2 Jeyowayaji ìre akọp acha iba mè ita mgbọ îkanabe ogwu ubọọn̄, mè ikup me Jeruselem ikpulu onyan̄ ita. 3 Ogwu ubọọn̄ Ijipiti osasan̄a Jeyowayaji isan̄a me inyọn̄ ogboon̄ ubọọn̄ kan̄ me Jeruselem, mè inifieek obop kilo alata okuket ita mè efit kilo ini, mè akọp kilo alata araran̄ ita mè kilo ini itoon̄ me ibot ido Juda kubọk otitip mkpulu. 4 Ogwu ubọọn̄ Ijipiti onenisa Eliyakim, ngwan̄ kè Jeyowayaji, ito ubọọn̄ Juda mè Jeruselem, mè inwene Eliyakim erieen̄ ibe ekegwen Jioyakim. Neko onenisa Jeyowayaji ngwan̄ kè Eliyakim ifo Ijipiti.

5 Jioyakim ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp mè acha ge. Îrọ ijo inu me chieen̄ Okumugwem Awaji kan̄. 6 Nebukadineja ogwu ubọọn̄ Babilọn ojijibi akọn̄ initim me lek kan̄, mè itim ikpan̄ ọmọ, mè isa mkpọn ekwe ibọp ọmọ ikam, mè isa ọmọ ifo Babilọn. 7 Nebukadineja îkpulu si owuwa nroon̄ ikwaan̄ Uwu Mbuban Okumugwem isa ifo Babilọn, mè isa isi igwook me uwu ubọọn̄^a kan̄.

8 Otutuuk ofifi inu òrọrọ me ukot mkpulu kè Jioyakim, mè filafila inu geelek îrọbe, mè nlilọ inu geelek emun̄be me ugwem kan̄, mîge otutuuk itap me emen ikpa mfufuk echi ebi ubọọn̄ Ijeren mè ebi ubọọn̄ Juda. Jioyakin ogwu gwun̄ onenikana ubọọn̄ me irek kan̄.

9 Jioyakin ìre akọp mè acha jeeta mgbọ îkanabe ogwu ubọọn̄, mè ikup me Jeruselem ikpulu onyan̄ ita mè akọp usen. Îrọ ijo inu me chieen̄ Okumugwem. 10 Me mgbọ aya otu ibot me acha ya, ogwu ubọọn̄ Nebukadineja oraria ebi ene, esasa ọmọ inu me Babilọn, mè ikpulu si nroon̄ ikwaan̄ unye otu ewe òkup me Uwu Mbuban Okumugwem igbaalek inu. Nebukadineja onenisa Jedikaya ngwan̄ kè Jioyakin ito ubọọn̄ me ido Juda melek ama Jeruselem.

11 Jedikaya ìre akọp acha iba mè ge mgbọ îkanabe ogwu ubọọn̄, mè ikup me Jeruselem ikpulu akọp mè acha ge. 12 Îrọ ijo inu me chieen̄ Okumugwem Awaji kan̄. Ìkasiki lek me isi kè Jerimaya ogwu nriran ogwu òtutumu ikọ ònan̄a me otu Okumugwem inyi ọmọ. 13 Îkpaka si ibot inyi ogwu ubọọn̄ Nebukadineja mgbọ Nebukadineja otetbe ibe inyan̄a ibot me erieen̄ Okumugwem. Ìkpọkpọ ikinye ibot, mè itet ejit inye, ìkachieek igwugwu ikom inu me lek Okumugwem, Awaji ebi Ijeren. 14 Ògak ge, otutuuk ebi ibot ebi ngwugwa mè ebi ibot ido Juda ekekirọ owuwa nlilọ inu, kpeyaka igbe utoon̄-ejit, ema ekekirọ mbuban inu cha echi ebi ofifi ido ekirọ, mè isa me ikeya ichaka mbuban me Uwu Mbuban, eyi Okumugwem osun̄be mbuban me Jeruselem.

15 Okumugwem Awaji ebi nte nte kiban̄ okpọkpọ ikiria etip me otu ebi ikwaan̄ kan̄ ijet ema, mije îkaan̄be ejit nsan me lek ebi kan̄ melek Uwu Mbuban. 16 Ire, ema ekekirọ ebi ikwaan̄ Awaji cha inu ochak, mè ikikpọ ikọ kan̄ chieen̄ isiki, mè ikinye chieen̄ inyi ebi nriran kan̄. Okumugwem onanaan̄ ejit uyok uyok inyi ebi kan̄, ire lek, kpunu ubọk ema ebeyaka ikọt inwọnọ. 17 Okumugwem oneniria Nebukadineja ogwu ubọọn̄ Babilọn^b inyi initim ema akọn̄ me lek. Nebukadineja osasa oge akọn̄ ikpan̄ nsabọn irieen̄ kiban̄ me emen Uwu Mbuban, ìkakaan̄ ejit nsan me lek ene geege, mè ìre nsabọn irieen̄ mè ìre nsabọn ibaan̄, mè ìre ebi ugane, mè ìre ebi isọọn̄ ibot. Awaji okakana otutuuk ene itap Nebukadineja me ubọk. 18 Nebukadineja okpukpulu otutuuk nroon̄ ikwaan̄ òkup me Uwu Mbuban Awaji, echi ilile mè echi asabọn, mè inin̄ si ere isun̄-inu echi òkup me Uwu Mbuban Okumugwem mè echi òkup me uwu ogwu ubọọn̄, mè ichiaan̄ otutuuk inu, mè ikpulu si inu me uwu ebi ibot ikwaan̄ ogwu ubọọn̄, mè isa otutuuk inu cha ifo Babilọn. 19 Ebi akọn̄ kan̄ etatap ukan̄ me lek Uwu Mbuban Awaji, mè igbugbọ mgban ama Jeruselem igwook, mè itap si ukan̄ iwọp otutuuk uwu ogwu ubọọn̄, mè ijijaka otutuuk inu geelek òkaan̄ oruru me ere ya isan̄a kpai.

20 Nebukadineja okpukpulu otutuuk ebi geelek ekpan̄be isik isa ifo Babilọn, ife cha ekakana usun̄ inyi ọmọ melek ebi bọn mege mkpulu Pesia ominbe ikana ido ònyenye lek. 21 Ebi ene eyayat itele ido Juda, ijọn̄ ya onenikaan̄ owuwa acha isiki-efuuk. Otutuuk acha cha îlaakbe ukpọk, ijọn̄ ya otatap efuuk, mè ikup ikeya mege akọp acha jaaba. Eya onenirọ ikọ Okumugwem otumube inan̄a me otu ogwu nriran Jerimaya iso.

22 Me adasi acha me lek mkpulu kè Sarọs ogwu ubọọn̄ Pesia, Okumugwem onenirọ ikọ kan̄ eyi îwuukbe lek itumu inan̄a me otu kè Jerimaya iso, mè initap me ejit kè Sarọs ogwu ubọọn̄ Pesia ibe inyi ida me otutuuk ido kan̄, mè ige si itap me ikpa ichon ikana ibe:

23 “Sarọs ogwu ubọọn̄ Pesia ìtumu ibe ikeyi:

“ ‘Okumugwem Awaji òkup me inyọn̄ îkana otutuuk ido geelek òkup me linyọn̄ keyi itap emi me ubọk, mè igobo emi ibe emi ǹnama Uwu Mbuban ǹnyi ọmọ me Jeruselem eyi òkup me ido Juda. Eya orọ, me etete kinyi, ebi geelek ìrere ebi eyi kan̄ egwu ekom efon Jeruselem me ido Juda. Awaji kinyi ikup melek kinyi.’ ”