Lu taune naituwei lo peri.
3
Sosu aꞌi pe ane taune meni se ape maꞌe au teꞌesiya. Fene, meni fene lo, lo peri wanu umasite. Wanure! Meni no Owane Sitewi lo peri umasi taꞌame su, le yo seni wisere aꞌi no siyeyei su, le yo seni no ne apou aꞌi toteyei, “Tani ano lo yo seni wisere aꞌi irosiya. Piyene le yo seni wisere aꞌi irowe awere? Ane marepi lo siye etiyei. Ane Jisas lo yo aiwawe aꞌi umasiyei awere?” Serai menitani ape peri eresene aꞌi su le meni lowe lo Jisas maꞌe henetiyei.a 2 Le yo seni waraꞌi aꞌi no siyeyei su, le ne ne marepi wisere aꞌi toteyei. Ne meni fene lo unahi iroteyei su, meni fene lo Jisas maꞌe wanu umasirowa. 3 Taune, fene tahe werese owe ape lesere! Mato towe fene lo fene etiri tomu neꞌese sahe owe ape ti tawesire! Fene niꞌaripe, maꞌaru tomu neꞌese owe ape ani lesere! Ipari tahe wisere aꞌi owe ape ani asire!b 4 Ahowa, marepi hepene fene lo wisere aꞌi papu irosiya ape, fene yo seni aseyaro aꞌi au lesere. Fene ai marepi owe ape totenamite! Yo seni fene lo momotei aꞌi irote! Etiri wisere ape mo luwaru poꞌuterowata. Peri werese fene lo aiwawe aꞌi momotei aꞌi irote! Fene etiri werese ape mo irowei su, Owane Sitewi lo nihe se etiri ape mo ne, le tote wisereyeyei. 5 Tu naifa weriyei taune tamo Owane Sitewi lo teꞌe naneiyei ape ninawenamiteye, lowe yo seni werese lowe lo aseyaro aꞌi iroteye. Lowe meni lowe lo peri wanu umasiteye. Lowe meni lowe lo unahi iroteye. Lowe yo seni aseyaro apou ape marepi hepene lowe lo au lesenamiteye. Yo seni werese lowe lo aseyaro aꞌi ironamiteye. 6 Menitani taꞌi iyape Sara, le meni lo, Abraham lo peri werese wanu umasiteye. Le Abraham maꞌe apou eiye, “Ne meni owane ano ne.” Fene yo seni aseyaro apou ape irowei su, sosu etiri tamo atoweiye taꞌame su, fene Sara lo eimane wou heneraiyei.c7 Sosu aꞌi pe ane lu taune maꞌe au teꞌesiya. Tani fene lo kairefi se taꞌame. Kairefi no erasi aꞌi irosiya. Serai fene tani fene lo maꞌe peri momotei aꞌi au teꞌete! Tani fene lo Owane Sitewi lo yo umasiteye su, fene iyape lo ei ani arowete! Owane Sitewi lai fenesi marepi hepene heꞌi aꞌi auwe. Sosu fenesi mi mi pasi pasi ironamisiya. Fene tani fene lo au wisereye nineꞌiyei su Owane Sitewi lai etiri ape mo fene teꞌe toweriyei ape, fene maꞌe itiyaꞌu wanurowawe, aurowa.d
8 Ane etiri tamo fene werese maꞌe au teꞌesiya. Nomo werese marepi taꞌi aꞌi tote tawesite! Meni ta, menitani ta marepi orese aꞌi teriteyei su, fene marepi ferafereiyei lowe maꞌe au irote. Fene lu werese ne kaiyemo aiwawe aꞌi au irote! Fene lu taune werese au pati ferafereite! Sosu fene iyape towafi fene lo owe ape ei ani arowete! Fene etiri apou ape irowei su, Owane Sitewi lai fene ne au teꞌe wisereyeyei. 9 Meni ta fene maꞌe au luwaruweyei su, fene etiri luwaru aꞌi itiyaꞌu owe ape irote! Meni ta peri luwaru aꞌi fene maꞌe au teꞌeyei su, fene peri luwaru aꞌi itiyaꞌu owe ape teꞌete! Ahowa, meni ta peri luwaru aꞌi fene maꞌe au teꞌeyei su, fene peri wisere aꞌi le maꞌe itiyaꞌu au teꞌere! Piyene awere? Owane Sitewi lai fene etiri ape irowei ne ei aniye ape fene maꞌe apou eiye, “Ane fene au pati ferafereiyei. Ane etiri wisere tomu neꞌese fene maꞌe auwei.” Serai fene lu ape mo maꞌe peri wisere aꞌi itiyaꞌu au teꞌete! 10 Meni ta Owane Sitewi lo peri one towe sahe leseye,
“Meni apou toteyei su, ‘Ane marepi hepene heꞌi aꞌi fu aniyei. Ane marepi wisere aꞌi mi mi weriyei ironamirowa.’ Fene marepi apou ape toteyei su, fene peri luwaru aꞌi owe ape au teꞌete! Aiwawe aꞌi fene peri wawero aꞌi owe ape au teꞌete!
11 Le yo seni luwaru werese aꞌi meꞌiyeni maꞌe atati awetote! Sosu yo seni wisere aꞌi fu irote! Lowe lu taune werese maꞌe marepi erasi aꞌi tote wawesiyenamite! Sosu lowe maꞌe marepi fetane aꞌi aure! Lowe yo seni apou ape umasi irote!
12 Piyene awere? Owane Sitewi lai lu taune werese yo seni waraꞌi aꞌi irosiya ape, le lai lowe siyesiya. Lowe Owane Sitewi maꞌe etiri ta ei toweriyei su, le lai ei toweriyei lowe lo wanurowawe, etiri ape lowe maꞌe aurowa. Lu taune yo seni luwaru aꞌi irowei su, Owane Sitewi lowe siye eti areiyeyei. Lowe maꞌe ai marepi erasi aꞌi toterowa.” Sng 34:12-16
13 Fene yo seni waraꞌi aꞌi ironamiyei su, eiwerai fene maꞌe au luwaruweyei awere? Fene yo seni waraꞌi aꞌi ironamiyei su, lu tamo tereꞌe fene maꞌe etiri tamo au luwaruwerowata. 14 Fene yo seni aseyaro aꞌi ironamirowa su, sosu lu tamo fene maꞌe au luwaruweyei su, Owane Sitewi lai fene maꞌe marepi wisere aꞌi auwei. Lowe fene maꞌe au luwaruweyei ne toteyei su, “Fene lowe ne owe ape atoweiyere! Aiwawe aꞌi fene marepi orese aꞌi owe ape totere!”e 15 Meni Owane Krais marepi fene lo papu ironamite. Fene apou totere, “Meni Owane Krais le Owane tutawe nomo lo ne.” Fene mi mi werese Owane Sitewi lo peri totenamite. Serai lu tamo fene maꞌe apou ei toweriyei su, “Piyene ne Owane Sitewi ne au pati ferafereiyei ne ninawenamisiya.” Ne faraꞌu Owane Sitewi lo peri lowe maꞌe itiyaꞌu au teꞌere! Fene lowe maꞌe Owane Sitewi lo marepi au teꞌeyei su, fene peri momotei aꞌi se lowe maꞌe au teꞌere! Fene yo seni waraꞌi aꞌi lowe maꞌe au atuatute! 16 Lu tamo Krais lo yo seni waraꞌi aꞌi, fene papu irosiya ape, au teꞌe naruwei su, fene marepi aseyaro waraꞌi aꞌi tote anite tawesinamite! Lu tamo yo seni aseyaro fene lo ne teꞌe naruwei su, Owane Sitewi lai lowe maꞌe au neritaseyeyei.f 17 Fene yo seni aseyaro waraꞌi aꞌi irowei su, Owane Sitewi lo marepi fene ne apou totesiya, faraꞌu fene fofowei erasi teriteyei. Ape wiyeme aꞌi ne. Ahowa, fene yo seni luwaru aꞌi irorowawe, fofowei erasi teriteyei su, Owane Sitewi ate fene ne au wisereyerowata. 18 Krais nowe taꞌi aꞌi se yo seni luwaru werese aꞌi ani sasari pamoweyei ne temeniyeye. Serai nomo mi mi pasi pasi temeniyerowata. Le yo seni aseyaro waraꞌi aꞌi ironamiteye. Nomo werese yo seni luwaru aꞌi ironamiteye. Serai le yo seni luwaru werese nomo lo ani sasari pamowe poꞌutesawi. Sosu le nomo werese Owane Sitewi maꞌe heneti. Lu tamo tahe paꞌare me tapeꞌi sahe aine teraꞌe ti tawesiye. Ahowa, Owane Sitewi lai hepene lo fisiye papu si tame taꞌane norohuwe sineye. Pereye le mi mi pasi pasi hepene se ironamisiya. 19 Krais lo hepene lai lu taune lo Hepene werese aꞌi maꞌe kalabus wesi iroteye ape, peri lo au teꞌe areiyeyei ne fi. 20 Lu taune lo Hepene ape mo ne, tu naifa weriyei meni Noa awei sahe iroteye ape, lu taune werese mi mi weriyei Owane Sitewi lo peri arisiteye. Sosu Owane Sitewi lai lowe marepi towafi lo fa irowei ne au arunamiteye. Sosu Noa wai erasi taꞌaneye su, lowe Noa maꞌe teꞌe naruteye. Wai erasi ape taꞌane tepaꞌasiye su, Owane Sitewi lai meni Noa nohuweripi awaripi wai ape papu hene wiye. Lu taune ereti feni werese feni hesi heta (8) wai ape papu hene wiye. Saꞌi erasi niꞌarawe maꞌe itorai su, lu taune werese awei sahe iroteye ape, saꞌi lai ani aporuwe. Noa lo lu feni wai ape papu wisere aꞌi onu ereteye.g 21 Saꞌi ape apou wou aꞌi ne. Meni ta saꞌi au huwei su, fene Owane Sitewi maꞌe apou eiyei, “Ane yo seni luwaru werese aꞌi ano atati aresaiyeye. Ne marepi ano waraꞌi aꞌi au irote.” Saꞌi ape awei peperi tahe nomo lo sahe iroteye ape, au hu taꞌame. Ahowa, marepi waraꞌi aꞌi se nomo Owane Sitewi maꞌe apou teꞌe toweriye, “Ne nomo au pati ferafereite.” Owane Sitewi peri ta nomo maꞌe au teꞌe naneiye. Jisas me tapeꞌi sahe temeniyeye su, Owane Sitewi lai le fisiye papu si tame taꞌane norohuwe sineye. Serai le nomo werese aiwawe aꞌi fisiye papu si tame taꞌane norohuwe sinerowa. 22 Jisas si tame sineye su, le Owane Sitewi lo omo hire maꞌe wiye. Le Owane Sitewi lo ereti eyate feni maꞌe onunamisiya. Owane Sitewi lai etiri werese Jisas unahi maꞌe fuwe. Owane Sitewi lo ipari wisere aꞌi, ipari lo owane werese, sosu etiri werese kairefi aꞌi hire maꞌe irosiya ape, Owane Sitewi lai lowe werese Jisas unahi maꞌe funamiteye.