4 Kaiyemo mo ano, fene aꞌi lai Owane Sitewi maꞌe fai. Fene au teꞌe siye lu areareyei aꞌi hi maꞌe ani atati fu arowe. Piyene awere? Owane Sitewi lo Hepene Waraꞌi aꞌi fene papu irosiya ape, erasi pefine aꞌi ne. Ipari ta, lu taune tereꞌe papu irosiya ape, hawihawi aꞌi ne. Owane Sitewi lo Hepene Waraꞌi sepei luwaru aꞌi hi ani araronamiteye.^d 5 Au teꞌe siye lu areareyei aꞌi lowe hi awei maꞌe fai. Serai peri lowe lo aiwawe aꞌi hi awei maꞌe fai. Lu taune omo omo werese sahe peri lo wanusiya. 6 Ahowa, nomo Owane Sitewi Pefine aꞌi maꞌe fai. Lu taune Owane Sitewi lo peri wanu tote tawesiyei su, lowe peri nomo lo wanuwei. Ahowa, lu taune tamo Owane Sitewi maꞌe aiye taꞌame su, lowe peri nomo lo wanurowata. Serai nomo ipari wiyeme aꞌi wanu soꞌoruweyei. Sosu aiwawe aꞌi, ipari areareyei aꞌi nomo lai wanu soꞌoruweyei.^e

7 Kaiyemo mo ano, nomo lu taune taꞌi taꞌi aꞌi tiyati maꞌe marepi erasi aꞌi tote wawesiyete. Marepi erasi aꞌi tote wawesiyeyei ape, Owane Sitewi maꞌe fai. Lu taune werese marepi erasi aꞌi tote wawesiyeye ape, lowe Owane Sitewi lo eimane henerai. Sosu lowe Owane Sitewi lo marepi siye soꞌoruwesiya. 8 Owane Sitewi lai marepi erasi aꞌi tote wawesiyenamisiya. Lu taune tamo marepi tote wawesiye taꞌame ape, lowe Owane Sitewi lo marepi siye soꞌoru taꞌama. 9 Owane Sitewi lo marepi erasi aꞌi tote wawesiyeyei ape, nomo maꞌe au atuatuwe. Serai le meni eime lo taꞌi woto aꞌi hi awei maꞌe eimawe itorai. Serai meni eime itorai su, le lai marepi hepene heꞌi nomo maꞌe auwe.^f 10 Tu naifa nomo Owane Sitewi maꞌe marepi erasi aꞌi tote wawesiye taꞌame. Ahowa, Owane Sitewi lai tu nomo maꞌe marepi erasi aꞌi tote wawesiyenamiye. Serai le eime topo lo yo seni luwaru aꞌi nomo lo ne au heseyei ne eimawe arosai. Serai marepi erasi apou aꞌi tote wawesiyenamiteye.^g 11 Kaiyemo mo ano Owane Sitewi lai nomo maꞌe marepi erasi aꞌi tote wawesiyenamiye su, nomo lu taune tiyati maꞌe marepi erasi aꞌi tote wawesiyenamite. 12 Lu taune werese werese Owane Sitewi maꞌe siye taꞌame. Ahowa, nomo lu taune werese tiyati maꞌe marepi erasi aꞌi tote wawesiyenamiye su, serai Owane Sitewi lai nomo marepi papu ironamisiya. Sosu Owane Sitewi lo marepi erasi aꞌi nomo ne temeꞌeriyenamisiya.^h

13 Owane Sitewi lai Hepene Waraꞌi topo lo nomo maꞌe au eimawe arosai. Serai nomo le papu ironamisiya. Sosu aiwawe le marepi nomo lo papu ironamisiya. Nomo lai etiri ape soꞌoruwesiya.ⁱ 14 Wanure! Owane Sitewi, Tai Pefine nomo lo, meni eime topo lo taꞌi aꞌi awei maꞌe au eimawe arosai. Piyene awere? Le meni eime eimawe arosai su, le yo seni luwaru aꞌi omo omo werese sahe au ani sasari pamowe fusawi. Nomo le maꞌe siyeteye. Sosu peri ape lu taune maꞌe au teꞌe fiyarisiya. 15 Serai lu taune tamo apou aꞌi au teꞌeye, “Jisas lai Owane Sitewi lo meni eime topo lo tene!” Lowe au teꞌeye su, Owane Sitewi lai marepi lowe lo papu ironamisiya. Sosu aiwawe aꞌi lowe lai Owane Sitewi papu ironamisiya. 16 Sosu nomo Owane Sitewi lo marepi erasi aꞌi tote wawesiyeyei ape siye soꞌoruwesiya. Sosu aiwawe aꞌi nomo le ne tote tawesisiya. Le nomo ne arunatirowata.

Owane Sitewi lai marepi erasi aꞌi tote wawesiyenamisiya. Lu taune tamo, marepi erasi tote wawesiyeyei ape, papu ironamisiya su, lowe Owane Sitewi papu ironamisiya. Sosu aiwawe Owane Sitewi lai marepi lowe lo papu ironamisiya. 17 Marepi erasi tote wawesiyeyei ape nomo ne temeꞌeriyenamisiya. Serai nowe yeꞌewi se Owane Sitewi lai lu taune werese lo yo seni siye eteyei su, nomo lai Owane Sitewi lo nihe se waraꞌi aꞌi teirowa. Piyene awere? Nomo awei sato ahe, nomo le papu ironamisiya. 18 Ane marepi erasi aꞌi tote wawesiyeyei su, ane etiri werese atoweiyerowata. Pefine aꞌi, Owane Sitewi lo marepi erasi tote wawesiyeyei ape, atoweiyeyei werese ape mo hi ani ararosawirowa. Piyene awere? Nomo yo seni luwaru aꞌi irowei su, marepi nomo atoweiye aꞌi ne. Serai nomo marepi atoweiye aꞌi teriteyei su, nomo marepi erasi aꞌi tote wawesiyerowata.

19 Nomo lu taune werese maꞌe marepi erasi aꞌi tote wawesiyesiya. Piyene awere? Apou aiwawe aꞌi Owane Sitewi lai tu nomo maꞌe marepi erasi aꞌi tote wawesiyenamiye. 20 Meni ta apou aꞌi teꞌesiya, “Ane Owane Sitewi maꞌe marepi erasi aꞌi tote wawesiyesiya.” Sosu le meni ai marepi luwaru aꞌi au totenamisiya su, le meni ape areareyei aꞌi ne. Sosu lu taune tamo kaiyemo topo lo maꞌe, le siyesiya ape, ai marepi totenamiyei. Sosu le Owane Sitewi maꞌe, siyeye taꞌama ape, marepi erasi aꞌi tote wawesiyerowata. 21 Sosu aꞌi pe Owane Sitewi lai peri kairefi aꞌi nomo maꞌe apou aꞌi teꞌeye, “Lu taune tamo Owane Sitewi maꞌe marepi erasi aꞌi tote wawesiyenamisiya su, lowe kaiyemo lowe lo marepi erasi aꞌi fa tote wawesiyete.^j