24
Me ukot mkpulu kè Jioyakim, Nebukadineja ogwu ubọọn̄ Babilọn onenijibi akọn̄ inin̄ ido Juda, mè itim ikpan̄. Jioyakim okakana usun̄ inyi ọmọ acha ita, mè inwene ejit, mè inikpaka ibot inyi Nebukadineja. 2 Okumugwem oraria urum ebi inọ afa inan̄a me Babilọn, mè Aram, mè Mowabu, mè Amọn inu ibe enejijaka Juda esan̄a kpai. Okumugwem ìrọ inu yi igọọk me lek ikọ îtumube inan̄a me otu ebi ikwaan̄ kan̄ ebi nriran. 3 Me atikọ, inu yi ìrọ me Juda igọọk me otu ikọ Okumugwem, isasa isan̄a ido Juda isan̄a isi ge me isi Okumugwem, mije ijo inu kè Manasi, melek otutuuk inu geelek îrọbe. 4 Ògak ge, Manasi îkpan̄ owuwa ebi ekalọge inu geege, eje ife cha orereke otutuuk Jeruselem. Mije keya, Okumugwem ìkakọt ìtele ìnyi ebi Juda.5 Otutuuk ofifi inu òrọrọ me ukot mkpulu kè Jioyakim, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Juda. 6 Jioyakim onenikwu ifo igọọk ebi nte nte kan̄. Jioyakin ogwu gwun̄ okakana ubọọn̄ me irek kan̄.
7 Ogwu ubọọn̄ Ijipiti ìkayaka ìkọt ìjibi akọn̄ ìnan̄a ìsibi me ido kiban̄ ofifi, mije, ogwu ubọọn̄ Babilọn îbọkọ otutuuk oke ijọn̄ kan̄, ibene me okwaan̄ Ijipiti isi igwook me okwaan̄ Yuferetis.
Jioyakin îkana ogwu ubọọn̄ Juda
8 Jioyakin ìre akọp mè acha jeeta mgbọ îkanabe ogwu ubọọn̄, mè ikup me Jeruselem ikpulu onyan̄ ita. Erieen̄ ogwu uga ìre Neyusita gwun̄ kè Elinatan ogwu Jeruselem. 9 Jioyakin orọrọ ijo inu me chieen̄ Okumugwem, kubọk ogwu ute orọbe.
10 Me ike mgbọ ya, ebi ibot akọn̄ kè Nebukadineja ogwu ubọọn̄ Babilọn ejijibi akọn̄ inu Jeruselem, mè inikpa mbin akọn̄ ikana ama. 11 Nebukadineja me lek kan̄ înu si Jeruselem mgbọ ebi akọn̄ kan̄ ekpabe mbin akọn̄ ikana ama ya. 12 Jioyakin ogwu ubọọn̄ Juda, mè ogwu uga, mè ebi nteme kan̄, mè ebi ibot ikwaan̄ kan̄, melek otutuuk ebi isi ikwaan̄ kan̄, enanan̄a isibi, mè inikana lek kiban̄ inyi Nebukadineja ogwu ubọọn̄ Babilọn.
Îre me òso acha jeeta me lek mkpulu kè Nebukadineja ke Nebukadineja onitet Jioyakin me akọn̄ isa ifo Babilọn isi itap me mkpọn. 13 Nebukadineja onenikpulu otutuuk inu ubọọn̄ òkup me Uwu Mbuban Okumugwem me Jeruselem, mè ikpulu si otutuuk echi òkup me uwu ogwu ubọọn̄, mè ikpulu si otutuuk nroon̄ ikwaan̄ esabe alata araran̄ irom echi Solomọn ogwu ubọọn̄ Ijeren orọbe itap me Uwu Mbuban Okumugwem, kubọk Okumugwem owuukbe lek itumu ibe ke môrọ. 14 Nebukadineja okpukpulu otutuuk ebi Jeruselem, òrere akọp obop ene, me usun̄ akọn̄ isa ifo Babilọn. Îkpulu otutuuk ebi ibot akọn̄, mè otutuuk ebi akọn̄, mè otutuuk ebi usọ ikwaan̄ ubọk, mè ebi usọ ikwaan̄ okwukwut, igbaalek isa ifo. Îtata ebi ugbọọn̄ ntọn̄ otu gaalek ke îtele ibe ebia me ido Juda.
15 Nebukadineja otetet Jioyakin me usun̄ akọn̄ isa ifo Babilọn. Îtet si nga kè Jioyakin ogwu ubọọn̄, mè itet ebi nwa ogwu ubọọn̄, mè ebi ikwaan̄ kan̄, melek ebi ilile ido Juda me usun̄ akọn̄ isa igbaalek inan̄a me Jeruselem ifo Babilọn. 16 Ogwu ubọọn̄ Babilọn ìkpukpulu otutuuk obop ebi akọn̄ jaaba ebi ìnyenye lek mè ikaan̄ efuuk ititim akọn̄, mè ikpulu si obop ebi usọ ikwaan̄ ubọk mè ebi usọ ikwaan̄ okwukwut isa isi igwook me Babilọn. 17 Nebukadineja ogwu ubọọn̄ Babilọn onenisa Mataniya, ngwan̄ nte kè Jioyakin irọ ubọọn̄ me irek kè Jioyakin, mè inwene Mataniya erieen̄ ibe ekegwen Jedikaya.
Jedikaya îkana ogwu ubọọn̄ Juda
18 Jedikaya ìre akọp acha iba mè ge mgbọ îkanabe ogwu ubọọn̄, mè ikup me Jeruselem ikpulu akọp mè acha ge. Erieen̄ ogwu uga ìre Amutali gwun̄ kè Jerimaya ogwu Libina. 19 Jedikaya orọrọ ijo inu me chieen̄ Okumugwem, kubọk Jioyakim orọbe. 20 Îre mije uyok uyok unaan̄-ejit Okumugwem onaan̄be ke otutuuk inu chi onirọn̄ ikeme ama Jeruselem mè ido Juda. Me òta kan̄, Okumugwem ochechep ema isan̄a, mè iyiyala ema isan̄a me isi kan̄.
Jedikaya onenikpaka ibot inyi ogwu ubọọn̄ Babilọn.