Kaiyemo mo ano, fene Owane Jisas Krais lo marepi tote tawesisiya ape, fene lu taune iyape se marepi erasi aꞌi toteyei su, sosu lu taune yahowaꞌi meꞌiyeni maꞌe atati tei awetowei su, yo seni apou ape luwaru aꞌi ne. Fene marepi yo seni apou ape owe ape totete. Ahowa, fene lu taune werese ne marepi taꞌi aꞌi apou aiwawe aꞌi totete.^a 2-3 Lu hesi tamo Owane Sitewi lo wesi papu wiyei su, meni taꞌi ipari tahe wisere aꞌi ani asiyei. Sosu meni tereꞌe ipari tahe luwaru unou aꞌi ani asiyei. Fene meni ipari tahe wisere aꞌi maꞌe apou owe ape teꞌere, “Ne meni wisere aꞌi ne. Ne me tutoꞌu tutawe onura.” Sosu meni tereꞌe ipari tahe unou aꞌi maꞌe apou owe ape teꞌe, “Meni, ne meꞌiye yaro maꞌe teite, ne lowe ano maꞌe unahi onura.” Fene yo seni apou ape owe ape irote. 4 Fene yo seni apou ape irowei su, fene lu hesi lo yo seni au hese ereiyei. Fene apou toteyei su, meni ape ipari tahe wisere aꞌi ani asisiya ape, yo seni lo aseyaro aꞌi ne. Sosu meni ape ipari tahe unou aꞌi ani asisiya ape, yo seni lo luwaru aꞌi ne. Fene yo seni luwaru aꞌi apou ape irowei ape, owe ape au hese ereite. 5 Kaiyemo mo ane fene marepi erasi aꞌi tote wawesiyenamisiya. Peri ano wanure! Owane Sitewi lai lu taune maꞌaru etiri ariye ape mo lowe ne ariariyeye. Etiri werese omo hire maꞌe irosiya ape, Owane Sitewi lai lowe maꞌe etiri tomu neꞌese aurowa. Lowe Owane Sitewi ne marepi erasi aꞌi tote wawesiyenamisiya ape, Owane Sitewi lai tote tawesiyei lowe lo au kairefiyesiya. Le lai peri teꞌe naneiyei ape lowe maꞌe au teꞌeye.^b 6 Fene meni ape maꞌaru etiri ariye ape maꞌe yo seni apou ape irowe su, fene meni ape lo marepi au luwaruweye. Wanure! Lu maꞌaru etiri tomu neꞌese irosiya ape, lowe lai fene maꞌe au luwaruwesiya. Lowe lai yo seni fene lo etiyei ne henetisiya. 7 Aiwawe aꞌi lowe tote tawesiyei fene lo au teꞌe naruwe. Lowe Jisas lo iyape ne aiwawe aꞌi teꞌe naruwe. 8 Owane Sitewi meni owane tutawe nomo lo one towe lo sahe peri wisere aꞌi ta apou teꞌesiya,

Fene yo peri wisere aꞌi lo ape umasinamiyei su, fene yo seni waraꞌi aꞌi irowei.^c 9 Ahowa, fene meni ape ipari tahe wisere aꞌi marepi erasi aꞌi toteyei su, sosu meni tereꞌe ape meꞌiyeni maꞌe atati aruwei su, fene yo seni luwaru aꞌi irowei. Serai Owane Sitewi lai yo seni fene lo au hese eti ereirowa. Fene Owane Sitewi lo yo peri pefine aꞌi arisisiya.^d 10 Meni ta Owane Sitewi lo yo peri werese aꞌi umasinamiyei ne toteyei. Ahowa, le yo peri tewi ta arisiyei su, le Owane Sitewi lo yo peri werese aꞌi arisi tepaꞌasiyei.^e 11 Owane Sitewi lai yo peri lo sahe apou eiye,

Le aiwawe aꞌi yo peri lo sahe apou eiye,

Serai ne tafaꞌe yo seni luwaru aꞌi iro taꞌame su, ahowa, ne meni ta aine teraꞌeyei su, ne Owane Sitewi lo yo peri werese arisi tepaꞌasiyei.^f 12 Serai peri werese fene lo, sosu yo seni werese fene lo aseyaro aꞌi fa ironamite. Fene Krais ne tote tawesi tepaꞌasiye su, Jisas Krais lai yo seni luwaru werese fene lo au hese eti erei tepaꞌasiye. Sosu marepi fene lo aseyaro aꞌi henerai. Serai fene yo seni luwaru aꞌi owe ape ironamite.^g 13 Meni ta fene maꞌe au luwaruweyei su, fene meni ape maꞌe ferafereiyei fu irote. Fene meni ape ferafereiyei iro taꞌame su, Owane Sitewi lai ferafereiyei lo fene maꞌe aurowata. Fene meni ta maꞌe au ferafereiyei su, fene yo seni luwaru aꞌi lo au hese ereirowata. Ferafereiyei werese lai au hese ereiyei ape hi ani ararowe.^h 14 Fene peri ano wanu tote etire. Kaiyemo mo ano, meni ta apou eiyei, “Ane Owane Sitewi ne tote tawesisiya.” Ahowa, le yo seni waraꞌi aꞌi iro taꞌame. Tote tawesiyei lo aꞌi lai Owane Sitewi lo omo hire maꞌe hene wiyei awere? Ahowa, le Owane Sitewi lo omo hire maꞌe wirowata. 15-16 Meni ta, menitani ta, Jisas lo marepi umasiteye ape, ipari tahe ariye aꞌi irowei su, aiwawe aꞌi lowe lau erasi mase iroteyei su, sosu meni ta le maꞌe apou eiyei, “Kaiyemo, ane ne maꞌe au tote ferafereiyei. Ne marepi fetane aꞌi mase ire. Ne ayei ta are.” Ahowa, fene ipari tahe ta le maꞌe au taꞌame. Sosu ayei ta au taꞌame. Yo seni fene lo luwaru aꞌi ne! Ipari tahe lo eiwerou maꞌe anirowa awere? Ayei lo eiwerou maꞌe anirowa awere?ⁱ 17 Serai fene Owane Sitewi ne tote tawesiyei su, ahowa, fene yo seni aseyaro aꞌi iro taꞌame. Tote tawesiyei fene lo yahowaꞌi aꞌi heneraiyei. Tote tawesiyei fene lo temeniye poꞌuteye wou aꞌi ne. Owane Sitewi ne tote tawesiyei ape lai yo seni waraꞌi aꞌi mase fu ironamiyei. 18 Meni ta apou eiyei, “Ne Owane Sitewi ne tote tawesiyei irosiya. Ane lai yo seni waraꞌi aꞌi ironamisiya.” Ahowa, ane Jems, fene maꞌe apou teꞌesiya. “Ne yo seni aseyaro iro taꞌame su, ne Owane Sitewi ne tote tawesiyei no ane maꞌe au atuaturowata. Sosu ane yo seni aseyaro ironamiyei su, ane Owane Sitewi ne tote tawesiyei ano ne maꞌe au atuatuwei.” Etiri hesi ape mo marepi hepene nomo lo papu pei ironamite.^j 19 Fene Owane Sitewi taꞌi aꞌi tote tawesiyei awere? Ei, wisere aꞌi ne. Sepei luwaru werese aꞌi Owane Sitewi taꞌi aꞌi ape tote tawesisiya. Lowe werese tahe erasi aꞌi auseriyesiya. Lowe atoweiye erasi ironamisiya. Serai fene Owane Sitewi ne erasi aꞌi atoweiyete. Sosu peri werese lo wanu umasinamite. 20 Peri ano wanu etire! Ne Owane Sitewi ne tote tawesiyei su, sosu yo seni waraꞌi aꞌi iro taꞌame su, ne meremereye aꞌi meni tote tawesiyei no sitewi se taꞌame. 21 Yaꞌariyei nomo lo iyape Abraham, le meni eime taꞌi aꞌi lo Aisak Owane Sitewi maꞌe tapiye wari sahe aine teraꞌerowawe, au hese ereiyei ne toteye su, Owane Sitewi lai yo seni lo siye soꞌoruwe tepaꞌasiye. Serai le le maꞌe apou eiye, “Ne yo seni ape irowe su, serai nihe ano se ne meni waraꞌi aꞌi ne.”^k 22 Abraham lai yo seni ape irowe su, le tote tawesiyei lo nomo maꞌe au atuatuwe. Le meni eime lo Aisak aine teraꞌerowawe, Owane Sitewi maꞌe au hese ereiyei ne toteye su, tote tawesiyei lo kairefi pefine aꞌi ironamiteye.^l 23 Tu naifa weriyei Owane Sitewi lai one towe lo sahe apou eiye,

Owane Sitewi lo one towe sahe meni Abraham ne apou eiye, “Meni ape Owane Sitewi lo nati wafei wiyeme aꞌi ne.” Peri ape wiyeme aꞌi henerai tepaꞌasiye.^m 24 Serai pereye fene peri ano wanu soꞌoruwe tepaꞌasiye. Meni ta apou eiyei, “Ane Owane Sitewi ne tote tawesisiya.” Sosu le yo seni waraꞌi aꞌi iro taꞌame su, Owane Sitewi lai meni ape ne apou toteye, “Meni ape marepi ano umasi taꞌame.” Ahowa, meni ta Owane Sitewi ne tote tawesiyei su, sosu yo seni aseyaro waraꞌi aꞌi irowei su, Owane Sitewi lai meni ape ne apou toteyei, “Meni ape marepi werese ano umasinamisiya. Serai ane yo seni werese lo aseyaro waraꞌi aꞌi au iro heneraiyei.” Serai nihe ano se le meni waraꞌi aꞌi ne. 25 Tu naifa weriyei peri tereꞌe Owane Sitewi lo one towe sahe irowe. Peri ape apou teꞌesiya. Menitani ta tafaꞌe yo seni luwaru aꞌi tu ironamiteye. Tu naifa weriyei Josua lu hesi omo papu wiyei ne eimawesawi. Sosu menitani ape iyape Rahap le lu hesi ape mo au noweinoweiteye. Lu tamo lai lowesi aine teraꞌeyei ne toteye su, menitani ape lowesi yo eresene fareyareye aꞌi maꞌe eimawesawi. Menitani ape lu hesi au pati ferafereiye su, le Owane Sitewi ne tote tawesiteye. Owane Sitewi lai menitani ape yo seni siyeye su, le meni tani ape ne apou toteye, “Ane yo seni werese lo aseyaro aꞌi siye tepaꞌasiye.”ⁿ 26 Meni ta temeniyeye su, hepene lo fi. Tote tawesiyei fene lo aiwawe aꞌi ne. Meni ta Owane Sitewi ne tote tawesiyei su, sosu yo seni waraꞌi aꞌi iro taꞌame su, tote tawesiyei lo aiwawe aꞌi temeniyeye. Tote tawesiyei lo etiri ta yahowaꞌi ne.