3 Wiyeme aꞌi nomo Owane Sitewi lo meni eime lo peri werese wanu umasiyei su, nomo meni ape marepi papu irosiya ape, siye soꞌoruwesiya! 4 Meni ta apou eisiya su, “Ane meni ape soꞌoruwe tene.” Sosu le peri topo lo ape arisiteye, meni ape peri wawero aꞌi meni. Sosu peri pefine aꞌi meni ape marepi papu iro taꞌame. 5 Ahowa, meni ta Owane Sitewi lo peri wanu umasisiya su, wiyeme aꞌi Owane Sitewi lo marepi erasi aꞌi meni ape maꞌe temeꞌeriyesiya su, serai nomo, le papu irosiya ape, siye soꞌoruwesiya. 6 Sosu lu taune tamo peri apou au teꞌe areiyesiya, “Ane Krais papu irosiya.” Serai lu taune ape mo Jisas lo marepi werese fa umasinamite. Jisas wou aꞌi umasiteye.^c

7 Kaiyemo mo peri ape ane fene maꞌe lese ausawisiya ape, peri ape heꞌi aꞌi taꞌama. Ahowa, fene tu naifa weriyei wanuteye. Yaꞌariyei peri heneruwe, fene tu wanuteye.^d 8 Serai ane fene maꞌe peri heꞌi aꞌi fene wanu umasiyei ape, lese ausawisiya. Fene peri wiyeme heꞌi aꞌi lo Krais sahe siyeteye. Fene peri wiyeme heꞌi aꞌi ape sahe irosiya. Serai yaꞌariyei lo yo seni fene lo werese teꞌi tepaꞌasiyewe, sosu peri wiyeme aꞌi mitaiyeyei pefine aꞌi tewi fiyarisiya.^e

9 Lu taune ta apou teꞌesiya, “Ane mitaiyeyei wiyeme aꞌi sato irosiya.” Sosu lu taune tereꞌe maꞌe ai marepi luwaru aꞌi totesiya. Meni ape yaꞌariyei lo yo seni ape sahe umasinamisiya.^f 10 Sosu aꞌi pe lu taune tamo kaiyemo ta maꞌe marepi wisere aꞌi totesiya. Meni ape marepi heꞌi aꞌi sato irosiya. Sosu aiwawe yo seni luwaru aꞌi ta le papu iro se taꞌame. Serai meni ape marepi aseyaro aꞌi faraꞌu umasinamisiya.^g 11 Ahowa, lu taune tamo kaiyemo lowe lo maꞌe ai marepi luwaru aꞌi toteyei su, meni ape yaꞌariyei lo yo seni ape sahe irosiya. Le yaꞌariyei lo yo seni sahe umasinamisiya. Lowe pasi aꞌi wou uweisiya. Serai le marepi towafi lowe lo siye eti taꞌame. Sosu le meremereye aꞌi uweisiya. Le yo seni meremereye aꞌi uweisiya su, lowe lu nihe pokowe tawesiyei wou aꞌi ne.^h

12 Owane Sitewi lai yo seni luwaru aꞌi fene lo Krais lo iyape se au ani sasari pamowe tepaꞌasiye. Serai ane fene, lu taune Jisas lo marepi tote tawesiteye ape, lese ausawisiya.

13 Ane lu owane maꞌe lese ausawisiya. Fene tai pefine aꞌi wou aꞌi ne. Fene meni ape tu naifa nowe sitewi iroteye ape, wanu soꞌoruwe tepaꞌasiye. Ane yoꞌorei lu ape maꞌe lese ausawisiya. Fene sepei luwaru pefine aꞌi hi ani araro tepaꞌasiye.

14 Ane eimane fene maꞌe lese ausawisiya. Fene werese Tai hire maꞌe irosiya ape, wanu tote soꞌoruwenamisiya. Ane fene tai werese maꞌe lese ausawisiya. Fene Meni Owane Krais, tu naifa nowe sitewi se iroteye ape, wanu soꞌoruwe tepaꞌasiye. Ane fene yoꞌorei lu ape maꞌe lese ausawisiya. Tote tawesiyei fene lo kairefi aꞌi irosiya. Owane Sitewi lo peri werese ape mo marepi fene lo papu ironamisiya. Sosu fene sepei luwaru pefine aꞌi hi ani araro tepaꞌasiye.

15 Fene yaꞌariyei lo marepi, sosu yaꞌariyei lo etiri werese, awei sahe irosiya ape, fene marepi erasi aꞌi owe ape totete. Lu taune tamo yaꞌariyei lo marepi erasi aꞌi toteyei su, Tai pefine aꞌi lo marepi lowe papu irorowata.ⁱ 16 Yaꞌariyei lo etiri werese apou aiwawe aꞌi ne. Nomo etiri luwaru aꞌi siye wisereyesiya. Nomo etiri luwaru aꞌi ape mo siyeyei su, yaꞌariyei marepi nomo lo marepi erasi aꞌi nineꞌinamisiya. Nomo etiri luwaru aꞌi siyesiya su, nomo etiri luwaru aꞌi ape mo aniyei ne totesiya. Sosu nomo etiri werese towafi nomo lo erasi aꞌi totenamisiya. Etiri werese ape mo Meni Owane Tai pefine aꞌi maꞌe aiye taꞌame.^j 17 Omo omo pani werese, sosu yaꞌariyei lo marepi aiwawe poꞌuterowa. Meni ta, Owane Sitewi lo marepi umasiteye ape, le mi mi pasi pasi weriyei ironamitorowa.^k

18 Eimane werese ano, nowe yeꞌewi ataheyewa. Fene Krais lo airame aiyerowa ape, wanuwe. Sosu pereye nowe eite se Krais lo airame tomu neꞌese sato irosiya. Serai nomo etiri ape soꞌoruwe tene! Nowe yeꞌewi heneraiyei ne ataheyeraiwa.^l 19 Krais lo airame ape mo tu naifa nomo mase aiwawe iroteye. Ahowa, lowe nomo arunatiyewe, fiyariti. Marepi lowe papu, lowe Krais lo marepi umasi taꞌame. Lowe Krais lo marepi umasiyei su, lowe pereye nowe eite se nomo aiwawe aꞌi iroteyei. Ahowa, lowe Krais lo marepi arunatiyewe, fiyariti. Serai fene marepi lowe lo siye soꞌoruwe tepaꞌasiye. Lowe Krais lo marepi tote umasi taꞌame.^m

20 Owane Sitewi lai Hepene Waraꞌi aꞌi lo fene werese maꞌe hi awei maꞌe eimawe arosai. Serai fene peri pefine aꞌi wanu soꞌoruwesiya.ⁿ 21 Ane fene maꞌe marepi kairefiyeyei ne au lesesiya. Marepi fene lo apou aꞌi toteye, “Nomo peri pefine aꞌi soꞌoru taꞌama.” Ahowa, fene Owane Sitewi lo peri pefine aꞌi soꞌoruwesiya. Fene lai etiri ta soꞌoruwesiya. Peri wawero werese aꞌi Owane Sitewi lo peri pefine aꞌi maꞌe aiye taꞌame. 22 Eiwerai peri wawero meni awere? Peri wawero meni apou aꞌi teꞌesiya, “Meni ape Jisas, le Krais taꞌama.” Meni ape lai Tai pefine aꞌi au teꞌe naruwe, sosu aiwawe aꞌi le meꞌiyeni maꞌe atati arunati. Le Owane Sitewi lo meni eime ne meꞌiyeni maꞌe atati arunati.^o 23 Meni ta lai Tai pefine aꞌi ne meꞌiyeni maꞌe atati arunati su, meni eime lo ne aiwawe aꞌi meꞌiyeni maꞌe atati arunati. Pefine aꞌi, meni ta Owane Sitewi lo meni eime ne tote tawesiyei su, le Tai Pefine aꞌi lo aiwawe tote tawesiyei.^p

24 Peri ano wanure! Peri ape fene tu naifa wanuteye ape, peri ape fene marepi fene lo sahe ironamisiya. Peri ape fene sahe irosiya. Sosu fene Owane Sitewi lo meni eime sahe ironamisiya, sosu aiwawe Tai Pefine aꞌi lo fene sahe ironamisiya. 25 Pefine aꞌi! Owane Sitewi lai nomo maꞌe peri au teꞌe naneiye. Nomo meni eime lo peri umasiyei su, Owane Sitewi lai nomo maꞌe marepi hepene heꞌi aꞌi mi mi pasi pasi weriyei ironamitorowa.

26 Lu taune tamo fene maꞌe marepi tote tatai aniyei ne totesiya. Serai ane etiri ape mo fene maꞌe lese ausawisiya. 27 Ane fene ne totesiya. Owane Sitewi lai fene maꞌe Hepene Waraꞌi aꞌi lo hi awei maꞌe eimawe arosai su, Hepene Waraꞌi aꞌi lo fene papu ironamisiya. Serai lu tamo etiri ape mo fene maꞌe au teꞌe atuaturowata. Ahowa, Owane Sitewi lo Hepene Waraꞌi aꞌi fene maꞌe etiri werese au teꞌe atuatunamisiya. Owane Sitewi lo Hepene Waraꞌi aꞌi peri wawero au teꞌe taꞌame. Tu naifa Owane Sitewi lo Hepene Waraꞌi aꞌi fene maꞌe au teꞌe atuatuteye apou teꞌeye, fene le sahe pei ironamite.^q

28 Ei, eimane ano, peri ano wanure. Fene le mase pei ironamite. Nomo le mase mi mi weriyei tei ironamiteyei su, nomo etiri werese ne atoweiye taꞌame. Nowe ape se Krais si tame itorairowa su, marepi nomo lo atoweiyerowata.

29 Pefine aꞌi! Krais lo yo seni waraꞌi aꞌi ironamisiya. Fene etiri ape soꞌoruwesiya. Serai lu taune werese yo seni farere aꞌi irowei su, lowe Owane Sitewi lo eimane pefine aꞌi heneraiyei.^r