Mîgbugbọ Jeruselem
25
Me òso acha onaan̄ge me lek mkpulu kè Jedikaya, me òso akọp usen me òso akọp onyan̄ me acha ya, Nebukadineja ogwu ubọọn̄ Babilọn onenijibi akọn̄ inu Jeruselem, ọmọ melek otutuuk ebi akọn̄ kan̄, mè inirieen̄ akọn̄ me agba lek ama ya, mè ikpa mbin akọn̄ ikana. 2 Mbin akọn̄ ya ekpabe ikana ama ya okukup ikeya mege ire òso akọp mè acha ge me lek mkpulu kè Jedikaya ogwu ubọọn̄. 3 Me òso usen onaan̄ge me òso onyan̄ ini me acha ya, akan̄ òninin̄ ama ya onyenye ire lek inorie ebilene eberie ìkayaka ìkup. 4 Ebi akọn̄ Babilọn enenibum ere ge me lek mgban ama ya itibi. Ire, mije ebi akọn̄ Babilọn egbanbe ikana ama ya okokop, otutuuk ebi akọn̄ ìkup me emen ama ya ekukup ire eririeen̄, mè inilim me eririeen̄ itibi me otunchit òkup me ibot usọk mgban iba, me agba lek uko ajakajak ogwu ubọọn̄, mè itibi iraka ebi akọn̄ Babilọn ifo agan̄ iteke Jodan.a 5 Ire, ebi akọn̄ Babilọn egọgọọk ogwu ubọọn̄ kiban̄, mè isoon̄ ọmọ me òla ijọn̄ Jeriko. Otutuuk ebi akọn̄ kan̄ elilim iyat itele ọmọ. 6 Ebi akọn̄ Babilọn etetet ọmọ, mè isa ijet ogwu ubọọn̄ Babilọn me Ribila, efefieek oyerebet itip ọmọ. 7 Ekpakpan̄ bọn ebirieen̄ kè Jedikaya me chieen̄ kan̄, mè inirọkọ ọmọ chieen̄ iba kan̄, mè isa mkpọn ekwe igon ọmọ ikam, mè inisa ọmọ isi Babilọn.8 Me òso usen jaaba me òso onyan̄ go me òso akọp mè acha onaan̄ge me lek mkpulu kè Nebukadineja ogwu ubọọn̄ Babilọn, Nebujaradan ogwu ibot ebi akọn̄ ìkibem ogwu ubọọn̄, òrere si ogwu ibot ikwaan̄ ogwu ubọọn̄ Babilọn, onunu Jeruselem, 9 mè initap ukan̄ iwọp Uwu Mbuban Okumugwem, mè itap si ukan̄ me lek uwu ogwu ubọọn̄, mè itaak si me lek otutuuk uwu ebi Jeruselem. Îtap si ukan̄ iwọp otutuuk uwu ilile geelek me Jeruselem. 10 Otutuuk ebi akọn̄ Babilọn ìgọgọọk ogwu ibot ebi akọn̄ ìkibem ogwu ubọọn̄ ya inu enenigbaan̄ ubọk igbugbọ otutuuk mgban ewakbe ikana ama Jeruselem igwook me ijọn̄. 11 Nebujaradan ogwu ibot ebi akọn̄ ìkibem ogwu ubọọn̄ okpukpulu otutuuk ebi ìsisik me emen ama ya, mè ebi ìsasa lek kiban̄ isi ikana inyi ogwu ubọọn̄ Babilọn, mè otutuuk ebi ido ya, mè ikpulu ema me usun̄ akọn̄ isi igwook me Babilọn. 12 Ire, ogwu ibot akọn̄ ya onenitele usini ebi ugbọọn̄ ntọn̄ otu me ido ya ibe ekup ekesi ikwaan̄ me emen uko gerep cha melek ofifi uko cha.
13 Ebi akọn̄ Babilọn cha eninin̄ emen Uwu Mbuban, mè ibak atà echi esabe ekwe irom, mè ibak si ngugọọn̄ ekpirikpo echi esabe ekwe irom, mè ibum otin̄ ekwe ya eyi ekigwen Okwaan̄, mè ikpulu otutuuk ekwe esabe irom inu cha isa ifon Babilọn. 14 Ema mîkpulu si ebi kè otin̄, mè orọk, mè sisini ekisa ikpaan̄ ekwut mkpukan̄, mè nkọm, mè otutuuk nroon̄ ikwaan̄ esabe ekwe irom echi ekisa isi ikwaan̄ me Uwu Mbuban. 15 Ogwu ibot ebi akọn̄ ìkibem ogwu ubọọn̄ ya îkpulu si otutuuk ngigọ nsensi echi ekisa itap nsensi iwọp, mè ebi kè ewop inyan eje, mè otutuuk inu geelek esabe atalek alata araran̄ mè atalek alata okuket irom.
16 Ekwe ònan̄a me lek atà iba cha, mè lek Okwaan̄ ya, mè lek ngugọọn̄ ekpirikpo cha, echi Solomọn orọbe itap me emen Uwu Mbuban Okumugwem îwa iraka inu mêkọtbe itọ. 17 Ubene atà ge me lek atà cha ìre ejit ini mè agbagba otubọk ini, ejiik erombe itoon̄ me inyọn̄ ibot atà ge ìre agbagba otubọk gweregwen me ubene kan̄, echi esabe ekwe irom inu òbet lek pomegaranet isa ikpa ikana me lek. Ubọk yaage si ke ebala atà eyi òso iba.
18 Ogwu ibot ebi akọn̄ ìkibem ogwu ubọọn̄ yi onenikpulu Seraya ogwu ibot ngwugwa, mè Jefanaya ogwu ògọgọọk ọmọ me udun̄, melek ene ita ebi ìkibem isotu me usun̄ akọn̄ isa ifon Babilọn. 19 Me lek ebi ìsisik me emen ama ya, îtet ogwu ibot ebi akọn̄, mè itet si ene go ebi nteme ogwu ubọọn̄ ebi ìbabia me emen ama ya. Îtet si ogwu uti ikpa, ogwu òrere ogwu ibot me lek ebi ìkitet ene itap me akọn̄, igbaalek akọp ene gweregwen îmun̄be me emen ama ya. 20 Nebujaradan onenisa otutuuk ebi ife cha ijet ogwu ubọọn̄ Babilọn me Ribila. 21 Ogwu ubọọn̄ Babilọn okpakpan̄ ema otutuuk me Ribila, me ido Amat.
Sa me ikeyi ke ekpulu otutuuk ebi ido Juda me akọn̄ isibi isan̄a me inyọn̄ ijọn̄ kiban̄.
22 Nebukadineja ogwu ubọọn̄ Babilọn onenito Gedaliya gwun̄ kè Ayikam, gwun̄ gwun̄ kè Safan, ibe ire ogwu ibot ogwu òbokikpọ chieen̄ me lek ebi îjuukbe itele me ido Juda. 23 Mgbọ otutuuk ebi ibot akọn̄ melek ebi akọn̄ kiban̄ enọbe ibe ke ogwu ubọọn̄ Babilọn îsa Gedaliya ito kubọk ogwu mkpulu, ema enunu me lek kè Gedaliya me Mijipa. Ema ìre Isimen gwun̄ kè Netaniya, mè Joyanan gwun̄ kè Kareya, mè Seraya gwun̄ kè Tanayumet ogwu Netofa, mè Jayajania gwun̄ ogwu Maaka, ema eje melek ebi akọn̄ kiban̄ inu. 24 Gedaliya onyanyan̄a ibot inyi ema melek ebi akọn̄ kiban̄, mè itumu inyi ema ibe, “Ikatet ukpook mije ebi ibot akọn̄ Babilọn. Ìluk me inyọn̄ ijọn̄ yi, mè ìkisi ikwaan̄ ìnyi ogwu ubọọn̄ Babilọn, ke inu môje ijaan̄ enyi me lek.”
25 Ire, me òso onyan̄ jaaba, Isimen gwun̄ kè Netaniya, gwun̄ kè Elisama ogwu owot iman uwu ubọọn̄, onenisa akọp ebirieen̄ igbaalek kan̄ inu, mè inikpan̄ Gedaliya, mè ikpan̄ si usini ebi Juda mè ebi Babilọn ebi melek kan̄ ekupbe me Mijipa igbaalek. 26 Mije keya, otutuuk ebi Juda, ebi asasa mè ebi ilile, mè otutuuk ebi ibot akọn̄ cha, elilim inan̄a me Juda ifon Ijipiti, mije ukpook ebi Babilọn.
Mîsan̄a Jioyakin isibi me mkpọn
27 Me òso akọp acha ita mè jaaba eyi Jioyakin ogwu ubọọn̄ Juda okupbe me usun̄ akọn̄, me ukot mgbọ Efili Merodak okanabe ogwu ubọọn̄ me ido Babilọn, Efili Merodak onenisan̄a Jioyakin isibi me mkpọn. Inu ya ìrọ me òso akọp usen iba mè jaaba me òso akọp mè onyan̄ iba me acha ya. 28 Efili Merodak onenikitumu ikọ esuuk esuuk melek kè Jioyakin, mè ininyi ọmọ irek ulibi òbebene igak echi ofifi ebi ubọọn̄ kechilọ melek kan̄ ekupbe me Babilọn. 29 Jioyakin oneniwọọk ofọnti mkpọn isan̄a me lek, mè inibene ikigọọk isiki ikweek me lek ikasi inorie ogwu ubọọn̄ ikirie inorie otutuuk usen ugwem kan̄. 30 Ogwu ubọọn̄ Babilọn okekikpe sọn̄ mkpukpe me usen me usen inyi Jioyakin me otutuuk usen ugwem kan̄.