞌeteye ape ne, nomo ninawenamisiya. 24 Serai nomo lu taune werese ne marepi erasi aꞌi pei tote eti tiyatinamite. Nomo lowe maꞌe au feraferei tiyatite. Nomo lowe maꞌe pei tote wawesiyenamite. Sosu lowe maꞌe wiyawi wisere aꞌi taꞌanete. 25 Lu taune tamo lai lu taune tereꞌe mase taꞌuweyei ne taꞌoresiya. Serai nomo yo seni lowe lo owe ape umasite. Ahowa, nomo lu taune tiyati mase taꞌuwenamite. Serai fene nowe ape se meni Owane Jisas si tame itoraiyei ne ataheyesiya ape, siye soꞌoruwesiya su, nomo lu taune marepi erasi aꞌi au tote wisereye tiyatite.h
Nomo Krais ne meꞌiyeni maꞌe owe ape atati arunatite.
26 Wanure! Lu tamo Krais lo peri pefine aꞌi nomo maꞌe au teꞌe areiyeye su, nomo peri pefine aꞌi ape wanu ani tepaꞌasiye. Peri eite wiyeme aꞌi su, nowe meꞌiye su, nomo marepi weriyei nomo lo tote umasirowawe, yo seni luwaru aꞌi ironamiteyei. Owe etiri tereꞌe ta se yo seni luwaru aꞌi nomo lo au ani sasarisawirowata.i 27 Ahowa, nomo Krais lo tote tawesiyei meꞌiyeni maꞌe atati arunatiyei su, nomo nowe ape se Owane Sitewi lai yo seni luwaru aꞌi au hese ereirowa ape, atoweiye ninawenamirowa. Sosu aiwawe aꞌi nomo yehe erasi kairefi pefine aꞌi, Owane Sitewi lo airame lu taune ape mo itomuwei ape, ninawesiya.j 28 Fene wanu soꞌoruwesiya. Meni ta Moses lo yo peri arisiyei su, meni owane ta le etiyei. Lu hesi, lu hesi heta meni ape yo peri arisiye ape siye soꞌoruweyei su, meni owane ape le maꞌe eiyei, “Ne Moses lo yo peri arisiye. Serai ne temeniyerowa.” Meni owane ape lai meni ape au feraferei atuaturowata. Sosu le meni ape fa aine teraꞌeyei ne eimaweyei.k 29 Sosu fene piye totesiya awere? Meni ta Owane Sitewi lo meni eime maꞌe ai marepi totenamirowawe, le maꞌe meꞌiyeni atati arunatiyei. Le Owane Sitewi lo marepi heꞌi aꞌi hi au ani ararowei. Le Jisas lo fisaꞌi ne peri luwaru aꞌi au teꞌe naruwei. Fene meni apou ape ne piye totesiya awere? Sosu le Owane Sitewi lo Hepene Waraꞌi aꞌi lu taune maꞌe au ferafereiyei ape au teꞌe naruteyei su, fene le ne piye totesiya awere? Lu taune ape mo yo seni apou ape irowei su, Owane Sitewi lai lowe maꞌe fofowei erasi wiyeme pefine aꞌi aunamirowa.l 30 Nomo etiri ape siye soꞌoruwe tepaꞌasiye. Owane Sitewi lai apou eiye,
“Lu taune ane maꞌe yo seni luwaru aꞌi irowei su, ane etiri luwaru aꞌi lowe maꞌe itiyaꞌu aurowa.” Lo 32:35
Le peri tereꞌe apou eiye,
“Owane Sitewi lai lu taune topo lo maꞌe au hese ereirowa.” Lo 32:36; Sng 135:14
31 Owane Sitewi norohuwe kairefi aꞌi mi mi pasi pasi weriyei ironamitorowa ape, le nomo werese au hese ereirowa su, le nomo maꞌe etiri luwaru aꞌi itiyaꞌu aurowa. Serai nomo le ne aꞌi pei atoweiye ninawenamite. Etiri ape luwaru aꞌi tene!
Owane Sitewi ne tote tawesiyei nomo lo tei kairefiyete!
32 Nowe tu naifa lu tamo fene maꞌe au luwaruweye. Sosu fene Owane Sitewi lo peri wanu tote tawesi umasiye su, fene marepi orese tomu neꞌese teriteteye. Ahowa, fene marepi orese aꞌi ape mo hi ani araronamiteye. 33 Lu taune tamo fene maꞌe nepawe amerame aꞌi sahe au teꞌe naruteye. Lowe meꞌiyeni fene lo maꞌe wafei se aine nateye. Nowe tereꞌe tamo se, lowe lu taune tereꞌe au luwaruweye su, fene fofowei lowe lo ape aiwawe aꞌi teriteyei ne naneiteye. 34 Lowe lu taune tamo kalabus wesi maꞌe hene arunari su, fene orese fofowei lowe lo aiwawe aꞌi teriteteye. Lowe etiri werese fene lo taꞌarei aniye su, fene marepi orese aꞌi terite taꞌame. Ahowa, marepi fene lo nineꞌi wisereyeye. Piyene awere? Fene etiri ta soꞌoruwesiya! Sosu etiri werese ape mo Krais fene maꞌe au teꞌe naneiye ape, awei lo etiri werese hi ani araronamisiya. Lowe mi mi pasi pasi weriyei ironamitorowa.m 35 Serai fene tei kairefiyete. Fene mi mi weriyei kairefiyeyei su, Owane Sitewi lai fene maꞌe etiri wisere pefine aꞌi aurowa. 36 Fene le ne marepi eresene momotei aꞌi tei kairefiyenamite. Fene le ne marepi eresene momotei aꞌi ninawenamiyei su, fene faraꞌu Owane Sitewi lo marepi tote umasirowa. Sosu fene etiri werese le fene maꞌe au teꞌe naneiye ape, anirowa.
37 Wiyeme aꞌi ne! Owane Sitewi lo one towe sahe apou teꞌesiya,
“Nowe oso aꞌi su le si tame itorairowa. Ahowa, le witane aꞌi si itorairowa.
38 Ahowa, lu taune aseyaro aꞌi ano ape ne, lowe ane ne tote tawesirowa. Lowe marepi ano mi mi weriyei tote umasinamitorowa. Sosu lowe taꞌi taꞌi aꞌi marepi weriyei lowe lo ape si atati tote anirowa su, ane aꞌi lai lowe maꞌe ai marepi totenamirowa.” Hab 2:3-4
39 Nomo werese lai marepi weriyei towafi nomo lo ape si atati tote umasirowata. Sosu nomo mi mi pasi pasi weriyei temeniyerowata. Ahowa, nomo le ne tote tawesiyewe, nomo etiri ape soꞌoruwesiya. Le nomo mi mi pasi pasi weriyei marepi hepene heꞌi aꞌi aurowa.