Ebi akọn̄ ìkibem ogwu ubọọn̄ mîwut ifan̄a
3
Ogwu ubọọn̄ Dariọs onenito ijọk inorie mè miin̄ inyi otutuuk ebi ìkup me irak kan̄ mè otutuuk ebi uwu kan̄, mè otutuuk ebi mkpulu me Midia mè Pesia, 2 mè otutuuk ebi ìkikpulu me agan̄ me agan̄, mè ebi isi akọn̄, mè ebi ibot mkpulu ìkup me irak ubọk mkpulu kan̄ me otutuuk efit mè akọp agan̄ iba mè jaaba, ibene me India isi ire Etiopia. 3 Mgbọ ema eriebe mè inwọ ijot, ema efofon ita. Ogwu ubọọn̄ Dariọs oninin̄ agwut kan̄ isi ilaak, mè ibolo chieen̄.4 Nsabọn irieen̄ ita ebi ìkibem ogwu ubọọn̄ me lek kan̄, enenikitumu me etete kiban̄ ibe, 5 “Eji ge ge etumu-nu inu ge ònyenye lek ichit. Ogwu ufọọk-otu kan̄ okaan̄be iriọọn̄-inu me lek ichit, ogwu ubọọn̄ Dariọs mônyi ogwa atalek uche melek ikpele umin. 6 Mêtap ene ya ofọnti irio irio, môkisa ekpen̄ echi alata araran̄ inwọ miin̄, mè ikilaak me inyọn̄ mkpilaak alata araran̄, mè ikaan̄ uji ekpirikpo òkaan̄ ọgbọn alata araran̄ me lek, mè akisi ibot esabe atalek lilin̄ irọ, mè ijeen̄ asi ebek me ebek kan̄. 7 Bak me lek iriọọn̄-inu kan̄, môkup irek igba Dariọs, mênyinyi si ọmọ erieen̄ umin, ‘Ngwan̄ kè Dariọs.’ ”
8 Ema, me ene me ene, egege inu eyi kiban̄, mè ichit igọm, mè iben isi itap me irak inu ibene-ibot ogwu ubọọn̄ Dariọs, 9 mè ibe, “Ogwu ubọọn̄ isinan̄a ilaak, mênyi ọmọ inu cha egebe. Geelek ogwu ubọọn̄ melek ebi ene ita, ebi isi me Pesia, etọn̄be ibe ìre eya okaan̄ iriọọn̄-inu me lek ichit, eya oboben, igọọk me lek inu îgebe.”
10 Ogwu adasi ìge ibe, “Miin̄ onye lek ichit.” 11 Ogwu òso iba obe, “Ogwu ubọọn̄ onye lek ichit.” 12 Sà ogwu òso ita oge ibe, “Ebibaan̄ enye lek ichit, ire, atikọ otim ikpan̄ otutuuk inu geelek.”
13 Mgbọ ogwu ubọọn̄ obolobe chieen̄ me ilaak, eteteen̄ inu cha egebe isa ijet, ifufuk. 14 Ineniria osat igwen otutuuk ebi isi me Pesia mè Midia, mè ebi ìkikpulu me agan̄ me agan̄, mè ebi isi akọn̄, mè ebi ibot mkpulu melek ebi ibot ikwaan̄, 15 mè inimọnọ irek kan̄ me agwut oru, enenifuk ikpa cha me isi kiban̄. 16 Dariọs obebe, “Ìgwen nsabọn irieen̄ cha, inyi enekpa ikọ kiban̄ ewele.” Enenigwen ema inu, ema eninin̄ emen agwut oru ya. 17 Enenibe ema, “Ìkpa-nu inu enyi egebe ìwele ìnyi eji.”
Ikọ ofolek miin̄
Adasi ene, ogwu òtutumu ibe ke miin̄ okaan̄ unye ichit, obebene ikitumu ibe, 18 “Ebi nte n̄a, me atikọ, miin̄ okaan̄ unye ichit. Miin̄ ìkirọ inyi ebi geelek ìnwọnwọ ọmọ ekana ebi una ekiket. 19 Ìkirọ si ibe ekiket otutuuk ene ire ikike, eyi ogwu ubọọn̄ mè eyi ogwu kpà-nte, eyi ogwu usun̄ mè eyi gwun̄ owot, eyi ogwu ugbọọn̄ mè eyi ogwu òbọbọọn̄ ubọọn̄. 20 Ìkinwene ene ekiket ifo lek irerie mè inwọnwọ gaalek, mè ikirọ ibe ene iwuuk otutuuk ufieejit mè urieek. 21 Ìkirọ otutuuk ene ekeek ibe ke ema mîbọọn̄ ubọọn̄, mè irọ ibe ewuuk unye ogwu ubọọn̄ mè ebi ìkikpulu me agan̄ me agan̄ ekaan̄be, mè ikirọ ibe ene geelek ikibak otu ifuk ikpoko kan̄ me efie me efie. 22 Ebi ene isinwọ miin̄, mîra iwuuk ima unene mè ngwan̄, ìkafiat mgbọ, mîwọọk oge akọn̄ isibi. 23 Miin̄ isita ema me chieen̄, ema kpeyaka ikikeek inu ema erọbe. 24 Ebi nte n̄a, eyi miin̄ okirọ ibe ebi ene ekerọ otutuuk inu chi, ìre eya ìkajeen̄ ibe ke îre miin̄ onye lek ichit?” Itutumu ikeyi isan̄a, ikọ kan̄ otata.