Owane Sitewi lo wesi lu owane lai lu taune au noweinoweite.
5
Sosu aꞌi pe ane Owane Sitewi lo wesi lu owane maꞌe au teꞌesiya. Ane, fene aiwawe aꞌi, Owane Sitewi lo wesi lu owane ne. Ane, fene aiwawe aꞌi, lu tamo Meni Owane Krais lo tahe sahe fofowei erasi auwe su, ane lai fofowei werese lo ape siyeteye. Sosu Jisas awei amerame aꞌi sahe si tame itorairowa su, le ane maꞌe kairefi lo mitaiyeyei erasi se au atuaturowa. 2 Ane fene maꞌe au teꞌesiya. Lu taune werese Owane Sitewi lo marepi tote umasinamiteye ape, fene lowe maꞌe au noweinoweite! Ane peri kairefi aꞌi fene maꞌe apou teꞌe taꞌame, “Fene lu taune werese au noweinoweite.” Ahowa, Owane Sitewi lo marepi fene ne apou toteyei, “Fene lu taune tewi ano au noweinoweite!” Fene lai marepi fene lo umasite! Marepi fene lo apou toteyei su, “Ei, ane faraꞌu lu taune maꞌe au noweinoweiyei.” Eite wisere aꞌi ne. Fene lu taune au noweinoweiyei su, fene apou owe ape totere, “Ane lu taune au noweinoweiyei su, ane maꞌaru tomu neꞌese aniyei.” Ahowa, fene apou owe totere! Fene lu taune au noweinoweiyei su, fene marepi wisere aꞌi se totere!a 3 Lu taune Owane Sitewi lai fene maꞌe au noweinoweiyei ne auwei. Fene lu taune au noweinoweiyei su, fene lu owane kairefi wou owe ape irote! Sosu fene lu taune ape mo owe ape hi ani fu arore! Ahowa, lowe yo seni waraꞌi aꞌi fene lo siyeyei su, lowe yo seni fene lo umasirowa.b 4 Fene lu taune au noweinoweite. Meni Owane tutawe lu taune werese au noweinoweisiya ape, si tame itorairowa su, le fene maꞌe iyape wisere aꞌi mitaiyeyei erasi se ta aurowa. Iyape erasi ape le fene maꞌe aurowa ape mi mi pasi pasi ironamitorowa.Nomo marepi wisere aꞌi lu taune maꞌe totere!
5 Ane yoꞌorei lu maꞌe teꞌeyei, fene aiwawe aꞌi lu owane lo peri wanu umasite! Sosu fene werese marepi towafi lo ani fu arore! Fene kuseriye marepi fene lo erasi aꞌi owe ape totere!c
“Meni ta kuseriye marepi erasi aꞌi totenamiteyei su, Owane Sitewi lai meni ape hi ani fu arowei. Ahowa, lu taune tamo marepi towafi lowe lo ani fu arosiya ape, le marepi ferafereiyei lo lowe maꞌe auwei.” Snd 3:34
6 Fene marepi towafi fene lo hi ani fu arote. Sosu fene Owane Sitewi lo kairefi unahi irote. Serai nowe meꞌiye su Owane Sitewi lai, fene ariariyeye ape, le iyape fene lo ei ani aroweyei.d 7 Fene marepi orese aꞌi teriteyei su, fene Owane Sitewi maꞌe au teꞌere! Le lai fene marepi erasi aꞌi tote wawesiyenamisiya. Sosu le fene au noweinoweinamisiya.e 8 Fene marepi hepene amerame aꞌi totere. Mi mi werese fene etiri werese siye etite! Meni airame luwaru fene lo ape, sepei Satan, le omo omo werese maꞌe itero ani nehi uwei siya. Le yo pusi erauwe noꞌu erasi wou aꞌi ne. Yo pusi erauwe erasi ape fe tamo moꞌo ani umasisiya. Le fe ape tomu teraꞌe ayei ne totesiya. Sepei Satan aiwawe aꞌi ne. Le lu taune lo tote tawesiyei au luwaruweyei ne totesiya.f 9 Sepei Satan fene maꞌe heneraiyei su, fene le ne kairefi aꞌi se teite! Fene Owane Sitewi ne tote tawesi teinamite! Wanure! Fene etiri ape soꞌoruwe tepaꞌasiye. Lu taune omo omo werese sahe Satan lai tote tawesiyei lowe lo au luwaruweyei ne totesiya. Lu taune tomu neꞌese fofowei erasi aꞌi teritesiya. Fene aiwawe aꞌi ne.g
10 Owane Sitewi lai fene ei aniyewe, fene Krais mitaiyeyei erasi mase mi mi pasi pasi ironamiyei ne ariariyeye. Nowe pereye aꞌi fene fofowei erasi terite. Fofowei ape nowe oso aꞌi teriterowa. Fofowei fene lo i tepaꞌasiyei su, Owane Sitewi lai ferafereiyei werese aꞌi sitewi ape, le lai fene maꞌe yo seni aseyaro aꞌi au irowei. Le marepi fene lo au kairefiyeyei. Tote tawesiyei ape lo lai au kairefiyeyei. Sosu le fene maꞌe au tei kairefiyeyei. 11 Kairefi erasi aꞌi lo mi mi pasi pasi ironamitorowa. Wiyeme aꞌi tene!
12 Ane one towe teꞌi aꞌi fene maꞌe ausawiyei. Meni Sailas peri ano leseye. Meni ape le kaiyemo wiyeme aꞌi ne. Marepi ano apou aꞌi totesiya, “Fene one towe eite aniyei su, fene siye eti teꞌere! Ane fene maꞌe peri kairefi aꞌi se au teꞌe areiyeye. Ane Owane Sitewi lo peri fene maꞌe apou au teꞌe areiye fiyariye. Owane Sitewi lo ferafereiyei fene maꞌe wiyeme aꞌi tene! Fene Owane Sitewi lo ferafereiyei sahe tei kairefiyenamite!h 13 Lu taune tomu neꞌese sato ahe irosiya ape, yo seni luwaru aꞌi ironamisiya. Lowe omo Babilon lo lu taune aiwawe aꞌi ne. Ahowa, ponei sahe irosiya ape, lu taune tamo fene aiwawe aꞌi ne. Lowe Owane Sitewi lo marepi umasinamisiya. Lowe ane mase irosiya ape, fene maꞌe eriteyei ausawisiya. Meni tereꞌe iyape Mak, le aiwawe aꞌi fene maꞌe eriteyei ausawisiya. Le meni eime ano wou aꞌi ne.i 14 Fene lai lu taune Krais lo yo umasisiya ape, marepi erasi aꞌi tote wawesiyenamite! Fene lowe taꞌi taꞌi aꞌi eritere!” Owane Sitewi lai marepi fetane aꞌi lo fene maꞌe auwei. Serai fene marepi fetane aꞌi ironamisiya.