7 Ogwu ubọọn̄ Josaya oneninyi ebi ìkup me ere ya bọn arọọn̄ melek bọn ebot, akọp obop ita, mè obop bọn eriembuuk ita. Ìnyi anam chi inan̄a me lek echi ọmọ okaan̄be, ike îchieekbe use inyi ebi ene mè ebi ngwugwa mè ebi otoko kè Libai. 8 Ebi ibot ikwaan̄ Uwu Mbuban, Ilikiya, mè Jekaraya, mè Jeyen, enyinyi ebi ngwugwa obop arọọn̄ iba mè efit gweregwen, mè efit bọn eriembuuk ita ibe esa erọ ijọk Iraraka ya. 9 Ikeya si, Jekonaya, mè Semaya, mè Netanayen ogwu ngwan̄, mè Asabiya, mè Okiyen, mè Joram, ebi ibot akọn̄ ìkikpulu obop obop ebi akọn̄, enyinyi si ebi otoko kè Libai obop arọọn̄ go mè efit bọn eriembuuk jaaba.

10 Ubọk erọbe ìre ikeyi: Ebi ngwugwa mè ebi otoko kè Libai, eben fituru kpetap olat, isa ikeke me onineen̄ me owot iman me owot iman, 11 mè otoko me otoko, me isi ebi ene, ibegwa ngwugwa inyi Okumugwem, kubọk egebe me ikpa Ikan kè Mosis. Erọ orirọ yi me ewelegwe. 12 Ema eneniwọp arọọn̄ ijọk Iraraka ya me lek ukan̄, ike ebe erọ, mè item inorie ngwugwa ya me emen otin̄ ekwe mè uchieen̄ ile, ikekidun̄u utop olu ifo inyọn̄. 13 Ema enenibeen̄ okpọkọ anam cha ikana ikinyi otutuuk ebi ene. Mgbọ eya otabe, ema enenirọ ngwugwa ijọk Iraraka ya eyi kiban̄ mè eyi ebi ngwan̄ kiban̄ ebi ngwugwa, ebi bọn kè Erọn. 14 Mije ebi ngwugwa ekekebe me lek igwagwa okpọn̄ anam inyi Awaji mege egwe ofitbe, eya orọ ebi otoko kè Libai erọbe inorie ijọk Iraraka ya inyi lek kiban̄ mè ebi ngwan̄ kiban̄, ebi bọn kè Erọn. 15 Bọn kè Asafu, ebi ìkọt okwa Uwu Mbuban, ekukup me irek kiban̄, igọọk ubọk Debit odọmọbe isun̄, ema melek Asafu, mè Jekaraya, mè Edinọs, ebi ìkup me otuchieen̄ uwu ogwu ubọọn̄. 16 Ebi ìkibem otunchit ekukup me otunchit geelek, ìkakup me uyọt ibe ene geege inan̄a me irek ikwaan̄ kan̄, mije ebi otoko kè Libai, ebi ngwan̄ kiban̄, ekirọ inorie ngwugwa ijọk Iraraka inyi ema.

17 Sa me ikeya ke erọ inu geelek òfo me lek ngwugwa igwagwa inyi Okumugwem isan̄a me egwe yaage. Mîrọ ijọk Iraraka, 18 mè igwa ngwugwa me inyọn̄ ntook ngwugwa Okumugwem, ike ogwu ubọọn̄ Josaya onyibe ida. 19 Ebi Ijeren ebi ìkukup me mgbọ ya, ererie ijọk Iraraka mè ijọk Fituru Kpunu Olat usen jaaba. 20 Akarake ukot kè Samien ogwu nriran, kperie mbet lek ijọk Iraraka keyi eriebe. 21 Kpunu ene geege me lek ebi ubọọn̄ Ijeren òtoto mbet lek ijọk Iraraka eyi Josaya, mè ebi ngwugwa, mè ebi otoko kè Libai, mè ebi Juda, mè otutuuk ebi Ijeren ìkiluk me Jeruselem etobe. 22 Îre me òso akọp mè acha jeeta me ukot mkpulu kè Josaya ke ijọk Iraraka ya obọkọ irek.

23 Josaya îrọ inu òtatat me isi Okumugwem, mije, îriọọn̄ Awaji òjot òjot me ejit kan̄. 24 Mîge inu òrọrọ me ukot kan̄ itap me ikpa mfufuk ukot ikaan̄, eyi òkitumu ikọ ofolek ebi ìrọrọ ijo inu, mè ikaan̄ eru ikpak ikpak me lek Okumugwem igak ebi ofifi ife mè ìre mkpulu, mè ike ema erọbe Okumugwem inaan̄ ejit enenen, eyi òrọrọ ibe osusut kan̄ ire lek ebi Ijeren.

25 Mgbọ Josaya orọbe otutuuk inu chi îrọbe isan̄a, ogwu Fero, òrere ogwu ubọọn̄ Ijipiti, onenijibi akọn̄ ibosi itim me Karekemis me lek okwaan̄ Yuferetis, Josaya osisibi isi ikweek ọmọ. 26 Ogwu ubọọn̄ Ijipiti oraria etip ijet ọmọ ibe, “Owu, ogwu ubọọn̄ Juda, kpasi nyan̄anyan̄a ke owu melek n̄a ekaan̄ ni? 27 Ìkare owu ke Okumugwem Awaji oria emi inu lek, akọn̄ n̄a ìkup me agan̄ okwaan̄ Yuferetis. Okumugwem òwa melek n̄a me lek akọn̄ yi! Okumugwem òwa melek n̄a, okisa emi ije! Kpebe lek, mè kaje ìkeme Okumugwem.”

28 Ire, Josaya ìkagwu ìkom ìsa uji akọn̄ kan̄ ìkọp ìfo, ichechieek mkpa ikiweek ititim akọn̄ me lek ogwu ubọọn̄ Ijipiti ya, ìkagbagban̄ si ikọ Okumugwem otumube itibi ogwu nriran Jerimaya. 29 Ititim akọn̄ me lek ogwu Fero me lek òla ijọn̄ Megido, ebi ibot akọn̄ ogwu Fero egwogwook ichit ogwu ubọọn̄ Josaya. 30 Ogwu ubọọn̄ Josaya obebe ebi ikwaan̄ kan̄, “Ìsan̄a emi ìsibi me isi akọn̄, ke unan înin̄ emi lek enenen.” Ebi ikwaan̄ kan̄ ebeben ọmọ mgbọ yaage isibi me isi akọn̄. 31 Etap ọmọ me uji akọn̄ kan̄ eyi òso iba, mè isa ọmọ ika inire Jeruselem, ikwukwu. Efufuun̄ ọmọ me udọn̄-ufuun̄ ebi nte nte kan̄.

32 Mîto ito mkpa kè Josaya me otutuuk Juda, ogwu nriran Jerimaya ofefieek ejit inyi. Ebi isi ene me ama, ebirieen̄ mè ebibaan̄, ekitoto ito kan̄ mege inire chereyi. Mîsun̄ si ibe ekerọ ikeyi kubọk orọmijọn̄ mgbọ geelek me otutuuk ido Ijeren. 33 Mîge inu chi geelek itap me ikpa mfufuk ebi ubọọn̄ Juda. Inu geelek Josaya orọbe isa itaan̄ etip, mè ike îgobobe Ikan Okumugwem itet, mè inu echi îwuukbe lek irọ iraka, mè echichi ekpabe mgbọ keyi, mîge otutuuk itap me emen ikpa ebi ubọọn̄ Ijeren mè Juda.

34 Ebi ido Juda etetet Jekonaya, gwun̄ kè Josaya, isa ito ubọọn̄ me irek ogwu ute. Mgbọ ya, ọmọ ìre akọp acha iba mè ita. 35 Ikekeke ubọọn̄ me Juda mè Jeruselem onyan̄ ita. Ogwu ubọọn̄ Ijipiti onenisan̄a ọmọ ito, ibe ikayaka ìkeke ubọọn̄ me Jeruselem, 36 mè ifieek efit obop ikpoko alata okuket mè obop ikpoko alata araran̄ ge inyi ebi ido Juda ibe ekpe. 37 Ogwu ubọọn̄ Ijipiti osasa Jioyakim, ngwan̄ kè Jekonaya, ito ubọọn̄ inyi Juda mè Jeruselem. 38 Jioyakim okpukpulu ebi isi ile me ido itaak me mkpọn, mè ikpebe Jariọs ogwu ngwan̄ me Ijipiti isa ika.

39 Jioyakim ìre akọp acha iba mè go mgbọ îkanabe ubọọn̄ me Juda mè Jeruselem. Îrọ ijo inu me chieen̄ Okumugwem. 40 Nebukadineja, ogwu ubọọn̄ Babilọn, onunu ọmọ akọn̄ me lek, mè isa mkpọn ekwe ibọp ọmọ, mè isa ifo Babilọn. 41 Nebukadineja îkpulu si usini nroon̄ ikwaan̄ òkup me mbuban echi Okumugwem isa ifo isi isun̄ me emen uwu yọk me Babilọn. 42 Ukpatu ofolek kè Jioyakim, mè ochichaka inu îrọbe, mè una ukpook Awaji îkaan̄be, mîge otutuuk itap me ikpa mfufuk usen me usen eyi ebi ubọọn̄.

43 Ogwu gwun̄, Jioyakin, onenibọkọ irek ubọọn̄ kan̄. Mgbọ ya, Jioyakin ìre akọp mè acha jeeta. 44 Ikekeke ubọọn̄ me Jeruselem onyan̄ ita mè akọp usen. Îrọ ijo inu me chieen̄ Okumugwem. 45 Acha ge iraraka me lek kan̄, Nebukadineja oraria ibe esan̄a ọmọ enu me Babilọn, melek nroon̄ ikwaan̄ mbuban echi Okumugwem, 46 mè isa Jedikaya ito ubọọn̄ me Juda mè Jeruselem.

Jedikaya ìre akọp acha iba mè ge mgbọ esabe ito ubọọn̄, ikpukpulu akọp mè acha ge. 47 Ọmọ si orọrọ inu òfefieek me isi Okumugwem. Ìkagban̄ ikọ Okumugwem otumube itibi me otu ogwu nriran Jerimaya. 48 Ogwu ubọọn̄ Nebukadineja otetet ibe isa erieen̄ Okumugwem inyan̄a ibot isisiki ibot inyi ọmọ. Ire, ichachaka inyan̄a-ibot ya, mè ikpaka ibot. Inyenye ibot, mè inye ejit, mè ije ilọ me lek ikan Okumugwem, Awaji ebi Ijeren.

49 Ebi ugane ama mè ebi ibot me lek ebi ngwugwa erọrọ si owuwa inu ikpak mè inu òlọlọ me lek ikan, echi òfefieek igak ten̄ten̄ inu geelek ebi ofifi ido erọbe. Ema mîfifila Uwu Mbuban Okumugwem me Jeruselem, eyi Awaji osun̄be me mbuban.

50 Awaji ebi nte nte kiban̄ oraria ogwu etip kan̄ isi lek kiban̄ ibe isi igwen ema igwu ikom, mije, ìkiweek inyanyan̄a ema melek Uwu Mbuban kan̄ isibi. 51 Ire, ema echachak ebi etip kan̄ me imọm. Mgbọ geelek Okumugwem isitumu ikọ, ema mîra ikisa ikọ ebi nriran irọ inu ochak. 52 Me òta kan̄, unaan̄-ejit owuwuku ichit Okumugwem ejit ikeme ebi kan̄, mije ema ekariọọn̄ge ọmọ. Inyinyi ida ibe ebi ubọọn̄ Kalidia enu ema akọn̄ me lek. 53 Ebi ife cha esasa oge akọn̄ ikpan̄ nsabọn irieen̄ kiban̄ igwook ikana ere Uwu Mbuban, mè ikpan̄ si ugane mè ìre gwun̄ aya, gwun̄ enerieen̄ mè ìre gwun̄ enenwaan̄, mije, Okumugwem ìyayaka otutuuk kiban̄ itap me ubọk ebi ochicha kiban̄. 54 Otutuuk nroon̄ ikwaan̄ Okumugwem, ilile mè ijija, mè inu esabe ibala lek okop inyan̄a-ibot Okumugwem, mè inu ubọọn̄ geelek esun̄be, ekpukpulu otutuuk isa ifon Babilọn. 55 Ema mîwọp Uwu Mbuban Okumugwem, mè igbugbọ mgban Jeruselem igwook, mè itap ukan̄ iwọp uwu-oket kan̄ cha, 56 mè ijijaka otutuuk uja inu kan̄ cha òkitaan̄ etip igwook. Ebi ìsisik, Nebukadineja okpukpulu isa ifo Babilọn. 57 Ema esisi ikana usun̄ inyi ọmọ mè bọn kan̄ ebirieen̄ mege ire mgbọ ebi Pesia ebenebe ikikeke ubọọn̄. Ikeyi ke ikọ Okumugwem otumube me otu kè Jerimaya orọ iso. 58 Jerimaya ìtumu ibe, “Mege ido ya òkup oso otu ifuk Usen Mbuban enyibe ọmọ, ìbosusun̄ Usen Mbuban otutuuk mgbọ îyatbe ita, mege akọp acha jaaba ya òta.”