1 Jon
One Towe Tutawe Jon lai Lese Ausawi.
Marepi hepene heꞌi aꞌi lo peri.
1
Meni ta tu naifa weriyei ironamiteye. Nomo peri lo wanuteye ape, sosu nomo le maꞌe nihe nomo lo se siyeteye. Sosu nomo le maꞌe siye etinamiteye ape, sosu nomo le maꞌe ereti nomo lo se isawe hetesiyeteye. Meni ape apou wou aꞌi marepi heꞌi aꞌi lo peri ne nomo fene maꞌe au teꞌe areiyesiya.a 2 Marepi heꞌi aꞌi tu naifa henerai. Nomo le maꞌe siyeteye. Sosu nomo le ne au teꞌe areiyesiya. Serai nomo marepi heꞌi aꞌi mi mi pasi pasi ironamirowa ape, fene maꞌe au teꞌe areiyesiya. Marepi heꞌi aꞌi ape Tai wiyeme mase ironamiteye. Sosu le nomo maꞌe henerai.b 3 Etiri ape mo, nomo lai siyenamiteye ape, sosu etiri ape mo nomo lai wanunamiteye. Nomo fene maꞌe au teꞌe areiyesiya. Piyene awere? Apou aꞌi fene nomo mase sewiyenamisiya. Sosu nomo Tai wiyeme, meni eime lo Jisas Krais aiwawe aꞌi, lowesi mase sewiyenamisiya. 4 Serai nomo fene maꞌe one towe eite se lese ausawisiya. Piyene awere? Apou aꞌi marepi nomo lo wisere aꞌi temeꞌeriye ironamisiya.cMitaiyeyei sahe uweisiya.
5 Peri heneruwe wisereye aꞌi ape, nomo Krais lo ahi maꞌe fai ape, wanuwe. Serai nomo fene maꞌe au teꞌe fiyariyei apou aꞌi Owane Sitewi aꞌi lai mitaiyeyei pefine aꞌi ne. Le papu sahe nowe pasi poꞌuteye.d 6 Nomo fene maꞌe au teꞌesiya su, “Nomo Owane Sitewi mase marepi taꞌi aꞌi irosiya.” Serai nomo nowe pasi aꞌi uweisiya. Apou aꞌi nomo yo seni luwaru aꞌi irosiya. Peri nomo lo wawero aꞌi ne. Sosu nomo peri pefine aꞌi iro taꞌame.e 7 Sosu nomo mitaiyeyei pefine aꞌi se uweisiya su, apou aꞌi Krais pefine aꞌi iroteye. Nomo lu taune taꞌi taꞌi aꞌi mase marepi taꞌi irosiya. Sosu Owane Sitewi lo meni eime lo fisaꞌi yo seni luwaru aꞌi nomo lo werese aseyaro aꞌi au irowei.
8 Nomo peri au teꞌe fiyariyei su, apou aꞌi teꞌesiya, “Nomo yo seni luwaru aꞌi irorowata.” Nomo taꞌu peri wawero aꞌi au teꞌesiya. Sosu Owane Sitewi lo peri pefine aꞌi marepi nomo lo sahe iro taꞌame. 9 Serai nomo Owane Sitewi maꞌe yo seni luwaru werese aꞌi au teꞌeyei su, le aꞌi lai mi mi pasi pasi weriyei, sosu marepi pefine aꞌi lo se, le yo seni luwaru aꞌi nomo lo werese au ani sasari pamoweyei. Sosu le etiri luwaru aꞌi werese nomo lo aseyaro aꞌi au irowei.f 10 Nomo peri ta apou au teꞌesiya su, “Nomo yo seni luwaru aꞌi iro taꞌame.” Nomo Owane Sitewi maꞌe apou teꞌesiya, “Ne peri wawero aꞌi au teꞌesiya.” Sosu Owane Sitewi lo peri pefine aꞌi marepi nomo lo sahe iro taꞌame.