Makabi
Eyi Adasi
Alikisenda Ogwu-ile
1
Alikisenda gwun̄ kè Filip ogwu Mesidonia, oneninan̄a me ido Kitim initim akọn̄ ikpan̄ Dariọs, ogwu ubọọn̄ Pesia mè Midia, mè iraka irek kan̄ ikikpulu. Ọmọ îwuuk lek ire ogwu ubọọn̄ ido Giris. 2 Alikisenda îtim akọn̄ iwa, mè itim ikpan̄ owuwa ama mgban akọn̄, mè ikpan̄ owuwa ebi ubọọn̄ agan̄ cha isan̄a. 3 Îben akọn̄ ikana ntutun̄ ere geelek me linyọn̄, mè ifum owuwa ido. Otutuuk linyọn̄ onenitọọk bak me lek kan̄. Inenibene alọm mè ugumulek. 4 Inenititiin̄ urum akọn̄ ònyenye enenen, mè isa itim ikpan̄ owuwa ido, mè ebi ibot mkpulu kiban̄; ebiba enenikitip otitip mkpulu inyi ọmọ.5 Me òta kan̄, Alikisenda orọrọn̄ orukan̄, mè imun̄ ibe ke ọmọ mônikwu. 6 Inenigwen ebi ibot akọn̄ kan̄ ebi ìsisibi isi, ebi ekpukpobe ọmọ melek kiban̄ isibi akarake ijija kan̄, mè inikup me ògat ugwem kan̄ iche ido kan̄ itap ema me ubọk sabum înikwu. 7 Alikisenda îkpulu ido cha akọp mè acha iba, mè inikwu.
8 Ebi ibot akọn̄ kan̄ cha ebebene ikikpulu, ogwu ikup mè okike ere kan̄. 9 Mgbọ îkwube iraka, ema otutuuk ekwukwuun̄ okpibot ubọọn̄ me ido kiban̄ ge ge. Mgbọ ukot kiban̄ orakabe, bọn kiban̄ si ekekikwuun̄ si okpibot ubọọn̄ kubọk ema ekwuun̄be, mè ikikpulu owuwa acha, mè irọ owuwa ijo inu me linyọn̄.
Antiọkus Epifanes melek ebi Ju ìkpakpaka ibot
(II Makab 4:7-17)
10 Ijo ugwun̄ ijọn̄ ge oneninan̄a me etete kiban̄ itibi isibi, òrere Antiọkus Epifanes, gwun̄ ogwu ubọọn̄ Antiọkus. Îkaan̄ mgbọ etetbe ọmọ me usun̄ akọn̄ isun̄ me Rom. Ìbene ikikpulu me òso efit mè akọp acha ita mè jaaba me lek Giris okanabe ido.
11 Me ukot kan̄, usini ebi Ijeren ìkikpaka ibot esasa owuwa ebi kiban̄ ije ilọ oniin̄, mè ikitumu inyi ema ibe, “Ìna eji egọọk ebi ofifi ido ìluluk ikana eji ekaan̄ mgbaan̄-nchieek, mije, akarake eji enan̄abe itele ema, ùrioon̄ ìkpọkpọ ikinitoon̄ eji.” 12 Nkeek yi ototop me lek owuwa ebi kiban̄. 13 Inu ya ototop ema me lek enenen. Usini kiban̄ esisi lek ogwu ubọọn̄ Antiọkus, isi itumu inyi, ogwu ubọọn̄ onyinyi ema unye ibe egọọk erọ orọmijọn̄ ebi ofifi ido cha ekirọ. 14 Eya orọ, ema enanama oyet ifit ile me Jeruselem, kubọk ebi ofifi ido cha erọbe, 15 mè ichichaka iman̄ òriọọn̄ kiban̄ eyi ifieek-afi, mè ijit inyan̄a-ibot mbuban ya, mè ikigọọk ebi ido cha igbaan̄ inu irọ, mè inyam lek kiban̄ ikana usun̄ inyi irọrọ ijo inu geelek.
Antiọkus Epifanes îsi akọn̄ me Ijipiti
16 Mgbọ Antiọkus omun̄be ibe ke mkpulu kan̄ îkeke inye, ibeben ejit irere ubọọn̄ me ido Ijipiti, inyi ọmọ ikigbaan̄ ido Ijipiti melek ido Siria ikikpulu. 17 Eya orọ, isasa urum akọn̄ ònyenye, mè ebi akọn̄ inyọn̄ inyinya, mè ebi akọn̄ inyọn̄ eniin̄, melek owuwa uji akọn̄ isi itim akọn̄ me Ijipiti, 18 mè itim akọn̄ me lek kè Tolemi ogwu ubọọn̄ Ijipiti. Tolemi ofọfiọọk, mè ilibi inan̄a, owuwa ebi kan̄ ebeben unan, mè ikwaan̄ irurọn̄ọ. 19 Antiọkus otitim akọn̄ ibọkọ otutuuk ama mgban akọn̄ geelek me Ijipiti, mè ifum ido ya irak.
Antiọkus îsisaak ebi Ju
20 Mgbọ Antiọkus otimbe ikpan̄ Ijipiti, me òso efit mè akọp acha ini mè ita, ikakana isi ida ido Ijeren, mè isa urum akọn̄ ònyenye initim akọn̄ me lek ama Jeruselem. 21 Isasa me ugumulek ije inin̄ emen Uwu Mbuban me Jeruselem, mè ikpulu ntook alata araran̄, mè ngugọọn̄ ekisa itoon̄ mkpukan̄, melek otutuuk nroon̄ ikwaan̄ òje me lek. 22 Îben si ikasi Fituru Isi Awaji, mè ikpulu ekpen̄ ekisa igwook miin̄, mè ugọn̄, mè ngigọ nsensi, mè ekwut mgban, mè okpibot, mè inu alata araran̄ cha esabe ibala isi Uwu Mbuban ya. Ìrọrọọn̄ otutuuk inu cha geelek irak. 23 Îkpulu alata araran̄ mè alata okuket, mè unye otu ewe nroon̄ ikwaan̄ geelek, mè ikpulu si nlelet inu ubọọn̄ geelek îmun̄be. 24 Isasa otutuuk inu chi ifo ido kan̄.
Îkpan̄ ene iwa enenen,
mè ikitumu ikọ me ikpele ugumulek.
25 Ikpele ufieejit oninin̄ otutuuk ere me ido Ijeren.
26 Ebi mkpulu mè ebi ugane ekekito mfi ufieejit,
lek owọwọ nsabọn ibaan̄ mè nsabọn irieen̄;
uja ogwọgwọk ita me lek ebibaan̄.
27 Ogwu geelek òdo aya nwa obebene okwa ito,
ogwu òbat aya olom
okwekweek me agwut obat-olom ikifieek ejit.
28 Ijọn̄ me lek kan̄ îsisik,
esip otetet otutuuk ebi uwu kè Jekọp.
Ebi ofifi ido mîbọkọ Jeruselem ikaan̄
29 Acha iba iraraka, ogwu ubọọn̄ Antiọkus oraria ogwu ibot ebi akọn̄ ebi ìkibọkọ otitip mkpulu inu me ama ebi Juda cha. Ogwu ibot akọn̄ ya osasa ikpele urum akọn̄ igbaalek inu me Jeruselem. 30 Inenifiaan̄ ikitumu ikọ esuuk esuuk inyi ebi ama ya. Ema ebọbọkọ ọmọ itap. Ire, me ekakpọge chieen̄, ikpọkpọ ijibi akọn̄ inin̄, mè ikijijaka ama ya igwook, mè ikpan̄ owuwa ebi Ijeren. 31 Ifufum ama ya inọọn̄, mè ichim ukan̄ itap, mè igwak uwu mè mgban òkakana ama ya okokop igwook. 32 Ema mîkpulu ebibaan̄ mè nsabọn me usun̄ akọn̄, mè ikpulu urum anam kiban̄ igbaalek. 33 Ema eneninama ikpele mgban mè owuwa uwu-oket ònyenye isa ikwek ama kè Debit ya, mè isa irọ ama mgban akọn̄ kiban̄, 34 mè ikpulu ebi ijo ife me etete ebi Ju, ebi ìkikpaka ibot cha, itap me ere ya ibe ekebem. Ife chi enenirọ ema inye. 35 Ema etititiin̄ nroon̄ akọn̄ mè inorie isun̄, mè ititiin̄ inu ema efumbe me Jeruselem isun̄ si me ere ya, mè inikana ikpele saasaak inyi ebi ene.
36 Ama mgban akọn̄ ya onenikana
ere ekilet ikikpọ Uwu Mbuban,
mè ire atalek ijo ere ogwu
ochicha ebi Ijeren mgbọ geelek.
37 Ife cha ekekifiat eje ebi kpelọ inu geege
ikana Uwu Mbuban okokop,
mè ikififila ere mbuban ya.
38 Mije kiban̄, ebi ìluk me
Jeruselem elilim itele ama,
ama okakana ere ebi ichen ekiluk.
Jeruselem okakana ofifi ama
inyi ebikaan̄ gaalek, bọn kan̄ ejijit ọmọ itele.
39 Uwu Mbuban kan̄ okakana ukpọk ukpọk kubọk emen èwê;
ijọk ekirie me emen kan̄ okakana ufieejit,
Usen Mbuban kan̄ okakana inu ochak,
umin kan̄ okakana esip.
40 Esip kan̄ mgbọ keyi omimin ikana ìkike
melek uja kan̄ mgbọ òraraka;
umin kan̄ ogwugwu ikom ikana ufieejit.
Òchichaka inu ebi ofifi ido înin̄ Jeruselem
41 Ogwu ubọọn̄ oneninyi ida iso otutuuk ido òkup me irak kan̄ ibe otutuuk ene ekana ere ge, 42 ogwu ikup, iyaka ọkpọkpọ orọmijọn̄ eyi kan̄ ito. 43 Otutuuk ebi ofifi ido geelek ebọbọkọ ida ogwu ubọọn̄ ya itap. Owuwa ebi Ijeren ebebele ejit ibọkọ ubọk iriaak awaji ogwu ubọọn̄ itap; ema ekekigwa ngwugwa inyi mkpọmfaka, mè ikichaka Usen Mbuban. 44 Ogwu ubọọn̄ oraria ikpa me ubọk ebi etip ibe esa esi Jeruselem mè ama geelek me Juda ibe mè ekerọ orọmijọn̄ ònu ayaya me ido kiban̄, 45 mè ibe ekayaka ìkigwa ngwugwa ewọwọp mè ofifi chieen̄ ngwugwa geege, mè ngwugwa miin̄ egwogwook me Uwu Mbuban, mè ekechichaka Usen Mbuban melek ijọk geelek, 46 mè echichaka si Uwu Mbuban mè irek ebi ngwugwa. 47 Ire, ìbe enama ntook, mè isi yọk, mè isi-ijọn̄ enyi mkpọmfaka, mè ekesa okodi mè òchichaka anam geelek ekegwa ngwugwa, 48 mè etele ifefieek bọn kiban̄ afi. Ìbe ema ekerọ inu geelek ikatanage mè ochichaka inu geelek esa efifila lek kiban̄, 49 inyi ema ewuuk Ikan Awaji, mè enwunween̄ otutuuk inu Awaji otọbe ibe ekerọ. 50 Me òta kan̄, ibebe, “Ogwu geelek òkpakpaka otu ikan ogwu ubọọn̄, ìbokwukwu.”
51 Inu chi ke îge me ikpa ichon ikana iso otutuuk ido geelek îkikpulu, mè ito ebi ìkikpọ chieen̄ me lek ebi ene, inyi ekerọ inu cha ubọk îbe ekerọ, mè inyi si ida ibe otutuuk ama me Juda ekegwa ngwugwa eyi kiban̄, kpa ama kpa ama. 52 Owuwa ebi Ijeren, ebi ìjijit Ikan Awaji, ekakana igọọk ema, mè ikirọ ijo inu me ido. 53 Eru kiban̄ orọrọ ebi Ijeren ebi ìkisun̄ Ikan Awaji elim esi elileek me otutuuk ere geelek emun̄be ilet lek.
54 Me òso akọp mè usen go me onyan̄ Kisilep, mè òso efit mè akọp acha ini mè go, ogwu ubọọn̄ Antiọkus osasa òchichaka inu eyi òkitap mfufiat ininama me inyọn̄ ntook ngwugwa me Uwu Mbuban. Mînama si ntook me otutuuk ama Juda òkakana Jeruselem; 55 ekekiwọp nsensi me isotu uwu geelek mè lek oniin̄ geelek. 56 Ikpa Ikan Awaji geelek ema eweekbe imun̄, ema mîra igwak isek, mè iwọp. 57 Ogwu geelek eweekbe ikpa inyan̄a-ibot imun̄ me ubọk, mè ìre ìkirọ inu Ikan Awaji otumube, mîra itip ogwa oyerebet mkpa, mè itet ikpan̄ ike ogwu ubọọn̄ onyibe ida ibe erọ. 58 Me onyan̄ me onyan̄, ebi ife chi mîra ikisa unye kiban̄ ikirọ nnaan̄ me lek ebi Ijeren geelek etetbe me emen ama òrọrọn̄ ikan kiban̄. 59 Me òso akọp usen iba mè go me onyan̄ ya, ema egwagwa ngwugwa me inyọn̄ ntook ya ema enamabe itoon̄ me inyọn̄ ntook ngwugwa ewọwọp me Uwu Mbuban. 60 Igọọk me lek ikan ogwu ubọọn̄ onyibe, ekikpakpan̄ ebibaan̄ geelek ìsasa bọn kiban̄ inyi ibe efieek afi, 61 mè ikpaan̄ si ebi ototun̄ ukan̄ kiban̄ melek ebi ìfefieek nsabọn cha afi, mè èbeen̄ nsabọn cha ekwaan̄ me ebek ebi uga.