Fene ai marepi owe teꞌe teꞌete.
4
Sosu aꞌi pe ane peri tereꞌe fene maꞌe au teꞌesiya. Ane ai peri fene lo wanusiya. Fene piyene ai peri teꞌe teꞌe tiyatisiya awere? Ai marepi werese ape lai marepi luwaru aꞌi, fene iroreme ape, maꞌe fai. Marepi luwaru aꞌi ape lai marepi wisere aꞌi ai atu tiyatinamisiya.a 2 Fene menitani ta siye wisereyeyei su, fene menitani lo meni aine teraꞌeyei. Sosu fene etiri ta siye wisereyesiya su, fene etiri ta anirowata. Serai fene ai marepi le maꞌe totenamisiya. Fene le maꞌe ai atunamisiya. Wanure! Yo seni apou ape luwaru aꞌi ne. Owane Sitewi apou totesiya, fene yo seni aseyaro ironamite. Serai fene Owane Sitewi maꞌe apou teꞌe towerite. Ne marepi luwaru aꞌi ano ne au fareraiyete. Fene le maꞌe peri apou ape teꞌe toweriyei su, le fene maꞌe aurowa. 3 Aiwawe fene Owane Sitewi maꞌe etiri ta teꞌe toweriyei su, sosu fene etiri ape ani taꞌame. Piyene awere? Wanure! Fene marepi luwaru aꞌi se Owane Sitewi maꞌe teꞌe toweriyei su, Owane Sitewi fene maꞌe aurowata. Owane Sitewi lai marepi fene lo siye soꞌoruwe tepaꞌasiye. Fene Owane Sitewi maꞌe apou teꞌe toweriyei su, “Owane Sitewi, ne etiri ape ane maꞌe aure. Ne ane maꞌe auwei su, ane marepi wisere aꞌi totenamisiya.” Ahowa, Owane Sitewi lai marepi luwaru aꞌi fene lo siye ereisiya. Serai le etiri ta aurowata.4 Fene, tafaꞌe yo seni irowei ape, ane fene maꞌe au teꞌesiya. Fene awei lo yo seni umasiyei su, fene Owane Sitewi maꞌe ai atu tiyatiyei. Serai fene awei lo yo seni umasiyei ne toteyei su, fene Owane Sitewi maꞌe ai atu tiyatinamiyei.b 5 Peri eite wiyeme aꞌi tene! Fene Owane Sitewi lo peri one towe lo sahe wanure! “Owane Sitewi lo Hepene Waraꞌi aꞌi, Owane Sitewi lai nomo maꞌe auwe ape, le marepi nomo lo papu ironamisiya. Le aꞌi lai marepi nomo lo au noweinoweinamisiya. Le marepi tereꞌe tereꞌe maꞌe ai atunamisiya.” Le apou teꞌesiya, “Ane marepi hepene fene lo papu ironamisiya su, fene marepi tereꞌe tereꞌe owe ape umasite.” Serai fene apou owe ape totere, “Owane Sitewi lo peri sitewi se taꞌama.” 6 Ahowa, le aꞌi lai nomo maꞌe ferafereiyei lo erasi aꞌi aunamisiya. Owane Sitewi lo peri apou teꞌesiya,
“Owane Sitewi lai lu taune werese maꞌe marepi kuseriyei iroteye ape, ai atunamisiya. Ahowa, le aꞌi lai lu taune maꞌe marepi towafi lowe lo hi ani fu ararosiya ape, ferafereiyei lo aunamisiya.” Snd 3:34
7 Serai ane fene maꞌe au teꞌesiya, fene Owane Sitewi unahi sahe fu ironamite. Fene sepei luwaru aꞌi Satan maꞌe ai atu tei kairefiyenamite. Fene sepei luwaru aꞌi Satan maꞌe tei kairefiyenamiyei su, le fene meꞌiyeni maꞌe atati tei arunatirowawe, atoweiye iterotirowa.c 8 Fene Owane Sitewi maꞌe ataheyeraiyei su, le aꞌi lai fene maꞌe ataheyeraiyei. Fene, yo seni luwaru aꞌi ironamisiya ape, fene yo seni luwaru werese aꞌi ape ne meꞌiyeni maꞌe fu atati arute! Fene marepi hesiyei se totenamisiya ape, fene yo seni aseyaro waraꞌi aꞌi fu irote.d 9 Fene yo seni luwaru aꞌi ironamisiya ape, fene luwei erasi aꞌi fu ironamite. Fene marepi orese aꞌi fu teritenamite. Fene owe ape niyeyeite. Yo seni luwaru werese aꞌi fene lo ne, fene luwei erasi aꞌi ironamite. Marepi wisere aꞌi fene lo ne, fene marepi orese aꞌi maꞌe atati totete. Ei, fene yo seni luwaru werese aꞌi fene lo hi ani ararote. 10 Fene Owane Sitewi maꞌe si tame aiyeyei ne toteyei su, fene marepi towafi fene lo hi ani ararote. Fene marepi fene lo hi ani ararowei su, Owane Sitewi lai iyape fene lo ei ani aroweyei.e
11 Sosu aꞌi pe kaiyemo mo, fene lu taune tereꞌe maꞌe owe ape teꞌe naruwei. Meni ta meni tereꞌe maꞌe teꞌe naruwei su, le Owane Sitewi lo yo peri maꞌe ai atu fiyariyei. Meni ta meni tereꞌe maꞌe yo seni lo au hese eti ereiyei su, le Owane Sitewi lo yo peri maꞌe au hese eti ereiyei. Fene Owane Sitewi lo yo peri maꞌe au hese eti ereiyei su, fene Owane Sitewi lo yo peri ape umasi taꞌame. Ahowa, fene Owane Sitewi lo yo peri au hese eti ereiyei siye meni ne. 12 Owane Sitewi taꞌi aꞌi lai yo peri werese lo nomo maꞌe auwe. Le taꞌi aꞌi lai yo seni werese nomo lo au hese eti ereisiya. Le aꞌi lai fene maꞌe marepi hepene heꞌi auwei. Aiwawe aꞌi le aꞌi lai faraꞌu nomo aine teraꞌeyei. Serai fene lu taune tereꞌe lo yo seni au hese eti ereirowata. Ahowa, fene yo seni eito eite owe ape teꞌe narunamite.f
Fene marepi kuseriyei fene lo au teꞌete.
13 Fene maꞌaru wiyawi ani siye lu, peri ano wanure. Fene apou eiyei su, “Nowe pereye awere? Nowe aperi awere? Ane omo tereꞌe maꞌe iyei. Ane nowe iyu menei taꞌi aꞌi ironamiyei. Ane etiri tomu neꞌese eteyei ne. Sosu ane maꞌaru tomu neꞌese aniyei.”g 14 Wanure! Fene aperi piye etiri ta iro heneraiyei awere? Eiwerou su, fene temeniyeyei awere? Fene etiri ape mo soꞌoru taꞌama. Fene aitu sapu omo sahe napetu ape, wou aꞌi ne. Pereye aꞌi aitu sapu sato irosiya. Nowe meꞌiye oso aꞌi su, aitu sapu werese poꞌutesawiyei.h 15 Ahowa, fene marepi towafi fene lo owe ape tote umasite. Fene peri ape apou teꞌere, “Ane Meni Owane Pefine aꞌi lo marepi umasisiya. Le ane ne apou toteyei su, “Nowe aperi ne sato iroteyei.” Serai ane faraꞌu wiyawi ano aniyei. Le ane maꞌe apou au teꞌeyei su, “Ne wiyawi eite pei irore.” Serai ane faraꞌu wiyawi ape fu irowei. 16 Wanure! Pereye fene marepi kuseriyei fene lo au teꞌe fiyarisiya. Yo seni apou ape luwaru aꞌi tene. 17 Serai ane peri ta fene maꞌe au teꞌesiya. Fene yo seni aseyaro waraꞌi aꞌi soꞌoruwe tepaꞌasiye. Sosu fene yo seni aseyaro waraꞌi aꞌi iro taꞌame su, fene yo seni luwaru aꞌi irowei.i