Ikpa Makabi Eyi Adasi ìre mfufuk inu òrọrọ me ido ebi Ju ibene me ukot mkpulu kè Antiọkus Epifanes me acha 175 sabum Karais inire ukot mkpulu kè Jọn Irikanus me acha 134 sabum Karais.

Mfufuk òkup me ikpa yi ìgbaan̄ me lek owot iman ebi Makabi, mè ikijeen̄ ibe ke Awaji ìgogobo ema isa inyan̄a ebi Ijeren isibi me ubọk ebi ochicha kiban̄. Ibot ibot ikọ òkup me emen ikpa yi ìre ke Awaji òwa okisi ikwaan̄ me mfufuk linyọn̄, ke mônyi ebi geelek ìkekeke inye me lek kan̄ ntim-mkpan̄ kubọk mkpukpe ema egban̄be utọn̄ inyi ọmọ.

Ikpa yi ìkikpa mfufuk òfo me lek mbum-nsibi eyi ebi Ju ebumbe isibi me ubọk ebi ubọọn̄ ebi Giris ebi ìkpukpulu ido Palesitin karake Alikisenda ogwu-ile okwube. Mbum-nsibi yi ìbene me ubọk ugane ogwu ngwugwa ge ekigwen Matatiyas. Ebi bọn enenibọkọ isa ije inyi isi. Adasi ogwu gwun̄, Judas, ke enyi erieen̄ ngigo ikigwen Makabi, eyi òsisibi “Abaracha,” mè ìyaka ire, “Awaji ogobo.” Ebi ngwan̄ kan̄, ebi ìkpukpulu me udun̄ kan̄, emọmọnọ si erieen̄ ya inyi lek kiban̄.

Ema mîtim akọn̄ ibọkọ Uwu Mbuban, mè ikpọk igbana uwu ya. Òta mgbọ me mkpulu kè Saimọn, òta ogwu ngwan̄ kiban̄, ke eriọọn̄ me mfufuk kubọk mgbọ ebi Ju elukbe me esuuk mè ibọọn̄ ubọọn̄.