Owane Sitewi nomo maꞌe tote wawesiyeyei lo au atuatusiya.
12
Sosu aꞌi pe fene nomo ne totere. Lu taune tomu neꞌese aꞌi, Owane Sitewi ne tote tawesinamiteye ape, irosiya. Lowe nomo maꞌe tote tawesiyei lowe lo au atuatu areiyesiya. Serai nomo etiri werese, tote tawesiyei nomo lo einamisiya ape, ani sasarisawite. Sosu yo seni luwaru aꞌi, nomo ti tawesisiya ape, nomo yo seni luwaru aꞌi ape mo pei ani sasari poꞌutesawite. Sosu yo ape, Owane Sitewi nomo maꞌe umasiyei ne auwe ape, nomo yo ape witane se aꞌi pei umasinamite.a 2 Nomo Jisas maꞌe mi mi weriyei pei siyenamite. Le aꞌi lai tote tawesiyei nomo lo, lo sitewi aꞌi ne. Sosu nowe yeꞌewi su, nomo etiri werese, le maꞌe auwei ne teꞌe naneiye ape, nomo omo hire sahe etiri ape mo anrowa. Le me tapeꞌi sahe temeniyeye su, le Owane Sitewi lo marepi tote iꞌane taꞌame. Ahowa, le marepi nineꞌi wisereyeyei ape, Owane Sitewi le ne nowe meꞌiye henerairowa ape, le ninawenamiteye. Serene le me tapeꞌi sahe temeniyeyei lo neritase aꞌi tote taꞌame. Sosu pereye nowe eite se le Owane Sitewi lo ereti eyate feni maꞌe onunamisiya. 3 Sosu fene etiri, le maꞌe henerai ape, totete. Lu taune, yo seni luwaru aꞌi iroteye ape, lowe le ne ai marepi erasi aꞌi totenamiteye. Serai lu tamo fene maꞌe au luwaruweyei su, fene marepi orese aꞌi owe ape teritete. Sosu fene le ne meꞌiyeni maꞌe owe ape atati arunatite.4 Peri ape wiyeme aꞌi ne. Lu tamo yo seni luwaru aꞌi iroteye ape, fene maꞌe au luwaruweteye su, tote tawesiyei fene lo tei kairefiyenamiteye. Sosu fene tei kairefiyenamiteye su, lowe fene aine teraꞌe taꞌame. 5 Fene peri wisere aꞌi, Owane Sitewi lai eimane werese lo ape maꞌe au teꞌeye ape, wanure! Fene peri lo ape owe ape tote iꞌanete. Le apou eiye,
“Eimane werese ano, Meni Owane pefine lai fene aine ameriyeyei su, fene peri lo wanu etite. Le yo seni luwaru aꞌi fene lo au fareraiyei su, fene marepi orese owe ape teritete.
6 Piyene awere? Lu taune werese ape mo, le lai lowe au aine ameriyeyei ape, le lowe ne marepi erasi aꞌi tote wawesiyenamisiya. Sosu lu taune ape mo, le lowe maꞌe aine ameriyeyei ape, lowe eimane topo lo aꞌi henerai tepaꞌasiye.” Jop 5:17; Snd 3:11-12
7 Serai Owane Sitewi lai fene maꞌe aine ameriyeyei su, fene le ne apou totere. Owane Sitewi lai le tai pefine aꞌi nomo lo ne. Serai le nomo aine ameriyeyei su, nomo faraꞌu tei kairefiyenamirowa. Fene fofowei lo ape teriteyei su, fene apou totesiya. Nomo eimane pefine lo aꞌi ne. Apou wou aꞌi awei lo aite werese lowe eimane towafi lowe lo maꞌe fofowei ta aurowa.b 8 Ahowa, Owane Sitewi lai fene maꞌe fofowei ta au taꞌame su, fene eimane pefine aꞌi lo taꞌama. Fene peiꞌare eimane wou aꞌi ne. Le aꞌi lai fofowei ta eimane werese pefine aꞌi lo aunamisiya. 9 Fene aite nomo lo awei sahe irosiya ape, totere. Lowe nomo maꞌe aine ameriyeye su, nomo lowe ne iyape erasi aꞌi ei ani aroweye. Serai fene Owane Sitewi, tai pefine aꞌi nomo lo, omo hire sahe ironamisiya ape, totere. Nomo yo seni luwaru aꞌi irowei su, Owane Sitewi lai nomo aine ameriyerowa. Nomo le maꞌe unahi irowei su, nomo le mase mi mi pasi pasi weriyei ironamitorowa.
10 Aite nomo lo, awei sahe irosiya ape, nomo maꞌe aine ameriyeye su, lowe nowe teꞌe oso aꞌi se nomo maꞌe aine ameriyeteye. Nomo eimane nomo lo aine ameriyeteye su, nomo apou toteye, “Yo seni nomo lo wisere farere aꞌi ne.” Ahowa, Owane Sitewi lai nomo maꞌe aine ameriyeyei su, le marepi hepene nomo lo farere aꞌi fa iro ne aine ameriyerowa. Serai nomo yo seni waraꞌi aꞌi lo umasirowa. 11 Wiyeme aꞌi ne. Owane Sitewi nomo maꞌe aine ameriyeyei su, nomo nowe ape se marepi orese aꞌi teriteye. Marepi nomo lo tote nineꞌi taꞌame. Ahowa, nowe meꞌiye su, nomo Owane Sitewi lai fofowei apou ape aine ameriyeye ape, apou toteyei, “Le nomo maꞌe aine ameriyeye su, le yo seni farere waraꞌi aꞌi iroteye.” Serai nomo Owane Sitewi lo nihe se yo seni waraꞌi aꞌi ironamirowa. Sosu marepi nomo lo tote fetaneyenamirowa.c
Nomo Owane Sitewi lo peri fa wanu umasite.
12 Sosu aꞌi pe ane peri tereꞌe ta fene maꞌe au teꞌesiya. Etiri werese, fene irowei ape, fene tei kairefiyete. Sosu aiwawe aꞌi marepi hepene fene lo au kairefiyete.d 13 Fene yo seni farere aꞌi ape se irote.
“Apou wou yo mai farere aꞌi ape se inamiteye.” Snd 4:26
Fene yo seni luwaru aꞌi irowei su, marepi hepene fene lo afofo kerikeriye wou aꞌi henerairowa. Ahowa, fene yo seni waraꞌi aꞌi ironamiyei su, marepi hepene fene lo farere wisere aꞌi henerairowa.
14 Sosu aiwawe aꞌi fene marepi momotei fetane aꞌi lu taune werese maꞌe tiyati irote. Fene yo seni waraꞌi aꞌi umasinamite. Fene Owane Sitewi lo yo seni waraꞌi aꞌi ape iro umasi taꞌame su, fene Meni Owane Pefine maꞌe naterairowata. 15 Serai fene weiyai! Fene Owane Sitewi lo ferafereiyei neri aꞌi meꞌiyeni maꞌe owe ape atati arunatite. Fene haiye moꞌufi wou aꞌi owe ape heneraire. Meni ta haiye moꞌufi lo wamu horuse aꞌi ape ayei su, horuse lo ape lai ahi sahe terite tawirawi luwaruwerowa. Fene haiye moꞌufi wou heneraiyei su, fene lu taune maꞌe au luwaruwe tawirawirowa. 16 Fene tafaꞌe yo seni luwaru aꞌi owe ape irote. Aiwawe aꞌi fene meni Iso ne totere. Le Owane Sitewi ne tote tawesi taꞌame. Le lau mase teriteye su, le paꞌise lo maꞌe ayei ta fa auwei ne ei toweriye. Serai le etiri iyami werese lo ne meꞌiyeni maꞌe atati arunati.e 17 Sosu nowe meꞌiye su, fene soꞌoruwe tepaꞌasiye ape, Iso aite lo peri wisere aꞌi aniyei ne toteyei su, aite lo le meꞌiyeni maꞌe atati aruwewe, etiri iyami werese lo le maꞌe au taꞌame. Le aite lo peri ape wanuwe su, le ewite luwei erasi irowe. Ahowa, le aite lo marepi tote ani awetowei lo yo ta siye soꞌoru taꞌama.f
18 Sosu aꞌi pe Owane Sitewi lai fene etiri luwaru werese aꞌi fene maꞌe omo Sainai sahe au atuatu taꞌame. Ahowa, le etiri luwaru ape mo Israel lo lu tewi werese maꞌe au atuatuteye. Tu naifa weriyei Israel lo lu taune lai omo Sainai lo toꞌu ite sahe henerai. Sosu Israel lo lu taune omo ape ataheyerai su, lowe yehe erasi aꞌi siyeye. Pasi pefine aꞌi lowe maꞌe henerai su lowe marepi orese aꞌi teriteye. Sosu lowe fiyaru erasi aꞌi teriteteye.g 19 Sosu lowe meneꞌe mapefuwe ape erasi aꞌi fateye ape, wanuwe. Lowe Owane Sitewi lo peri erasi aꞌi uteye ape, wanuwe. Lowe peri lo ape wanuwe su, lowe atoweiye erasi irowewe, serai lowe meni Moses se apou teꞌeye, “Nomo peri tereꞌe lo ape meꞌiye wanuwei wou taꞌama.”h 20 Piyene awere? Lowe peri lo ape wanuwei ne taꞌoreye. Owane Sitewi lai lowe maꞌe apou eiye,
“Meni ta, sosu fe apou ape werese aꞌi omo ape hire maꞌe iyaneyei su, fene tapiye se lowe maꞌe aine teraꞌeyei ne fusawire.” Kis 19:12-13
21 Wiyeme aꞌi ne. Lu taune ape mo etiri luwaru werese aꞌi ape wanu siyeye su, lowe atoweiye erasi irowe. Serai meni Moses lai apou eiye.
“Ane taꞌu aiwawe aꞌi atoweiye auseriyesiya.” Lo 9:19
22 Ahowa, fene etiri apou ape, lowe maꞌe henerai ape, siye taꞌame. Fene Omo Saion lo yo henerai. Sosu Owane Sitewi marepi hepene norohuwe aꞌi lu taune maꞌe auwe ape, fene omo weniyei lo ape sahe wiye. Omo weniyei ape niꞌarawe hire sahe irosiya. Omo weniyei ape sahe Owane Sitewi lo ipari wisere aꞌi tomu neꞌese aꞌi irosiya. 23 Sosu Owane Sitewi lai eimane Poto werese lo ei taꞌuwerai. Lu ape mo iyape lowe lo Owane Sitewi lai meni eime niꞌarawe hire maꞌe one towe sahe au lese fuwe. Sosu le fene, lowe aiwawe, ei taꞌuwe aniyewe, fene werese maꞌe marepi erasi aꞌi nineꞌinamiteye. Fene yo ape sahe Owane Sitewi maꞌe aiyeteye. Le lu taune werese lo yo seni au hese ereirowa. Fene lu taune maꞌe tu naifa temeniyeye ape, lowe mase ei taꞌuwerai. Owane Sitewi lai lowe lu taune waraꞌi pefine aꞌi au irowe. 24 Sosu fene Jisas lo yo sahe henerai. Le, meni ape ponei sahe teiteye ape, Owane Sitewi lo marepi toteyei heꞌi aꞌi ape nomo maꞌe ausai. Le me tapeꞌi sahe temeniyeye su, fisaꞌi lo nomo ne au teroso arowe. Nomo le ne tote tawesiyei su, Owane Sitewi lai etiri wisere pefine aꞌi nomo maꞌe au teꞌe naneirowa. Fisaꞌi lo ape meni Abel lo fisaꞌi wou taꞌama. Meni Kein lai paꞌise lo Abel aine teraꞌeye su, Owane Sitewi lai fisaꞌi lo ne apou eiye, “Ane lai meni ape, Abel aine teraꞌeye ape, itiyaꞌu aine teraꞌerowa.”i
25 Serai ane fene maꞌe teꞌesiya. Fene weiyai! Owane Sitewi lai fene maꞌe au teꞌeyei su, fene apaniye fene lo owe ape tewi tawesite. Owane Sitewi, omo niꞌarawe hire maꞌe ironamitorowa ape, le peri lo hi awei sahe teꞌe arosai. Lu taune ape mo peri lo wanuwewe, le maꞌe meꞌiyeni atati arunati su, lowe Owane Sitewi lo ai marepi aweraꞌiyenati taꞌame. Serai nomo Owane Sitewi lo peri, omo niꞌarawe hire maꞌe au teꞌe arosai ape, wanuwewe, le ne meꞌiyeni maꞌe atati arunati su, nomo Owane Sitewi lo ai marepi aweraꞌiyenatirowata. Peri eite wiyeme pefine tene!j 26 Owane Sitewi omo Sainai sahe itorai su, peri lo ape lai awei pani werese au ani auseriyeye. Ahowa, pereye nowe eite se le peri ta apou au teꞌe naneiye.
“Ane peri ano tame uteyei su, ane aiwawe aꞌi nowe toꞌuresi ta se tame awei pani werese au ani auseriyerowa. Sosu ane aiwawe aꞌi omo niꞌarawe hire maꞌe aiwawe aꞌi au ani auseriyerowa.” Hag 2:6
27 Peri ape ne, nowe toꞌuresi ta se tame utesiya, Owane Sitewi lai nomo maꞌe au teꞌe areiyesiya. “Etiri werese ane taꞌane fuwe ape mo, ane etiri ape mo au ani auseriyerowawe, ani sasari poꞌutesawirowa. Ahowa, etiri werese au ani auseriyerowata ape, etiri ape mo mi mi weriyei ironamitorowa.”
28-29 Serai nomo Owane Sitewi lo omo pani, niꞌarawe sahe irosiya ape, wiyei su, owe meni ta lai nomo au ani auseriyerowa. Serai nomo le maꞌe pei au teꞌe wisereyete.
“Owane Sitewi nomo lo aꞌi lai etiri werese yehe se faraꞌu itomu ti seroꞌo poꞌuterowa.” Lo 4:24; 9:3
Ahowa, le aꞌi lai wesi ta, omo niꞌarawe hire sahe, nomo ne au taꞌane naneiye. Serai nomo mi mi weriyei le maꞌe pei au teꞌe nineꞌi wisereyete. Nomo marepi lo, le nomo maꞌe au atuatuwe ape, pei tote umasinamite. Nomo le maꞌe aꞌi au teꞌe wisereye nineꞌinamite.