Ikwaan̄ Uwu Mbuban îkpọk ibene
6
Me òso acha iba me ukot mkpulu kè Dariọs, ebi nriran, Agai mè Jekaraya gwun̄ kè Ido, eneniben nriran me erieen̄ Okumugwem Awaji ebi Ijeren inyi ebi Ju ìkup me agan̄ Judia mè Jeruselem. 2 Mgbọ ya ke Jerubaben gwun̄ kè Sialitien mè Jesuwa gwun̄ kè Josadak ekpọk ibene ikinama Uwu Mbuban Okumugwem me Jeruselem, sa me ntap-ubọk ebi nriran Okumugwem ebi ìkup melek kiban̄.3 Me mgbọ ya, Sisines ogwu òkikpulu Siria mè Fonisia, melek Satarabujanes mè ebi ogbo kiban̄ enunu me lek kiban̄, mè ibe, 4 “Ìre ekene onyi enyi unye ibe enyi enama uwu yi, mè egon inyọn̄ echit, mè erọ otutuuk inu geelek enyi erọbe isan̄a me lek? Ìre ebi owa ere ebi ìkinama uwu yi, mè irọ otutuuk inu chi erọbe me lek?” 5 Ire, mîkaan̄ ata ejit me lek ebi ugane ebi Ju, mije, Okumugwem ọmọ òwa me udun̄ ebi usun̄ akọn̄ cha. 6 Eya orọ, kpekput ema inanama uwu ya, mege ire mgbọ mêlookbe etip ofolek inyi Dariọs, mè inọ ikọ otu kan̄. 7 Eyiyi ìre ikpa Sisines ogwu òkikpulu Siria mè Fonisia, melek Satarabujanes mè ebi ogbo kiban̄ ebi ama ama ebi etobe ibe ekegọọk ekpulu me Siria mè Fonisia, egebe iria ijet Dariọs:
8 “Eji ekige ikpa yi inyi owu ogwu ubọọn̄ Dariọs, mè ikitọp owu amọn.
“Eji ekiweek ibe owu, ogwukaan̄ kiji, ogwu ubọọn̄, òriọọn̄ ubọk òriọọn̄ ibe, mgbọ eji esibe agan̄ ido Judia, mè inin̄ ama Jeruselem, ke eji mîmun̄ ebi ugane ebi Ju, ebi ìnanan̄a me usun̄ akọn̄ ika, 9 ekinama ikpele aya uwu me Jeruselem inyi Okumugwem. Ekisa ewuuk ebabak inama, mè isa uti unye otu ewe itaak ogbugboon̄ inwunwan̄ me agba uwu ya. 10 Ikwaan̄ òkije isi ge isi ge, mè ifet me ubọk kiban̄. Ema egwugwuun̄ chieen̄ ire ijọn̄ ikirọ ikwaan̄ ya, ikukup si òrirọ òrirọ.
11 “Eji enenido ebi ugane chi ibe, ‘Ìre ekene onyi enyi unye ibe enyi enama uwu yi, mè etọbọ ọdọ uwu yi eyi enyi ekinama?’ 12 Eji mîdo ema ikọ, mè ibe enyi eji erieen̄ ebi ibot kiban̄, inyi eji ege ikpa elook owu ebi ebi ibot cha erebe.
13 “Ema efọfọọk eji ibe, ‘Eji ìre ebi ikwaan̄ Okumugwem ogwu òrom inyọn̄ mè ijọn̄. 14 Uwu yi, îre ogwu ubọọn̄ ebi Ijeren ge òmimin, mè inye lek onama isan̄a owuwa acha òraraka. 15 Ire, mgbọ ebi nte nte kiji erọbe ijo inu me isi Okumugwem Awaji ebi Ijeren, ogwu òkup me emen inyọn̄, mè iribi ọmọ unaan̄-ejit, iyayaka ema itap me ubọk kè Nebukadineja, ogwu ubọọn̄ Babilọn, òrere si ogwu ubọọn̄ ebi Kalidia. 16 Nebukadineja ogbugbugbọ uwu ya, mè itap ukan̄ iwọp, mè ikpulu ebi ene me usun̄ akọn̄ ifo Babilọn. 17 Ire, me adasi acha Sarọs okanabe ubọọn̄ me ido ebi Babilonia, ogwu ubọọn̄ Sarọs ogege ikpa ibe ekpọk enama uwu yi. 18 Nroon̄ ikwaan̄ mbuban alata araran̄ mè alata okuket cha, echi Nebukadineja okpulube isibi me uwu ya me Jeruselem isa isi isun̄ me uwu yọk kan̄, ogwu ubọọn̄ Sarọs îkpọk isan̄a isibi me uwu yọk ya me Babilọn, mè iyaka inyi Jerubaben melek Sesibajari ogwu ibot mkpulu, 19 mè inyi ida ibe ikpulu otutuuk nroon̄ ikwaan̄ chi isa igwu ikom isi isun̄ me Uwu Mbuban me Jeruselem, mè ibe ekpọk enama Uwu Mbuban Okumugwem yi me akpat kan̄. 20 Mgbọ Sesibajari yi orebe ere keyi, itọtọbọ ọdọ Uwu Mbuban Okumugwem me Jeruselem. Akarake ya ke ekup me lek inanama uwu ya inire mgbọ keyi, ire, kpenama isan̄a.’
21 “Eya orọ, ire môneme owu, ogwu ubọọn̄, nyi ida ibe eweek emen ikpa mfufuk ogwukaan̄ kiji ogwu ubọọn̄, echi òkup me Babilọn ekpọ-nu. 22 Ire iweek imun̄ ibe ke esa me unye ogwu ubọọn̄ Sarọs ikinama Uwu Mbuban Okumugwem ya me Jeruselem, mè ire ke owu ogwu ubọọn̄ ogwukaan̄ kiji obọkọ itap, teme eji inu eji eberọ òfo me lek inu chi.”
Mînyi unye ibe enama Uwu Mbuban
23 Dariọs oneninyi ida ibe eweek emen ikpa mfufuk ebi ubọọn̄ echi esun̄be me Babilọn. Enenimun̄ ikpa ekakat ge me ama Ekibatana, ama mgban òkup me ido Midia, mè imun̄ egebe me lek ikpa ya ibe:
24 “Me adasi acha me ukot mkpulu ogwu ubọọn̄ Sarọs, ogwu ubọọn̄ Sarọs înyi ida ibe ekpọk enama Uwu Mbuban Okumugwem òkup me Jeruselem, òrere ere ema ekigwa ngwugwa, ere ukan̄ okilomo mgbọ geelek. 25 Ubene uwu ya môre akọp mè ejit go, uwele kan̄ si môre akọp mè ejit go; isitoon̄ ugban ewuuk ebabak ita, mêtotoon̄ ugban aya uwot ge igọọk. Ikpoko mêsabe inama uwu ya mônan̄a me akpa ogwu ubọọn̄ Sarọs. 26 Nroon̄ ikwaan̄ mbuban òkup me Uwu Mbuban Okumugwem, echi alata araran̄ mè echi alata okuket cha, echi Nebukadineja okpulube me Jeruselem isa ifo Babilọn, mêsa isi igwook me uwu ya me Jeruselem, mè isun̄ me ere ema ewuukbe lek ikikup.”
27 Eya orọ, Dariọs onyinyi ida ibe Sisines, ogwu ibot mkpulu Siria mè Fonisia, melek kè Satarabujanes, mè ebi ogbo kiban̄, mè ebi ama ama ebi etobe ibe ekegọọk ekpulu me Siria mè Fonisia, eda lek ebọkọ me ere ekinama uwu ya, mè etele inyi Jerubaben, ogwu ikwaan̄ Okumugwem mè ogwu ibot mkpulu me Judia, mè ebi ugane ebi Ju, enama Uwu Mbuban Okumugwem yi me akpat ere kan̄. 28 Ogwu ubọọn̄ Dariọs otutumu si ibe, “Ǹkinyi ida ibe ebi ìnan̄a me usun̄ akọn̄ ika cha enama uwu ya esan̄a kpai, mè enyi esa òjot òjot efuuk etap ubọk enyi ebi ìnanan̄a me usun̄ akọn̄ ika Judia, mege ènama Uwu Mbuban Okumugwem ya èsan̄a. 29 Ofifi kan̄, otitip geelek ebọkọbe me ido Kole-Siria mè ido Fonisia, ekalọlọ isasa okpọkọ me lek inyi ife chi, òrere Jerubaben ogwu mkpulu, inyi ekesa egwa ngwugwa enyi Okumugwem. Ikpoko otitip cha môkup inyi orie eriembuuk, mè orie arọọn̄, mè bọn arọọn̄, 30 melek akpa wit, mè uchi, mè miin̄, mè aran̄, mgbọ geelek me acha geelek. Ikagbini, ìkinyi, inyi ekesa erọ inu ebekisa irọ ikwaan̄ usen geelek, ike ebi ngwugwa me Jeruselem ebekido, 31 ufuna ekegwa ngwugwa miin̄ egwogwook enyi Awaji Ogwu Òbebene Ichit me ibot ogwu ubọọn̄ mè bọn kan̄, mè ekeriaak uriaak me ibot ugwem kiban̄.”
32 Înyi si ida ibe, “Ikaan̄ ogwu ije ilọ, mè ìre isan̄a inu ge me lek inu egebe me emen ikpa yi, esan̄a ogbugboon̄ ge me lek uwu ene ya, mè esa ekpat ene ya etibi, mè etet ijọn̄ kan̄ ebọkọ esa enyi ogwu ubọọn̄.
33 “Eya orọ, kè Okumugwem, ogwu ekigwen erieen̄ kan̄ me ere ya, ijijaka ogwu ubọọn̄ geelek mè ìre ido geelek môbenebe ubọk kan̄ isa ikput mè ìre ifiat Uwu Mbuban Okumugwem ya me Jeruselem.
34 “Emi, ogwu ubọọn̄ Dariọs, nnyi ida ibe egwuun̄ chieen̄ erọ otutuuk inu ike ngebe me emen ikpa yi ibe erọ.”