Nomo Owane Sitewi lo eimane pefine aꞌi ne.
3
Tai pefine aꞌi lai nomo maꞌe marepi erasi aꞌi tote wawesiyenamisiya. Serai nomo eimane lo henerai. Pefine aꞌi, nomo Owane Sitewi lo eimane henerai tepaꞌasiye. Lu taune omo omo werese sahe, lowe Owane Sitewi lo marepi tote umasi taꞌame. Serai lowe lai etiri ape soꞌoru taꞌama. Nomo Owane Sitewi lo eimane pefine aꞌi ne.a 2 Kaiyemo mo ano! Nowe pereye aꞌi nomo Owane Sitewi lo eimane henerai. Sosu nowe yeꞌewi su, nomo piye henerairowa awere? Nomo soꞌoru taꞌama. Ahowa, sosu etiri ta nomo soꞌoruwesiya. Krais si tame itoraiyei su, nomo le siyerowa. Serai nowe ape se nomo le wou aiwawe aꞌi heneraiyei. Sosu marepi hepene nomo lo waraꞌi aꞌi henerairowa.b 3 Lu taune werese Krais lo marepi tote umasiyei su, lowe marepi lowe lo waraꞌi aꞌi, Krais aiwawe aꞌi, irosiya. Krais lai yo seni waraꞌi pefine aꞌi ne.4 Lu taune yo seni luwaru aꞌi irowei su, le Owane Sitewi lo yo peri arisiyei. Pefine aꞌi, yo seni luwaru aꞌi ape Owane Sitewi lo yo peri maꞌe ai atu tiyatisiya. 5 Ahowa, fene etiri ape soꞌoruwesiya. Krais hi awei maꞌe yo seni luwaru aꞌi au sasari pamoweyei ne itorai. Krais lo marepi hepene papu irosiya ape, yo seni luwaru aꞌi irorowata.c 6 Lu taune tamo Jisas lo marepi umasisiya su, lowe yo seni luwaru aꞌi ironamirowata. Lu taune yo seni luwaru aꞌi ironamiteyei su, lowe Jisas ne tote umasi taꞌame. Sosu le ne wanu soꞌoru taꞌama.
7 Kaiyemo mo ano, Weiyai! Lu taune tamo marepi fene lo owe ape tatai anite. Krais lai yo seni waraꞌi aꞌi tene! Serai lu taune tamo yo seni farere aꞌi irowei su, marepi lowe lo waraꞌi aꞌi ne. 8 Sepei luwaru aꞌi pefine aꞌi, Satan, tu naifa weriyei weriyei yo seni luwaru aꞌi ironamiteye. Serai lu taune tamo yo seni luwaru aꞌi ironamiyei su, le Satan maꞌe fai. Sosu Owane Sitewi lo meni eime itorai su, le aꞌi lai sepei Satan lo wiyawi au ani luwaruwe poꞌuteyei ne itorai.d 9 Owane Sitewi lo meni eime lai lu taune papu irowei su, lowe Owane Sitewi lo eimane pefine aꞌi heneraiyei. Marepi hepene heꞌi aꞌi lowe lo, Owane Sitewi lowe maꞌe auwe ape, marepi hepene weriyei weriyei ironamitorowa. Serai le yo seni luwaru aꞌi irorowata. Lu taune tamo Owane Sitewi lo eimane henerai su, lowe yo seni luwaru aꞌi irorowata.e 10 Lu taune tamo Owane Sitewi lo eimane heneraiyei su, eiwerai lowe soꞌoruweyei awere? Aiwawe lu taune tamo sepei luwaru pefine aꞌi, Satan lo eimane henerai su, eiwerai lowe soꞌoruweyei awere? Peri ano wanure! Lu taune tamo yo seni luwaru aꞌi ironamisiya su, lowe Owane Sitewi lo eimane taꞌama. Sosu aiwawe aꞌi, lu taune tamo Owane Sitewi lo lu feni marepi erasi aꞌi tote wawesiyenami taꞌame su, lowe Owane Sitewi lo eimane taꞌama.
Lu taune taꞌi taꞌi werese marepi erasi aꞌi tote wawesiye tiyatite.
11 Tu naifa weriyei peri ta, fene wanuwe ape apou aꞌi teꞌesiya, “Nomo lu taune werese maꞌe marepi erasi aꞌi tote wawesiye tiyatite.”f 12 Fene meni Kein lo yo seni owe ape umasire. Sepei Satan meni ape yaꞌoreye. Serai le paꞌise topo lo aine teraꞌeye. Piyene le paꞌise topo lo aine teraꞌeye awere? Wanure! Meni ape lo paꞌise yo seni farere aꞌi irowe. Sosu Kein lo marepi le maꞌe tote luwaruweye. Serai le paꞌise lo aine teraꞌeye.g 13 Kaiyemo mo lu taune werese marepi luwaru aꞌi fene ne toteyei. Fene owe ape hepene se suꞌarite.h 14 Nomo lu taune werese maꞌe, Krais lo marepi umasisiya ape, marepi erasi aꞌi tote wawesiyeteyei su, fene nomo aiwawe etiri ta soꞌoruwesiya. Hepene nomo lo temeniyerowata. Ahowa, marepi hepene nomo lo norohu mi mi pasi pasi weriyei ironamitorowa. Lu taune tamo marepi erasi aꞌi tote wawesiye taꞌame su, lowe hepene lowe lo temeniyerowa.i 15 Lu taune tamo tiyati maꞌe ai marepi totenamiteyei su, lowe aine teraꞌeyei siye lu wou aꞌi ne. Sosu fene etiri ape soꞌoruwesiya. Lu taune tamo meni ta aine teraꞌeyei su, lowe marepi hepene heꞌi aꞌi weriyei weriyei irotorowata.j
16 Marepi erasi aꞌi tote wawesiyesiya ape, ape piye awere? Wanure! Ane fene maꞌe au teꞌesiya. Meni ape Jisas Krais le nomo ne au temeniyeye. Serai nomo aꞌi lai kaiyemo mo nomo lo ne aiwawe aꞌi temeniyeyei.k 17 Meni ta etiri maꞌaru tomu neꞌese irosiya. Sosu le meni tereꞌe ta etiri maꞌaru ariye aꞌi se siyesiya. Meni ape lai meni tereꞌe ape au pati feraferei taꞌame su, meni ape Owane Sitewi lo marepi tote wawesiyeyei topo le papu iro taꞌame.l 18 Eimane ano, fene lu taune tiyati maꞌe marepi erasi aꞌi tote wawesiyeyei su, fene peri ta ahi se owe ape toteyei. Ahowa, fene marepi erasi aꞌi tote wawesiyeyei su, fene lowe maꞌe peri pefine aꞌi, sosu aiwawe aꞌi yo seni wisere aꞌi au irowei.m 19-20 Nomo lu taune tiyati maꞌe tote wawesiyenamisiya su, nomo etiri ape soꞌoruwesiya. Nomo Owane Sitewi lo marepi pefine aꞌi papu ironamisiya. Nomo yo seni luwaru aꞌi irowei su, marepi nomo lo orese aꞌi teriteyei. Ahowa, Owane Sitewi lai marepi fetaneye aꞌi nomo maꞌe aurowa. Owane Sitewi lai marepi nomo lo ne erasi aꞌi totenamisiya. Sosu le etiri werese siye soꞌoruwesiya.
21 Kaiyemo mo ano, nomo apou aꞌi toteyei su, “Nomo yo seni luwaru aꞌi iro taꞌame.” Nomo faraꞌu Owane Sitewi maꞌe aiyeyei. Nomo le ne marepi atoweiye aꞌi tote taꞌame.n 22 Nomo Owane Sitewi lo peri wanu umasiyei su, le etiri werese, nomo le maꞌe teꞌe toweriye ape, nomo maꞌe aurowa. Nomo yo seni farere aꞌi irowei su, Owane Sitewi lai nomo ne au wisereye nineꞌirowa. 23 Sosu aꞌi pe peri ano wanure! Owane Sitewi lo peri kairefi aꞌi apou aꞌi teꞌesiya. Fene werese Owane Sitewi lo meni eime ne, Jisas Krais, tote tawesite. Sosu aiwawe fene lu taune werese tiyati maꞌe marepi erasi aꞌi tote wawesiyenamite. Peri hesi aꞌi ape Owane Sitewi lai nomo maꞌe au teꞌeye.o 24 Lu taune tamo Owane Sitewi lo peri kairefi aꞌi wanu umasiyei su, lowe le papu ironamiyei. Sosu aiwawe aꞌi Owane Sitewi lai lowe papu ironamiyei. Nomo apou aꞌi soꞌoruwesiya. Owane Sitewi lai Hepene Waraꞌi lo nomo maꞌe ausai. Serai Owane Sitewi nomo papu ironamisiya su, le Hepene Waraꞌi aꞌi lo nomo maꞌe eimawe arosai. Hepene Waraꞌi aꞌi lo nomo maꞌe au atuatu areiyerowa.p