Fene sorowe fene lo einamite.
3
Kaiyemo mo ano, lu taune tomu neꞌese au atuatu siye lu taune heneraireme. Fene peri ape tote etire. Meni ta au atuatu siye meni heneraiyei su, Owane Sitewi lai yo seni lo au hese eti ereirowa. 2 Lu taune tereꞌe tamo Owane Sitewi lo wiyawi taꞌanesiya ape, le yo seni lowe lo momotei aꞌi au hese ereirowa. Nomo werese nowe tomu neꞌese yo seni luwaru aꞌi ironamisiya. Meni ta Owane Sitewi lo marepi aseyaro lu taune maꞌe au atuatuwei su, meni ape peri topo lo umasite. Meni ape Owane Sitewi lo marepi aseyaro aꞌi, le lu taune maꞌe au atuatuwe ape, umasinamiteye su, le meni aseyaro aꞌi henerairowa. Sosu le tahe paꞌare werese topo lo faraꞌu au noweinoweirowawe, sorowe topo lo einamirowa. 3 Nomo ain tewi aꞌi ta fe hos lo ahi papu fuwei. Nomo wafei tewi aꞌi ain feni se feni se ti tawesiyei su, nomo faraꞌu fe hos eiwerou maꞌe henetiyei. Nomo wafei eyate feni ani tore aniyei su, fe hos ai feni maꞌe au uweitiyei. Nomo wafei epi feni ani tore aniyei su, fe hos ape, epi feni maꞌe au uweitiyei. Nomo wafei tewi hesi ani tore aniyei su, fe hos ape uweirowata. Nomo faraꞌu fe hos lo marepi hi ani fu ararowei. Serai fe hos ape marepi nomo lo umasiteyei. Ain oso ape lai fe hos lo yo seni au tore anirowa. 4 Aiwawe aꞌi fene wai ta totere. Nomo wai ta saꞌi mai erasi sahe fuwei su, saꞌi ei erasi wai ape ani awetu awetowei. Ahowa, meni ta wai si sahe teiyei su, le iyahi oso aꞌi se wai ape au fareraiyetiyei. Meni ape wai topo lo ani fu arowei. Wai ape lai meni ape lo marepi umasiteyei. Iyahi ape lai wai erasi lo yo seni au tore anirowa. 5 Peri anowe hesi ape lai sorowe nomo lo ne totesiya. Ain ape fe hos lo ahi fuwei ape oso aꞌi ne. Sosu iyahi aiwawe aꞌi etiri oso aꞌi ne. Lowesi fe hos sosu wai erasi ape au ani fareraiyerowa. Sorowe ape tahe paꞌare nomo lo sahe etiri tewi oso aꞌi ne. Sorowe nomo lo yo seni nomo lo au ani tatairowa. Meni ta peri au teꞌeyei su, peri topo lo ape kairefi aꞌi ne. Le ai peri au teꞌeyei. Le peri topo lo se lu taune lo marepi tatai aniyei. Ei, sorowe nomo lo yo seni nomo lo tatai aniyei. Sorowe nomo lo apou aꞌi ne. Meni ta yehe tewi oso aꞌi se awei pani erasi aꞌi fu meteyei su, ipo pani ti seroꞌo poꞌuteyei. 6 Sorowe nomo lo yehe wou aꞌi ne. Yo seni luwaru aꞌi eito eite ahi nomo lo se au teꞌesiya. Yo seni luwaru werese aꞌi ahi sahe tu au teꞌesiya. Yo seni luwaru aꞌi ahi sahe heneyei su, lowe etiri tewi oso aꞌi ne. Nowe meꞌiye se yo seni luwaru aꞌi ape erasi aꞌi heneraiyei. Yo seni luwaru aꞌi ape tahe paꞌare nomo lo au luwaruweyei. Nomo yo seni luwaru aꞌi ahi sahe heneyei ape, umasiyei su, marepi hepene werese nomo lo au luwaruwe poꞌuteyei. Yo seni luwaru werese aꞌi yehe omo maꞌe fai.a 7 Etiri werese ipo maꞌe irosiya ape, fe, iro woru, awiye, haru, irowe apou ape, etiri werese saꞌi erasi sahe irosiya ape, etiri ape mo taꞌi taꞌi aꞌi lu lai faraꞌu omo sahe au noweinoweiteyei. Etiri werese ape mo lu lo marepi unahi iroteyei. Lu ape mo etiri werese lowe wafei faraꞌu ti tawesiyei. 8 Ahowa, lu werese lai sorowe towafi lowe lo wafei mino eiwerou ti tawesirowata. Ahowa, lowe sorowe towafi lowe lo au noweinoweirowata. Sorowe towafi lowe lo luwaru aꞌi tene! Sorowe towafi lo haru aimesi apou aꞌi ne. Haru aimesi meni ta tomuwei su, meni ape temeniyeyei. Sorowe aiwawe aꞌi ne.b 9 Ahi nomo lo se, nomo faraꞌu Owane Tai Pefine nomo lo maꞌe au teꞌe wisereyesiya. Aiwawe aꞌi ahi nomo lo se, nomo faraꞌu lu tamo maꞌe au teꞌe naruwei. Piyene awere? Owane Sitewi lai lu taune werese au taꞌaneteye su, le hawowou lo wou aꞌi au taꞌaneye. Lowe piyene lu taune tiyati maꞌe au teꞌe narusiya awere? 10 Peri ano wanure! Ahi taꞌi aꞌi se meni ta Owane Sitewi maꞌe au wisereyesiya. Sosu moꞌo ahi aiwawe aꞌi se meni ape lu taune maꞌe au teꞌe narusiya. Yo seni apou ape luwaru aꞌi ne. Ahi nomo lo se nomo peri hesi aꞌi apou ape au teꞌesiya. Serai fene yo seni apou ape owe ape irore. 11 Saꞌi pitomuwe ape lai saꞌi hesi aꞌi wiraiyei awere? Saꞌi wisere aꞌi wiraiyei awere? Saꞌi horuse aꞌi wiraiyei awere? Ahowa, saꞌi pitomowe saꞌi taꞌi pefine aꞌi wiraiyei. 12 Aiwawe aꞌi me owarape lai me patiyawe so wou eiwerou taꞌerowata. Aiwawe aꞌi wafei pameki me owarape so wou eiwerou taꞌerowata. Owane Sitewi me owarape so taꞌi aꞌi taꞌeyei ne au taꞌaneye. Serai Piyene ahi nomo peri hesi aꞌi apou ape au teꞌesiya awere?Fene Owane Sitewi ne tote tawesiyei su, fene marepi wisere aꞌi totete.
13 Ane fene maꞌe apou ei towerisiya. Fene marepi wisere aꞌi totesiya awere? Fene etiri tomu neꞌese soꞌoruwe tepaꞌasisiya awere? Fene marepi wisere aꞌi toteyei su, fene yo seni aseyaro waraꞌi aꞌi lu taune maꞌe ironamite. Fene marepi momotei aꞌi se lowe maꞌe au atuatute. 14 Ahowa, fene ai marepi erasi aꞌi totesiya su, sosu fene marepi towafi fene lo umasiyei ne totesiya su, fene marepi kuseriyei owe ape totete. Ahowa, fene peri wiyeme aꞌi maꞌe owe ape au teꞌe arearete. 15 Marepi fene lo eito eite Owane Sitewi maꞌe fai taꞌama. Ahowa, marepi fene lo ape lu awei maꞌe fai. Marepi eito eite Owane Sitewi lo omo hire maꞌe fai taꞌama. Ahowa, marepi fene lo sepei luwaru aꞌi maꞌe fai. 16 Fene ai marepi totenamisiya su, sosu fene marepi towafi fene lo umasiyei ne totesiya su, yo seni fene lo meremereyesiya. Serai fene yo seni luwaru aꞌi umasinamisiya. 17 Ahowa, marepi wisere aꞌi, Owane Sitewi lo omo hire maꞌe fai ape, tutawe marepi aseyaro waraꞌi aꞌi ne. Sosu moꞌo marepi wisere aꞌi ape marepi fetane aꞌi ne. Ai marepi se taꞌama. Lu taune tereꞌe ne tote wawesiyesiya. Marepi wisere aꞌi toteyei su, fene yo seni waraꞌi aꞌi umasiyei. Aiwawe aꞌi fene marepi hesiyei se tote taꞌame. Ahowa, fene peri waraꞌi aꞌi au teꞌeyei su, sosu fene yo seni luwaru aꞌi irowei su, fene yo seni luwaru aꞌi apou ape owe ape umasinamite. 18 Meni ta marepi wisere aꞌi totesiya su, le faraꞌu meni tereꞌe maꞌe apou teꞌeyei, “Ne ai marepi owe ape totere.” Meni ape yo seni apou ape irowei su, le meni wisere aꞌi ne. Meni tereꞌe ape peri lo wanu umasiyei su, le yo seni wisere aꞌi irowei. Etiri wisere aꞌi ne. Serai meni tereꞌe ape le lu tereꞌe tereꞌe maꞌe marepi fetane aꞌi au irowei.c