Fene Owane Sitewi lo peri wanu tote tawesite!
4
Lu tamo owane Krais maꞌe fofowei erasi au irowe su, serai fene yo seni lo erasi aꞌi totere! Fene yo seni lo apou ape umasinamite! Lu taune tamo Krais lo wiyawi taꞌanerowawe, tahe paꞌare lowe lo maꞌe fofowei erasi aꞌi teriteyei su, lowe yo seni luwaru aꞌi marepi hepene towafi lowe lo papu iro taꞌame.a 2 Lowe Krais lo yo seni aiwawe aꞌi umasinamiyei su, lowe mi mi, awei sato iroteyei ape, lowe awei lo yo seni werese aꞌi owe ape irote. Ahowa, lowe Owane Sitewi lo marepi fa wanu tawesi umasinamite. 3 Nowe tu naifa fene owane Krais lo marepi tote tawesi taꞌame su, lu taune tomu neꞌese yo seni luwaru aꞌi ironamiteye. Fene aiwawe aꞌi yo seni luwaru aꞌi lowe lo umasinamiteye. Fene tafaꞌe yo seni lo marepi toteteye. Fene taune siye wisereyeteye. Saꞌi meremereye aꞌi ateye. Fene saꞌi meremereye aꞌi ateye su, fene yo seni meremereye aꞌi iroteye. Fene lu taune tomu neꞌese taꞌuwe hereiyei ta ei aniye. Lowe taꞌuwe hereiyei ape maꞌe taꞌuwerai su, lowe saꞌi meremereye aꞌi anamiteye. Serai lowe yo seni meremereye aꞌi ironamiteye. Fene god wawero neꞌese aꞌi taꞌaneteye su, fene iyape lowe lo ei ani aroweteye. Yo seni ape luwaru aꞌi tene! Tu naifa fene yo seni apou ape umasinamiteye. Pereye nowe eite se fene yo seni luwaru aꞌi atati aresaiye arunatiyewe, Owane Sitewi lo marepi umasinamisiya.b 4 Serai fene Owane Sitewi lo marepi maꞌe atati aresaiye umasinamiye su, lu taune tomu neꞌese fene ne hepene se suꞌariteye. Lowe apou aꞌi toteye. Fene piyene yo seni luwaru aꞌi nomo mase iro taꞌame awere? Lowe fene maꞌe ai marepi se tote luwaruweteye. 5 Nowe yeꞌewi se, lu taune ape mo Owane Sitewi lo nihe sahe teirowa su, lowe yo seni luwaru werese aꞌi le maꞌe au teꞌerowa. Owane Sitewi lu taune etiyei nowe ape taꞌuwe tepaꞌasiye. Lu taune werese temeniyeye ape, lu taune norohu irosiya ape, le yo seni luwaru aꞌi lowe lo au hese eti ereirowa.c 6 Lu tamo Jisas lo peri lu taune maꞌe tu temeniyeye ape, au teꞌe areiye fiyariteye. Piyene awere? Aiwawe aꞌi ne. Tu naifa Owane Sitewi lai yo seni luwaru wou aꞌi lowe lo au hese ereiteye. Serai lowe temeniyeye. Lu taune werese aiwawe ne. Lowe Jisas lo peri wanuwe su, lowe Jisas ne tote tawesi umasiteye. Serai lowe temeniyeye su, hepene lowe lo Owane Sitewi mase mi mi pasi pasi ironamitorowa.Nowe yeꞌewi ataheyewa! Fene yo seni aseyaro ironamite!
7 Nowe yeꞌewi ataheyewa. Serai fene marepi wisere aꞌi tote etire. Fene yo seni waraꞌi aꞌi irote! Fene marepi wisere aꞌi toteyei su, fene faraꞌu Owane Sitewi maꞌe au teꞌe tiyatiteyei.d 8 Etiri tutawe fene tote anite tawesite! Fene lu taune, Jisas lo marepi umasiteye ape, fene lowe maꞌe marepi erasi aꞌi tote wawesiye tiyatinamite! Fene lu taune maꞌe marepi erasi aꞌi tote wawesiye tiyatinamiyei su, yo seni luwaru aꞌi lowe fene maꞌe au irowe ape, fene lai yo seni luwaru aꞌi lowe lo ape, tote iꞌanenamite.e 9 Lu taune tamo fene maꞌe sewiyeyei ne aiyeyei su, fene etiri tamo lu taune ape mo maꞌe isafiye tiyatire! Fene lowe maꞌe marepi luwaru owe ape totere!f 10 Owane Sitewi lai lu taune werese maꞌe Jisas lo marepi umasiteye ape, le lowe maꞌe kairefi tereꞌe tereꞌe tamo lu taune maꞌe au pati ferafereiyei ne auwe. Owane Sitewi lai fene maꞌe ferafereiyei erasi lo auwe su, fene kairefi ape se lu taune maꞌe au pati ferafereite! Fene lu taune au pati ferafereiyei su, fene Owane Sitewi lo marepi umasiyei.g 11 Owane Sitewi lai meni ta maꞌe kairefi au teꞌe areiye fiyariyei ne auwe su, le Owane Sitewi lo peri wou aꞌi lu taune maꞌe fu au teꞌe areiye fiyarite! Owane Sitewi lai meni tereꞌe ta maꞌe lu taune au pati ferafereiyei lo kairefi auwe su, le lu taune Owane Sitewi lo kairefi se fu au pati ferafereire! Serai fene lu taune maꞌe Krais Jisas lo iyape se au pati ferafereiyei su, fene Owane Sitewi lo iyape erasi aꞌi ei ani aroweyei. Owane Sitewi lo kairefi mi mi pasi pasi weriyei ironamisiya. Nomo Owane Sitewi lo iyape mi mi pasi pasi weriyei teꞌe ani arowete. Peri ape mo wiyeme aꞌi tene!
12 Peri ano wanu etire! Lu taune tamo fene maꞌe fofowei erasi aꞌi au luwaruweteye. Etiri luwaru aꞌi ape fene maꞌe henerai su, Owane Sitewi lai tote tawesiyei fene lo siye areiyeyei ne totesiya. Tote tawesiyei fene lo kairefi teisiya awere? Piyete awere? Fene hepene se suꞌariye owe ape totere! Etiri ape mo lu taune werese maꞌe aiwawe henerainamisiya ape, fene maꞌe henerairowa. Serai fene owe ape hepene se suꞌarire. 13 Fene Jisas lo wiyawi taꞌaneyei su, fene fofowei taꞌi taꞌi aꞌi, fofowei le aiwawe aꞌi teriteyei. Lu taune tamo fofowei erasi aꞌi teriteyei. Lu taune tamo fofowei oso aꞌi teriteyei. Fene fofowei teriteye su, fene marepi wisere aꞌi totenamire. Serai nowe yeꞌewi se Jisas Krais mitaiyeyei erasi mase pani awei amerame aꞌi maꞌe itorairowa su, fene marepi wisere erasi aꞌi toterowa. Sosu fene Jisas lo iyape teꞌe ani arowerowa.h 14 Fene Jisas lo wiyawi taꞌane su, sosu lu tamo fene maꞌe au luwaruweyei su, Owane Sitewi lai marepi fene lo au wisereye irowei. Fene Jisas lo peri wanu tote tawesi umasiyei su, Owane Sitewi lo Hepene Waraꞌi aꞌi mitaiyeyei fene maꞌe napetuwei.i 15 Wanure! Fene yo seni luwaru aꞌi irowei su, apou aꞌi fene meni ta aine teraꞌeyei, etiri ta taꞌarei aniyei, yo seni luwaru aꞌi ironamiyei, lu taune maꞌe au luwaruweyei. Fene yo seni owe ape irowei su, fene fofowei erasi aꞌi teriteyei. Fofowei ape ne Owane Sitewi lo nihe se luwaru aꞌi ne. Serai yo seni apou ape owe ape irote. 16 Ahowa, fene, Krais lo marepi umasisiya ape, fofowei erasi aꞌi teriteyei su, fene marepi neritase aꞌi owe ape totere. Fene Krais lo iyape, marepi fene lo papu irosiya ape, fene Owane Sitewi lo iyape au teꞌe ani arowete. 17 Nowe ataheyewa. Owane Sitewi lai yo seni werese au hese ereirowa. Nomo Jisas lo peri wanu tote tawesi umasisiya ape, pereye nowe eite se le yo seni nomo lo tu au hese ereisiya. Serai nomo fofowei oso aꞌi teritesiya. Lu taune tereꞌe, Owane Sitewi lo peri heneruwe meꞌiyeni maꞌe atati awetowei ape, le yo seni lowe lo moꞌo au hese ereirowa. Le lowe au hese erei tepaꞌasirowa su, le lowe maꞌe fofowei erasi aꞌi au irowei. 18 Meni ta Owane Sitewi lo peri one towe sahe apou leseye,
“Lu taune yo seni waraꞌi aꞌi ironamisiya ape, sasarisawirowa. Ei, lowe awei sahe fofowei erasi teritesiya. Sosu moꞌo lowe Owane Sitewi lo omo hire maꞌe wirowa. Sosu lu taune Owane Sitewi lo peri arisiteye ape, sosu yo seni luwaru aꞌi ironamiteye ape, Owane Sitewi lai eiwerou lowe maꞌe au irorowa awere? Le lai lowe maꞌe fofowei erasi aꞌi tahe lowe lo sahe aunamitorowa.” Snd 11:31
19 Serai Owane Sitewi lo marepi apou aꞌi toteyei su, lu taune taꞌi taꞌi aꞌi fofowei erasi tahe towafi lowe lo sahe teriteyei. Fene fofowei erasi teriteyei su, fene kairefi teite! Fene yo seni waraꞌi aꞌi owe ape arunatire. Ahowa, fene marepi hepene fene lo Owane Sitewi lo ereti maꞌe au fure! Le tahe paꞌare hepene fene lo au taꞌaneye su, serai le fene mi mi pasi pasi au noweinoweinamirowa.