Ebi Ijeren mîrieen̄ nwa kiban̄ ìrere ebi ofifi ido isibi
9
Ejira onanan̄a me oyet egep Uwu Mbuban isibi isi inin̄ emen agwut kè Jeyoyanan gwun̄ kè Eliasibu, 2 mè ikup me ere ya otutuuk eririeen̄ ya, ìkarie inorie, ìkanwọ mudim, mije, ìkifieek ejit me ibot ikpele nrọ-nlọ ebi urum ene cha erọbe. 3 Enenilook etip ikana otutuuk Judia mè Jeruselem ijet otutuuk ebi ìnanan̄a me usun̄ akọn̄ ika inu, ibe mè ema enetitiin̄ me Jeruselem. 4 Ire ema kpenu inititiin̄ me ere ya sabum usen iba mè ìre ita, ike ebi ugane ebi ìkikpulu etumube ifieek, ke mêfum anam kiban̄ isa igwa ngwugwa, mè isan̄a ema me lek kiban̄ isan̄a me otu ifuk ebi ìnanan̄a me usun̄ akọn̄ ika.5 Sabum usen ita oniso, ebi otoko kè Juda mè otoko Benjamin etititiin̄ me Jeruselem. Inu yi ìrọ me onyan̄ onaan̄ge me òso akọp usen iba me onyan̄ ya. 6 Otutuuk urum ene cha ekukup me eden̄ oyet egep isi Uwu Mbuban, mè ikiran utọọk, bak me lek, mgbọ ya ìre ijo mgbọ utọọk. 7 Ejira oneninan̄a ikeke, mè itumu inyi ema ibe, “Enyi mîchaka Ikan, mije enyi edobe ebibaan̄ ofifi ido me lek nwa, mè irọ inyi ijo ebi Ijeren iriọọn̄ ubọk ikiwa. 8 Me mgbọ keyi, ìfuk ijo kinyi, mè ìnyi Okumugwem Awaji ebi nte nte kinyi umin, 9 mè ìrọ nkeek kan̄. Ìsan̄a lek kinyi me lek ebi ife ìluk me lek ijọn̄ yi, mè ìkpebe lek me lek nwa kinyi cha ìrere ebi ofifi ido.”
10 Otutuuk urum ene cha etataan̄ ukpo ichieek igwook itumu ibe, “Eji mêrọ ubọk owu otumube. 11 Ire, urum ene chi mîwa enenen, mgbọ keyi si ìre mgbọ utọọk, eji kpebekọt ikup me eden̄ oyet me lek efet. Inu yi ìkare ikwaan̄ mêsabe usen ge mè ìre usen iba irọ ifieek, mije, me lek ibot ikọ keyi, eji mîrọ ijo inu iwa enenen. 12 Eya orọ, ebi ibot me lek urum ene chi ekup me Jeruselem, mè ekenyi ebi geelek ìkakaan̄ nwa ebi ofifi ido, me ama me ama, mgbọ mênube, 13 ema melek ebi ugane mè ebi oyerebet me ama ama, mege eji mênwọnọbe uyok uyok unaan̄-ejit Okumugwem me lek inu yi òrọrọ.”
14 Jonatan gwun̄ kè Asayen mè Jayijeya gwun̄ kè Tikiba ebọbọkọ itap ikeya ikpọkpọ chieen̄ me lek. Mesulam mè Libai mè Sabetai egọgọọk ema irọ ikwaan̄ kubọk ebi oyerebet. 15 Otutuuk ebi ìnanan̄a me usun̄ akọn̄ ika erọrọ si ikpọ me lek inu chi geelek.
16 Ejira ogwu ngwugwa onenigobo ebi ibot me uwu me uwu, me erieen̄ me erieen̄ igbaalek kan̄. Ema ebebene ikiwọlọ emen ikọ ya, ibene me aya otu onyan̄ eyi òso akọp onyan̄. 17 Oyerebet ebi ìkaan̄ nwa ìrere ebi ichen otata me aya otu onyan̄ eyi okpa onyan̄.
Erieen̄ ebi ìdodo ebibaan̄ ofifi ido
18 Me lek ebi ngwugwa, ebi esabe inu, ebi emun̄be ibe ke mîkaan̄ nwa ìrere ebi ofifi ido, ìre: 19 Me owot iman kè Jesuwa gwun̄ kè Josadak, mè ebi ngwan̄ ebirieen̄: Maseya, mè Elieja, mè Jaribu mè Jọdan. 20 Ema mîchieek use ilalap ebi nwa kiban̄ isan̄a, mè inyinyi ebi kè orie arọọn̄ inyi esa egwa ngwugwa inwene ibot me inu ema erọbe ilọ. 21 Me owot iman kè Imeri: Anani mè Jebadiya, mè Maseya, mè Semaya, mè Jeyen mè Ajariya. 22 Me owot iman kè Pasuru: Elioyenai, mè Maseya, mè Isimen, mè Netanayen, mè Gedaliya, mè Salitas.
23 Me owot iman ebi otoko kè Libai: Josabadi, mè Simei, mè Kelaya, òrere Kelita, mè Petaya, mè Juda, mè Jona. 24 Me lek ebi ìkọt okwa me Uwu Mbuban: Eliasibu melek Jakuru. 25 Me lek ebi ìkibem otunchit: Salum mè Telem.
26 Me lek ebi Ijeren, me owot iman kè Paros: Ramia, mè Ijiya, mè Malikija, mè Mijamin, mè Elieja, mè Asibiyas, mè Benaya. 27 Me owot iman kè Elam: Mataniya, mè Jekaraya, mè Jesirielọs, mè Abidi, mè Jeremot, mè Ilaija. 28 Me owot iman kè Jamot: Eliadas, Eliasibu, mè Otoniya, mè Jeremot, mè Jabadi, mè Jeridaya. 29 Me owot iman kè Bebai: Jeyoyanan, mè Ananiya, mè Jabai, mè Ematis. 30 Me owot iman kè Mani: Olamus, mè Mamukus, mè Adaya, mè Jasubu, mè Seyali, mè Jeremot. 31 Me owot iman kè Adi: Natus mè Mosias, mè Lakunus mè Naidus, mè Besikasipasimis, mè Sesiten, mè Belinus, mè Manasias. 32 Me owot iman kè Anan: Elionas, mè Asayas, mè Melikiyas, mè Sabayas melek Saimọn Kosameyus. 33 Me owot iman kè Asum: Matenai, mè Matata, mè Jabadi, mè Elifelet, mè Manasi, mè Simei. 34 Me Owot iman kè Bani: Jeremai, mè Momidiọs, mè Mayerus, mè Juwen, mè Mamidai, mè Bedeya, mè Fania, mè Karabasion, mè Eliasibu, mè Mamitanemus, mè Eliasis, mè Binuwi, mè Eliasis, mè Simei, Selemeya, mè Netaniya. Me owot iman kè Ejora: Sasai, mè Ajaren, mè Ajayen, mè Samatus, mè Jambiris, mè Josefu. 35 Me Owot iman kè Noma: Majitiyas, mè Jabadi, mè Ido, mè Juwen, mè Benaya. 36 Otutuuk kè ebibi edo ebibaan̄ ebi ofifi ido. Ema elalap ebibaan̄ cha mè ebi bọn isibi.
Ejira îfuk Ikan inyi ebi ene
37 Ebi ngwugwa, mè ebi otoko kè Libai, mè ebi Ijeren enenikiluk me Jeruselem mè asabọn ama cha. Me aya otu onyan̄ eyi òso onyan̄ jaaba, mgbọ ebi Ijeren ekiluk me ama kiban̄, 38 otutuuk urum kiban̄ esasa me ejit ge inigbaan̄ ititiin̄ me eden̄ oyet me isi otunchit Uwu Mbuban eyi agan̄ mbum-ura. 39 Ema enenitumu inyi Ejira ogwu ibot ebi ngwugwa mè ogwu òriọọn̄ Ikan ibe isa Ikan kè Mosis, eyi Okumugwem Awaji ebi Ijeren onyibe, inu. 40 Ejira ogwu ibot ebi ngwugwa osasa Ikan ya inu, me aya otu onyan̄ eyi òso onyan̄ jaaba, inyi otutuuk urum ebi ene cha, ebirieen̄ mè ebibaan̄, mè otutuuk ebi ngwugwa, enọ Ikan ya. 41 Inenibene ida ikifuk Ikan ya isibi me eden̄ oyet me isi otunchit Uwu Mbuban Okumugwem bene me okpa otu ewelegwe mege ire ejit ikarek, me isi otutuuk ene, ebirieen̄ mè ebibaan̄. Otutuuk urum ene cha egbagbala utọn̄ ikigban̄ Ikan ya. 42 Ejira ogwu ngwugwa, ogwu òriọọn̄ Ikan, okekeke me inyọn̄ ubene uwot egonbe isun̄. 43 Ebi kè Matatiya, mè Sema, mè Ananayas, mè Ajariya, mè Uraya mè Ejikaya, melek Balisamus ekekeke me agan̄ ubọk ulom kan̄, 44 sà ebi kè Pedaya, mè Misayen, mè Malikija, mè Lotasubus, mè Nabaria melek Jekaraya ekeke me ubọk agan̄ ujit kan̄. 45 Ejira oneniben ikpa Ikan ya ikaan̄ me isi otutuuk urum ene cha, mije, ọmọ ke esun̄ me irek umin me isi otutuuk ebi ene. 46 Mgbọ îchilibe ikpa Ikan ya, otutuuk ene enanan̄a ikeke. Ejira onenitọn̄ Okumugwem Awaji Ogwu Òbebene Ichit, Ogwukaan̄ Inyọn̄ mè Ijọn̄, Ogwu Òkaan̄ Unye Geelek. 47 Urum ebi ene echechieek igwook ibe, “Ikup ikeya.” Ema ebebene ubọk ifo inyọn̄, mè igele igwook me ijọn̄, mè itọbọ ebum inyi Okumugwem. 48 Jesua, mè Aniyut, mè Serebiya, mè Jadinus, mè Akubu, mè Sabetai, mè Odiya, mè Mayanas, mè Kelita, mè Ajariya, mè Josabadi, mè Anan, mè Pelaya, ema ebi otoko kè Libai, ekekijeen̄ ebi ene Ikan Okumugwem, mè ikikpa inu efukbe iwele.
49 Atarates onenitumu inyi Ejira ogwu ibot ebi ngwugwa, ogwu òriọọn̄ Ikan, mè ebi otoko kè Libai ebi ìkijeen̄ urum ebi ene Ikan, mè otutuuk ene, ibe, 50 “Usen cherekeyi ìre usen òkup me mbuban inyi Okumugwem.” Otutuuk ene ekekito ito mgbọ enọbe Ikan ya efukbe. 51 Aretas onenitumu ibe, “Ìweek oniin̄ ìfon, ìsi ìrie ata inorie, mè ìnwọ miin̄ òtotop, mè ìche me lek ìnyi ebi kpekaan̄, 52 mije, cherekeyi ìre usen òkup mbuban inyi Okumugwem. Ikayaka ìfieek ejit, mije, Okumugwem môjibi enyi ibene.” 53 Ebi otoko kè Libai enyinyi otutuuk ebi ene ida ibe, “Cherekeyi ìre usen òkup mbuban. Ikayaka ìfieek ejit.”