Sarọs îtele ebi usun̄ akọn̄ eka
2
Me adasi acha Sarọs orebe ubọọn̄ ebi Pesia, Okumugwem onenirọ ibe ikọ ọmọ otumube sa me otu kè Jerimaya irọ iso, 2 Okumugwem îrọ inyi Sarọs ogwu ubọọn̄ Pesia, itap ikan iso otutuuk ere îkikpulu, mè ige si itap me ikpa. Sarọs ìge ibe:3 “Emi, Sarọs ogwu ubọọn̄ ebi Pesia m̀be: Okumugwem ebi Ijeren, Okumugwem, Ogwu Òbebene Ichit, îsa emi ito ubọọn̄ inyi otutuuk linyọn̄, 4 mè ibe emi ǹnama uwu ǹnyi ọmọ me Jeruselem, òkup me Judia. 5 Ikaan̄ ogwu geelek me etete kinyi òrere ene ge me lek ebi kan̄, Okumugwem Awaji kinyi ikup melek kwun̄. Ngwa, ìje ìnene ìfon Jeruselem òkup me Judia, mè ìnama Uwu Mbuban Okumugwem ebi Ijeren. Ọmọ ore Okumugwem òluk me Jeruselem. 6 Ere geelek ene geelek me lek kinyi olukbe, ebi ere ya etap ubọk, enyi ọmọ alata araran̄ mè alata okuket, 7 mè enyi ema inyinya mè eriembuuk, mè ofifi inu si echi mêsabe irọ inyan̄a-ibot iso me Uwu Mbuban Okumugwem òkup me Jeruselem.”
8 Ebi ibot uwu me otoko kè Juda mè otoko kè Benjamin, mè ebi ngwugwa mè ebi otoko kè Libai, esisibi inu, ema melek otutuuk ebi geelek Okumugwem ochakbe ubọk me ejit ibe enene esi Jeruselem esi enama Uwu Mbuban Okumugwem. 9 Ebi mbuuruk kiban̄ etatap ubọk, inyi ema otutuuk inu. Mînyi ema alata okuket mè alata araran̄, mè inyinya mè eriembuuk. Owuwa ene ebi Awaji ochakbe ubọk me ejit mînyi inu òwawa enenen mêsabe igwa ngwugwa irọ inyan̄a-ibot kiban̄ iso.
10 Ogwu ubọọn̄ Sarọs îkpulu si nroon̄ ikwaan̄ mbuban Okumugwem cha, echi Nebukadineja okpulube me Jeruselem isa ifo isi isun̄ me uwu mkpọmfaka kiban̄, isibi inyi ema. 11 Sarọs ogwu ubọọn̄ Pesia ìkpulu inu chi ikana itap me ubọk kè Mitiridates, ogwu òkisun̄ ikpoko kan̄. 12 Ogwa oyayaka ema inyi Sesibajari, ogwu ibot mkpulu òkikpulu agan̄ Judia. 13 Otu ifuk nroon̄ ikwaan̄ cha ìre: Obop ekpen̄ alata araran̄, mè obop ekpen̄ alata okuket, mè akọp uchieen̄ alata okuket iba mè onaan̄ge, mè akọp ngigo alata araran̄ ita, mè obop ngigọ alata okuket iba mè efit ini mè akọp, mè obop ofifi nroon̄ ikwaan̄ si. 14 Otutuuk nroon̄ ikwaan̄ alata araran̄ mè alata okuket eyakabe inyi ìre obop go mè efit ini mè akọp gweregwen mè onaan̄ge. 15 Sesibajari onenikpulu inu chi isa igbaalek ika, me mgbọ ọmọ melek ebi usun̄ akọn̄ enan̄abe me Babilọn igwu ikom ika inu Jeruselem.
Ebi ene kpechieek ibe enama Uwu Mbuban
16 Me ukot kè Ayaserọs ogwu ubọọn̄ Pesia, Bisilam mè Mitiridates, mè Tabeli, mè Rewum, mè Belitetimọs mè Simisayi ogwu òjeen̄ Ikan, mè ebi melek kiban̄, ìkiluk me Samaria mè ofifi ere, enenige ikpa keyi ijet ogwu ubọọn̄, ikeme ebi Ju ìkiluk me Judia mè Jeruselem:
17 “Eji ebi ikwaan̄ kwun̄, Rewum ogwu uti ikpa, mè Simisayi ogwu òjeen̄ Ikan, melek otutuuk ebi oru ebi melek kiji, mè ebi oyerebet ìkup me ido Kole-Siria mè ido Fonisia, ege ikpa keyi ijet owu, ogwu ubọọn̄ Ayaserọs, ogwukaan̄ kiji.
18 “Eji ekirọ inyi owu, ogwukaan̄ kiji mè ubọọn̄ kiji, òriọọn̄ ibe ke ebi Ju ìnanan̄a me agba lek kwun̄ ika inu me lek kiji, mîsi Jeruselem, mè ikinama ama òkpaka ibot ya, ama ikpak ya, mè ikikpọk si inama oyet ewe ama ya mè mgban ama ya, mè ikitọbọ si ọdọ uwu mbuban ge me ama ya. 19 Mgbọ keyi, ire ema ilululuk inama ama ya mè mgban ama isan̄a, ema mêjit ikpekpe otitip mkpulu. Ìkare eya gaalek, ema mênye si ibot inyi ebi ubọọn̄ geelek. 20 Me mgbọ keyi ema ekinama uwu mbuban yi, eji emun̄ ibe ke îkup me uyọt ibe eji ekakpọ inu yi ìlọ chieen̄, 21 ire, mè eji ekpa inu yi enyi owu, ogwukaan̄ kiji, ogwu ubọọn̄, inyi, ire ineme owu, eweek-nu emen ikpa ebi nte nte kwun̄ ekpọ inu ofolek ife chi. 22 Owu mômun̄ inu egebe òfo me lek kiban̄ me emen mfufuk, mè iriọọn̄ ibe ke ama yi ìre ama unye-ibot, òkinyi ebi ubọọn̄ mè ofifi ama kechilọ saasaak. 23 Owu mômun̄ ibe ke ebi Ju ekikpaka ibot inyi mkpulu geelek, mè ikikwek oniin̄ me emen ama ya akarake ukot ukot. Eya orọ ekpukpukube ama ya igwook. 24 Eya orọ, eji ekirọ owu ogwukaan̄ kiji mè ogwu ubọọn̄ òriọọn̄, ibe, ire ikpọk inama ama yi mè mgban kan̄ cha isan̄a, ke owu òkpoyaka ikọt ije itibi isi ido Kole-Siria mè ido Fonisia.”
25 Ogwu ubọọn̄ onenige ifọọk keyi ijet Rewum ogwu uti ikpa, mè Belitetimọs mè Simisayi ogwu òjeen̄ Ikan mè ebi melek kiban̄ kechilọ cha ebi ìkiluk me Samaria mè Siria mè Fonisia, ibe:
26 “Mfuk ikpa enyi egebe ijet emi, mè inyi ida ibe eweek emen ikpa mfufuk. Mîweek imun̄ ibe ke ama yi îkitim akọn̄ me lek ebi ubọọn̄ akarake ukot ikaan̄, 27 ke ebi ìkikup me emen ama ya mîma mkpaka-ibot mè akọn̄, ke ebi ubọọn̄ ìkakaan̄ unye mè ire ebi ikpak mîkpulu Jeruselem, mè inwan ebi ido Kole-Siria mè ido Fonisia ubọk ibọkọ otitip mkpulu. 28 Eya orọ, ǹkinyi ida mgbọ keyi ibe ekwek ife chi, inyi ekayaka ìnama ama ya, mè emun̄ si ibe ke kpeyaka irọrọ ikwaan̄ geege igak ikeya, 29 mè inu ikpak kecha òkirọ ikayaka ìje ìnyi isi, inyi ikatap ebi ubọọn̄ unaan̄-ejit.”
30 Mgbọ efukbe ikpa ogwu ubọọn̄ Ayaserọs ogebe, Rewum mè Simisayi ogwu òjeen̄ Ikan̄, mè ebi melek kiban̄ cha egwagwat lek isa ebi akọn̄ inyọn̄ inyinya mè ikpele urum ebi akọn̄ melek nroon̄ akọn̄ me ubọk, isa isi Jeruselem, mè ibene ikigban ebi ìkinama uwu ya. Ikwaan̄ inanama Uwu Mbuban ya me Jeruselem oyayaka ikeke, mege inire òso acha iba me ukot mkpulu kè Dariọs ogwu ubọọn̄ ebi Pesia.