Uriaak Kè Manasi
37
Me ikpa Mfufuk Eyi Òso Iba, ibot 33:1-20, mîkpa ibe ke mîtet Manasi, ijo ogwu ubọọn̄ ebi Juda ge, me usun̄ akọn̄ isa ifo Babilọn. Mîkpa si me ere ya, me ibot 33:12-13, ibe ke Manasi îgwu ikom me ijo inu kan̄ me Babilọn ya, mè iriaak uriaak, Awaji onọnọ uriaak kan̄, mè iyaka ọmọ ika inu me Jeruselem.Ikpa keyi ìre uriaak ya eyi Manasi oriaakbe me Babilọn.
Itọtọn̄ Awaji
1 Jei, Okumugwem Ogwu Òkaan̄ Unye Geelek,
Awaji ebi nte nte kiji, Ebereyam, mè Ajiki, mè Jekọp,
mè bọn owot iman kiban̄ ebi ata irọrọ;
2 ogwu òrom inyọn̄ mè ijọn̄
me otutuuk onineen̄ kiban̄;
3 owu ogwu òsa ida kwun̄ ikput okwaan̄ ibia me irek,
ogwu ògwugwuk ugwuuk okwaan̄ ichit,
mè isa erieen̄ kwun̄ eyi ekitetet ukpook me lek, eyi òkitataan̄ etip
igon me lek, kubọk iman̄ òriọọn̄.
4 Inu geelek ìkiraran, mè ikinyinyen̄e
mgbọ owu osijeen̄ unye kwun̄,
5 mije, kpebekọt ikeke ida ikpele ujamgbugbo kwun̄,
kpebekọkọt si ibeme unaan̄-ejit kwun̄ me lek ebi ijo.
6 Ire, nsan kwun̄ ochieekbe use ikakaan̄ me lek ene,
kpebekọt itọ, kpebekọkọt si iweek iriọọn̄.
7 Mije, owu ore Okumugwem, Ogwu Òbebene Ichit,
ogwu ikpele ejit njijin, mè ujọn̄ọ ukarajit, mè ikpele nsan,
ogwu òkitap ubọk inyi ebilene me emen ufialek,
mgbọ ema isikibọkọ ufialek ijo inu kiban̄.
Jei, Ogwukaan̄-ene, sa me ikpele ata ejit kwun̄,
owu ochieek use ibe ke owu môtele ijo inyi ebi ìrọrọ owu ilọ,
mè inyan̄a ebi ìgwugwu ikom;
owu osa me owuwa ejit nsan okaan̄be,
ito ibe ebi ijo egwu ekom,
inyi mênyan̄a ema isibi.
8 Eya orọ, owu Okumugwem, Awaji ebi ata irọrọ,
òkasun̄ igwugwu ikom ìnyi ebi ata irọrọ,
òkasun̄ ìnyi Ebereyam mè Ajiki mè Jekọp, ebi kperọ owu ilọ,
ire, òsun̄ igwugwu ikom inyi emi, ogwu ijo ene.
Itutumu ijọ
9 Mije, ijo inu nrọbe îwa me otu ifuk,
igak nkwukwuuk achiaan̄ agba awaji.
Jei, Okumugwem, ijo inu n̄a îwa, îwa ma!
Emi ǹkagbe ibebene chieen̄ imun̄ ubene akpabin inyọn̄,
mije owuwa nrọ-nlọ n̄a.
10 Ulobo owuwa mkpọn esabe igugọbọ emi îkeme emi iwọ,
ǹkakọt ìbene isi, mije ijo n̄a,
ǹkamumun̄ esuuk;
mije, nribi owu uyok uyok unaan̄-ejit me ejit,
mè irọ inu òfefieek me chieen̄ kwun̄,
sa me isusun̄ mkpọmfaka,
mè irọrọ ijo inu itutọmọ.
Ibebeek ibe etele ijo
11 Mgbọ keyi, ngele igwook inyi owu me ijọn̄ ijọn̄ ejit n̄a,
ikibeek owu ata ejit kwun̄.
12 Nrọ owu ilọ, jei Okumugwem, nrọ owu ilọ,
nriọọn̄ ijo inu n̄a nrọbe.
13 Soso, nriaak owu, mè ikibeek owu;
tele nyi emi, jei Okumugwem, soso, tele nyi emi!
Kagbaan̄ emi melek ijo n̄a ìjijaka!
Kanaan̄ ejit ìnyi emi ìre mgbọ geelek,
katitiin̄ ijo inu n̄a ìbuk emi me ibot;
katip emi oyerebet ìria emi ìsi ama ekwukwu,
mije, owu ìre Awaji ebi ìgwugwu ikom me ijo inu,
jei Okumugwem.
14 Nnwọn kwun̄ môsibi utoon̄ me lek n̄a;
mije, ubọk geelek ǹkagbegbe,
owu mônyan̄a emi sa me ikpele nsan kwun̄.
15 Emi mâkekitọn̄ owu mgbọ geelek
me otutuuk usen ugwem n̄a.
Mije, otutuuk urum ebi emen inyọn̄ ekikọt okwa itọn̄ owu;
ujamgbugbo kwun̄ si ìkukup ire mgbọ geelek, mgbọ geelek.