1 Pita
One Towe Tutawe eite Pita lai Lese Ausawi
Pita lu taune werese eriteye.
1
Ane Pita Jisas Krais lo wiyawi taꞌane siye meni. Tu naifa le lai ane ariariyeye. Le lai ane peri lo au teꞌeyei ne eimawesawi. Ane one towe eite Owane Sitewi lo lu taune fene omo sitewi towafi lowe lo arunatiyewe, omo tereꞌe tereꞌe sahe faiyewe, irosiya. Fene lu taune omo pani Pontus sahe, sosu pani Galesia sahe, sosu pani Kapadosia sahe, sosu pani Esia sahe, sosu pani Bitinia sahe, ane fene maꞌe one towe eite ausawisiya. 2 Tu naifa weriyei Owane Sitewi lai fene werese siye soꞌoruweteye. Le fene teꞌi lu taune aseyaro waraꞌi aꞌi fa heneraiyei ne ariariyeye. Owane Sitewi lo Hepene Waraꞌi aꞌi wiyawi ape ironamisiya. Fene Jisas Krais lo peri wanu tote tawesi umasiteye su, le fene maꞌe fisaꞌi topo lo se saꞌi ani tanipase fiyariye. Yo seni luwaru werese aꞌi fene lo au sasari tepaꞌasiye su, serai fene Jisas Krais lo marepi fu umasinamite. Owane Sitewi lai fene maꞌe marepi ferafereiyei lo, aiwawe aꞌi fetane aꞌi lo erasi wiyeme aꞌi aurowa.aMarepi hepene heꞌi wiyeme aꞌi nomo ne hire omo se yaro ninawesiya.
3 Owane Sitewi lai nomo werese maꞌe seremareyeyei lo aunamiteye. Serai nomo marepi hepene norohu heꞌi aꞌi henerai. Le Jisas Krais tapiye fisiye sahe si tame taꞌane norohuwe sineye su, le nomo maꞌe marepi hepene heꞌi aꞌi auwewe, nomo le ne ninawenamisiya. Serai nomo werese Owane Sitewi, nomo lo ne Owane Jisas Krais lo tai nomo lo iyape lo pei ei ani arowete. 4 Owane Sitewi lai nomo au ariariye tepaꞌasiye. Sosu le nomo maꞌe marepi hepene heꞌi aꞌi auwe. Le nomo omo hire maꞌe hene anirowa. Nomo omo hire maꞌe wirowa su, nomo, etiri werese ape le teꞌe naneiye ape, nomo maꞌe aurowa. Etiri ape mo aseyaro waraꞌi aꞌi ne. Lowe uwaserowata. Ahowa, etiri werese ape mo mi mi pasi pasi tei ironamitorowa.b 5 Fene lai Krais ne tote tawesi umasisiya. Serai Owane Sitewi lai fene kairefi lo se au noweinoweisiya. Le lai fene mi mi pasi pasi au noweinoweiteyei. Serai nowe yeꞌewi su, Owane Sitewi lai lu taune werese maꞌe amerame aꞌi au atuaturowa. Le lu taune, le ne tote tawesiteye ape, omo hire maꞌe hene ani wirowa.c 6 Serai fene werese marepi wisere aꞌi irore. Fene awei sato irosiya su, fene marepi orese aꞌi teritesiya. Ahowa, fene nowe oso aꞌi se, marepi orese aꞌi teritesiya. Fene marepi orese aꞌi teritesiya su, fene Owane Sitewi ne totenamite. Serai fene marepi wisere aꞌi ironamirowa.d 7 Piyene fene marepi orese aꞌi teritesiya awere? Owane Sitewi lai tote tawesiyei fene lo siye soꞌoruwesiya. Tote tawesiyei fene lo kairefi aꞌi irosiya awere? Marepi orese aꞌi fene maꞌe heneraiyei su, fene Owane Sitewi ne tote tawesiyei fene lo ape aweraꞌiyenatiyei awere? Apou wou aꞌi gol totere. Meni ta gol yehe sahe leiyei su, le gol wiyeme aꞌi siye soꞌoruweyei. Ahowa, lu tamo gol werese faraꞌu au ani luwaruwe poꞌuterowa. Tote tawesiyei fene lo gol hi ani fu ararosiya. Tote tawesiyei fene lo mi mi pasi pasi tei uwateyenamitorowa. Nowe yeꞌewi se, Owane Sitewi lai Jisas lu taune maꞌe amerame aꞌi au atuaturowa. Nowe ape se le fene maꞌe iyape erasi aꞌi aurowa. Le fene maꞌe au eirowa, “Yo seni fene lo aseyaro waraꞌi aꞌi ironamiteye.” Le fene maꞌe mi erasi aꞌi aurowa.e 8 Fene Owane Jisas Krais siye taꞌame. Ahowa, fene le ne marepi erasi aꞌi tote wawesiyenamisiya. Fene pereye nowe eite se, fene le siye se taꞌame. Ahowa, fene le ne tote tawesi umasinamisiya. Serai fene nineꞌiyei erasi aꞌi le ne totesiya. Nineꞌiyei erasi aꞌi fene lo erasi wiyeme aꞌi irosiya. Fene ahi se eiwerou au teꞌerowata. Nineꞌiyei ape Owane Sitewi lo mi erasi aꞌi temeꞌeriyesiya.f 9 Fene le ne tote tawesisiya su, le lai fene omo hire lo maꞌe hene wirowa. Serai fene le mase mi mi pasi pasi ironamitorowa. 10 Marepi hepene heꞌi aꞌi Owane Sitewi lai fene maꞌe auwe ape ne, Owane Sitewi lo peri au teꞌe siye lu werese peri ape ne au teꞌeye. Lowe apou leseye, “Nowe tase Owane Sitewi lai awei sahe itorairowa. Le yo seni luwaru aꞌi fene lo au ani sasari pamowerowa. Sosu lowe maꞌe marepi hepene heꞌi norohu aꞌi aurowa.” Owane Sitewi lo peri au teꞌesiye lu ape mo Owane Sitewi maꞌe apou teꞌeye, “Ne peri no ape nomo maꞌe au atuatu areiyere.”g 11 Tu naifa weriyei Krais itorai taꞌame su, Krais lo hepene lu ape mo maꞌe peri lo ape au teꞌe areiyeteye. Le apou au teꞌeteye, “Meni Krais nowe tase awei sahe itorairowa su, le fofowei erasi teriterowa. Sosu le Krais maꞌe iyape erasi aꞌi ei ani arowerowa.” Lu tewi ape mo lowe apou teꞌe toweriteye, “Eiwerou su etiri ape henerairowa awere? Meni ape Krais le eiwerai awere?”h 12 Owane Sitewi lai lowe maꞌe au teꞌeye, “Peri ano ape fene au teꞌeye ape, fene etiri ape henerai siyerowata. Ahowa, peri ano ape nowe meꞌiye su henerairowa. Lu taune tamo peri ano ape wanurowa su, lowe Krais ne wanu soꞌoruwerowa. Peri ano ape lai lowe au pati anirowa.” Owane Sitewi lai Hepene Waraꞌi aꞌi lo awei hi maꞌe eimawe arosai. Sosu Owane Sitewi lo wiyawi ani siye lu ape fene maꞌe peri heneruwe ape au teꞌe areiyeteye. Peri ape Owane Sitewi lai hi maꞌe au teꞌe arosai ape, Owane Sitewi lo ipari wisere aꞌi ape mo, lowe peri ape wanu soꞌoruwereme. Ahowa, lowe peri ape wanu soꞌoruwerowata.
Fene lu taune werese yo seni waraꞌi aꞌi irote.
13 Serai nowe weriyei weriyei marepi fene lo taꞌuwe naneite. Fene yo seni fene lo siye etite. Ferafereiyei lo etiri werese Owane Sitewi lai fene maꞌe aurowa ape, fene marepi tote eti tawesite. Nowe yeꞌewi se Owane Sitewi lai Jisas lu taune maꞌe amerame aꞌi au atuaturowa su, fene etiri werese ape mo aniyei ne ninawenamite. 14 Tu naifa fene awei lo yo seni umasiteye. Fene awei lo yo seni umasiteye su, fene marepi aseyaro aꞌi ape soꞌoru taꞌama. Ahowa, pereye nowe eite se fene Jisas Krais lo yo seni umasinamisiya. Fene Owane Sitewi lo eimane ne. Serai fene Owane Sitewi lo peri werese fu wanu umasite. Fene awei lo yo seni werese si owe umasite.i 15 Owane Sitewi lai fene ariariyeye ape, le meni waraꞌi aꞌi wiyeme aꞌi ne. Serai fene etiri werese irorowa ape, fene yo seni aseyaro irote. 16 Piyene awere? Wanure! Tu naifa meni ta Owane Sitewi lo one towe sahe apou leseye,
“Owane Sitewi apou eiye, Yo seni marepi werese ano waraꞌi wiyeme aꞌi ne. Serai fene aiwawe aꞌi yo seni marepi aseyaro fu ironamite.” Wkp 11:44-45; 19:2; 20:7
17 Fene Owane Sitewi pefine ne apou au teꞌesiya, “Ne Tai Pefine nomo lo ne.” Owane Sitewi lai lu taune taꞌi taꞌi aꞌi lo yo seni werese aiwawe aꞌi siye eti ereiyei. Serai fene awei sato irosiya su, fene yo seni fene lo ne marepi erasi aꞌi tote etire. Fene Tai fene lo ne atoweiye aꞌi ironamite.j 18 Fene peri eite soꞌoruwesiya! Tu naifa yaꞌariyei fene lo awei lo yo seni umasinamiteye. Lowe awei lo yo seni umasiteye su, lowe marepi hepene heꞌi ani taꞌame. Awei lo yo seni yahowaꞌi aꞌi lowe lo fene maꞌe henerai. Serai Jisas Krais hi awei maꞌe itorai su, le yo seni luwaru aꞌi fene lo maꞌaru se ete taꞌame. Maꞌaru werese uwase poꞌuterowa. 19 Ahowa, Jisas Krais me tapeꞌi sahe temeniyeye su, Owane Sitewi lai yo seni luwaru aꞌi fene lo Jisas lo fisaꞌi se eteye. Fisaꞌi lo maꞌaru werese ani fu arowei. Owane Sitewi lai Jisas lo fisaꞌi wisere aꞌi aniye su, le fisaꞌi lo se lu taune werese lo yo seni luwaru aꞌi eteye. Jisas le yo seni luwaru aꞌi iro taꞌame. Serai le fe sipsip waraꞌi aꞌi wou aꞌi ne.lk 20 Tu naifa weriyei weriyei Owane Sitewi awei pani werese taꞌane taꞌame su, Owane Sitewi Meni Krais lu taune lo yo seni luwaru aꞌi ete aniyei ne ariariyeye. Pereye nowe eite se le hi awei maꞌe amerame aꞌi fene au pati ferafereiyei ne itorai.m 21 Fene peri lo wanu umasinamiteye su, fene Owane Sitewi ne tote anite tawesi umasinamiteye. Owane Sitewi lai Jisas fisiye sahe si tame taꞌane norohuwe hene aniye. Le le maꞌe iyape erasi aꞌi auwe. Serai fene Jisas lo yo seni umasiteye su, fene Owane Sitewi ne tote tawesiteye. Sosu fene le ne ninawesiya. Le fene omo hire lo maꞌe hene wirowa.n
22 Fene Owane Sitewi lo peri wanu umasiye su, marepi hepene fene lo aseyaro aꞌi henerai. Serai fene ahi yahowaꞌi se lu taune maꞌe apou owe ape teꞌere, “Ane ne marepi erasi aꞌi tote wawesiyenamisiya.” Ahowa, fene lu taune werese marepi fene lo se marepi erasi aꞌi tote wawesiyenamite.o 23 Mai fene lo fene auteiye su, fene temeniyerowa. Ahowa, Owane Sitewi lai marepi hepene heꞌi norohu aꞌi auwe su, hepene heꞌi aꞌi ape temeniyerowata. Ahowa, fene mi mi pasi pasi weriyei tei ironamitorowa. Marepi hepene heꞌi aꞌi fene lo Owane Sitewi lo peri pefine aꞌi maꞌe fai. Owane Sitewi lo peri pefine aꞌi ape lai mi mi pasi pasi weriyei tei ironamisiya. Aiwawe aꞌi peri ape lai marepi hepene fene lo papu ironamisiya. 24 Tu naifa Owane Sitewi lai one towe sahe apou teꞌeye,
“Lu taune werese senarepe wou aꞌi ne. Yo seni wisere aꞌi lowe lo senarepe su wou aꞌi ne. Senarepe werese foroꞌoweyei. Senarepe su aiwawe aꞌi winetaiyei.
25 Ahowa, Meni Owane Pefine aꞌi lo peri werese mi mi pasi pasi weriyei ironamisiya.” Ais 40:6-8
Owane Sitewi lo peri pefine aꞌi ape lu tamo fene maꞌe au teꞌe areiyeteye ape, peri ape lai Krais lo peri heneruwe wisere aꞌi ne.