Mîgbana Mbuban
7
Sisines, ogwu ibot mkpulu ido Kole-Siria mè ido Fonisia, mè Satarabujanes, mè ebi ogbo kiban̄, egbagban̄ utọn̄ me ida ogwu ubọọn̄ Dariọs, 2 mè igwuun̄ chieen̄ enenen ikpọ chieen̄ me lek ikwaan̄ mbuban ya, mè ikitap ubọk inyi ebi ugane ebi Ju mè ebi ibot ikwaan̄ me Uwu Mbuban. 3 Ikwaan̄ mbuban ya okekije ijaan̄. Ebi nriran, Agai mè Jekaraya, ekekiben nriran ikpọ me lek otutuuk mgbọ ikwaan̄ ya okije inyi isi. 4 Ema erọrọ ikwaan̄ ya isan̄a igọọk me ida Okumugwem Awaji ebi Ijeren onyibe. Eya orọ, sa me igbagbaan̄ ichieek eyi Sarọs mè Dariọs mè Ayaserọs, ebi ubọọn̄ ebi Pesia, egbaan̄be ichieek, 5 enanama Uwu Mbuban ya isan̄a kpai me òso akọp usen iba mè ita me onyan̄a Adari, mè òso acha gweregwen me ukot mkpulu ogwu ubọọn̄ Dariọs. 6 Ebi Ijeren, mè ebi ngwugwa, mè ebi otoko kè Libai, mè ebi Ijeren geelek ebi ìnanan̄a me usun̄ akọn̄ ika inigbaan̄ ikup melek kiban̄, erọrọ inu geelek igọọk me ubọk egebe me ikpa Ikan kè Mosis. 7 Mgbọ egbanabe Uwu Mbuban Okumugwem, ema egwu efit orie eriembuuk, mè efit orie arọọn̄ iba, mè efit bọn arọọn̄ ini, 8 mè akọp mè orie ebot iba isa igwa ngwugwa ijo inu me ibot otutuuk ebi Ijeren, igọọk me otu ifuk akọp mè ene iba ebi ibot otoko ebi Ijeren. 9 Ebi ngwugwa mè ebi otoko kè Libai etatap ofọnti ikwaan̄ kiban̄ ikeke me onineen̄, me ototun̄ ukan̄ me ototun̄ ukan̄, ikirọ ikwaan̄ inyi Okumugwem Awaji ebi Ijeren, igọọk me lek inu egebe me ikpa Ikan kè Mosis. Ebi ìkibem otunchit ekukup me otunchit ge ge iso.Ijọk Iraraka
10 Ebi Ijeren ebi ìnanan̄a me usun̄ akọn̄ ika esusun̄ ijọk Iraraka me òso akọp mè usen ini me adasi onyan̄, me mgbọ ebi ngwugwa mè ebi otoko kè Libai egwọkbe lek isan̄a. 11 Ìkare otutuuk ebi ìnanan̄a me usun̄ akọn̄ ika ke egwọk lek, ire, otutuuk ebi otoko kè Libai mîgwọk lek iso. 12 Ema egwugwu arọọn̄ ijọk Iraraka ya me ibot otutuuk ebi usun̄ akọn̄ ìkaka, mè ibot ebi ngwan̄ kiban̄ ìrere ebi ngwugwa, mè ibot kiban̄. 13 Otutuuk ebi Ijeren ebi ìnanan̄a me usun̄ akọn̄ ika, otutuuk ebi isasan̄a lek isan̄a me lek ochichaka inu ebi ìluk me ido ya ekirọ, mè ikiweek Okumugwem, ererie inorie ngwugwa ijọk ya. 14 Ema ererie si ijọk Fituru Kpunu Olat usen jaaba, mè ikinwọọn̄ unwọọn̄ me isi Okumugwem, 15 mije, Okumugwem onwenebe nkeek ogwu ubọọn̄ Asiria okaan̄be ofolek kiban̄, mè itap ema unye me lek, inyi esi ikwaan̄ Okumugwem Awaji ebi Ijeren.