2 Lu tamo fene maꞌe au luwaruweyei su, fene marepi wisere aꞌi Owane Sitewi maꞌe au teꞌe nineꞌinamite.^b 3 Etiri ape mo fene wanu soꞌoruwe tepaꞌasiye. Lu tamo fene maꞌe fofowei erasi aꞌi au irowei su, fofowei ape lai tote tawesiyei fene lo Owane Sitewi ne au kairefiyeyei. Sosu fene kairefi aꞌi teinamiteyei. Serai fene marepi momotei aꞌi ironamiteyei.^c 4 Fene mi mi werese kairefi aꞌi teinamiyei su, Owane Sitewi lai marepi lo fene maꞌe erasi aꞌi aurowa. Owane Sitewi lo marepi fene lo papu heneraiyei su, yo seni werese fene lo aseyaro waraꞌi aꞌi henerairowa. Serai marepi fene lo sahe etiri ta poꞌuterowata. 5 Ahowa, fene marepi wisere aꞌi tote poꞌuteyei su, fene Owane Sitewi maꞌe marepi wisere aꞌi ne teꞌe towerite. Owane Sitewi lai marepi wisere aꞌi lu taune werese maꞌe erasi aꞌi aurowa. Fene Owane Sitewi maꞌe marepi wisere aꞌi teꞌe toweriyei ne aiyeyei su, Owane Sitewi lai marepi fene lo teꞌe ani fu arorowata. Ei, le lai marepi wisere aꞌi lo fene maꞌe aurowa.^d 6 Fene Owane Sitewi maꞌe marepi wisere ne teꞌe toweriyei su, fene kairefi aꞌi tote tawesiyei su Owane Sitewi maꞌe teꞌe towerite. Fene apou owe totere. Owane Sitewi marepi wisere aꞌi nomo maꞌe auwei awere? Piyete awere? Tote tawesiyei fene lo kairefi se taꞌame. Apou aꞌi totesiya. Fiyaru erasi lai saꞌi ei ani auseriye torutorosiya wou aꞌi ne. 7 Meni ta apou aꞌi toteyei su, “Owane Sitewi lai ane maꞌe marepi wisere aꞌi auwei taꞌama.” Peri eite wiyeme aꞌi henerairowa. Owane Sitewi lai meni ape maꞌe etiri tamo aurowata. 8 Meni ape marepi hesiyei se totesiya su, yo seni werese lo meremereye aꞌi ne.

9 Sosu aꞌi pe meni Krais ne tote tawesisiya ape, ta maꞌaru etiri ariye aꞌi ape, Owane Sitewi lai meni ape maꞌe marepi wisere aꞌi auwei. Serai meni ape marepi nineꞌinamite. 10 Ahowa, meni ta Krais ne tote tawesisiya ape, maꞌaru etiri tomu neꞌese irosiya ape, nowe meꞌiye se maꞌaru werese lo poꞌuterowa. Sosu le maꞌaru etiri ariye aꞌi temeniyerowa. Meni ape senarepe wou aꞌi ne. Meni ape aiwawe aꞌi marepi nineꞌinamite.^e 11 Esi su, poweiye hire maꞌe wiraiyei. Fiyaru umeri se poweiye aiwawe aꞌi lowesi senarepe werese tewi foroꞌowe poꞌuteyei. Senarepe werese temeniye poꞌutyei. Senarepe su poꞌuteyei. Sosu aiwawe aꞌi meni ape maꞌaru etiri tomu neꞌese irosiya ape, le aiwawe aꞌi etiri ariye aꞌi temeniyerowa.

12 Sosu aꞌi pe lu tamo meni ta maꞌe au luwaruweyei su, meni ape kairefi aꞌi fu teite. Meni ape kairefi aꞌi teiteyei su, le marepi wisere aꞌi toteyei. Meni ape kairefi aꞌi teinamiyei su, Owane Sitewi le ne au nineꞌiyei. Sosu le meni ape maꞌe neri aꞌi marepi hepene heꞌi aurowa. Meni Owane Pefine lu taune maꞌe le ne marepi erasi aꞌi tote wawesiyenamisiya ape, sosu teinamisiya ape, peri ta teꞌe naneiye. “Fene marepi orese aꞌi teriteyei su, fene kairefi aꞌi teite. Fene kairefi aꞌi teinamiyei su, ane marepi hepene heꞌi aꞌi mi mi pasi pasi ironamitorowa ape, fene maꞌe aurowa.”

13 Fene werese peri ape apou owe teꞌete! “Owane Sitewi lai yo seni luwaru aꞌi lo marepi ano papu au fuwe.” Ahowa, le maꞌe peri ape owe teꞌete! Owane Sitewi lai yo seni luwaru aꞌi irorowata. Ahowa, le lai yo seni luwaru aꞌi lu taune maꞌe fu au toterowata. 14 Lu taune werese marepi towafi lo sahe yo seni luwaru aꞌi fu au totesiya. Lowe yo seni luwaru erasi aꞌi totenamiyei su, lowe yo seni luwaru aꞌi ironamisiya. 15 Meni ta yo seni luwaru aꞌi ta erasi aꞌi totenamiyei su, le yo seni luwaru aꞌi ape ironamiyei. Meni ta yo seni luwaru aꞌi irowei su, le temeniyerowa. Sosu Owane Sitewi lai lowe yehe omo maꞌe mi mi pasi pasi fu ani arosawirowa. 16 Kaiyemo mo werese ano, lu tamo peri wawero fene maꞌe au teꞌeyei su, fene peri lowe lo owe wanu umasite. 17 Etiri werese wisere aꞌi hire maꞌe fai. Owane Sitewi lai lu taune maꞌe etiri werese wisere aꞌi hi awei maꞌe ausai. Owane Sitewi lai etiri werese, hire maꞌe irosiya ape, taꞌaneye. Eiwariyemi, yame, poweiye, le lai taꞌaneye. Le marepi hesiyei se tote taꞌame. Le marepi taꞌi aꞌi mi mi pasi pasi weriyei totenamisiya. Le marepi lo atati awetorowata. 18 Tu naifa nomo peri pefine aꞌi lo wanuwe su, le marepi hepene heꞌi aꞌi auwei ne ariariyeye. Etiri werese, fe ape mo, awiye ape mo, you ape mo, lowe nomo unahi maꞌe ironamisiya.^f

19 Fene werese peri ano wanure! Fene peri ape wanu soꞌoruwe tepaꞌasiye. Kaiyemo mo werese, fene werese lu taune lo peri wanu etire. Fene peri tutawe owe au teꞌete. Aiwawe aꞌi fene ai peri witane se owe ape au teꞌete. 20 Meni ai marepi lu taune maꞌe tote tiyatinamiyei su, le Owane Sitewi lo marepi waraꞌi fetane aꞌi umasi taꞌame.^g 21 Yo seni luwaru tomu neꞌese omo omo pani werese sahe irosiya. Serai fene marepi unou aꞌi werese fene lo fu ararosawite. Aiwawe aꞌi fene yo seni luwaru werese aꞌi fene lo meꞌiyeni maꞌe atati arute. Fene marepi momotei aꞌi se Owane Sitewi lo peri wiyeme aꞌi lu tamo fene maꞌe au teꞌeye ape, wanu tote umasite. Owane Sitewi lo peri wiyeme aꞌi lai marepi hepene fene lo si tame hene anirowa.^h 22 Fene Owane Sitewi lo peri wiyeme aꞌi wanuwei su, fene peri lo ape fu wanu umasite. Ei, fene yo seni aseyaro waraꞌi aꞌi fu ironamite. Fene Owane Sitewi lo peri yahowaꞌi wanuwei su, sosu peri lo ape umasiyei taꞌama su, fene lai marepi towafi fene lo arearesiya.ⁱ 23-24 Meni ta Owane Sitewi lo peri wiyeme aꞌi yahowaꞌi wanuwei su, sosu le marepi topo lo umasiyei su, le meni marepi yahowaꞌi ne. Meni ape nihari lo lutatei se siyesiya wou aꞌi ne. Sosu le nihari lo siye tepaꞌasiyei su, le nowe maꞌe iyei. Sosu le nihari lo tote iꞌaneyei. Apou aiwawe aꞌi le yo seni luwaru aꞌi lo siyeye su, le yo seni luwaru aꞌi ape tote iꞌanerowa. 25 Ahowa, meni tereꞌe Owane Sitewi lo yo peri pefine wiyeme aꞌi wanu siye eti umasiyei ape, le marepi hepene fetane aꞌi iroteyei. Le marepi orese aꞌi tote taꞌame. Owane Sitewi lo yo peri pefine wiyeme aꞌi hepene lo au fetaneyesiya. Meni ape Owane Sitewi lo yo peri pefine wiyeme aꞌi wanu umasisiya ape, le yo peri ape iꞌanerowata. Ahowa, le mi mi weriyei yo peri ape umasinamirowa. Owane Sitewi lai meni ape lo wiyawi werese ne au nineꞌiyei.^j 26 Meni ta apou eiyei su, “Ane Owane Sitewi ne tote tawesisiya. Sosu ane mi mi weriyei peri pefine aꞌi teꞌenamisiya.” Ahowa, le peri wawero au teꞌeyei su, le marepi topo lo areareyei. Aiwawe aꞌi le tote tawesiyei lo Owane Sitewi ne yahowaꞌi aꞌi irosiya.^k 27 Owane Sitewi tai pefine lo nihe se tote tawesiyei nomo lo wiyeme aꞌi siye etisiya. Meni ta Owane Sitewi ne tote tawesi umasiyei su, le eimane atauwe tamo au pati aniyei ne sewiyetiye. Taune weiname marepi orese aꞌi iroteyei su, le lowe ne au pati aniyei. Sosu le awei lo yo seni werese meꞌiyeni maꞌe atati awetonamiyei. Marepi hepene lo aseyaro aꞌi ironamirowa.