Meni Owane wiyeme si tame itorairowa.
3
Sosu aꞌi pe kaiyemo mo ano, one towe eite ane fene maꞌe au lesesiya ape, one towe toꞌuresi ne. Marepi sitewi ano apou aꞌi totesiya. Fene marepi erasi aꞌi yo seni waraꞌi aꞌi ape ne tote etinamite. Ane tu fene maꞌe apou au teꞌeye. Sosu ane fene maꞌe tame au teꞌesiya. Fene peri ano wanu tote tawesi umasite. 2 Tu naifa weriyei Owane Sitewi lo peri au teꞌe siye lu aseyaro aꞌi, lowe Owane Sitewi lo peri lu taune maꞌe au teꞌe fiyariye. Fene Owane Sitewi lo peri ape wanu tepaꞌasiye. Serai fene peri lowe lo ape tote anite tawesite. Aiwawe aꞌi lu ape mo, Owane Sitewi ariariyeye ape, le lai lowe Meni Owane Pefine aꞌi lo peri lu taune maꞌe au teꞌe fiyariyei ne eimawesawi. Fene peri lowe lo wanuwe su, fene Jisas ne tote tawesi umasinamiteye. Serai fene peri lowe lo fu tote anite tawesite.a 3 Wanure! Fene etiri ape wanu soꞌoruwete. Nowe yeꞌewi se lu tamo Owane Sitewi ne peri teꞌe naruwei ne henerairowa. Lowe marepi luwaru aꞌi towafi lowe lo tote umasirowa.b 4 Lowe apou teꞌerowa, “Krais lai peri teꞌe naneiyei ta lu taune maꞌe au teꞌeye. Le apou au teꞌeye, ‘Nowe meꞌiye su ane meni ta hi awei maꞌe si tame itorairowa.’ Lowe apou ei towerisiya. ‘Eiwerou su meni ape itorairowa awere? Krais lai peri wawero nomo maꞌe au teꞌeye. Meni ape hi awei maꞌe itorairowata. Tu naifa weriyei Owane Sitewi awei etiri werese au taꞌaneye. Nowe moꞌo ape se Owane Sitewi lai wiyawi werese ani taꞌame. Sosu pereye nowe eite se awei aite werese nomo lo temeniyeye ape, le aiwawe aꞌi wiyawi taꞌane taꞌame.’”c 5 Peri ape lowe mi mi werese au teꞌeteye su, lowe etiri tamo marepi tote iꞌaneye. Tu naifa weriyei weriyei Owane Sitewi lai peri ta au teꞌeye. Le lai peri teꞌeye su, sosu etiri werese hire maꞌe henerai. Aiwawe aꞌi le peri ta tame au teꞌeye su, le awei werese taꞌaneye. Le saꞌi ei apuweyewe, awei pani wirai.d 6 Sosu nowe meꞌiye ta se, lu taune werese yo seni luwaru aꞌi ironamiteye. Serai Owane Sitewi lai saꞌi erasi eimawe arosai. Lu taune werese etiri werese ape mo saꞌi papu au luwaruwe poꞌuterowa.e 7 Saꞌi werese here foroꞌoweye su, Owane Sitewi apou eiye, “Ane lu taune werese saꞌi se tame ani aporu temeniyerowata. Ahowa, etiri werese, hire maꞌe irosiya ape, sosu etiri werese awei sahe irosiya ape, ane lai etiri werese ape mo yehe se taiso fu ti seroꞌo poꞌuterowa. Nowe yeꞌewi su, ane lu taune werese yo seni luwaru aꞌi ironamiteye ape, yehe se etiri werese ape mo taiso fu ti seroꞌo poꞌuterowa.”8 Kaiyemo fene peri ano wanu tote tawesire! Owane Pefine aꞌi lo marepi se nowe taꞌi aꞌi ne iyu menei tomu neꞌese, 1,000 aiwawe aꞌi ne. Sosu iyu menei tomu neꞌese nowe taꞌi aꞌi aiwawe aꞌi ne. Owane Pefine aꞌi lo marepi apou aꞌi totesiya.f 9 Lu taune tamo apou totesiya, “Owane Sitewi lo peri teꞌe naneiyei ape, ‘Ane meni Jisas hi awei maꞌe si tame eimawe arosawirowa.’ Le peri ape au teꞌeye. Ahowa, Le meni ape witane aꞌi se si tame eimawe arosai taꞌama. Le ninawe momoteiyesiya.” Ahowa, meni Owane Pefine aꞌi lai fene ne marepi momotei aꞌi ne. Le lu taune werese maꞌe marepi ferafereiyei aꞌi se au iro ninawe momoteiyesiya. Lu taune yehe omo maꞌe irowa su, etiri luwaru aꞌi ne. Ane lowe yehe omo maꞌe iyei wou taꞌama. Le apou eiye, “Ane lowe ne ninawe ninaweteyei. Lowe yo seni luwaru aꞌi lowe meꞌiyeni maꞌe atati awetowei su, ane lowe maꞌe marepi hepene heꞌi aꞌi aurowa.”g
10 Peri ano wanure! Nowe Meni Owane Pefine aꞌi lu taune au hese ereirowa ape, witane aꞌi henerairowa. Apou wou aꞌi taꞌarei meni ta pasi etiri fareyare taꞌareiyei. Nowe ape henerairowa su, etiri werese niꞌarawe hire maꞌe irosiya ape, noꞌu erasi se perati poꞌuterowa. Sosu awei pani werese yehe ti seroꞌo poꞌuterowa. Awei pani werese, etiri werese awei sahe irosiya ape, ti seroꞌo poꞌuterowa.h
11 Owane Sitewi lai etiri werese yehe taiso ti seroꞌo poꞌuterowa su, fene piye yo seni, fene lo irosiya ape, totesiya awere? Fene yo seni luwaru aꞌi ironamiyei su, Owane Sitewi lai fene aiwawe yehe taiso ti seroꞌo poꞌuterowa. Serai fene yo seni aseyaro waraꞌi aꞌi fu ironamite. Sosu Owane Sitewi lo marepi waraꞌi aꞌi umasinamite. 12 Nowe ape Owane Sitewi ariariyeye ape, Jisas si tame itorairowa ape ne, fene erasi aꞌi totete. Le witane aꞌi fu aiyerowa. Fene lai Owane Sitewi lo wiyawi aninamiyei su, Jisas si tame itoraiyei ape, witane aꞌi aiyerowa. Nowe ape se etiri werese hire maꞌe irosiya ape, Owane Sitewi lai yehe taiso ti seroꞌo poꞌuterowa. Niꞌarawe, yame, eiwariyemi werese lowe taiso fu ti seroꞌo poꞌuterowa. Awei etiri werese hi maꞌe irorowa ape, yehe taiso fu ti seroꞌo poꞌuterowa. Saꞌi wou aꞌi henerairowa. 13 Tu naifa weriyei Owane Sitewi peri teꞌe naneiyei ta au teꞌeye. Le apou eiye, “Ane omo hire maꞌe heꞌi aꞌi taꞌanerowa. Aiwawe aꞌi ane awei pani hi maꞌe heꞌi aꞌi taꞌanerowa. Omo heꞌi aꞌi, hire taꞌanerowa ape, sosu awei pani heꞌi aꞌi, hi sahe taꞌanerowa ape, lu taune yo seni aseyaro ironamirowa ape, saro ironamitorowa.” Nomo nowe ape ne ninawe ninawesiya.i
14 Serai kaiyemo mo, fene nowe ape ne ninawesiya su, fene Owane Sitewi ne tote tawesiyei fene lo kairefi aꞌi teite. Fene yo seni werese fene lo aseyaro waraꞌi aꞌi fu ironamite. Fene Krais lo marepi fetane aꞌi kairefi teite. Meni Owane Pefine aꞌi si tame itorairowa su, le fene ne marepi wisere aꞌi totenamirowa. 15 Wanure! Meni Owane Wiyeme aꞌi nomo lo lu taune werese ne eresene momotei aꞌi se ninawesiya. Le lu taune au luwaruwe poꞌute wou taꞌama. Ahowa, le lu taune werese marepi hepene heꞌi aꞌi aureme. Serai le lowe ne eresene momotei aꞌi se ninawesiya. Lowe yo seni luwaru aꞌi meꞌiyeni maꞌe atati tei awetowei su, le lowe maꞌe marepi hepene heꞌi aꞌi aurowa. Kaiyemo nomo lo, iyape Pol, one towe tamo fene maꞌe aiwawe aꞌi leseye. Owane Sitewi lai le maꞌe marepi wisere aꞌi auwe.j 16 Pol fene maꞌe apou lese ausawi, “Peri ano ape ane fene maꞌe lesesiya. Jisas si tame itorairowa. Fene yo seni luwaru aꞌi meꞌiyeni maꞌe atati arunatite. Fene Owane Sitewi lo marepi werese tote tawesi umasite.” Pol peri ape mo one towe sahe leseye su, peri lo eti kairefi aꞌi ne. Peri tamo erasi lo nomo lai wanu soꞌoruwerowata. Lu taune tamo Pol lo peri, sosu Owane Sitewi lo peri tereꞌe, atati ani teꞌe areareteye. Lu taune Owane Sitewi lo marepi siye soꞌoru taꞌama. Sosu lowe Owane Sitewi ne tote tawesiyei towafi lowe lo kairefi se taꞌama. Serai Owane Sitewi lai lowe werese yehe omo maꞌe ani fu arosawirowa.
17 Sosu kaiyemo mo ano, fene werese peri ano wanure! Fene weiyai! Fene etiri ape mo wanu soꞌoruwe tepaꞌasiye. Lu taune tamo fene maꞌe peri wawero aꞌi au teꞌeyei. Fene peri wawero aꞌi lowe lo owe ape wanute. Fene peri wawero lowe lo wanu umasiyei su, fene marepi fene lo au luwaruweyei. Fene peri wawero lowe lo ape wanu umasiyei su, tote tawesiyei fene lo winetairowa. Lu taune ape mo, Owane Sitewi lo yo peri heꞌi aꞌi tote umasi taꞌame.k 18 Ahowa, fene Owane Sitewi lo ferafereiyei werese siye etite. Fene Owane Sitewi lo ferafereiye siye teꞌe etiyei su, fene kairefi aꞌi teinamirowa. Fene Meni Owane Jisas Krais, nomo ne ani hene anirowa ape, lo yo seni wanu soꞌoruweyei. Nomo werese le maꞌe iyape erasi aꞌi pei ei ani arowete. Nomo mi mi pasi pasi weriyei iyape lo ei ani arowete. Peri ape wiyeme aꞌi tene!