Lu taune, maꞌaru etiri neꞌese irosiya ape, weiyai!
5
Sosu aꞌi pe fene werese, maꞌaru etiri tomu neꞌese irosiya ape, ane fene maꞌe au teꞌesiya. Nowe meꞌiye su fene marepi orese erasi aꞌi teritenamiyei. Fene luwei erasi irote. Fene etiri luwaru orese aꞌi teriteyei su, fene fofowei erasi aꞌi ne hare utete. 2 Etiri werese aꞌi fene lo uwase tepaꞌasiyei. Ipari tahe werese fene lo aseye mowaꞌi lai a poꞌuteyei.a 3 Maꞌaru werese fene lo fene ani fu taꞌuwe aniye ape, werese uwase papaꞌuweyei. Lu taune tomu neꞌese maꞌaru werese papaꞌu aꞌi fene lo siyeyei su, lowe fene ne apou toteyei, “Sawi amou! Meni ape siyere! Le maꞌaru tomu neꞌese ani fu ani taꞌuwe aniye. Maꞌaru werese lo uwase papaꞌuwe poꞌuteye. Le etiri ta eterowata. Le meni luwaru aꞌi ne.” Maꞌaru papaꞌu aꞌi fene lo yehe wou aꞌi ne. Yehe ape lai tahe fene lo tiyei su, fene fofowei erasi aꞌi teriteyei. Apou aiwawe aꞌi maꞌaru fene lo lai fofowei erasi fene maꞌe au irowei. Fene maꞌaru etiri tomu neꞌese ani fu taꞌuwe ani tepaꞌasiye. Etiri ape mo nowe yeꞌewi se uwase papaꞌuwe poꞌuteye. 4 Fene maꞌaru etiri tomu neꞌese irosiya ape, lu tamo eteye su, fene lai lowe werese maꞌe teꞌe areareye. Fene lai ereti fene lo sahe maꞌaru tewi lowe lo aniteye. Wanure! Lowe fene maꞌe maꞌaru lowe lo ne ai peri se hareyei erasi uteye. Lu taune awei fene lo loꞌu taꞌeye ape, lowe fene maꞌe ai peri uteye. Hareyei erasi lowe lo uteyei su, Owane Pefine aꞌi lai peri noꞌu lowe lo wanu tepaꞌasiyei. Le aꞌi lai yo seni luwaru aꞌi tote tawesinamirowa.b 5 Fene awei sato ironamiteye su, fene etiri tomu neꞌese taꞌuwe aniye. Wesi fene lo erasi wiyeme aꞌi ne. Fene marepi towafi fene lo umasiteye. Fene apou totesiya, “Ane etiri tomu neꞌese irosiya. Ane marepi wisere aꞌi totenamisiya. Ane faraꞌu marepi luwaru aꞌi tote umasiyei.” Fene fe omowe wou aꞌi ne. Sosu fe erasi piyoꞌu aꞌi heneraiyei su, lu tamo eine se neiyei. Sosu fe loꞌu ene ateyei. Fene lai fe omowe wou aꞌi ne. Nowe meꞌiye se, Owane Sitewi lai fene aine teraꞌeyei.c 6 Fene lai lu waraꞌi aꞌi au hese eti ereiye. Fene lowe ne peri areareye. Fene lowe maꞌe eiye, “Fene fu temeniyere.” Lowe fene maꞌe peri ta itiyaꞌu au teꞌerowata.Peri apou ape au teꞌe wisereyesiya.
7 Sosu aꞌi pe kaiyemo mo, fene peri ano wanure! Nowe meꞌiye se marepi orese aꞌi fene maꞌe heneraiyei. Fene kairefi aꞌi teite. Nowe tase Meni Owane Pefine nomo lo lai si tame itorairowa. Nomo le ne fu ninawete. Apou aꞌi meni ta awei lo sahe one, sawi yehe sameyei. Le mi mi tomu neꞌese ninawe ninaweteye. Nowe meꞌiye su, one, sawi loꞌu taꞌeye. Fene aiwawe aꞌi. Fene Meni Owane Pefine aꞌi ne ninawete.d 8 Wanure! Owane Jisas si tame itoraiyei ape, nowe ape ataheyewa. Fene marepi fene lo au kairefiyete. Fene marepi fetane aꞌi irote. Sosu fene le ne ninawete.e 9 Meni ta peri luwaru aꞌi fene maꞌe au teꞌeyei su, fene le maꞌe ai peri itiyaꞌu owe ape au teꞌere. Fene meni ape lo yo seni owe ape au hese ereire. Fene le maꞌe au hese ereiyei su, Meni Owane Pefine lai fene maꞌe au hese eti ereiyei. Wanure! Meni Owane Pefine lu taune werese lo yo seni au hese ereiyei ape, ataheyeraiwa. 10 Kaiyemo mo, tu naifa weriyei Owane Sitewi lo peri au teꞌe siye lu werese ne, fene yo seni lowe lo totere. Nowe tomu neꞌese lu tamo lowe maꞌe au luwaruweteye su, lowe kairefi aꞌi teiteye. Sosu lowe yo seni aseyaro aꞌi ironamiteye. Fene yo seni apou ape lowe lo fu umasite. 11 Lu ape mo, lowe lai fofowei erasi aꞌi teriteteye. Sosu lowe Owane Sitewi lo marepi ne kairefi aꞌi teinamiteye. Serai nomo lowe ne apou teꞌesiya, “Lu ape mo wisere aꞌi ne!” Tu naifa weriyei Owane Sitewi lo one towe sahe meni ta iyape Jop, fene meni ape lo peri heneruwe wanuwe awere? Le marepi orese tomu neꞌese aꞌi teritenamiteye. Sepei Satan lai nohuweripi awaripi lo au luwaruweye. Le enite kairefi aꞌi tahe werese lo sahe au fuwe. Etiri werese lo yehe ti seroꞌo poꞌuteye. Weiya! Etiri orese tomu neꞌese meni ape au napetu luwaruweye su, le Owane Sitewi lo ne kairefi aꞌi teinamiteye. Sosu etiri orese aꞌi poꞌuteye su, Owane Sitewi lai le maꞌe marepi ferafereiyei lo auwe. Le meni ape etiri wisere tomu neꞌese si itiyaꞌu tame auwe.f
12 Kaiyemo mo, fene peri ano wanu etire! Fene peri ta teꞌe naneiyei su, fene apou owe au teꞌere, “Ane omo hire maꞌe lo iyape ane peri teꞌe naneisiya.” Aiwawe fene owe au teꞌere. Awei lo iyape se ane peri teꞌe naneisiya, sosu iyape tereꞌe tereꞌe se ane peri teꞌe naneisiya. Ahowa, fene peri teꞌe naneiyei owe ape au teꞌere. Fene apou toteyei su, “Ane etiri ape au irowei.” Serai fene apou fu eire, “Ei, ane etiri ape irowei.” Sosu fene apou toteyei su, “Ane etiri ape irowei taꞌama.” Serai fene apou fu eire, “Ahowa, ane etiri ape irowei taꞌama. Fene marepi hesiyei se toteyei su, Owane Sitewi lai marepi fene lo au hese ereiyei.”g
Jems apou eisiya, fene Owane Sitewi maꞌe au teꞌenamite.
13 Sosu aꞌi pe lu taune tamo fene mase irosiya ape, marepi orese aꞌi teritesiya awere? Lowe Owane Sitewi maꞌe marepi orese ape ne au teꞌe towerire. Lu taune tamo marepi nineꞌisiya awere? Lowe Owane Sitewi maꞌe omoyawi ahi wisere aꞌi fu irote. Owane Sitewi lo iyape ei ani arowere. 14 Lu taune tamo, fene mase irosiya ape, u tahe irosiya awere? Lowe Owane Sitewi lo wesi lu owane fu ei anire. Serai lowe aiyeyei su, lowe meni u tahe se ne Owane Sitewi maꞌe au teꞌe toweriyei. Owane wiyeme lo iyape se, lowe lai tuwai saꞌi tahe lo sahe au teineyei.h 15 Sosu lowe Owane Sitewi ne tote tawesisiya ape, lowe meni ape ne Owane Sitewi maꞌe au teꞌe toweriyei su, Owane Sitewi lai peri lowe lo wanuwei. Le meni ape u tahe se irosiya ape, au faraꞌuweyei. Meni ape yo seni luwaru aꞌi irowe su, Owane Sitewi lai yo seni luwaru aꞌi lo au sasari pamoweyei.i 16 Serai ane fene maꞌe au teꞌesiya. Fene yo seni luwaru aꞌi fene lo lu feni tiyati fene lo maꞌe au teꞌe areiyere. Sosu lowe fene ne Owane Sitewi maꞌe au teꞌe toweriyei. Serai Owane Sitewi lai yo seni luwaru aꞌi fene lo au faraꞌuweyei. Meni aseyaro waraꞌi ta Owane Sitewi maꞌe au ei toweriyei su, Owane Sitewi lai meni ape lo peri wanuwei. Serai etiri tomu neꞌese henerairowa. 17 Tu naifa weriyei meni ta iyape, Elaija, le meni nomo aiwawe aꞌi ne. Nowe tase le Owane Sitewi maꞌe apou ei toweriye, “Ane ne maꞌe peri ta ei towerisiya. Ne saꞌi hi maꞌe owe ape eimawe arosawire.” Owane Sitewi lai Elaija lo peri wanuwe. Serai iyu menei hesi heta, yame ereti feni werese feni taꞌi aꞌi saꞌi awei pani werese sahe itorai taꞌama.j 18 Sosu Elaija Owane Sitewi maꞌe apou ei toweriye. “Owane Sitewi, ne faraꞌu saꞌi hi awei se ito eimawe arosaire.” Owane Sitewi lai niꞌarawe maꞌe ei perati fiyariyewe, saꞌi erasi hi awei pani se itorai. Serai me loꞌu tomu neꞌese taꞌeteye.k
19 Kaiyemo mo, lu taune tamo, fene irosiya ape, Owane Sitewi lo peri wiyeme aꞌi meꞌiyeni maꞌe atati awetowei su, sosu yo seni luwaru aꞌi irowei. Sosu meni tereꞌe ta lai meni ape, yo seni luwaru aꞌi irowei ape, Owane Sitewi maꞌe si tame hene aitaiyei.l 20 Fene peri ano wanu etire! Meni ta yo seni luwaru aꞌi irowei su, sosu meni tereꞌe ta le Owane Sitewi maꞌe si tame hene aitaiyei. Owane Sitewi lai meni ape lo yo seni luwaru aꞌi au sasari pamoweyei. Meni ape meni yo seni luwaru aꞌi irowe ape, au pati ferafereiyei. Meni ape lo hepene temeniye taꞌame. Sosu Owane Sitewi lai yo seni luwaru aꞌi tomu neꞌese lo au sasarisawirowa. Ane Jems, one towe eite fene maꞌe lese ausawisiya. Peri tepaꞌasiye.m