Ejira îre Jeruselem
8
Mgbọ inu chi geelek orakabe, mgbọ Ayaserọs, ogwu ubọọn̄ ebi Pesia, orebe ubọọn̄, Ejira onunu. Ejira ìre gwun̄ kè Seraya, gwun̄ kè Ajariya, gwun̄ kè Ilikiya, gwun̄ kè Salum, 2 gwun̄ kè Jadọk, gwun̄ kè Ayitubu gwun̄ kè Amariya, gwun̄ kè Uji, gwun̄ kè Buki, gwun̄ kè Abisuwa, gwun̄ kè Fineyas, gwun̄ kè Elieja, gwun̄ kè Erọn ogwu òban Awaji.3 Ejira yi ìnan̄a me Babilọn inu kubọk ogwu òjeen̄ Ikan òrọriọọn̄ Ikan kè Mosis, eyi Awaji ebi Ijeren onyibe, ijaan̄ lek. 4 Ogwu ubọọn̄ okakaan̄ ọmọ ulibi me lek, mè inyi ọmọ ata isi me otutuuk inu geelek îbeekbe. 5 Ebi melek kan̄ enube Jeruselem ìre usini ebi Ijeren, mè usini ebi ngwugwa, mè ebi otoko kè Libai, mè ebi ìkọt okwa Uwu Mbuban, mè ebi ìkibem otunchit, melek ebi ikwaan̄ Uwu Mbuban. 6 Ema enan̄a me Babilọn me adasi usen me adasi onyan̄ me òso acha jaaba me ukot mkpulu kè Ayaserọs ogwu ubọọn̄, mè inire Jeruselem me adasi usen me òso onyan̄ go. Okumugwem onyinyi ema ata ije. 7 Ejira îkaan̄ ikpele iriọọn̄-inu ofolek Ikan Okumugwem mè inu Okumugwem otọbe ibe erọ. Eya orọ, geege me lek ìkakwala ọmọ, ire, ìjejeen̄ otutuuk ebi Ijeren otutuuk orọmijọn̄ mè ikan òje me lek.
Ogwu ubọọn̄ înyi Ejira unye
8 Eyiyi ìre ikpa unye eyi ogwu ubọọn̄ Ayaserọs oriabe ijet Ejira ogwu ngwugwa mè ogwu òriọọn̄ Ikan Okumugwem:
9 “Emi ogwu ubọọn̄ Ayaserọs nge ikpa keyi ijet owu Ejira ogwu ngwugwa mè ogwu òriọọn̄ Ikan Okumugwem. Ntọp owu amọn.
10 “Ike nsabe me ata ejit n̄a itumu ifieek, nnyi ida ibe ebi ido ebi Ju mè ebi ngwugwa mè ebi otoko kè Libai mè ofifi ebi Ju geelek ìkup me irak mkpulu n̄a, ebi ìmama ifofon, egọọk owu efon Jeruselem. 11 Ike emi melek ebi ogbo unene n̄a, ìrere ebi nteme n̄a, ene jaaba etumube ifieek, otu ifuk ene geelek ìweweek ifofon, tele ema egọọk owu eje, 12 inyi esi ekpọ chieen̄ me lek inu ògbaan̄ me lek Judia mè Jeruselem, egọọk me lek inu òkup me emen Ikan Okumugwem, 13 mè ekpulu uche emi mè ebi ogbo unene n̄a echieekbe use inyinyi Okumugwem Awaji ebi Ijeren, mè ebọkọ otutuuk alata araran̄ mè alata okuket geelek emun̄be me ido Babilonia esa esi erọ ikwaan̄ enyi Okumugwem me Jeruselem, 14 igbaalek inu ebi ido Ijeren me lek kiban̄ enyibe ibak me lek Uwu Mbuban Okumugwem Awaji kiban̄ òkup me Jeruselem, òrere alata araran̄ mè alata okuket, echi mêsabe ileen̄ orie eriembuuk mè orie arọọn̄ mè bọn arọọn̄, mè inu geelek òje me lek kiban̄, 15 inyi mêsabe ikigwa ngwugwa me inyọn̄ ntook Okumugwem Awaji kiban̄ òkup me Jeruselem.
16 “Inu geelek owu mè bọn ulọk kwun̄ eweekbe isasa alata araran̄ mè alata okuket cha irọ, ìsa ìrọ ìkpọ me lek nkeek Awaji kinyi. 17 Ìsa nroon̄ ikwaan̄ mbuban Okumugwem cha, echi enyibe enyi ibe esa esi erọ ikwaan̄ me Uwu Mbuban Awaji kinyi me Jeruselem, ìjet. 18 Inu geelek enyi emun̄be ibe ke îkup me uyọt me Uwu Mbuban Awaji kinyi, enyi mêkọt imọnọ ikpoko me akpa ogwu ubọọn̄ isa ilep.
19 “Emi, ogwu ubọọn̄ Ayaserọs, nra inyi ebi uwu ikpoko me Siria mè Fonisia ida ibe, inu geelek Ejira ogwu ngwugwa mè ogwu òriọọn̄ Ikan Awaji Ogwu Òbebene Ichit obeekbe, enyi, ekalọ inyinyi, 20 mè enyi eso efit obop ikpoko alata okuket, mè efit akpa akpa wit, mè efit igbe miin̄, mè uchi owuwa owuwa. 21 Inu geelek òkup me Ikan Awaji, ìtele inyi egwuun̄ chieen̄ erọ eso enyi Awaji Ogwu Òbebene Ichit, inyi uyok uyok unaan̄-ejit kan̄ ikakeme mkpulu ogwu ubọọn̄ mè ebi bọn. 22 Ǹkilook si enyi ibe, ikafieek mkpukpe geege mè ìre ofifi otitip ìtoon̄ me ibot ebi ngwugwa geege, mè ìre ebi otoko kè Libai, mè ìre ebi ìkọt okwa me Uwu Mbuban, mè ìre ebi ìkibem otunchit, mè ìre ebi ikwaan̄ Uwu Mbuban, mè ìre ebi eteen̄be me ikwaan̄ me Uwu Mbuban yi. Ene geege ìkakaan̄ unye ifefieek otitip geege inyi ema, inu geelek ikerọrọ.
23 “Owu, Ejira, sa me iriọọn̄-inu Awaji onyibe owu, gobo ebi ibot oyerebet ile mè ebi ijija, inyi ekesibi oyerebet enyi otutuuk ebi ìrọriọọn̄ Ikan Awaji kinyi, me otutuuk Siria mè Fonisia. Ebi geelek kperiọọn̄ Ikan Awaji, jeen̄ ema. 24 Ebi geelek ìchachaka Ikan Awaji kinyi, mè ìre ikan eyi mkpulu, esulu atalek osusut, mè ìre osusut mkpa, mè ìre esese chieen̄ osusut, mêkọt ifieek ikpoko ibe ekpe, mè ìre mkpọn ibe esi.”
Ejira îtọn̄ Awaji
25 Ejira ogwu òjeen̄ Ikan onenibe, “Itọn̄ ikup inyi Okumugwem gaalek, ogwu òtatap me ejit ogwu ubọọn̄ ibe inyi Uwu Mbuban kan̄ òkup me Jeruselem umin; 26 ogwu ònyinyi emi umin me isi ogwu ubọọn̄ mè isi ebi nteme kan̄ mè otutuuk ebi ogbo unene kan̄ mè ebi ilile kan̄. 27 Ntap-ubọk eyi Okumugwem Awaji n̄a onyibe emi îkat emi ejit, ntititiin̄ ebi Ijeren ibe egọọk emi esi Jeruselem.”
Ebi ibot ebi ìkaka
28 Ebibi ere ebi ibot, igọọk me uwu ebi nte nte kiban̄, mè ukpa kiban̄, ebi ìgọgọọk emi inan̄a me Babilọn, me ukot mkpulu kè Ayaserọs: 29 Me owot iman kè Fineyas, Gesiọm. Me owot iman kè Itamaru, Gamayen. Me owot iman kè Debit, Atus gwun̄ kè Sekanaya. 30 Me owot iman kè Paros, Jekaraya, mè efit mè akọp ene go etap erieen̄ me ikpa. 31 Me owot iman kè Payat Mowabu, Elieyowenai gwun̄ kè Seraya, mè efit ene iba ebi melek kan̄. 32 Me owot iman kè Jatu, Sekanaya gwun̄ kè Jayajien, mè efit ene ita melek kan̄. Me owot iman kè Adin, Obedi gwun̄ kè Jonatan, mè efit ene iba mè akọp go ebi melek kan̄. 33 Me owot iman kè Elam, Jesaya gwun̄ kè Gotolia, mè akọp ene jaaba melek kan̄. 34 Me owot iman kè Sefatiya, Jeraya gwun̄ kè Maiken, mè akọp ene jaaba melek kan̄. 35 Me owot iman kè Jowabu, Obidaya gwun̄ kè Jeyen, mè efit ene iba mè akọp mè iba. 36 Me owot iman kè Bani, Selomit gwun̄ kè Josifia, mè efit ene mè akọp gweregwen melek kan̄. 37 Me owot iman kè Bebai, Jekaraya gwun̄ kè Bebai, mè akọp ene iba mè jeeta ebi melek kan̄. 38 Me owot iman kè Ajigadi, Joyanan gwun̄ kè Akatan, mè efit ene mè akọp ebi melek kan̄. 39 Me owot iman kè Adonikam, erieen̄ ebi mgburudun̄ ìre Elifelet, mè Jewen, mè Semaya, mè akọp ene jaaba ebi melek kan̄. 40 Me owot iman kè Bigibai, Utai gwun̄ kè Isitalikurọs, mè akọp ene jaaba ebi melek kan̄.
41 Nnenititiin̄ ife cha me agba lek okwaan̄ ekigwen Teras, eji egwugwugwuun̄ uwu ọfọ me ere ya ikup usen ita. Nneniweek iriọọn̄ ebi ema erebe. 42 Mgbọ nkamun̄ge ene geege me etete kiban̄ òrere ogwu owot iman ebi ngwugwa, mè ìre ebi otoko kè Libai, 43 nraria etip ijet Elieja, mè Iduwen, mè Masimas, 44 mè Netan, mè Elinatan, mè Jekaraya, mè Mesulam, ebi ìrere ebi ibot mè ikaan̄ ngobo-ntet. 45 Mbebe ema esi lek kè Ido, ogwu ibot ebi uwu ikpoko, 46 mè inyi ema ida ibe etumu enyi Ido mè ebi ikwaan̄ ogbo kan̄ melek ebi ìkisun̄ ikpoko me ere ya, ibe eria ebi ngwugwa ejet eji, ebi ìbenirọ ikwaan̄ me Uwu Mbuban Okumugwem. 47 Sa me unye Okumugwem Awaji kiji, ema esasa ebi ene ìgbegbe ijet eji, ìrere ebi owot iman kè Mali gwun̄ kè Libai, gwun̄ kè Ijeren. Ebi esabe inu cha ìre Serebiya mè ebi owot iman kan̄, mè bọn ebi ulọk, akọp mè ene jeeta. 48 Ofifi ebi ene si ìre Asabiya mè Anunus melek ogwu ngwan̄ Jesaya, ebi owot iman kè Ananiya, mè ebi owot iman kiban̄, akọp ene iba, 49 mè ebi ikwaan̄ Uwu Mbuban, ebi Debit mè ebi ibot enyibe ibe ekerọ ikwaan̄ enyi ebi otoko kè Libai, efit ebi ikwaan̄ Uwu Mbuban iba mè akọp iba. Mîtap erieen̄ kiban̄ otutuuk isan̄a me ikpa.
Ejira îsun̄ ijin-otu
50 Nneninyi ikan ibe otutuuk nsabọn irieen̄ cha ejin otu me isi Okumugwem, esa ebeek ibe irọ inyi ije eji mè bọn kiji mè anam kiji ebeje, ijaan̄. 51 Mije, esip ìtetet emi ibebeek ogwu ubọọn̄ ibe inyi eji ebi akọn̄ ukot ukot mè ebi inyọn̄ inyinya, ebi mêsabe eji iban, inyi ebi oriara kiji ekasisaak eji. 52 Bak me lek si, eji mîwuuk lek itumu inyi ogwu ubọọn̄ ibe ke Unye eyi Okumugwem Awaji kiji ọmọ òwa melek ebi ìkiriaak ọmọ, ke môtap ubọk inyi ema me oniin̄ kiban̄ geelek. 53 Eji ekpọkpọk ibeek Okumugwem Awaji kiji mbeek ofolek inu chi, mè imun̄ ibe ke ọmọ îkaan̄ ata ejit enenen.
Uche echebe inyi Uwu Mbuban
54 Nnenigobo akọp mè ene iba me etete ebi ibot ebi ngwugwa, isun̄ esese. Ema ìre Serebiya mè Asabiya melek akọp bọn ulọk kiban̄, 55 mè initọ alata okuket mè alata araran̄ inyi ema, mè inyi ema si nroon̄ ikwaan̄ mbuban echi Uwu Mbuban Okumugwem, echi ogwu ubọọn̄ me lek kan̄, mè ebi nteme kan̄, mè ebi isi ile, melek otutuuk ebi Ijeren enyibe cha. 56 Ǹtọ akọp obop kilo alata okuket iba, mè obop mè efit kilo nroon̄ ikwaan̄ alata okuket ini, mè obop mè efit kilo alata araran̄ ini, 57 mè inyi ema si akọp ngigọ alata araran̄ iba, mè akọp mè nroon̄ ikwaan̄ iba echi esabe atalek ekwe òkimumumọn kubọk alata araran̄ irom. 58 Nnenitumu inyi ema ibe, “Enyi ekup me mbuban inyi Okumugwem, nroon̄ ikwaan̄ chi si ìkup me mbuban. Alata okuket mè alata araran̄ cha ìre inu esabe inyan̄a ibot inyi Okumugwem, Okumugwem Awaji ebi nte nte kiji. 59 Ìgbala chieen̄ me lek, mè ìbem mege enyi mêyakabe ema itap me ubọk ebi ibot ebi ngwugwa mè ebi otoko kè Libai, mè ebi ibot uwu ebi Ijeren me otoko me otoko, me emen agwut cha òkup me lek Uwu Mbuban Okumugwem kiji me Jeruselem.” 60 Ebi ngwugwa mè ebi otoko kè Libai ebi ìbọbọkọ alata okuket mè alata araran̄ melek nroon̄ ikwaan̄ cha echi òkup me Jeruselem mgbọ òraraka, esasa nroon̄ ikwaan̄ cha inu me Uwu Mbuban Okumugwem.
Ejira mè ebi melek kan̄ mîka inire Jeruselem
61 Eji enan̄a me agba lek okwaan̄ Teras ya me òso akọp mè usen iba me adasi onyan̄, mè isa me irak ikpele ubọk Okumugwem Awaji kiji ogwu okisa eji ije, inire Jeruselem. Înyan̄a eji me ubọk ebi ochicha geelek me oniin̄ ije, eji enenire Jeruselem. 62 Mgbọ eji ekupbe me Jeruselem usen ita, eji enenitọ alata okuket mè alata araran̄ cha, mè iyaka inyi me Uwu Mbuban Okumugwem Awaji kiji, eji ekana ema itap me ubọk kè Meremot ogwu ngwugwa, òrere gwun̄ kè Uraya. 63 Ogwu òkup melek kè Meremot ìre Elieja gwun̄ kè Fineyas, mè ebi melek kiban̄, ìrere Josabadi gwun̄ kè Jesua, mè Mowet gwun̄ kè Binuwi, ebi otoko kè Libai. 64 Ema efufuk otutuuk inu cha, mè itọ ulobo kiban̄, mè ige ulobo inu cha geelek itap me ikpa me mgbọ yaage. 65 Ebi ìnanan̄a me usun̄ akọn̄ ika cha enenigwa ngwugwa inyi Okumugwem, Awaji ebi Ijeren. Esa akọp mè orie eriembuuk iba igwa ngwugwa me ibot otutuuk ido Ijeren, mè isa si akọp orie arọọn̄ onaan̄ge mè gweregwen, 66 mè akọp bọn arọọn̄ jaaba mè iba igbaalek, mè inisa akọp mè orie ebot iba igwa ngwugwa esuuk. Otutuuk cha, egwa inyi Okumugwem. 67 Ida ogwu ubọọn̄ onyibe, ema mînyi si ebi ikwaan̄ ogwu ubọọn̄, mè inyi ebi ibot mkpulu ido Kole-Siria mè ido Fonisia, ebi ibot ikwaan̄ chi enyinyi ebi Ijeren mè Uwu Mbuban Okumugwem umin.
Ejira îje ikeme ebi Ijeren ìdodo ebi kpere ebi Ju me lek nwa
68 Mgbọ erọbe otutuuk inu chi iraka, ebi ibot ebi Ju eneninu me lek n̄a, mè inibe, 69 “Ebi Ijeren, mè ebi mkpulu, mè ebi ngwugwa, mè ebi otoko kè Libai kpesan̄a lek kiban̄ me lek ebi ofifi ido ìluk me lek ijọn̄ yi, òrere ebi Kenan, mè ebi Et, mè ebi Pereji, mè ebi Jebus, mè ebi Mowabu, mè ebi Ijipiti, mè ebi Edọm, mè filafila inu ife cha ekirọ. 70 Mije, ebi kiji chi mè ebi bọn ebirieen̄ mîdido bọn ebibaan̄ ebi ife chi me lek nwa. Sa me ikeya, otoko ebi ìkup mbuban onenigbaan̄ iwọlọ me lek eyi ebi ichen ìluk me lek ijọn̄ yi. Ebi ibot mè ebi ilile kiji me lek ebi ìkigọọk irọ nlilọ inu yi bene me ibebene.”
71 Mgbọ yaage nnọbe inu chi, ngwagwak ofọnti melek ekwut mbuban òkup emi me lek, mè ijim ijeek ibot n̄a mè ifet otu n̄a, mè ikweek irek me ijọn̄ me uga ekiket mè ufieejit. 72 Ebi geelek ikọ Okumugwem ebi Ijeren osisikbe lek, etititiin̄ ikana emi, mgbọ nkifieek ejit ofolek nrọ-nlọ keyi. Nkukup me ufieejit mege ire mgbọ ngwugwa ikakwun̄. 73 Nneninan̄a ikeke me ijin-otu n̄a, melek ngwak ofọnti mè ekwut mbuban me lek n̄a, mè itọbọ ekpe, mè inyana ubọk n̄a inyi Okumugwem, 74 mè ibe:
“Jei Okumugwem, esip îtet emi enenen me isi kwun̄, ǹkayaka ìriọọn̄ inu mbarọ. 75 Mije, ijo inu kiji îbene isaba iraka eji ibot, nrọ-nlọ kiji îtoon̄ ibene isi ire akpabin inyọn̄, 76 bene me ukot ebi nte nte kiji re cherekeyi. Chereyi si, eji ekup me emen ikpele ijo inu. 77 Bak me lek ijo kiji mè eyi ebi nte nte kiji, owu oyaka eji mè bọn ulọk kiji itap me ubọk ebi ubọọn̄ linyọn̄, mè isa eji inyi oge akọn̄ mè usun̄ akọn̄ mè mfum mè esip mege inire chereyi. 78 Ire, mgbọ keyi, jei Okumugwem, owu oche usini me lek nsan kwun̄ ire eji lek, inyi eji ekaan̄ ugwun̄ ijọn̄ mè erieen̄ me ere mbuban kwun̄ yi, 79 mè ichili utoon̄ inyi eji me emen Uwu Mbuban Okumugwem Awaji kiji, mè inyi eji inorie mgbọ eji ekupbe me usun̄. 80 Ikerere mgbọ eji ekupbe me usun̄ ya, Okumugwem Awaji kiji ìkajit eji ìtele, ire, îrọ inyi ebi ubọọn̄ ebi Pesia ekaan̄ ata ejit me lek kiji, mè ekenyi eji inorie, 81 mè emin Uwu Mbuban Okumugwem Awaji kiji, mè ejibi ama Sayọn eyatbe itele ebene, mè enyi eji ere ikput-lek me Judia mè Jeruselem.
82 “Jei, Okumugwem, keke ke eji ebeyaka itumu? Owu onyi eji otutuuk inu chi, ire, eji echachaka ikan kwun̄ onyibe sa me otu ebi ikwaan̄ kwun̄ ebi nriran ibe, 83 ‘Ijọn̄ enyi ekinin̄ ya ibesi ibọkọ isak, ìre ijọn̄ ebi ichen ìkup me lek esabe filafila ugwem ififila igwook, mè itap mbuban ugwem kiban̄ ijot me lek dum. 84 Eya orọ, ikasa bọn ebibaan̄ kinyi ìche olom ìnyi bọn ebirieen̄ kiban̄, ikadodo si bọn ebibaan̄ kiban̄ ìnyi bọn ebirieen̄ kinyi. 85 Ikalululuk ìweek ibe enyi ekaan̄ esuuk melek kiban̄, inyi enyi mênye lek, mè irie ata inu ònan̄a me ijọn̄ ya, mè itele ijọn̄ ya me ìrot inyi bọn kinyi ire mgbọ geelek.’ 86 Otutuuk inu geelek òrọrọ eji ìrọ mije ijo irọrọ kiji mè ikpele ijo inu eji erọbe. Ire, jei Okumugwem, owu oben ufialek ijo inu kiji isan̄a, 87 mè inyi eji mbet lek ugwun̄ ijọn̄ òkup ikeyi. Ire, eji ekpọkpọk igwu ikana inyi udun̄ isi ije ilọ Ikan kwun̄, sa me ifufufuku me emen ten̄ten̄ ugwem ebi lek ijọn̄ yi. 88 Kè owu okọt ònaan̄ ejit onyi eji, ire lek owu mojijakabe eji isan̄a, me okatelege ugwun̄ ijọn̄, mè ire ukwuuk uti, mè ìre erieen̄ geege ìnyi eji. 89 Jei Okumugwem ebi Ijeren, owu ogbe utoon̄ ejit, mije owu otele eji kubọk ugwun̄ ijọn̄ mege ire chereyi. 90 Kpọ, eji ire ebi me isi kwun̄ me emen nrọ-nlọ kiji; mije, bak me lek inu chi, eji kpebekọt iyaka ikeke me isi kwun̄.”
Mînyan̄a ibot ibe kpebeyaka ido mè ibat ebi ofifi ido
91 Mgbọ Ejira olaakbe inyana me ijọn̄ me isi Uwu Mbuban ikito ito, mè ikiriaak uriaak, mè ikifuk ijo isibi, ikpele urum ene, ebirieen̄ mè ebibaan̄, mè nsabọn irieen̄ mè nsabọn ibaan̄, ìnan̄a me Jeruselem, egbagban ikana ọmọ, mije, ito îmin enenen me etete urum ebi ene cha. 92 Sekanaya, gwun̄ kè Jeyen, ene ge me lek ebi Ijeren, otataan̄ ukpo itumu inyi Ejira ibe, “Eji mîrọ Okumugwem ilọ, bak me lek eji mîdo ebibaan̄ ebi ofifi ido ìluk me lek ijọn̄ yi me lek nwa. Ikerere mgbọ keyi, ikpọchieen̄ ọmọ òwa inyi ebi Ijeren. 93 Eji enenyan̄a ibot ofolek inu yi enyi Okumugwem, ibe ke eji mêlap ebi nwa kiji cha ìrere ebi ofifi ido isibi, ema melek bọn kiban̄, 94 ire mônwọn owu me lek mè inwọn me lek otutuuk ebi ìkisun̄ Ikan Okumugwem. 95 Nan̄a keke, mè rọ inu, mije îre irek kwun̄. San̄a unye, eji òwa me udun̄ kwun̄.”
96 Ejira oneninan̄a ikeke, mè itet ebi ibot ebi ngwugwa mè ebi otoko kè Libai mè otutuuk ebi Ijeren ibe enyan̄a ibot ibe ke mêrọ ikeya. Ema enyanyan̄a ibot.