2
Meni Owane wiyeme lo peri mi mi pasi pasi ironamisiya. Serai nomo yo seni luwaru werese aꞌi fu arosawire. Fene peri wawero owe ape teꞌete. Fene marepi owe ape arearete. Fene marepi hesi aꞌi owe ape totete. Aiwawe aꞌi fene apou eiye, “Ane meni wisere aꞌi ne.” Sosu nowe meꞌiye su, fene yo seni luwaru aꞌi irowei. Marepi fene lo tote arearesiya. Fene etiri ta owe ape siye wisereyete. Sosu fene lu taune maꞌe owe ape teꞌe narute.a 2 Fene meni owane Jisas lo peri wanu umasiye su, fene eimane osu wou aꞌi henerai. Mai meni eime ta auteiyei su, meni eime ape lai moꞌu ayei ne lu tatai eteyei. Fene eimane osu aiwawe aꞌi ne. Fene Jisas lo peri heꞌi aꞌi wanu umasisiya su, fene Owane Sitewi lo peri mai lo moꞌu wou aꞌi ayei ne lu tataisiya. Fene Owane Sitewi lo peri wanuwei su, fene lu taune erasi aꞌi henerai. Sosu le nowe moꞌo su nomo omo hire lo maꞌe hene wirowa. 3 Peri ape wiyeme aꞌi ne. Fene meni owane wiyeme lo ferafereiyei teriteye su, fene Owane Sitewi lo peri werese ape mo tote umasinamite.bKrais tapiye norohu aiwawe aꞌi ne. Sosu lu taune ariariyeye ape.
4 Fene Meni Owane Jisas maꞌe fa aiyere! Le wesi me tou tutawe wou aꞌi ne. Le hepene se mi mi pasi pasi weriyei ironamisiya. Lu taune tomu neꞌese le ne apou teꞌeye, “Meni ape luwaru aꞌi ne. Nomo le ani fu arosawiyei.” Ahowa, Owane Sitewi lai meni ape ariariyeye. Le Owane Sitewi lo nihe se meni tutawe henerai. 5 Fene lai le aiwawe aꞌi ne. Fene wesi me tou kairefi wou aꞌi henerai. Owane Sitewi lai fene anirowawe, Owane Sitewi lo wesi wisere aꞌi taꞌanerowa. Fene meni au hese erei siye meni aseyaro henerairowa. Serai fene Jisas lo iyape se marepi hepene fene lo Owane Sitewi maꞌe au hese ereirowa. Owane Sitewi lai marepi hepene fene lo, fene au hese ereirowa ape, le marepi wisere aꞌi se ani nineꞌirowa.c 6 Tu naifa weriyei meni ta Owane Sitewi lo peri one towe sahe leseye. Wanure!
“Ane meni ta ariariyeye. Le wesi me tou tutawe wou aꞌi ne. Ane omo ano hire sahe wesi ta taꞌanerowa. Omo ape iyape eiyei Saion. Wesi me tou ape wisere aꞌi ne, le wesi me tou tutawe heneraiyei. Lu taune tamo meni ape ne wanu tote tawesiyei su, lowe le ne neritase aꞌi iro taꞌame. Marepi lowe lo wisere aꞌi totenamiyei.” Ais 28:16
7 Le lai meni wisere pefine aꞌi ne. Fene Owane Sitewi lo peri pefine aꞌi tote tawesisiya ape, le lai fene ne au pati ferafereiyei ne itorai. Ahowa, lu taune tamo le ne tote tawesi taꞌame ape, le me tou luwaru wou aꞌi henerai.
“Wesi taꞌane siye lu lai, wesi me tou luwaru aꞌi siyeye su, lowe wesi me tou ape ani fusawi. Ahowa, meni ta me tou kairefi aꞌi siyeye su, le me tou tutawe henerai.” Sng 118:22
8 Sosu meni tereꞌe Owane Sitewi lo peri one towe sahe leseye,
“Meni ape Owane Sitewi lai ariariyeye ape le wesi me tou kairefi wou aꞌi ne. Lu taune tamo me tou kairefi aꞌi ape se lowe apine ato tewiye awei sahe winetaiyei. Lowe le siyeyei su, lowe le ne neritaseyeye.” Ais 8:14-15
Piyene awere? Lowe Owane Sitewi lo peri wanuwe su, lowe Owane Sitewi lo peri arisinamisiya. Winetaiyei lowe lo ape, Owane Sitewi lai lo ne ariariyeye. 9 Ahowa, fene lu tewi ape mo wou taꞌama. Fene werese Owane Sitewi lai lu tewi lo ariariyeye. Fene meni owane tutawe lo wiyawi siye lu taune tewi ne. Owane Sitewi lo au heseyei lu taune ne. Fene lu tewi waraꞌi aꞌi ne. Fene Owane Sitewi lo lu tewi henerai tepaꞌasiye. Fene Owane Sitewi lo lu tewi ironamisiya su, fene lu taune werese maꞌe Owane Sitewi lo marepi wisere aꞌi fu au teꞌe fiyarire. Tu naifa fene pasi aꞌi ironamiteye. Fene yo seni luwaru aꞌi ironamiteye. Ahowa, Owane Sitewi lai fene pasi lo yo seni luwaru aꞌi nowe maꞌe ei aniye. Le lai fene mitaiyeyei lo yo seni aseyaro aꞌi irowei ne ei aniye.d 10 Tu naifa fene werese lu tewi yahowaꞌi ne. Ahowa, pereye nowe eite se fene Owane Sitewi lo lu tewi henerai. Tu naifa Owane Sitewi fene maꞌe au seremareye taꞌame. Pereye nowe eite se Owane Sitewi lai fene maꞌe au seremareyeye.e
11 Kaiyemo, ane fene maꞌe peri kairefi aꞌi au teꞌesiya. Fene lu taune omo eyeri maꞌe fai wou aꞌi ne. Serai lu taune tomu neꞌese yo seni fene lo soꞌoru taꞌama. Serai ane fene maꞌe peri kairefi aꞌi au teꞌesiya. Fene tafaꞌe yo seni owe ape irote. Yo seni ape tahe paꞌare marepi fene lo au luwaruweteyei.f 12 Lu taune tomu neꞌese Jisas lo yo umasi taꞌame. Lowe yo seni fene lo peri luwaru aꞌi teꞌe naruwei su, fene yo seni aseyaro aꞌi fu irote. Sosu lowe yo seni waraꞌi aꞌi fene lo siyeyei su, lowe yo seni waraꞌi aꞌi fene lo marepi se tote tawesi umasiyei. Jisas hi awei maꞌe itorairowa su, lowe Owane Sitewi lo iyape ei ani arowerowa.g
13 Wanure! Fene awei lo lu owane werese lo peri wanu umasite. Fene awei lo lu owane lo peri wanu umasiyei su, fene meni owane pefine nomo lo iyape ei ani aroweyei. Ei, awei lo meni owane tutawe, fene peri lo fu wanu umasite. Le meni erasi kairefi aꞌi ne. Le lu taune werese au noweinoweisiya.h 14 Awei lo lu owane tereꞌe lowe awei pani tewi aꞌi tewi aꞌi au noweinoweisiya. Awei lo meni owane tutawe lu taune maꞌe eimawesawi. Lu taune tamo yo seni luwaru aꞌi irowei su, le meni owane ta yo seni luwaru aꞌi lowe lo au fareraiyeyei ne eimawesawiyei. Lu taune tamo yo seni aseyaro aꞌi irowei su, le lowe maꞌe peri wisere aꞌi ausawiyei. 15 Sosu fene yo seni aseyaro aꞌi irowei su, fene Owane Sitewi lo marepi umasiyei. Fene yo seni aseyaro aꞌi irowei su, fene lu meremereye aꞌi lo peri einamiyei. Serai lowe fene ne teꞌe narurowata.i 16 Owane Jisas Krais yo seni luwaru aꞌi fene lo si ete hene aniye. Serai fene Owane Sitewi lo lu taune tewi henerai. Fene yo seni luwaru aꞌi unahi owe ape irote. Fene apou owe ape teꞌere, “Ane Owane Sitewi lo lu tewi aꞌi ne. Serai ane faraꞌu yo seni luwaru aꞌi irowei.” Ahowa, fene apou owe ape teꞌere. Fene Owane Sitewi lo wiyawi yahowaꞌi siye lu taune ne. 17 Fene marepi wisere aꞌi lu taune werese maꞌe totete. Lu taune werese Jisas lo yo umasisiya ape, fene lai lowe ne marepi erasi aꞌi tote wawesiyenamite. Aiwawe aꞌi fene Owane Sitewi ne marepi wisere aꞌi se atoweiyete. Awei lo meni owane tutawe, fene le ne marepi wisere aꞌi totete.j
18 Ane wiyawi yahowaꞌi siye lu taune maꞌe au teꞌesiya. Fene wiyawi meni owane fene lo lo peri wanu umasite. Fene peri lowe lo wanu umasiyei su, fene marepi wisere aꞌi lowe maꞌe totete. Wiyawi lu owane tamo wisere aꞌi ne. Lowe tamo fene maꞌe marepi fetane aꞌi au iroteye. Aiwawe aꞌi wiyawi lu owane tamo marepi orese aꞌi fene maꞌe au irowe. Serai ane fene maꞌe tame teꞌesiya. Fene wiyawi lu owane werese maꞌe marepi wisere aꞌi totete.k 19 Fene yo seni aseyaro aꞌi ironamiyei su, sosu meni owane fene lo feni maꞌe au luwaruweyei su, fene Owane Sitewi lo marepi tote umasite. Wiyawi meni owane lai fene maꞌe au luwaruweyei su, fene kairefi aꞌi teite. Fene le maꞌe etiri luwaru aꞌi ta itiyaꞌu owe ape irore. Owane Sitewi lai yo seni wisere aꞌi fene lo siyeye su, le fene ne au ei wisereyeyei. 20 Fene yo seni luwaru aꞌi irowewe, le tahe fene lo sahe wafei se aineyei su, fene le maꞌe etiri ta luwaru aꞌi itiyaꞌu au taꞌame. Ahowa, Owane Sitewi fene maꞌe au wisereyeyei awere? Fene yo seni wisere aꞌi irowei su, sosu wiyawi meni owane fene maꞌe wafei se aineyei su, fene marepi fetane aꞌi iroteyei. Yo seni luwaru aꞌi ape, le fene maꞌe au irowe ape, Owane Sitewi siyeye. Sosu le fene maꞌe au ei wisereyeyei.l 21 Krais Jisas lo yo seni aseyaro waꞌari aꞌi ne. Sosu le fofowei erasi aꞌi fene ne teriteye. Serai fene Krais lo fofowei erasi aiwawe aꞌi terite umasite. Ei, Owane Sitewi lai fene yo seni apou ape lo umasiyei ne ei aniye.m
22 “Le yo seni luwaru aꞌi iro taꞌame. Aiwawe aꞌi le peri wawero aꞌi ahi lo se au teꞌe taꞌame.” Ais 53:9
23 Lu tamo le au teꞌe naruwe su, le lowe maꞌe etiri luwaru aꞌi itiyaꞌu au teꞌe naru taꞌame. Le tahe sahe fofowei erasi aꞌi teriteye su, le ai peri luwaru aꞌi lowe maꞌe au teꞌe taꞌame. Ahowa, le tahe paꞌare hepene topo lo Owane Sitewi ereti se maꞌe auwe. Ei, Owane Sitewi lai etiri werese wiyeme aꞌi se au hese ereirowa. Le yo seni lo waraꞌi aꞌi ne.n 24 Ei, Jisas Krais me tapeꞌi sahe temeniyeye su, le yo seni luwaru werese aꞌi nomo lo tahe paꞌare lo sahe eteye. Piyene awere? Nomo le ne tote tawesi umasinamisiya su, nomo yo seni luwaru werese aꞌi fa fu arosawinamire. Ei, nomo yo seni aseyaro waraꞌi aꞌi fu ironamire. Jisas me tapeꞌi sahe fofowei erasi teriteye su, fene lu taune aseyaro aꞌi henerai.o 25 Nowe tomu neꞌese fene Owane Sitewi lo yo maꞌe meremereye uweiteye. Fene fe sipsip wou aꞌi ne. Meni ta fe sipsip au noweinoweiyei su, fe sipsip yo amerame aꞌi sahe uweiteyei. Ahowa, fe sipsip au noweinowei siye meni ariye su, fe sipsip yo amerame aꞌi siyerowata. Lowe yo maꞌe taꞌi taꞌi aꞌi meremereyeti fiyari howeiyei. Tu naifa fene fe sipsip lo yo seni aiwawe aꞌi iroteye. Pereye nowe eite se fene fe sipsip au noweinowei siye meni pefine aꞌi maꞌe si tame fai. Le marepi hepene fene lo mi mi pasi pasi au noweinoweinamisiya.p