3 Owane Sitewi lo kairefi wisere erasi aꞌi ne. Marepi werese lo waraꞌi aꞌi sosu wisere aꞌi ne. Le lai nomo yo seni aseyaro irowei ne ariariyeye. Serai nomo Owane Sitewi lo marepi tote tawesi umasinamiteye. Nowe mi mi werese nomo le ne wanu soꞌoruweteye. Sosu lu taune werese le ne tote tawesiyei ape, lowe yo seni lo aiwawe aꞌi irote. Le lai kairefi wisere erasi aꞌi lo nomo maꞌe auwe. Nomo kairefi lo se aniyei su, nomo faraꞌu yo seni aseyaro ironamiteyei. 4 Owane Sitewi marepi waraꞌi wisere aꞌi ironamitorowa ape, le marepi waraꞌi wisere aꞌi lo se le teꞌe naneiyei erasi pefine aꞌi lo nomo maꞌe auwe. Nomo teꞌe naneiyei lo ape mo wanu aniyei su, nomo Owane Sitewi mase lefeifonamisiya. Nomo marepi lo apou aꞌi totenamisiya. Serai awei lo marepi luwaru aꞌi fene maꞌe au luwaruwe poꞌuterowata. 5 Fene Owane Sitewi lo marepi waraꞌi aꞌi umasisiya su, fene Owane Sitewi ne tote tawesi kairefiye irote. Owane Sitewi ne tote tawesiyei fene lo kairefiye irowei su, fene yo seni waraꞌi aꞌi irote. Fene yo seni waraꞌi aꞌi irowei su, fene Owane Sitewi lo marepi wanu tote soꞌoruwete. 6 Fene Owane Sitewi lo marepi wanu tote soꞌoruweyei su, fene marepi wisere aꞌi tote anite tawesite. Sosu fene marepi wisere aꞌi tote anite tawesirowa su, marepi hepene fene lo kairefi aꞌi irote. Sosu marepi hepene fene lo kairefi aꞌi irowei su, fene Owane Sitewi lo yo seni waraꞌi aꞌi ironamite.^a 7 Fene Owane Sitewi lo yo seni waraꞌi aꞌi umasinamirowa su, fene lu taune werese, Krais ne tote tawesisiya ape, marepi erasi aꞌi totenamite. Sosu fene lu taune Krais ne tote wawesiyerowa ape, werese marepi erasi aꞌi totenamirowa su, fene lu taune tereꞌe werese marepi erasi aꞌi tote wawesiyenamite. 8 Yo seni werese ape mo ane fene maꞌe au teꞌeye ape, marepi hepene fene lo papu irosiya su, Owane Sitewi lai etiri ape mo erasi aꞌi au iro henerairowa. Yo seni apou ape fene papu irosiya ape, marepi fene yahowaꞌi irorowata. Ahowa, fene wiyawi lo erasi aꞌi henerairowa. Fene yo seni ape mo umasiyei su, fene Meni Owane Jisas Krais lo yo seni wanu tote soꞌoruweyei. 9 Ahowa, lu taune tamo yo seni aseyaro ape mo umasi taꞌame su, lowe meni nihe pokoweyei wou aꞌi ne. Lowe Owane Sitewi yo seni luwaru aꞌi lowe lo aseyaro aꞌi irowe ape, tote iꞌaneye. Lowe awei lo yo seni luwaru aꞌi umasinamiteye.

10 Serai kaiyemo mo ano, fene werese yo seni aseyaro irowei ne irote. Peri ano wanure! Le aꞌi lai fene ariariyeye. Sosu aiwawe le fene maꞌe wiyawi lo aniyei ne ei aniye. Serai fene lu taune maꞌe, Owane Sitewi fene ei ariariyeyei ape, au atuatuwei ne tohotete. Fene Owane Sitewi lo marepi waraꞌi aꞌi umasiyei su, tote tawesiyei fene lo mi mi werese kairefi aꞌi ironamirowa. 11 Aiwawe aꞌi fene Owane Sitewi lo marepi tote umasinamiyei su, Owane Sitewi lai fene omo hire maꞌe hene wiyei. Owane Jisas Krais lai yo seni luwaru werese aꞌi nomo lo ani pamowe sasariye. Sosu le marepi hepene heꞌi aꞌi nomo maꞌe auwe. Le aꞌi lai omo hire maꞌe au noweinoweinamirowa.

12 Sosu aꞌi pe le fene mase mi mi pasi pasi ironamisiya. Peri ape ane fene maꞌe au teꞌeye ape, fene soꞌoruwe tepaꞌasiye. Fene peri wiyeme aꞌi ape wanu tote tawesi umasinamiteye. Fene peri ape se marepi hepene fene lo kairefi ironamisiya. Ahowa, ane mi mi werese se peri wiyeme aꞌi ape lo tame teꞌereme. Piyene awere? Mi mi weriyei fene peri ape ne marepi erasi aꞌi totenamite! Serai ane fene maꞌe tame teꞌesiya. 13 Ane awei sahe hepene se irosiya su, ane mi mi werese fene maꞌe peri lo tame au teꞌeyei. Owane Sitewi lai wiyawi ape ane maꞌe auwe. Serai ane marepi lo wanu umasi irote. Ane fene maꞌe tame au teꞌesiya. Serai fene marepi lo tote umasinamite. 14 Nowe ta ataheyewa. Ane temeniyeyei. Meni Owane Jisas Krais lai ane maꞌe temeniyeyei ano ne au teꞌe atuatu areiyeye.^b 15 Ane temeniyeyei su, fene peri lo ape tote anite tawesinamite. Serai ane fene maꞌe peri lo ape au teꞌeyei ne ani tohoteyei ne. Fene Jisas lo peri ape fa wanu tote tawesinamite.

16 Tu naifa nomo fene maꞌe Jisas lo kairefi au teꞌeteye su, nomo fene maꞌe peri wawero, lu tamo teꞌeteye ape, au teꞌe taꞌame. Ahowa, nomo Owane Jisas lo si tame itorairowa ape, fene maꞌe au teꞌeye su, nomo fene maꞌe au teꞌe areare se taꞌame. Ahowa, nomo nihe nomo lo se Jisas lo kairefi siyeteye. Owane Sitewi lai Jisas maꞌe meni owane tutawe au irowe. Sosu nomo meni owane tutawe ape siye tepaꞌasiye.^c 17-18 Tu naifa Jisas nomo hesi heta omo waraꞌi aꞌi ape hire maꞌe heneti. Nomo omo hire sahe onuteye su, Owane Sitewi tai Meni Owane wisere pefine lai meni eime lo iyape erasi wisere aꞌi ei ani arowewe, peri noꞌu erasi se apou eiye, “Siyere! Meni eime ano ne. Ane lai le ne marepi erasi aꞌi tote wawesiyenamisiya. Ane lai le ne marepi wisere aꞌi totesiya.” Nomo hesi heta omo sahe onuteye su, Owane Sitewi lai peri ape lo au teꞌeye. Le peri lo ape au teꞌeye su, nomo hesi heta wanuwe.^d 19 Nomo etiri ape siyeye su, nomo Owane Sitewi lo peri au teꞌe siye lu tamo tu naifa weriyei leseye ape, tote anite tawesiye. Nomo fene maꞌe peri lo ape au teꞌesiya. Fene peri lo ape wanu tote tawesire. Peri lo ape yehe erei lo mi erasi wou aꞌi ne. Fene nowe pasi se yehe erei ereti aniteyei su, fene yo amerame siye umasiyei. Peri lo ape marepi fene lo papu iroteyei su, peri lo ape Owane Sitewi lo yo seni werese ne fene maꞌe au pati ferafereiyei. Serai fene peri lo tote umasite. Nowe meꞌiye su, le si tame itorairowa su, le nowe mitaiyeyei wou aꞌi ne. Le Owane Sitewi lo marepi fene maꞌe au atuatu areiyeyei. Apou wou poweiye wirai su, le pasi aꞌi fiyari poꞌuteye. Peri lo ape nomo mi mi werese au pati aniyei. Jisas si tame itorairowa su, nomo le mase mi mi pasi pasi ironamitorowa. 20-21 Peri ano wanure! Peri ta Owane Sitewi lo au teꞌe siye lu leseye ape, lowe marepi towafi lowe lo se lese taꞌame. Ahowa, lowe Owane Sitewi lo marepi ape one towe sahe leseye. Serai lu tamo marepi towafi lowe lo au teꞌerowata. Lowe Owane Sitewi lo marepi fu au teꞌe fiyariteye. Owane Sitewi lo Hepene Waraꞌi aꞌi lowe maꞌe Owane Sitewi lo marepi au teꞌeteye. Lowe Owane Sitewi lo marepi wanuwe su, lowe one towe sahe leseye.^e