Fene Owane Sitewi lo meni eime ne tote tawesite.
5
Lu taune tamo apou aꞌi teꞌesiya, “Meni Jisas lai lu taune werese lo yo seni luwaru aꞌi au ani sasari pamoweteye.” Lu taune ape mo apou aꞌi tote tawesinamisiya su, lowe Owane Sitewi lo eimane pefine heneraiyei. Lu taune tamo aite lowe lo ne marepi erasi aꞌi tote wawesiyenamisiya su, lowe aite lo eimane maꞌe aiwawe marepi erasi aꞌi tote wawesiyesiya.a 2 Nomo Owane Sitewi maꞌe marepi erasi aꞌi tote wawesiyenamiyei su, sosu peri kairefi aꞌi werese lo umasiyei. Serai nomo Owane Sitewi lo eimane werese maꞌe marepi erasi aꞌi tote wawesiyeye. Nomo etiri ape mo soꞌoruwe tene! 3 Piyene nomo Owane Sitewi maꞌe marepi erasi tote wawesiyesiya awere? Apou aꞌi nomo peri kairefi werese aꞌi lo fa umasite. Sosu peri kairefi werese aꞌi lo orese se taꞌama.b 4 Sosu lu taune werese Owane Sitewi lo eimane henerai ape, lowe awei lo yo seni werese hi ani ararowe. Nomo Owane Sitewi maꞌe tote tawesinamiye su, etiri ape apou aꞌi awei lo yo seni hi ani ararowe. 5 Eiwerai awei lo yo seni werese hi ani ararowe awere? Wanure! Lu taune tamo Owane Sitewi ne tote tawesisiya. Apou aꞌi Jisas lai Owane Sitewi lo meni eime topo lo taꞌi aꞌi ne.6 Meni ape Jisas Krais, lai awei hi maꞌe henerai su, le saꞌi ani huwe. Sosu le temeniyeye su, fisaꞌi topo lo au terosowe. Jisas hi awei maꞌe itorai su, mai topo lo auteiye. Aiwawe aꞌi le omo hire maꞌe itorai. Serai le saꞌi se, sosu fisaꞌi topo lo se aiwawe aꞌi itorai. Peri ape wiyeme aꞌi tene! Owane Sitewi lo Hepene Waraꞌi apou aꞌi au teꞌe areiyesiya. Piyene awere? Apou aꞌi Owane Sitewi lo Hepene Waraꞌi pefine aꞌi ne.c 7 Serai etiri hesi heta lai nomo maꞌe Jisas ne teꞌe atuatu areiyesiya. 8 Owane Sitewi lo Hepene Waraꞌi, sosu saꞌi au huwe ape, sosu fisaꞌi topo lo ani terosowe ape, lowe hesi heta marepi taꞌi aꞌi tote iroteye.d 9 Meni ta peri wiyeme aꞌi au teꞌesiye su, nomo peri ape wanu umasirowa. Ahowa, Owane Sitewi lai peri wiyeme aꞌi nomo maꞌe au teꞌesiya su, nomo peri lo ape pei wanu eti umasite. Peri lo ape lai awei lo peri werese hi ani ararowe. Le aꞌi lai peri wiyeme aꞌi meni eime lo ne nomo maꞌe au teꞌeye.e 10 Sosu aꞌi pe lu taune tamo Owane Sitewi lo meni eime ne tote tawesisiya su, le Owane Sitewi lo peri wiyeme aꞌi marepi papu irosiya. Lu taune tamo Owane Sitewi ne tote tawesi taꞌame su, le Owane Sitewi maꞌe au areare teꞌesiya. Piyene awere? Apou aꞌi le Owane Sitewi lo peri tote tawesi taꞌame. Apou aꞌi Owane Sitewi lai meni eime lo ne au teꞌe areiyeye.f 11 Sosu peri ape Owane Sitewi lai nomo maꞌe au teꞌe areiyeye, apou aꞌi teꞌeye. Owane Sitewi lai nomo maꞌe marepi hepene heꞌi aꞌi mi mi pasi pasi au ironamitorowa. Owane Sitewi lai marepi hepene heꞌi aꞌi meni eime lo se auwe. 12 Lu taune tamo Owane Sitewi lo meni eime tote tawesiyei su, le marepi hepene heꞌi aꞌi ironamitorowa. Lu taune tamo Owane Sitewi lo meni eime ne meꞌiyeni maꞌe atati arunatiyei su, le mi mi pasi pasi temeniyetorowa.g
Nomo marepi hepene heꞌi aꞌi mi mi pasi pasi ironamisiya.
13 Fene, Owane Sitewi lo meni eime ne tote tawesinamisiya ape, ane fene maꞌe etiri werese ape mo lese ausawisiya. Piyene awere? Apou aꞌi fene marepi hepene heꞌi aꞌi fene lo mi mi pasi pasi ironamirowa ape, siye soꞌoruweyei.h 14 Serai nomo Owane Sitewi maꞌe teꞌe toweriyei ne iyei su, nomo apou aꞌi wanu soꞌoruwesiya. Nomo mi mi pasi pasi ironamitorowa. Sosu nomo etiri werese ape mo, marepi towafi nomo lo se teꞌe toweriyei su, Owane Sitewi lai nomo maꞌe wanusiya.i 15 Sosu nomo, le nomo wanusiya ape, soꞌoruwesiya. Serai etiri werese ape mo nomo teꞌe toweriyei ape, le etiri werese ape mo nomo maꞌe auwe. Wiyeme aꞌi nomo siye soꞌoruwesiya.
16 Meni ta lai meni tereꞌe, Owane Sitewi ne tote tawesisiya ape, yo seni luwaru aꞌi irowei su, le meni ape ne Owane Sitewi maꞌe au teꞌe tiyatire. Yo seni luwaru aꞌi ape, le irowe ape, Owane Sitewi le maꞌe yehe omo maꞌe ani fu arosawi taꞌama. Meni ape marepi topo lo atati aresaiye su, Owane Sitewi lai marepi hepene heꞌi aꞌi aurowa. Yo seni luwaru aꞌi taꞌi aꞌi irosiya. Owane Sitewi lai meni ape yehe omo maꞌe ani fu arosawiyei. Ahowa, meni ta yo seni luwaru ape ne iro taꞌame su, Owane Sitewi le maꞌe marepi hepene heꞌi aꞌi aurowa. Serai ane peri ta fene maꞌe teꞌesiya. Meni ta yo seni ape, yehe omo maꞌe eimawesawirowa ape, fene le ne Owane Sitewi maꞌe owe ape au teꞌere.j 17 Etiri luwaru werese aꞌi meni ta irowei su, yo seni luwaru aꞌi ne. Ahowa, meni ta yo seni luwaru taꞌi aꞌi irowei su, Owane Sitewi le yehe omo maꞌe eimawesawirowa.
18 Lu taune werese, Owane Sitewi lo eimane heneraiyei ape, lowe yo seni luwaru werese aꞌi ironamirowata. Meni Jisas Krais, Owane Sitewi lo meni eime lai le maꞌe au noweinoweisiya. Serai sepei luwaru pefine aꞌi, Satan, le maꞌe au luwaruwerowata.k 19 Wanure! Etiri ape nomo soꞌoruwesiya. Nomo Owane Sitewi lo eimane werese ne. Sosu lu taune omo omo werese werese sato irosiya ape, sepei luwaru aꞌi pefine aꞌi, Satan, marepi lowe lo yaꞌore anite tawesinamisiya. 20 Sosu aiwawe aꞌi nomo etiri ape soꞌoruwesiya. Owane Sitewi lo meni eime, Jisas Krais, le nomo maꞌe marepi wisere aꞌi au soꞌoruweyei ne fai. Serai nomo Owane Sitewi ne siye soꞌoruwesiya. Le aꞌi lai wiyeme pefine aꞌi ne. Nomo Owane Sitewi pefine aꞌi papu ironamisiya. Sosu aiwawe aꞌi nomo meni eime lo, Jisas Krais papu ironamisiya. Le aꞌi lai Owane Sitewi pefine aꞌi ne. Le mi mi pasi pasi weriyei ironamitorowa. 21 Sosu eimane werese ano, Fene god tereꞌe wawero aꞌi meꞌiyeni maꞌe atati arute. Peri ano tepaꞌasiye.