4 Sosu aꞌi pe meni Abel Owane Sitewi ne tote tawesiyewe, le maꞌe au heseyei wisere aꞌi ape au heseye. Meni Kein lai au heseyei tereꞌe lo ape Owane Sitewi maꞌe au heseye su, Owane Sitewi lai Kein lo au heseyei ape ne nineꞌi taꞌame. Abel Owane Sitewi ne tote tawesiye su, le Owane Sitewi lo nihe se meni waraꞌi aꞌi iroteye. Piyene awere? Owane Sitewi lai au heseyei lo ape siyeye su, le le ne tote nineꞌiteye. Nowe meꞌiye su, le temeniyeye. Nomo Abel lo tote tawesiyei ape siye soꞌoruwesiya su, tote tawesiyei lo lai nomo maꞌe tote tawesiyei lo sitewi pefine aꞌi au teꞌe atuatusiya.^c 5 Meni Enok Owane Sitewi ne tote tawesi umasinamiteye Le temeniye taꞌame. Ahowa, Owane Sitewi lai le tahe paꞌare se omo niꞌarawe hire lo maꞌe hene wiye. Lu tamo le ne nehiteye su, owe lu tamo le siye taꞌame. Piyene awere? Owane Sitewi lo one towe sahe apou teꞌesiya. “Meni Enok hi awei sahe iroteye su, Owane Sitewi lai tote tawesiyei lo siyeyewe, le ne marepi erasi aꞌi tote nineꞌiteye.”^d 6 Meni ta, menitani ta Owane Sitewi ne tote tawesi taꞌame su, Owane Sitewi lai lowe ne tote wisereye nineꞌirowata. Lu taune tamo Owane Sitewi maꞌe aiyeyei ne toteyei su, lowe etiri hesi aꞌi pei tote tawesire. Tutawe, Owane Sitewi mi mi pasi pasi weriyei ironamitorowa. Sosu toꞌuresi lowe le maꞌe aiyerowa su, le lowe ne au nineꞌirowa. 7 Meni Noa Owane Sitewi lo peri orese aꞌi ta nowe meꞌiye henerairowa ape, wanuwe. Le etiri ape, lowe maꞌe henerairowa ape, siye taꞌame. Ahowa, le Owane Sitewi lo peri wanu umasiteyewe, wai wesi erasi ta taꞌaneye. Nohuweripi awaripi wai wesi ape papu wiye. Le Owane Sitewi ne tote tawesiye su, lowe nohuweripi awaripi wisere aꞌi wai wesi papu iroteye. Lowe wai wesi ape papu wiye su, Owane Sitewi lai lu taune werese au hese ereiyewe, lu taune etiri werese saꞌi se atenise temeniye poꞌuteye. Serai meni Noa Owane Sitewi ne tote tawesinamiye su, le Owane Sitewi lo nihe se meni farere aꞌi ironamiteye.^e

8 Owane Sitewi lai meni Abraham ei aniyewe, le maꞌe eiye, “Ane ne maꞌe omo pani tereꞌe ta aurowa. Ne sinerowawe, omo pani ape maꞌe, ane ne maꞌe teꞌe naneiye ape, ire.” Serai Abraham Owane Sitewi ne tote tawesiyewe, omo sitewi lo ape arunati. Le omo pani heꞌi ape, le iteyei ape, soꞌoru taꞌama. Ahowa, le omo pani ape iteye^f 9 Le omo pani ape Owane Sitewi le maꞌe au teꞌe naneiye ape henerai su, le wesi ta ipari tahe se taꞌaneye. Wesi ape sahe, le howeinamiteye. Le omo pani sahe iroteye su, le meni ta omo pani tereꞌe maꞌe fai ape, wou aꞌi ne. Aiwawe aꞌi Abraham lo meni eime Aisak, sosu eime auwe lo, Jekop, lowesi aiwawe aꞌi Owane Sitewi lo peri teꞌe naneiyei ape wanu aniye. Lowesi wesi towafi lowesi lo, ipari tahe se taꞌaneye ape, howeiteye.^g 10 Sosu Owane Sitewi lai apou eiye, “Nowe meꞌiye su ane omo weniyei erasi aꞌi ta mi mi pasi pasi tei kairefiyenamiteyei ape, taꞌaneyei ne toterowa.” Serai Abraham omo weniyei ape sahe, le iroteyei ape, ninawenamiteye.

11 Sosu aꞌi pe Owane Sitewi lai meni Abraham maꞌe peri teꞌe naneiyei ape au teꞌeye, “Ne lu tewi tomu neꞌese lo yaꞌariyei sitewi henerairowa.” Abraham sosu tani lo Sara, nohuwe hesi ape naiheyeye. Sara, menitani waiyari aꞌi ne. Ahowa, Abraham Owane Sitewi ne tote tawesiyewe, le meni eime ape lo aite henerai. Owane Sitewi lai le maꞌe peri teꞌe naneiye su, Abraham le ne tote tawesiye. Peri teꞌe naneiyei lo ape wiyeme aꞌi henerairowa.^h 12 Meni Abraham naiheyeyewe, temeniye ataheyeye. Ahowa, le lu taune tomu neꞌese lo yaꞌariyei sitewi henerai. Eimane werese lo tomu neꞌese erasi aꞌi henerairowa. Lowe eiwariyemi werese wou nawiterowa. Eneri, saꞌi tewiye sahe irosiya ape, wou aiwawe aꞌi ne.ⁱ

13 Sosu aꞌi pe lu taune ape mo lowe Owane Sitewi ne tote tawesinamiteye. Peri teꞌe naneiyei werese lo, le lowe maꞌe au teꞌe naneiye ape, le etiri ape mo ne wiyeme pefine aꞌi au iro henerairowa. Lowe hi awei sato iroteye su, lowe etiri ape mo Owane Sitewi lowe maꞌe teꞌe naneiye ape, ani te taꞌame. Ahowa, lowe etiri werese ape mo eyeri yaro siyeteye su, marepi lowe lo tote wisereye nineꞌiteye. Sosu moꞌo lowe taꞌi taꞌi aꞌi temeniyeye. Lowe lu taune werese maꞌe apou teꞌe areiyeye. “Nomo hi awei sato ipari lu taune wou aꞌi irosiya.” Sosu moꞌo lowe taꞌi taꞌi aꞌi temeniyeye^j 14 Lu taune ape mo apou au teꞌesiya su, “Nomo lu taune omo pani eyeri maꞌe fai ape, wou tapei irosiya.” Lowe peri ape au teꞌeye su, lowe apou toteye, “Nomo omo pani towafi nomo lo siye nehinamisiya.” 15 Lowe omo pani sitewi lowe lo ape ne erasi aꞌi tote taꞌame. Ahowa, lowe omo pani sitewi ape ne marepi erasi aꞌi totenamiteye su, lowe omo pani sitewi towafi lowe lo ape maꞌe si tame irowa. 16 Ahowa, etiri ape pefine aꞌi ne. Omo pani heꞌi wisere pefine aꞌi ape ne, lowe erasi aꞌi totenamiteye. Omo pani niꞌarawe hire sahe irosiya. Serai lowe Owane Sitewi maꞌe apou au teꞌeye su, “Ne aꞌi lai Owane Sitewi nomo lo ne.” Ahowa, le lowe ne neritaseye taꞌame. Piyene awere? Le lai lowe ne omo weniyei erasi ta au taꞌane naneiye.

17-18 Sosu aꞌi pe Owane Sitewi lai Abraham lo tote tawesiyei siyeyei ne toteye. Sosu le maꞌe apou eiye,

20 Sosu aꞌi pe meni Aisak eimane hesi Jekop, sosu Iso peri wisere aꞌi teꞌe naneiyei ne toteye su, le Owane Sitewi ne tote tawesinamiteye. Peri teꞌe naneiyei lo lowesi maꞌe nowe meꞌiye su wiyeme aꞌi henerairowa.^l 21 Meni Jekop temeniyeye ne ataheyeye su, le Owane Sitewi ne tote tawesinamiteye.

23 Meni Moses lo mai le auteiye su, Isip lo meni owane tutawe ape yo peri ape apou eiye, “Israel lo taune werese eimane auteiyei su, fene lu wenei eimane werese aine teraꞌete.” Sosu Moses lo mai le auteiye su, nohuwe hesi apou toteye, “Meni eime notosi lo, lo nihari wisere pefine aꞌi ne. Lowe le owe ape aine teraꞌere.” Notosi meni owane tutawe lo peri ape ne atoweiye taꞌame. Serene lowesi meni owane tutawe ape lo yo peri tote arisiyewe, lowesi Owane Sitewi ne tote tawesiteye. Le aꞌi lai meni eime lowesi lo au noweinoweinamiteye.^o 24 Sosu meni Moses meni erasi aꞌi henerai su, le Owane Sitewi ne tote tawesiteye. Le lu taune werese maꞌe apou eiye, “Fene ane ne meni owane tutawe lo eime taune lo meni eime owe ape eire.” 25 Le apou toteye, “Ane yo seni luwaru aꞌi lowe lo umasirowata. Lowe yo seni luwaru aꞌi ironamisiya su, marepi lowe lo oso poꞌo aꞌi terite nineꞌisiya. Serai ane yo seni luwaru aꞌi lowe lo arunatirowawe, Owane Sitewi lo lu tewi mase ironamirowa. Ahowa! Ane fofowei lowe lo aiwawe aꞌi teritenamirowa.” 26 Le apou toteye, “Krais, Owane Sitewi ariariyeye ape, le fofowei erasi aꞌi teriterowa. Serai ane yaru lo sahe fofowei erasi aꞌi faraꞌu teriterowa. Etiri wisere werese aꞌi, Isip lo meni owane tutawe ane maꞌe auwe ape, ane tote iꞌanerowa. Etiri ape erasi wisere aꞌi ne, sosu etiri wisere pefine aꞌi Owane Sitewi ane maꞌe aurowa ape, ane siyeyei ne ninawenamisiya.” 27 Moses omo pani Isip arunati su, le Isip lo meni Owane tutawe lo ai marepi, le maꞌe toteyei ape ne, atoweiye taꞌame. Serai Moses Owane Sitewi ne tote tawesinamiteye. Owane Sitewi le maꞌe au noweinoweinamirowa. Owe meni ta lai Owane Sitewi siye areiye taꞌame. Ahowa, Moses lo tote tawesiyei ape lai Owane Sitewi wou aꞌi siyeteye. Serai nowe poweiye ape se le omo pani Isip maꞌe si i taꞌame. 28 Moses Owane Sitewi ne tote tawesinamiteyewe, peri werese lo umasiteye. Owane Sitewi lai le maꞌe apou eiye, “Fene werese iyu menei taꞌi taꞌi werese taꞌuwe hereiyei, Pasova lo seni umasinamite. Fene fe sipsip ta aine teraꞌere. Fisaꞌi lo yo tewiye sahe ani teine teroso eretire. Ane ipari wisere aꞌi ano, lu aine teraꞌesiya ape, eimawe arosairowawe, le fisaꞌi yo tewiye sahe siyeyei su, le wesi ape aweraꞌiyenati. Le fisaꞌi siye taꞌame su, le lu wenei eimane poto ape mo aine teraꞌerowa. Le Israel lo lu wenei poto ape mo aine teraꞌerowata.” Serai Moses Israel lo lu tewi maꞌe apou eiye. “Iyu menei werese aꞌi, fene nowe ape se tote anite tawesinamite.”^p

29 Israel lo lu taune Owane Sitewi ne tote tawesiteyewe, sosu lowe hare ite farufaru aꞌi feni maꞌe awei foroꞌo sahe toneri. Sosu Isip lo lu tewi tamo lowe moꞌo umasititeye su, saꞌi ei lai lowe atenise teraꞌe ereye.^q

30 Sosu aꞌi pe Israel lo lu taune Owane Sitewi ne tote tawesinamiteyewe, peri lo ape umasiteye. Lowe Omo Jeriko lo weniyei ape lo tewiye nowe poweiye ereti feni werese feni hesi aꞌi (7) se yose iteye. Lowe omo ape yose i tepaꞌasiye su, Owane Sitewi lai tapiye fisahe aine towesi fiyari ereye.^r

31 Menitani Rahap, tu tafaꞌe yo seni luwaru aꞌi iroteye ape, le Owane Sitewi ne atati tote tawesinamiteyewe, le lu hesi, eresene aꞌi napetu fareyareteye ape, siye nineꞌiteye. Sosu lu hesi ape, le napetu fareyareye ape, arunati su, lowesi le maꞌe teꞌeye, “Owane Sitewi ne au noweinoweirowa.” Serai Israel lo ai lu werese omo weniyei ape maꞌe ai atuwe su, lowe lu taune werese, Owane Sitewi ne tote tawesi taꞌame ape, aine teraꞌeyei ne toteye. Ahowa, lowe menitani ape aine teraꞌe taꞌame.^s

32 Lu tomu neꞌese Owane Sitewi ne tote tawesinamiteye. Ahowa, ane nowe eite se lowe ne fene maꞌe au teꞌerowata. Lu weneri ape apou aꞌi ne. Meni Gideon, meni Barak, meni Samson, meni Jepta, meni Devit, meni Samuel, sosu lu tereꞌe ape mo Owane Sitewi lo peri au teꞌe siye lu werese, lowe werese Owane Sitewi ne tote tawesinamiteye.^t 33 Lowe Owane Sitewi ne tote tawesiteye su, lowe omo pani sahe lu tereꞌe maꞌe ai atu tiyatiteye. Sosu lowe lu ape mo maꞌe hi ani araro poꞌuteye. Lowe yo seni farere aꞌi iroteye su, lowe etiri ape mo, Owane Sitewi lowe maꞌe au teꞌe naneiye ape, aniye. Serai lowe Owane Sitewi lo peri tote tawesi umasiteye su, Owane Sitewi lai you pusi erawe erasi aꞌi lo ahi ani tomoꞌute tawesiye.^u 34 Sosu airame lowe lo yehe erasi aꞌi lowe ti seroꞌowei ne fu meteye su, lowe yehe ape aine noroweye. Lowe ai atu tiyatiyei su, airame lowe lo meneꞌe se aine teraꞌeyei ne toteye. Sosu Owane Sitewi lai lowe maꞌe hene fareyareti. Lowe tahe pereꞌe aꞌi teriteye su, Owane Sitewi lai lowe maꞌe au kairefiyeteye. Lowe airame lowe lo ai atu tiyatiteye su, lowe airame lowe lo ne kairefi erasi aꞌi ai atu tiyatinamiteye. Sosu lowe ipari ai lu tomu neꞌese aꞌi ani araro poꞌuteye.^v

35 Taune tamo Owane Sitewi ne tote tawesinamiteyewe, lu tewi lowe lo tamo, temeniyeteye ape mo, Owane Sitewi lai lowe fisiye sahe si tame au taꞌane norohuwe sineteye. Sosu taune ape mo lai lowe si sine norohuwe siye aniye su, lowe lai lowe ne au siye nineꞌi aniye. Lu taune tewi tereꞌe tamo kalabus wesi iroteye ape, apou teꞌeye. “Nomo tote tawesiyei nomo lo meꞌiyeni maꞌe mi mi weriyei atati arunatirowata. Ahowa nomo kalabus wesi sato aꞌi ironamirowawe, nomo fofowei erasi teritenamitorowa. Lowe nomo aine teraꞌeyei su, nomo marepi erasi aꞌi tote nineꞌitorowa. Piyene awere? Owane Sitewi lai nomo marepi hepene heꞌi wisere aꞌi au taꞌane norohuwe sinerowa. Serai nomo mi mi weriyei Owane Sitewi ne meꞌiyeni maꞌe atati arunatirowata. Ahowa, nomo le ne mi mi weriyei tote tawesi umasinamitorowa.”^w 36 Lu taune tamo Owane Sitewi ne tote tawesiteye ape, ai lu tamo lai lowe maꞌe teꞌe naruteye. Lowe lu taune tereꞌe lo tahe wafei se aine nateye. Lowe lu taune tereꞌe lo tahe wafei kairefi aꞌi se ti tawesinamiteyewe, lowe kalabus wesi maꞌe heneti.^x 37 Lowe lu taune ape mo, Owane Sitewi ne tote tawesiteye ape mo, tapiye se fusawi aine teraꞌeteye. Lowe ipari meneꞌe se lowe tewi pa tewi aꞌi aine topoto ereteye. Lowe lu taune tereꞌe tamo ipari meneꞌe tereꞌe ai feni se feni se ape se tewi teraꞌe ereteye. Sosu lowe fe sipsip, fe meme lo tahe ani asiyewe, uweiyei aꞌi iro ereteye. Lowe maꞌaru etiri werese poꞌuteye. Lu tereꞌe lai lowe kalabus wesi ti tawesinamiteyewe, lowe maꞌe au luwaruweteye.^y 38 Lu taune ape mo yo seni waraꞌi aꞌi ironamiteye. Serai lu taune tereꞌe awei pani iroteye ape, lowe ne ai marepi totenamiteye. Lowe omo pani, etiri taꞌame ape, sahe uwei ereteye, omo hire sahe uwei ereteye. Lowe tapiye pa wesi tewi sahe howeiteye. Sosu lowe awei yo papu howei ereteye. 39 Nomo lu taune werese eite mo lo tote tawesiyei ape mo lo peri wanuwe su, nomo Owane Sitewi ne hepene se suꞌariye. Serai nomo le maꞌe au teꞌe wisereye nineꞌinamiteye. Ahowa, lu taune ape mo ne, lowe lai Owane Sitewi lo teꞌe naneiye ape mo meꞌiye henerairowa ape, lowe etiri ape mo henerairowa ape, siye taꞌame. 40 Serene Owane Sitewi lai marepi heꞌi aꞌi nomo ne totenamisiya. Marepi heꞌi lo ape wisere pefine aꞌi ne. Lu taune ape mo tu naifa awei sato iroteye ape, lowe Owane Sitewi ne tote tawesinamiteye. Sosu moꞌo meni Owane Krais henerai su, nomo le ne tote tawesi umasisiya. Serai Owane Sitewi lo marepi sitewi apou toteteye. Lu taune tu naifa Owane Sitewi ne tote tawesi umasiteye ape mo, lowe nomo mase aiwawe taꞌuwerairowa. Sosu nomo werese Owane Sitewi lo nihe se lu taune waraꞌi aꞌi ironamitorowa. Nowe ape se nomo etiri werese, le nomo maꞌe auwei ne teꞌe naneiye ape, nomo omo hire sahe etiri ape mo anirowa.