4 Tu naifa weriyei weriyei Owane Sitewi lo ipari tamo yo seni luwaru aꞌi Owane Sitewi maꞌe irowe. Lowe yo seni luwaru aꞌi irowe su, Owane Sitewi lai lowe yehe omo ani fu arosawi ereye. Nowe yeꞌewi su Owane Sitewi lai sepei luwaru werese aꞌi au hese ereirowa.^b 5 Tu naifa weriyei lu taune werese yo seni luwaru aꞌi ironamiteye. Meni taꞌi iyape Noa, yo seni aseyaro aꞌi ironamiteye. Le Owane Sitewi lo yo seni waraꞌi aꞌi lu taune maꞌe au teꞌe fiyarinamiteye. Lu taune werese Noa lo peri wanu taꞌame su, Owane Sitewi lai lowe werese saꞌi sahe atenise teraꞌe ereye. Owane Sitewi lai Noa maꞌe apou eiye, “Ane lu taune werese saꞌi sahe ani aporu atenise teraꞌe ereyei. Ne tani no eimane hesi heta no, eimane lo tani hesi heta ane lai hene ani ferafereirowa.” Owane Sitewi lai saꞌi erasi lu taune werese ani aporu atenise temeniyeye su, lu taune ereti feni werese feni hesi heta (8) hene ani ferafereiye.^c 6-7 Aiwawe aꞌi tu naifa weriyei nowe moꞌo tereꞌe se omo hesi aꞌi Sodom, sosu Gomora sahe lu taune werese yo seni luwaru aꞌi ironamiteye. Lowe yo seni luwaru aꞌi ironamiteye su, Owane Sitewi lai omo hesi ape maꞌe yehe erasi aꞌi eimawe arosai. Yehe erasi ape lu taune werese werese aꞌi ti seroꞌo poꞌuteye. Meni taꞌi aꞌi Owane Sitewi lai omo ape maꞌe ei ani hene arosai. Lu taune, omo tereꞌe tereꞌe iroteye ape, siyeye su, lowe Owane Sitewi ne atoweiyeye. Serai lowe yo seni luwaru aꞌi apou ape iro taꞌame. Lowe apou toteye, “Nomo yo seni luwaru aꞌi irowei su, Owane Sitewi lai nomo aiwawe aꞌi yehe se ti seroꞌo poꞌuteyei.” Meni Lot yo seni aseyaro iroteye ape, lu taune lo tafaꞌe yo seni luwaru aꞌi siyeye su, le marepi orese aꞌi teriteteye. Serai Owane Sitewi lai meni ape omo Sodom nowe maꞌe ei hene ani arosai.^d 8 Owane Sitewi lai meni taꞌi ape yo seni aseyaro ironamiteye ape siyeye. Lu werese yo seni luwaru aꞌi mi mi werese au ironamiteye. Meni ape, yo peri arisiyei lowe lo ape siyeye su, le marepi orese erasi aꞌi teritenamiteye. Serai Owane Sitewi lai meni aseyaro ape omo maꞌe sahe ei hene ani arosai. 9 Owane Sitewi Noa sosu Lot hene ani pati ferafereiye su, nomo etiri ta siye soꞌoruweye. Le faraꞌu lu taune Owane Sitewi lo marepi umasiteye ape, Owane Sitewi lai lowe au pati ferafereiyei. Lu tamo lowe maꞌe au luwaruweyei ne toteyei su, Owane Sitewi lai lowe hene ani pati ferafereirowa. Ahowa, lu taune tereꞌe yo seni luwaru aꞌi ironamiteyei ape, sosu lowe Owane Sitewi ne meꞌiyeni maꞌe atati tei awetowei su, le lai lowe maꞌe pereye nowe eite se marepi orese aꞌi ausiya. Sosu nowe yeꞌewi se, le lowe yehe omo maꞌe eimawe arosawirowa. 10 Lu taune ape mo tafaꞌe yo seni mi mi werese ironamisiya su, Owane Sitewi lai ai marepi erasi aꞌi lowe ne totenamisiya. Aiwawe aꞌi lowe awei lu owane lo peri arisisiya ape, le lowe ne aiwawe aꞌi yehe omo maꞌe ani fu arosawirowa. Lu taune ape mo apou aꞌi totesiya, “Owane Sitewi lo peri yahowaꞌi ne. Ane faraꞌu peri lo arisiyei.” Lowe marepi towafi lowe lo umasiyei su, lowe tafaꞌe yo seni mi mi pasi pasi ironamiyei.

Lowe kuseriyei marepi totenamiteye. Lowe Owane Sitewi ne atoweiye taꞌame. Lowe Owane Sitewi lo ipari wisere aꞌi maꞌe peri luwaru aꞌi teꞌe naruwei su, lowe Owane Sitewi ne atoweiye taꞌame.^e 11 Lowe Owane Sitewi lo ipari wisere aꞌi maꞌe peri luwaru teꞌe naruwe su, Owane Sitewi lo ipari lai Meni Owane wiyeme maꞌe apou teꞌe taꞌame, “Lu ape mo luwaru aꞌi ne.” Lowe teꞌe taꞌame. Ahowa, Owane Sitewi lo ipari ape mo kairefi aꞌi ne. Sosu lowe werese lu taune hi ani ararowe.^f 12 Peri ano wanure! God wawero peri au teꞌe siye lu, lowe peri luwaru aꞌi au teꞌesiya su, lowe peri sitewi soꞌoru taꞌama. Lowe fe erauwe wou aꞌi ne. Lowe lu aiheiye aꞌi ne. Etiri ape Owane Sitewi lai lowe maꞌe irorowa ape, apou wou aꞌi meni ta ipo maꞌe iyei su lowe fe erauwe nehirowawe, eine se nei teraꞌe temeniyerowa. Aiwawe aꞌi le peri wawero au teꞌe siye lu werese aꞌi nehirowawe, lowe aine teraꞌe ererowa.^g

13 Yo seni luwaru aꞌi ne, lowe lai lu taune maꞌe irowe ape, Owane Sitewi lai etiri fofowei luwaru aꞌi lowe maꞌe itiyaꞌu aurowa. Lu ape mo apou aꞌi totesiya. “Nomo yo seni luwaru aꞌi irowei su, nomo nowe mi sahe aiwawe aꞌi ironamiyei. Nomo yo seni apou ape ne nineꞌisiya.” Lowe yo seni luwaru aꞌi irowei su, lu taune tomu neꞌese siyerowawe, iyape fene lo hi ani ararorowa. Lu werese ape mo luwaru aꞌi ne. Lowe lu taune maꞌe peri wawero au teꞌeyei su, lowe marepi tote nineꞌiteyei. Lowe fene mase ene ayei su, lowe tote tawesiyei fene lo tatai aniyei ne toteyei. 14 Lu tewi god wawero lo peri au teꞌe siye lu, lowe taune werese siye wisereyesiya. Lowe yo seni luwaru aꞌi mi mi pasi pasi ironamisiya. Lu taune tamo marepi afofoweteye ape, lu areareyei aꞌi lai marepi lowe lo tatai aninamisiya. Ei, lu tewi ape mo maꞌaru lo marepi erasi aꞌi totenamisiya. Wanure! Lu tewi ape mo luwaru aꞌi tene. Owane Sitewi lai lowe yehe omo maꞌe ani fu arosawirowa. 15 Lu tewi ape mo Owane Sitewi lo yo wiyeme aꞌi meꞌiyeni maꞌe atati awetowewe, yo seni luwaru aꞌi umasinamiteye. Lu tewi ape mo meni Balam apou wou aꞌi ne. Le Beor lo meni eime ne. Le maꞌaru tamo aniteye. Serai tu naifa weriyei meni ape yo seni luwaru aꞌi ironamiteye su, le luwaru aꞌi ne nineꞌiteye. Lu tewi tereꞌe ape mo yo seni apou ape umasinamiteye.^h 16 Ahowa, meni ape yo seni luwaru aꞌi ironamiteye su, Owane Sitewi lai fe donki peri teꞌe taꞌame ape, le maꞌe yo seni lo au fareraiyeyei ne eimawesawi. Fe donki ape lai meni lo peri ahi wou aꞌi le maꞌe au teꞌeye. Fe donki ape apou eiye, “Yo seni no luwaru aꞌi ne.” Fe donki ape peri lo au teꞌeye su, meni ape peri lo wanuwe. Le yo seni luwaru aꞌi arunati.ⁱ 17 Lu tewi ape mo apou aꞌi saꞌi pitomuwe awei sahe heneraisiya. Lowe saꞌi pitomuwe, saꞌi ariye wou aꞌi ne. Peri lowe lo lu taune au pati anirowata. Aiwawe aꞌi lowe saꞌi nihari wou aꞌi ne. Fene saꞌi tomu neꞌese hire maꞌe siyesiya. Sosu fiyaru erasi heneraiyei su, saꞌi nihari fiyari poꞌuteye. Saꞌi itowei taꞌama. Saꞌi ape lu taune werese au pati anirowata. Aiwawe aꞌi peri lowe lo lu taune maꞌe au pati anirowata. Owane Sitewi lai lowe ne apou au teꞌeye, “Nowe yeꞌewi su, ane lai lowe yehe omo maꞌe ani fu arosawirowa. Sosu lowe omo pasi aꞌi maꞌe mi mi pasi pasi ironamitorowa.” Owane Sitewi omo ape lowe ne au taꞌane naneiye.^j 18 Lowe peri kuseriyei aꞌi lu taune maꞌe peri ahi aꞌi se au teꞌesiya. Lowe lu taune lo marepi tafaꞌe yo seni maꞌe tatai anisiya. Lowe lu taune au teꞌe pereꞌeye hawihawiyeteye. Lu taune ape mo tote tawesiyei lowe lo kairefi se taꞌame. Lowe heꞌi aꞌi se lu taune yo seni luwaru aꞌi meꞌiyeni maꞌe atati arunatiteye ape, ahowa, lu tewi areareyei ape mo marepi lowe lo tatai aniteye. 19 Lowe lu taune maꞌe apou teꞌe naneiteye, “Fene peri nomo lo wanu umasiyei su, nomo marepi fetane aꞌi fene maꞌe auwei.” Peri lowe lo wawero aꞌi ne. Marepi hepene lowe lo uwase poꞌute tepaꞌasiye. Yo seni luwaru aꞌi ta meni lo marepi ani fu arowei su, meni ape yo seni luwaru aꞌi ape aweraꞌiyenatirowata. 20 Lu taune Meni Owane Jisas Krais lo peri wanu tote tawesiyei su, le lai yo seni luwaru aꞌi ani sasari pamoweyei. Sosu moꞌo lu tewi areareyei ape mo lowe maꞌe peri wawero au teꞌeyei su, lowe yo seni luwaru aꞌi si tame umasinamiteyei. Lu taune ape mo marepi towafi lowe lo luwaruwe poꞌuteyei. Pereye marepi lowe lo yo seni luwaru aꞌi, tu naifa lowe yo seni luwaru aꞌi umasiteye ape, hi ani ararowe.^k 21 Lu taune tamo Jisas lo yo seni waraꞌi aꞌi soꞌoru taꞌama ape, Owane Sitewi lai lowe maꞌe fofowei oso aꞌi auwei. Ahowa, lu taune tamo Jisas lo peri lu feni lowe lo maꞌe au teꞌeteye ape, wanuwe su, Lowe mi mi werese Jisas lo yo seni waraꞌi aꞌi meꞌiyeni maꞌe atati arunati. Owane Sitewi lai lowe maꞌe fofowei erasi luwaru aꞌi auwei.^l 22 Tu naifa meni taꞌi peri wiyeme aꞌi au teꞌeye. Le lu tewi ape mo ne toteye. “You ta oriyei su, nowe meꞌiye su, le oriyei ape maꞌe si tame ayei ne aiyerowa.” Sosu peri wiyeme aꞌi tereꞌe apou teꞌesiya.