Nomo lu taune maꞌe pei tote wawesiye tiyatite.
13
Sosu aꞌi pe lu taune werese, Jisas ne tote tawesi umasiteye ape, nomo lowe maꞌe pei tote wawesiye tiyatinamite. 2 Lu taune tamo, fene soꞌoru taꞌama ape, wesi no sahe henerai su, fene lowe maꞌe meꞌiyeni owe ape atati tei arute. Ahowa, fene lowe maꞌe au isafiye nineꞌite. Tu nowe ta se lu taune tamo meni ta maꞌe au isafiyeteye su, lowe etiri ape soꞌoru taꞌama. Ahowa, meni ape le Owane Sitewi lo ipari waraꞌi aꞌi ne.a 3 Fene Owane Sitewi lo lu taune tamo, kalabus wesi sahe irosiya ape, fene lowe ne owe tote iꞌanere. Fene aiwawe aꞌi lowe mase kalabus wesi sahe irowei su, fene piye toterowa awere? “Nomo lowe ne au ferafereire. Lu airame ape mo lai Owane Sitewi lo lu taune ape maꞌe au luwaruwerowa su, fene lowe ne owe ape tote iꞌanere. Lowe fene maꞌe au luwaruwerowa su, fene piye toterowa awere? Nomo lowe ne au ferafereirowa.” 4 Meni ta menitani naituwei lo yo seni ape wisere pefine aꞌi tene! Serai lu taune naituwe fene. Serai fene lo naituwei ape au noweinoweite. Meni ta tani lo mi mi weriyei naituwei lo yo seni farere aꞌi fa ironamite. Sosu aiwawe aꞌi menitani ta meni lo ape mase naituwei ene ayei lo yo seni farere aꞌi fa ironamite. Lu taune werese, tafaꞌe yo seni luwaru aꞌi irowei ape, sosu tafaꞌe yo seni marepi umasiteye ape, Owane Sitewi lai lowe maꞌe au hese ereirowa.b 5 Owane Sitewi lai one towe lo sahe apou teꞌesiya.“Ane lai fene nowe weriyei weriyei tote iꞌane arurowata. Sosu ane fene ne meꞌiyeni maꞌe atati tei arunatirowata.” Lo 31:6,8; Jos 1:5
Serai fene maꞌaru tomu neꞌese aniyei ne owe ape totenamite. Maꞌaru etiri werese fene lo, wesi fene lo sahe irosiya ape, fene marepi tote nineꞌinamite. 6 Serai nomo pei tei kairefiyete. Sosu nomo apou teꞌerowa,
“Meni Owane Pefine lai ane ne au ferafereisiya. Serai ane atoweiyerowata. Owe meni ta lai ane au luwaruwerowa.” Sng 118:6-7
7 Fene lu owane fene lo, Owane Sitewi lo peri tu fene maꞌe au teꞌe areiyeye ape, owe ape tote iꞌanete. Fene yo seni lowe lo ne totere. Yo seni wisere aꞌi lowe lo aiwawe totere. Fene lowe ne toteyei su, fene tote tawesiyei lowe lo ne umasinamite.c 8 Peri lowe lo ape, fene maꞌe teꞌeteye ape, apou teꞌesiya, “Jisas Krais lo yo seni tu naifa weriyei aiwawe aꞌi, sosu pereye nowe eite se yo seni lo apou aiwawe aꞌi ne. Sosu nowe meꞌiye weriyei weriyei se apou aiwawe aꞌi ironamitorowa.” 9 Serai peri wawero tereꞌe tereꞌe tamo marepi fene lo sahe owe ape tatai anite. Sosu fene Owane Sitewi lo yo waraꞌi aꞌi owe ape arunatite. Fene peri wawero lowe lo owe ape umasite. Owane Sitewi lo ferafereiyei lai marepi fene lo au ani kairefiyeyei su, etiri ape wisere pefine aꞌi ne. Lu taune tamo ayei lo yo peri ape mo ne tote umasiyei su, lu taune ayei lo yo peri ape umasiyei ape, yo peri ape marepi lowe lo au kairefiye taꞌame.d 10 Nomo Jisas ne tote tawesisiya ape, nomo mi mi weriyei weriyei faraꞌu Owane Sitewi maꞌe aiyenamisiya. Au heseyei lu owane, Juda lo taꞌuwe wesi sahe au hesesiya ape, lowe ayei ape Owane Sitewi maꞌe tapiye wari sahe au heseye ape, lowe ayei tewi ape ene arowata. 11 Fene etiri ta wanu soꞌoruwesiya. Sosu aiwawe aꞌi Juda lo au heseyei lo meni owane pefine aꞌi yo seni luwaru aꞌi ne au heseyei su, lowe fe bulmakau yene lo fisaꞌi aniyewe, wesi tewi waraꞌi pefine aꞌi ape sahe au heseye. Ahowa, lowe fe bulmakau yene lo tahe paꞌare omo weniyei ape nowe tewiye maꞌe yehe lei seroꞌoteye.e 12 Aiwawe aꞌi Jisas omo weniyei nowe tewiye maꞌe temeniyeye. Le lu taune lo yo seni luwaru aꞌi fisaꞌi topo lo se au ani hu aseyaroweyei ne toteye.f 13 Serai apou aiwawe aꞌi, nomo werese taꞌi taꞌi aꞌi Jisas, me tapeꞌi sahe temeniyeye ape, omo weniyei nowe tewiye maꞌe pei ite. Sosu nomo le omo weniyei nowe tewiye maꞌe moꞌo umasiyei su, nomo neritaseyeyei lo aiwawe aꞌi teritenamirowa.g 14 Nomo Jisas ne tote tawesisiya su, nomo etiri eite siye soꞌoruwesiya. Omo weniyei erasi aꞌi ta, hi awei sahe weriyei weriyei ironamirowata. Ahowa, nomo omo weniyei erasi ta nowe meꞌiye henerairowa ape ne, siye ninawesiya.h 15 Serai nomo taꞌi taꞌi mi mi weriyei Owane Sitewi maꞌe marepi nineꞌiyei nomo lo, Jisas lo iyape se, pei teꞌe nineꞌinamite. Nomo lu taune maꞌe apou au teꞌe areiyeyei su, “Jisas lai Meni Owane Pefine aꞌi nomo lo ne.” Nomo Owane Sitewi maꞌe au hese nineꞌinamite.i 16 Sosu aiwawe aꞌi fene lu taune maꞌe yo seni wisere aꞌi irowei ne owe ape tote iꞌane tiyatite. Fene lu taune maꞌe, Jisas ne tote umasisiya ape, maꞌe au feraferei tiyatite. Fene yo seni apou ape irowei su, fene etiri wisere aꞌi ta Owane Sitewi maꞌe wou au heseyei. Sosu le fene ne wisereye nineꞌinamiteyei.j
17 Sosu aꞌi pe lu owane fene lo ape mo, lowe hepene fene lo au noweinoweinamisiya. Lowe mi mi weriyei wiyawi lowe lo ironamisiya. Lowe onu fetaneyerowata. Serai lowe fene maꞌe au teꞌeyei su, fene peri werese lowe lo wanu tote umasite. Wiyawi lowe lo ape, lowe iroteye ape, lowe Owane Sitewi lo nihari maꞌe teirowawe, le maꞌe etiri werese, lowe iroteye ape, au teꞌe areiyerowa. Fene peri lowe lo umasiyei su, lowe wiyawi lowe lo nineꞌiyei se irowei. Ahowa, fene peri lowe lo arisiyei su, lowe wiyawi lowe lo marepi orese aꞌi se teriteyei. Serai lowe fene maꞌe au ferafereirowata.k 18 Sosu aꞌi pe nomo etiri eite soꞌoruwesiya. Marepi nomo lo Owane Sitewi lo nihe se waraꞌi aꞌi ne. Sosu nomo mi mi weriyei yo seni farere aꞌi ironamiteyei ne totesiya. Serai fene nomo ne Owane Sitewi maꞌe au teꞌe towerinamite.l 19 Sosu ane fene maꞌe peri kairefi aꞌi se apou ei towerirowa. Fene Owane Sitewi maꞌe teꞌe toweriyei su, fene le maꞌe apou teꞌe towerire, “Owane Sitewi, ne meni ape nomo maꞌe iꞌero aꞌi si tame eimawesaire.”
Meni ape lowe ne Owane Sitewi maꞌe teꞌe toweriye.
20-21 Meni Owane Jisas, le meni Owane fe sipsip au noweinowei siye meni wou aꞌi ne. Nomo fe sipsip lo wou aꞌi ne. Le nomo au noweinoweinamirowa. Serai Jisas me tapeꞌi sahe temeniyeye su, Owane Sitewi lai le si tame taꞌane norohuwe sineye. Le Owane Sitewi maꞌe fisaꞌi topo lo au heseyei su, le Owane Sitewi lo marepi heꞌi aꞌi, nowe weriyei weriyei ironamitorowa ape, au kairefiyeteye. Serai ane fene ne Owane Sitewi maꞌe au teꞌe towerisiya. Ane le maꞌe apou teꞌe towerirowa, “Owane Sitewi, nomo maꞌe marepi fetane aꞌi, auwe ape, ne fene wiyawi wisere aꞌi no irowei ne au pati ferafereirowa. Ne aꞌi lai wiyawi no marepi hepene nomo lo papu irorowa. Ne marepi topo no umasinamisiya. Ne wiyawi no Jisas Krais lo kairefi se ironamisiya.” Nomo le maꞌe weriyei weriyei au teꞌe nineꞌi wisereyenamite.m
Ane peri yeꞌewi tamo fene maꞌe teꞌesiya.
22 Serai kaiyemo mo ano, ane peri kairefi se fene maꞌe au ei towerisiya. Fene peri werese one towe eite sahe marepi momotei aꞌi wanu etite. One towe eite ane fene maꞌe lese ausawisiya ape, pitase taꞌama. Serene ane fene maꞌe marepi wisere aꞌi au teꞌeyei ne totesiya. 23 Ane fene maꞌe peri soꞌoruwe au teꞌesawiyei ne totesiya. Kaiyemo nomo lo iyape Timoti, le kalabus wesi sahe arunati. Le ane maꞌe iꞌero aꞌi aiyeyei su, notosi aiwawe aꞌi fene siyeyei ne aiyerowa. 24 Fene lu owane fene lo maꞌe nomo ne au teꞌe eritere. Sosu aiwawe fene Owane Sitewi lo lu taune maꞌe au teꞌe eritere. Lu tewi kaiyemo mo, omo pani Itali sahe irosiya ape, lowe fene maꞌe au teꞌe eritesiya. 25 Ane Owane Sitewi maꞌe apou ei towerisiya, “Owane Sitewi lo feraferei neri aꞌi fene werese mase ironamitorowa.”