Ikọ ofolek ogwu ubọọn̄
4
Ogwu òso ene iba òtutumu ikọ ofolek unye ogwu ubọọn̄, obebene ikọ kan̄, ibe: 2 “Ebi nte n̄a, me atikọ, îre ebilene ebi ìkikpulu ijọn̄ mè okwaan̄ mè otutuuk inu geelek òkup me emen kiban̄, enye lek ichit. 3 Ire, îre ogwu ubọọn̄ onye lek igak ema. Ọmọ ore ogwukaan̄ kiban̄, mè ire nte uwu kiban̄. Inu geelek îtọbe inyi ema, ema ekirọrọ. 4 Ire ibe ema etim akọn̄ me lek kiban̄, ema ekititim. Ire iria ema akọn̄ me lek ebi ochicha, ema ekisisi, mè etim akọn̄ egbugbọ ogoon̄, mè mgban, mè uwu-oket egwook. 5 Ema ekikpakpan̄ ene, mè ene èkpan̄ ema si, ire, ema kpekikpaka ida ogwu ubọọn̄. Ire akọn̄ inwọn ema, mêsa otutuuk inu geelek ema efumbe, mè owuwa ofifi inu geelek si, ijet ogwu ubọọn̄. 6 Ikeya si, ebi ìkiwop uko, kpere ebi akọn̄, kpekisi akọn̄, inu geelek ema ewopbe mè irọkọ, ekisasa ininyi ogwu ubọọn̄. Ema ekitetet lek kiban̄ me unye ibe ekpe mkpukpe enyi ogwu ubọọn̄. 7 Ire, ogwu ubọọn̄ ìre ene ge gaalek. Ire ibe ema ekpan̄ ene, ema ekikpakpan̄; ire ibe ema etọn̄ọ ene eto, ema ekitọtọn̄ọ ito. 8 Ire ibe ema ebene akọn̄, ema ekibebene. Ire ibe ema ejijaka ere, ema ekijijijaka. Ire ibe ema enama, ema ekinanama. 9 Ire ibe ema esọp inu egwook, ema ekisọsọp igwook. Ire ibe ema ewop, ema ekiwowop. 10 Otutuuk ebi kan̄ mè ebi akọn̄ kan̄ ekisisiki ibot inyi ọmọ. Ofifi kan̄, môkup me lek ikasi inorie, mè òrie, mè ònwọ, mè òlaak. 11 Ire, ema ebekekeke ikana ikibem ọmọ, ene geege ìkpokọt ije inan̄a isi irọ mbubek eyi lek kan̄, ema kpekikpakpaka si ibot inyi ọmọ. 12 Ebi nte n̄a, keke orọ ogwu ubọọn̄ kporebe ogwu òmimin ichit, eyi otutuuk ene ekisiki ibot inyi ọmọ ikeyi?” Itutumu ifieek me ikeya.Ikọ ofolek ebibaan̄
13 Ogwu òso ene ita òtutumu ikọ kan̄ ibak ebibaan̄ melek atikọ, òrere Jerubaben, obebe: 14 “Ebi nte n̄a, me atikọ, ogwu ubọọn̄ îmin, ebi ene si mîwa. Miin̄ si îkaan̄ unye. Ire, ìre ekene okaan̄ unye me lek kiban̄, sa ìre ekene okikpulu ema? Ìre ìkafat ìre ebibaan̄? 15 Ebibaan̄ emaan̄ ogwu ubọọn̄ melek ebi geelek ìkikpulu okwaan̄ mè ijọn̄. 16 Ema enan̄a me lek ebibaan̄ isibi. Ebibaan̄ si ekpukpo ebirieen̄ cha ebi ìkiwop uko gerep eyi miin̄ okinan̄a me lek isibi. 17 Ebibaan̄ ekichim ofọnti inyi ebirieen̄ etaak, mè ikirọ ebirieen̄ ekaan̄ umin. Ebirieen̄ kpebekọt ikup, ire kpunu ebibaan̄. 18 Ire ebirieen̄ ititiin̄ alata okuket mè alata araran̄, mè ìre inu geelek ònwọnwọn isun̄, mè inimun̄ enenwaan̄ òkaan̄ ata akparalek mè uja òkilọk ene ebek, 19 ema ekitetele otutuuk inu cha, mè igwuun̄ chieen̄, inwe otu ibook, ikikpọ ogwu enenwaan̄ ya, mè emọnọ ogwu enenwaan̄ ya egak alata araran̄ mè alata okuket mè ìre inu cha geelek ònwọnwọn. 20 Enerieen̄ ìkitele ogwu ute ogwu òbọbọọk ọmọ isibi, mè òtele ido ọmọ osibibe, mè osa lek kan̄ òchim òriaak me lek ogwu nwa. 21 Ìbokup melek ogwu nwa otutuuk usen ugwem kan̄, mè owuuk ogwu ute, mè ogwu uga, mè ido kan̄.
22 Eya orọ, enyi mêriọọn̄ ibe ke îre ebibaan̄ ekikpulu enyi! Ìre enyi kpekisi ikwook ukwook mè ikikwukwulu, mè isa otutuuk ijet ebi nwa kinyi, ìrere ebibaan̄ ni? 23 Enerieen̄ môben oge akọn̄ kan̄ isa isibi ije, mè òsi ochiin̄ inu, mè òfum inu me ubọk unye, mè òkọp òsaba okwaan̄ mè okolo; 24 môsi igban me lek egbe àtat, mè ijijen̄e ije me emen udun, isi ichichim inu, mè ifum inu me unye-ubọk isan̄a, mè osa oka ojet ogwu enenwaan̄ ya ogwu îmabe. 25 Enerieen̄ ìkima nwa kan̄ igak nte kan̄ mè ìre nga kan̄. 26 Owuwa ebirieen̄ mîrama iraak bak me lek ebibaan̄, owuwa mîkana usun̄ mije ebibaan̄. 27 Owuwa ebirieen̄ mîkwaan̄, mè ìre irurọn̄ọ, mè ìre irọ ijo inu, mije ebibaan̄. 28 Ìre enyi kpechieek si ikọ n̄a mgbọ keyi? Ìre ogwu ubọọn̄ ìkamin ene mije unye îkaan̄be ni? Ìre otutuuk ijọn̄ kpekitet ukpook ichachak ọmọ ubọk me lek? 29 Ire, emi mmun̄ ọmọ melek kè Apame, ogwu ugan kan̄, gwun̄ enenwaan̄ kè Baritakọs ogwu ekinọ erieen̄. Apame ìkikweek irek me agan̄ ubọk ulom ogwu ubọọn̄, 30 mè òchili okpibot ubọọn̄ òsan̄a me ibot ogwu ubọọn̄, mè òben òkwuun̄ me ibot eyi kan̄, mè osa ubọk agan̄ ujit otap ogwu ubọọn̄ ada me isi. 31 Ogwu ubọọn̄ mônwenwe otu ibook ikikpọ ọmọ. Ọmọ isifọọk otu imọm feep, ogwu ubọọn̄ îra ichak ikaak. Ọmọ isinaan̄ ejit, ogwu ubọọn̄ îra isa unin̄i otu itumu ikọ inyi, ufuna ikọ ita. 32 Ebi nte n̄a, ire ebibaan̄ ikikọt irọ inu kechi, ìre keke onye lek igak ema me linyọn̄?”
Ikọ ofolek atikọ
33 Ogwu ubọọn̄ melek ebi ilile cha ekekiriraan̄ chieen̄ ikikpọ lek kiban̄ ge ge, ogwu ene ya obebene ikitumu ikọ ofolek atikọ, ibe: 34 “Ebi nte n̄a, ebibaan̄ mînye lek enenen. Linyọn̄ îmin enenen, akpabin inyọn̄ îbene, ire, ura îfet me ije kan̄. Ìkije me okwọ kan̄ ikana akpa inyọn̄, mè oka ònu me ere kan̄ me usen yaage. 35 Ìre ura, òkirọ inu kechi ìkafat imin ni? Ire, atikọ omin mè inye lek igak otutuuk inu geelek. 36 Otutuuk linyọn̄ ekiweek atikọ, akpa isinyọn̄ ìkitọtọn̄ ọmọ. Otutuuk inu Awaji orombe ekisisisik, mè ikiran me isi kan̄, kpunu ijo irọrọ geege me lek kan̄. 37 Ijo irọrọ òwa me lek miin̄, ọmọ òwa me lek ogwu ubọọn̄, ọmọ òwa me lek ebibaan̄. Otutuuk ebilene mîkaan̄ ijo irọrọ me lek iso, otutuuk ikwaan̄ kiban̄ geelek si ìre ijo irọrọ, mè otutuuk ofifi inu geelek si. Kpunu atikọ me emen kiban̄, ema mêkwaan̄ ita me emen ijo irọrọ kiban̄. 38 Ire, atikọ ìbokukup, mè ikinye lek, mege ire mgbọ geelek, mè ikiluk ugwem, mè ikikpulu me unye ire mgbọ geelek mgbọ geelek. 39 Atikọ ìkakifeen̄ ene, ìkakigọọk ene ìkeke. Ire, ìkirọ inu ònenen, ìkakirọ ijo irọrọ mè ìre ikpak. Otutuuk ebilene ekibọbọkọ ikwaan̄ kan̄ itap. 40 Ijo irọrọ geege ìkakikup me emen oyerebet kan̄. Unye mè ubọọn̄, mè unye eyi mkpulu melek irek ubọọn̄ òbokup ire ukot geelek ìre echi kan̄. Itọn̄ ikup inyi Awaji ogwu atikọ!” 41 Mgbọ ikọ kan̄ otabe, otutuuk ene etataan̄ ukpo itumu ibe, “Atikọ omin ichit, ọmọ onye lek igak otutuuk inu!”
Inu esabe iwaak Jerubaben ubọk
42 Ogwu ubọọn̄ onenibe ọmọ, “Do inu geelek oweekbe, eji mênyi owu, mè inyi isaba iraka inu egebe me ikpa, mije, mîmun̄ ibe ke owu oriọọn̄ inu ichit. Owu môkikweek irek igọọk emi, mêkigwen owu Ngwan̄ n̄a.” 43 Jerubaben onenibe ogwu ubọọn̄, “Keek ibot onyan̄abe me usen etobe owu ubọọn̄, ibe ke owu mônama Jeruselem, 44 mè iria otutuuk nroon̄ ikwaan̄ Uwu Mbuban ekpulube me Jeruselem ijet me ere înan̄abe. Inu cha ke Sarọs osun̄ esese, mè ichieek use iraria ijet me ere înan̄abe, me mgbọ îbenebe ikigwak Babilọn, mè inyan̄a ibot ibe ke ọmọ môria inu cha ijet ebikaan̄. 45 Owu onyan̄a ibot si ibe ke owu mônama Uwu Mbuban, eyi ebi Edọm ewọpbe me mgbọ ebi Kalidia egwakbe Judia ikpukpuku igwook. 46 Eya orọ, ogwu ubọọn̄ ogwukaan̄ n̄a, eyiyi ore inu nkido, mè ikibeek owu me ubọk, inu eyi ògbegbe umin kwun̄. Eya orọ, ǹrariaak owu ibe mè owu òrọ inyan̄a-ibot ya osabe otu kwun̄ inyan̄a inyi Ogwu Ubọọn̄ akpabin inyọn̄ òso.”
47 Ogwu ubọọn̄ Dariọs onanan̄a ikeke, mè isi ituun̄ ọmọ otu, mè ige ikpa me ibot kan̄ ijet otutuuk ebi otuchieen̄ ikpoko, mè ebi ibot mkpulu, mè ebi ibot akọn̄, mè ebi ìkikpulu me agan̄ me agan̄, ibe enyi ọmọ melek ebi mêgọọkbe inene isi Jeruselem, irek, inyi ema eje me utelelek esi. 48 Igege si ikpa ijet otutuuk ebi mkpulu me ido Kole-Siria mè ido Fonisia, mè ebi ìkup me Lebanọn ibe esa uti olik me Lebanọn esi Jeruselem, mè etap ubọk enyi, inyi inama ama ya. 49 Îge si me ibot otutuuk ebi Ju ìkup me irak ubọk mkpulu kan̄, ebi ìbenan̄a igọọk inene ifon Judia, mije ikaan̄-lek enyibe ema, ibe ogwu ibot akọn̄ geege, mè ìre ogwu òkikpulu me agan̄, mè ìre ogwu ibot mkpulu, mè ìre ogwu otu chieen̄ ikpoko geege, ikanin̄ uwu kiban̄ me unye; 50 mè otutuuk ijọn̄ geelek ema mêkupbe me lek ikup inyi ema, mè ekabọkọ ema mkpukpe me lek; mè ebi Idumia eyaka ama ebi Ju geelek ema etetbe ikaan̄ inyi ebikaan̄; 51 mè ekenyi ema akọp obop ikpoko alata okuket iba me acha me acha, inyi esa enama Uwu Mbuban, mege mênamabe isan̄a; 52 mè ekenyi ema ofifi akọp obop ikpoko alata okuket me acha me acha, eyi mêkisa igwa ngwugwa ewọwọp me inyọn̄ ntook, akọp mè mgbọ jaaba usen geelek, kubọk Ikan kiban̄ otumube; 53 mè otutuuk ebi ìbenan̄a me Babilọn isi inama ama ya ekaan̄ lek kiban̄, ema mè bọn kiban̄ mè ebi ngwugwa.
54 Îge si inu ofolek itatap ubọk inyi ema, mè ikpọkpọ chieen̄ me lek ofọnti ebi ngwugwa ebekitap isa ikisi ikwaan̄. 55 Îge si ibe ekpọ chieen̄ me lek ebi otoko kè Libai, mege ire usen mênamabe Uwu Mbuban mè ama Jeruselem isan̄a. 56 Îge si ibe enyi otutuuk ebi ìbem ama ijọn̄, mè ekpe ema ikpoko ọkọ kiban̄. 57 Ineniria otutuuk nroon̄ ikwaan̄ cha, echi Sarọs osun̄be esese, inan̄a me Babilọn ijet me Jeruselem. Inu geelek Sarọs onyibe ida ibe erọ, înyi ida eyi kan̄ ibe erọ, mè eria ejet me Jeruselem.
Uriaak kè Jerubaben
58 Mgbọ Jerubaben, ogwu nsabọn irieen̄ ya, onan̄abe isibi, ibebene isi ikpọ inyọn̄ iyaka isi ida agan̄ Jeruselem, mè itọn̄ Ogwu Ubọọn̄ akpabin inyọn̄ ibe, 59 “Ntim-mkpan̄ ìkinan̄a me ubọk kwun̄, iriọọn̄-inu ìkinan̄a me lek kwun̄, ujamgbugbo ìre eyi kwun̄. Emi ìre gwun̄ ikwaan̄ kwun̄. 60 Itọn̄ ikup inyi owu, ogwu ònyinyi emi iriọọn̄-inu. Ntọn̄ owu, jei Ogwukaan̄-ene, Awaji ebi nte nte kiji.”