Erieen̄ ebi ìnanan̄a me usun̄ akọn̄ ika
5
Mgbọ ijọk ya otabe, enenigobo ebi ibot me owot uwu ebi nte nte, me otoko me otoko, ebi ìbefon Jeruselem, ema mè ebi nwa, mè bọn kiban̄ ebirieen̄ mè ebibaan̄, mè ebi usun̄ kiban̄, ebirieen̄ mè ebibaan̄, mè anam uwu kiban̄. 2 Dariọs onenisan̄a obop ebi akọn̄ inyọn̄ inyinya, ibe esa ema eban me utelelek esi ere Jeruselem. Ema ekekikwak nkwukwak, mè ikiwut òja isa ikirie ijọk ije me oniin̄. 3 Otutuuk ebi ngwan̄ kiban̄ ekekinwọọn̄ lek. Ogwu ubọọn̄ oraria ebi akọn̄ cha, egọgọọk ema ije, isa ema iban.4 Erieen̄ ebi ìfofon, me otoko me otoko, me owot iman me owot iman, me ibot ukpa ebi kiban̄ ìre ikeyi: 5 Ebi ngwugwa, ebi owot iman kè Fineyas gwun̄ kè Erọn: Jesuwa gwun̄ kè Josadak gwun̄ kè Seraya melek Jowakim gwun̄ kè Jerubaben gwun̄ kè Sialitien, ogwu uwu kè Debit, ònan̄a me owot iman kè Fares me otoko kè Juda, 6 ogwu òtutumu ikọ iriọọn̄-inu me isi kè Dariọs ogwu ubọọn̄ ebi Pesia, me òso acha iba me ukot mgbọ Dariọs orebe ubọọn̄, me onyan̄ Nisan, òrere adasi onyan̄.
7 Ebibi ere ebi Juda ebi ìnanan̄a me usun̄ akọn̄ ika, ebi Nebukadineja ogwu ubọọn̄ Babilọn okpulube me usun̄ akọn̄ isa ifo Babilọn. 8 Ema chi eka inu Jeruselem mè ofifi ere me Juda, ogwu ikup ofo ama kan̄. Ebi isi kiban̄ ebi melek kiban̄ ekabe ìre Jerubaben mè Jesuwa, mè Neyemaya, mè Seraya, mè Resaya, mè Eneneyọs, mè Mọdikai, mè Belisarọs, mè Asifarasọs, mè Relia, mè Rewum, mè Bayana.
9 Otu ifuk ebi ido kiban̄ mè ebi ibot kiban̄ ebi ìkaka ìre: Ebi owot iman kè Paros, obop ene iba mè efit mè akọp ene jaaba mè iba. Ebi owot iman kè Sefatiya, efit ene ini mè akọp ene jaaba mè iba. 10 Ebi owot iman kè Ara, efit jaaba mè akọp ene go mè gweregwen. 11 Ebi owot iman kè Payat Mowabu, me owot iman kè Jesuwa mè Jowabu, obop ene iba mè efit jeeta mè akọp ene mè iba. 12 Ebi owot iman kè Elam, obop ene mè efit iba mè akọp ene go mè ini. Ebi owot iman kè Jatu, efit ene onaan̄ge mè akọp ene ini mè go. Ebi owot iman kè Korube, efit ene jaaba mè go. Ebi owot iman kè Bani, efit ene gweregwen mè akọp ene ini mè jeeta. 13 Ebi owot iman kè Bebai, efit ene gweregwen mè akọp ene iba mè ita. Ebi owot iman kè Ajigadi, obop ene mè efit ita mè akọp ene iba mè iba. 14 Ebi owot iman kè Adonikam, efit ene gweregwen mè akọp ene gweregwen mè jaaba. Ebi owot iman kè Bigibai, obop ene iba mè akọp ene gweregwen mè gweregwen. Ebi owot iman kè Adin, efit ene ini mè akọp ene go mè ini. 15 Ebi owot iman kè Ateri gwun̄ kè Ejikaya, akọp ene onaan̄ge mè iba. Ebi owot iman kè Kilan mè Ajetas, akọp ene gweregwen mè jaaba. Ebi owot iman kè Ajaru, efit ene ini mè akọp ene ita mè iba. 16 Ebi owot iman kè Ananayas, efit ene mè ge. Ebi owot iman kè Arọm mè ebi owot iman kè Bejai, efit ene ita mè akọp ene iba mè ita. Ebi owot iman kè Arusifurit, efit ene mè akọp mè ene iba. 17 Ebi owot iman kè Baiterọs, obop ene ita mè ene go. Ebi owot iman kè Betilomọn, efit ene mè akọp ene iba mè ita. 18 Ebi ìnan̄a me ama Netofa, akọp ene go mè go. Ebi ìnan̄a me ama Anatọt, efit ene mè akọp ene go mè jeeta. Ebi ìnan̄a me ama Betasimot, akọp ene ini me iba.
19 Ebi ìnan̄a me ama Kiriatarim, akọp ene iba mè go. Ebi ìnan̄a me ama Kefira mè ama Beyerot, efit ene jaaba mè akọp ene ini mè ita. 20 Ebi ama Kadiasa mè ebi ama Amidia, efit ene ini mè akọp ene iba mè iba. Ebi ìnan̄a me ama Kirama mè ama Geba, efit ene gweregwen mè akọp ene iba mè ge. 21 Ebi ìnan̄a me ama Makalọn, efit ene mè akọp ene iba mè iba. Ebi ìnan̄a me Betolio, akọp ene go mè iba. Ebi owot iman kè Nifis, efit ene mè akọp ene go mè gweregwen. 22 Ebi ìnan̄a me owot iman kè Kalamolalus mè Ono, efit ene jaaba mè akọp ene iba mè go. Ebi owot iman kè Jerekọs, efit ene ita mè akọp ene ini mè go. 23 Ebi owot iman kè Senaya, obop ene ita mè efit ita mè akọp ita.
24 Ebi ngwugwa ebi owot iman kè Jedaya gwun̄ kè Jesuwa me owot iman kè Anasibu, efit ene onaan̄ge mè akọp ene jaaba mè iba. Ebi owot iman kè Imeri, obop ene mè akọp ene go mè iba. 25 Ebi owot iman kè Pasikuri, obop ene mè efit iba mè akọp ene ini mè jaaba. Ebi owot iman kè Karime, obop ene mè akọp mè ene jaaba.
26 Ebi otoko kè Libai, òrere ebi owot iman kè Jesuwa mè Kadimien, mè Banas melek Sudias, akọp ene jaaba mè ini. 27 Ebi ìkọt okwa me Uwu Mbuban, òrere ebi owot iman kè Asafu, efit ene mè akọp ene iba mè jeeta. 28 Ebi ìkibem otunchit, òrere ebi owot iman kè Salum, mè owot iman kè Ateri, mè owot iman kè Talimon, mè owot iman kè Akubu, mè owot iman kè Atita, mè owot iman kè Sobai, otutuuk kiban̄ esibi efit mè akọp ene ita mè onaan̄ge.
29 Ebi ikwaan̄ Uwu Mbuban, ebi owot iman kè Isọ, òrere ebi owot iman kè Asufa, mè ebi owot iman kè Tabot, mè ebi owot iman kè Kerọs, mè ebi owot iman kè Suwa, mè ebi owot iman kè Padọn, mè ebi owot iman kè Lebana, mè ebi owot iman kè Agaba, 30 mè ebi owot iman kè Akubu, mè ebi owot iman kè Utai, mè ebi owot iman kè Ketabu, mè ebi owot iman kè Agabu, mè ebi owot iman kè Subai, mè ebi owot iman kè Ana, mè ebi owot iman kè Katuwa, mè ebi owot iman kè Geduru, 31 mè ebi owot iman kè Jairọs, mè ebi owot iman kè Daisani, mè ebi owot iman kè Noweba, mè ebi owot iman kè Kejibi, mè ebi owot iman kè Gajera, mè ebi owot iman kè Uja, mè ebi owot iman kè Finowe, mè ebi owot iman kè Asira, mè ebi owot iman kè Basitai, mè ebi owot iman kè Asina, mè ebi owot iman kè Mayani, mè ebi owot iman kè Nefisim, mè ebi owot iman kè Akufu, mè ebi owot iman kè Akufa, mè ebi owot iman kè Asuri, mè ebi owot iman kè Farakim, mè ebi owot iman kè Bajilut, 32 mè ebi owot iman kè Meyida, mè ebi owot iman kè Kuta, mè ebi owot iman kè Kareya, mè ebi owot iman kè Barikọs, mè ebi owot iman kè Serari, mè ebi owot iman kè Tema, mè ebi owot iman kè Nejia, mè ebi owot iman kè Atifa.
33 Ebi owot iman ebi ikwaan̄ kè Solomọn: Ebi owot iman kè Asafiọti, mè ebi owot iman kè Peruda, mè ebi owot iman kè Jayala, mè ebi owot iman kè Lojon, mè ebi owot iman kè Isidayen, mè ebi owot iman kè Sefatiya, 34 mè ebi owot iman kè Agia, mè ebi owot iman kè Pokeret-Ajebayim, mè ebi owot iman kè Sarọtie, mè ebi owot iman kè Masia, mè ebi owot iman kè Gas, mè ebi owot iman kè Adus, mè ebi owot iman kè Subas, mè ebi owot iman kè Afera, mè ebi owot iman kè Barodis, mè ebi owot iman kè Safat, mè ebi owot iman kè Ami. 35 Otutuuk ebi ikwaan̄ Uwu Mbuban mè ebi owot iman ebi ikwaan̄ kè Solomọn, efit ene mè akọp ene jaaba mè iba.
36 Ebibi ìre ebi ìnan̄a me ama Telimela mè ama Telarusa ije me irak kè Kerub, mè Adan, mè Imeri ebi ibot kiban̄ ika. 37 Ire, ema kpekọt isa me owot iman ebi nte nte kiban̄, mè ìre mfufuk owot iman, ijeen̄ isibi ibe ke ema ìre ebi Ijeren. Ema ìre ebi owot iman kè Delaya gwun̄ kè Tobaya, mè ebi owot iman kè Nekoda, ema ìre efit ene gweregwen mè akọp ene jaaba mè iba.
38 Me etete ebi ngwugwa, ebibi ìre ebi ìbe ke ema ìre ebi ngwugwa, ire, kpemun̄ erieen̄ kiban̄ me ikpa. Ema ìre ebi owot iman kè Abaya, mè ebi owot iman kè Akoji, mè ebi owot iman kè Jadus, ogwu òrere nlom kè Agia, ene ge me lek bọn ebibaan̄ kè Bajilai, mè ikichieek erieen̄ kè ogwa. 39 Mgbọ eweekbe emen ikpa, kpemun̄ erieen̄ ife chi me mfufuk owot iman, esasan̄a ema isan̄a me ikwaan̄ ebi ngwugwa. 40 Neyemaya ogwu ibot mkpulu ochichit ema ibe ekayaka ìkaan̄ uche me lek inu mbuban, mege ire mgbọ mêkaan̄be ogwu òban Awaji ogwu môtapbe urim melek tumim ekisa itet ǹcha isa iriọọn̄ nkeek Awaji.
41 Otutuuk ebi ìrere ebi Ijeren, ibene me lek ebi ìsoso akọp mè acha iba ifo inyọn̄, kpefuk ebi usun̄ ebirieen̄ mè ebibaan̄, ìre akọp obop ene ini mè iba mè efit ene ita mè akọp gweregwen. 42 Ebi usun̄ kiban̄, ebirieen̄ mè ebibaan̄, ìre obop ene jaaba mè efit ita mè akọp ene ita mè jaaba. Ebi nkwukwak mè ebi ìkọt okwa ìre efit ene iba mè akọp ene ini mè go. 43 Aligọ kiban̄ ìre efit ini mè akọp ita mè go; inyinya kiban̄ ore obop jaaba mè akọp ita mè gweregwen; inyinya mgbidim ukot ore efit iba mè akọp ini mè go, sà inyinya akpan ore obop go mè efit go mè akọp iba mè go.
44 Mgbọ usini ebi ibot otoko cha enire Uwu Mbuban Awaji me Jeruselem, mînyan̄a ibot isasa unye geelek ema ekaan̄be inama uwu ya me akpat kan̄, 45 mè ibe ke ema mênyi efit kilo alata araran̄ go mè obop kilo alata okuket iba mè efit go, mè efit ofọnti ebi ngwugwa me uwu ekisun̄ inu mbuban, inyi esa esi ikwaan̄.
46 Ebi ngwugwa, mè ebi otoko kè Libai, mè usini ebi ene eluk me Jeruselem mè asabọn ama òkukup iriaak, sà ebi okwa Uwu Mbuban mè ebi ìkibem otunchit, mè otutuuk ebi Ijeren, eluk me ama kiban̄.
Itọtọbọ ebum inyi Awaji îkpọk ibene
47 Mgbọ òso onyan̄ jaaba orebe, otutuuk ebi Ijeren ekupbe me uwu kiban̄, ema enenititiin̄ me ejit ge me oyet ile òkup me isi adasi otunchit òkikpọ agan̄ mbum-ura. 48 Jesuwa gwun̄ kè Josadak, melek ebi ngwugwa ogbo kan̄, mè Jerubaben gwun̄ kè Sialitien, mè ebi ulọk kan̄, emọmọnọ irek kiban̄, mè inen̄e ntook ngwugwa Awaji ebi Ijeren isun̄, 49 inyi mêgwabe ngwugwa ewọwọp iriọk me inyọn̄, igọọk me nteme enyibe me ikpa kè Mosis ogwu ikwaan̄ Awaji. 50 Otutuuk ebi ofifi ife me ido ya ekirọ ema me lek unye unye, mè inye si lek igak ema. Ire, usini ebi ife cha egọgọọk ema igbaan̄ irọ ikwaan̄. Ema enanama ntook ngwugwa ya me irek kan̄, mè ikigwa esese chieen̄ ngwugwa me mgbọ ònenen, mè ikigwa ngwugwa ewọwọp iriọk inyi Okumugwem ewelegwe mè ikakwun̄. 51 Ema ererie ijọk Uwu Nlak kubọk enyibe me ikan, mè ikigwa ngwugwa òjeje me lek usen geelek. 52 Ema ebebene me mgbọ ya ikigwa ngwugwa mgbọ geelek, melek ngwugwa eyi Usen Mbuban, mè eyi ijọk Aya Onyan̄, mè echi ijọk òkup mbuban geelek. 53 Otutuuk ebi ìnyanyan̄a ibot inyi Awaji ebebene ikigwa ngwugwa inyi Awaji, bene me ijọk Aya Onyan̄ eyi òso onyan̄ jaaba, ubọk geelek kpenama-nu Uwu Mbuban Awaji. 54 Ema ekekinyi ebi ìnama uwu mè ebi usọ ikpoko, mè ikisa inorie mè miin̄ 55 melek uji ekpirikpo inyi ebi Saidọn mè ebi Taya, ibe esa uti olik ònan̄a me Lebanọn enu, mè egbaan̄ uti cha ebọp esa ete me isi mun̄ esibi enu me atasuk Jọpa, ike Sarọs ogwu ubọọn̄ Pesia onyibe ida me emen ikpa kan̄ ema ebọkọbe.
Mîtọbọ ọdọ Uwu Mbuban
56 Me òso acha iba me lek ema ekabe inire ere Uwu Mbuban Awaji me Jeruselem, me òso onyan̄ iba kan̄, Jerubaben gwun̄ kè Sialitien mè Jesuwa gwun̄ kè Josadak ebebene ikwaan̄ me lek Uwu Mbuban, ema melek ebi bọn ulọk kiban̄, mè ebi ngwugwa otoko kè Libai, mè otutuuk ebi ìnan̄a me usun̄ akọn̄ isibi ika inu Jeruselem. 57 Ema etọtọbọ ọdọ Uwu Mbuban Awaji me usen ijọk Aya Onyan̄ eyi òso iba, me òso acha iba me lek ema ekabe inu me Judia mè Jeruselem. 58 Enenisan̄a ebi otoko kè Libai, bene me lek ebi akọp acha iba ifo inyọn̄, ito me otuchieen̄ ikwaan̄ Okumugwem. Jesuwa onanan̄a ikeke, ọmọ melek ebi bọn, mè ebi ulọk kan̄, mè ogwu ngwan̄ Kadimien, mè bọn kè Jesuwa Emadabun, mè bọn kè Joda gwun̄ kè Iliadun, melek bọn kiban̄ mè ebi ngwan̄ kiban̄, mè otutuuk ebi otoko kè Libai, esasa ejit ge ikibieen̄ ikwaan̄ inanama Uwu Awaji ya inye.
Mgbọ ebi ìkinama uwu cha ekinama Uwu Mbuban Okumugwem ya, 59 ebi ngwugwa etatap ofọnti ikwaan̄ kiban̄, mè ikeke me onineen̄, mè ikaan̄ nkwukwak mè otita me ubọk, ebi otoko kè Libai, bọn kè Asafu, ekakaan̄ mkpamkpa me ubọk, 60 isa ikikọt okwa ikitọn̄ Okumugwem, mè ikibe ọmọ onirọ, igọọk ike Debit ogwu ubọọn̄ Ijeren odọmọbe ibe ekerọ. 61 Ema ekekikọt okwa ikinyi Okumugwem itọn̄ ikibe, “Mije nnwọn kan̄ mè umin kan̄ ìkukup me lek ebi Ijeren ire mgbọ geelek.” 62 Otutuuk ene ekekiwut otita, mè ikitaan̄ uga ukpo ikitọn̄ Okumugwem, mije Uwu Mbuban Okumugwem ya ekinama. 63 Usini ebi ngwugwa ebi otoko kè Libai mè usini ebi ibot owot iman cha, ebi ìkakan, mè imun̄ Uwu Mbuban keyilọ ya, enunu me lek eyi keyi, mè ikifieek ejit, mè ikitaan̄ ukpo ito ito ifan̄a ere. 64 Ire, usini ene esasa otita inu inikikọt okwa inwọọn̄ unwọọn̄. 65 Urum ebi otita cha ekekiwut otita cha inye enenen, ida okekitaan̄ isi igwook me ujọn̄ọ ere. Ire, ebi ene ebi ìkukup me ere ya me lek kan̄ kpenọ ida otita cha, bak me lek ida ukpo ito ebi ìkito ito cha.
66 Mgbọ ebi ochicha ebi otoko kè Juda mè otoko kè Benjamin enọbe ida otita cha, ema esisibi inu ibeniweek iriọọn̄ inu otita cha obak me lek ikitaan̄. 67 Ema eneninọ ibe ke ebi ìnanan̄a me usun̄ akọn̄ ika ekinama Uwu Mbuban Okumugwem Awaji ebi Ijeren. 68 Ema esisi lek kè Jerubaben mè Jesuwa, melek ebi ibot owot iman cha, mè ibe ema, “Eji mêgọọk enyi inama. 69 Mije, eji ekisiki ibot inyi Okumugwem kubọk enyi ekirọ, mè ikigwa si ngwugwa inyi ọmọ akarake ukot kè Esaradọn ogwu ubọọn̄ Asiria, ogwu òsasa eji inu me ere keyi.” 70 Ire, Jerubaben mè Jesuwa, melek ebi ibot owot iman cha ebebe ema, “In̄-in̄, enyi kpebegọọk eji inama Uwu Mbuban Okumugwem Awaji kiji. 71 Îre eji gaalek ebenama uwu yi inyi Okumugwem Awaji ebi Ijeren, ike Sarọs, ogwu ubọọn̄ ebi Pesia, onyibe eji ida.” 72 Ire, ebi ìluk me ido ya etatap ufialek me lek ebi ìkup me Judia, mè ikwek ibe ekayaka ìria inorie ìjet, mè igban ikwaan̄ uwu ya ema ekirọ. 73 Ebi ìluk me ido ya etataka otọt, mè itap wọlọwọlọ, mè ibene afa, isa ikput ikwaan̄ ya, inyi ekakọt ìnama uwu ya ìsan̄a otutuuk mgbọ ogwu ubọọn̄ Sarọs okupbe me ugwem. Mîkput ikwaan̄ uwu ya otuuk kè acha iba, inire mgbọ Dariọs okanabe ogwu ubọọn̄ me irek kè Sarọs.