Ichechieek kè Matatiyas mè ebi bọn
2
Me ike mgbọ ya, Matatiyas gwun̄ kè Jọn, gwun̄ kè Simiọn, òrere ogwu ngwugwa me owot iman kè Jioyaribu, otetele Jeruselem isi iluk me ama Modeyin. 2 Îkaan̄ ibot bọn ebirieen̄ go; ema ìre Jọn ogwu ekigwen si Gadi, 3 mè Saimọn ogwu ekigwen si Tasi, 4 mè Judas ogwu ekigwen si Makabiyọs, 5 mè Elieja ogwu ekigwen si Afaran, melek Jonatan ogwu ekigwen si Apus. 6 Matatiyas onenimun̄ òchichaka inu cha ekirọ me Juda mè Jeruselem, 7 mè initumu ibe,“Jei! Keke orọ emanbe emi,
inyi ǹkensa chieen̄ n̄a m̀mun̄ inu kechi?
Mîjijaka ebi n̄a isan̄a,
mè ijijaka si ama mbuban ya isan̄a?
M̀bajeje iluk ni, ama înin̄ ubọk ebi ochicha,
Uwu Mbuban înin̄ ubọk ebi ichen?
8 Uwu Mbuban ìyaka inibet lek ogwu ikakaan̄ge umin;
9 nroon̄ ikwaan̄ kan̄ cha òkup òrirọ òrirọ,
mîfum me akọn̄ isa ifon.
Mîkpan̄ asasa nsabọn ama mbuban ya me lek oniin̄ kan̄,
nsabọn irieen̄ ama ya mînin̄
me otu oge akọn̄ ogwu oriara.
10 Ìre îkaan̄ ido eyi ikabọkọge uwu
ebi ubọọn̄ ama ya ìkaan̄ me ìrot,
mè ìkpulu inu kan̄ me mfum ni?
11 Mîbọkọ otutuuk inu ibala-lek kan̄ isan̄a ọmọ me ubọk,
ọmọ îkana usun̄, ìkayaka ìkaan̄ lek kan̄.
12 Ìkpọ, mîjijaka Uwu Mbuban kiji isan̄a,
mîjijaka uja kiji mè umin kiji isan̄a;
ebi ofifi ido mîfifila ema isan̄a kpai.
13 Keke ke eji eyaka ikiluk ugwem ikpọ ni?”
14 Matatiyas mè ebi bọn egwagwak ofọnti kiban̄, mè itap ofọnti ufieejit, mè ifieek ejit enenen enenen.
Matatiyas îjit ngwugwa ebi yọk me Modeyin
15 Ebi ikwaan̄ ogwu ubọọn̄ cha, ebi ìkitet ene ibe ejit Awaji, eneninu me ama Modeyin inenitet ebi ene ibe enegwa ngwugwa. 16 Owuwa ebi Ijeren esisibi inu me lek ife cha. Matatiyas melek ebi bọn esisibi si inu. 17 Ebi ikwaan̄ ogwu ubọọn̄ cha enenitumu inyi Matatiyas ibe, “Owu ìre ogwu ibot ogwu ekinyi ulibi me ama yi, owu omin ene, mè ikaan̄ bọn mè ngwan̄ ìberọ owu inye. 18 Owu re adasi ene òbosibi inu inirọ inu ogwu ubọọn̄ otọbe ibe erọ, kubọk otutuuk ebi ofifi ido, mè ebi ibot me Juda, mè ebi ìsisik me Jeruselem, erọbe. Ire orọ, mêgwen owu mè bọn kwun̄, ebi ‘Unene ogwu Ubọọn̄,’ mè inyi owu mè bọn kwun̄ alata araran̄, mè alata okuket, mè owuwa uche.”
19 Matatiyas otataan̄ ukpo ifọọk otu ibe, “Ikerere otutuuk ido òkup me irak mkpulu ogwu ubọọn̄ esisiki ibot inyi ogwu ubọọn̄, mè ichieek irọrọ inu ogwu ubọọn̄ otọbe, mè itele ubọk ebi nte nte kiban̄ ekiriaak Awaji, mè ikirọ otu ikọ ogwu ubọọn̄ otọbe, 20 emi melek bọn n̄a melek ebi ngwan̄ n̄a, eji ebekigọgọọk inyan̄a-ibot Awaji onyan̄abe melek ebi nte nte kiji. 21 Awaji ìkpochieek ibe eji etele Ikan kan̄ mè inu îtọbe ibe eji erọ. 22 Eji kpeberọ inu ogwu ubọọn̄ otọbe cha, kpebetetele ubọk eji ekiriaak Awaji, mè igwaka inin̄ agan̄ ulom mè ìre agan̄ ujit.”
23 Itutumu ikọ ya isan̄a me otu, ogwu Ju ge onanan̄a isibi me isi otutuuk ene, ibonigwa ngwugwa me inyọn̄ ntook ya me Modeyin, kubọk ogwu ubọọn̄ otọbe. 24 Mgbọ Matatiyas omun̄be inu ya, uga ulọk eyi Awaji oyoyok ọmọ me ejit kubọk ukan̄, ejit kan̄ ofufufuku ikana. Inanaan̄ ejit ògbegbe, mè ilibi inin̄ lek ene ya, mè ikpan̄ ene ya me inyọn̄ ntook ya. 25 Akpat yaage si, ikpakpan̄ ogwu ikwaan̄ ogwu ubọọn̄ ya, ogwu òkitet ene me ubọk unye ibe egwa ngwugwa ya, mè igwak ntook ya igwook. 26 Ikeyi ke îsa me uga ulọk îkaan̄be me lek Ikan Awaji irọ mbet lek inu Fineyas orọbe Jimiri gwun̄ Salu.
27 Matatiyas onenikitaan̄ ukpo ikana ama ibe, “Ogwu ikaan̄ ulọk me lek Ikan Awaji, mè ikeke inye me lek inyan̄a-ibot Awaji, ene ya isibi igọọk emi!” 28 Ọmọ mè bọn kan̄ elilim ifon inyọn̄ ogoon̄, mè ijuuk otutuuk inu geelek ema ekaan̄be itele me emen ama.
Mîkpan̄ obop ebi Ju
29 Me ike mgbọ ya si, owuwa ebi ìkiweek ata irọrọ mè unen oyerebet efofon emen èwê isi iluk, 30 ema mè bọn ebirieen̄ kiban̄, mè ebi nwa kiban̄, mè anam kiban̄, bak me lek ikpele ukwook òkekeme ema. 31 Ire, etip onenire lek ebi ibot ikwaan̄ ogwu ubọọn̄ melek urum ebi akọn̄ ìkup me Jeruselem, ama kè Debit, ibe ke ebi ìjijit irọrọ inu ogwu ubọọn̄ otọbe cha mîlim ifon emen èwê isi ilileek. 32 Owuwa ebi akọn̄ esisibi igọọk ema, mè isoon̄ ema, mè irieen̄ akọn̄ ikwek ema, mè ibem lek ititim ema akọn̄ me lek me Usen Mbuban; 33 mè itumu inyi ema ibe, “Îkem! Ìsibi ìna ìnirọ inu ogwu ubọọn̄ otọbe, mè ìgat ugwem.” 34 Ire, ema ebebe, “Eji kpebesibi inu, eji kpeberọrọ si inu ogwu ubọọn̄ otọbe, mè isa me ikeya ichaka Usen Mbuban.” 35 Ife cha ebebene ema akọn̄ me lek mgbọ yaage. 36 Ire, ema kpebọkọ otu, kpetọtọbọ kubọk ewuuk ge, kpechichit si ere ema ekilileek, 37 mije, ema ebe, “Eji mêkwaan̄ mkpa ebi ekarọge nlilọ inu geege. Inyọn̄ mè ijọn̄ mîkeke ata-ikọ ibe ke enyi ekikpan̄ eji me kpunube inu geege eji erọbe ilọ.” 38 Ebi ife cha ebebene ema akọn̄ me lek me Usen Mbuban, mè ikpan̄ ema, mè ebi nwa kiban̄, mè bọn kiban̄, mè anam kiban̄ isan̄a kpai. Otu ifuk ebi ema ekpan̄be ìre obop ene.
Matatiyas mè ebi melek kan̄.
39 Mgbọ etip inu ya onire lek kè Matatiyas mè ebi melek kan̄, ema efefieek ejit enenen inyi ebi ekpan̄be cha. 40 Ema enenikitumu me lek kiban̄ ibe, “Ire eji otutuuk ene irọ kubọk bọn ulọk kiji chi erọbe, mè ijit ititim akọn̄ me lek ebi ofifi ido cha isa inyan̄a ebek ugwem kiji mè orọmijọn̄ kiji, ìkpofifiin̄ mgbọ, ema mêchep eji isan̄a kpai me linyọn̄.” 41 Ema etumu ifieek me usen ya ibe, “Ikaan̄ ogwu inu eji akọn̄ me lek me Usen Mbuban, eji ebetitim akọn̄ me lek, eji kpebekwaan̄ kubọk bọn ulọk kiji ekwaan̄be me ere ema elileekbe.”
42 Ìkafiin̄, ogbo ebi Kasidi enenigbaan̄ itọbọ melek kiban̄. Ebi Kasidi ìre ebi Ijeren ìrọriọọn̄ ukot akọn̄, ebi ìnanan̄a isibi isa lek kiban̄ ichieek use me ibot Ikan Awaji. 43 Otutuuk ebi ìlilibi inwọnọ saasaak ya enunu ininin̄ isọkọ me lek kiban̄, mè inirọ urum kiban̄ inye. 44 Ema etititiin̄ lek kiban̄ ikana urum akọn̄, mè isa me unaan̄-ejit isibi isi ikpan̄ ebi ijo ife cha, mè isa me uyok uyok unaan̄-ejit kiban̄ isọp ebi ìkakana igọọk ikirọ ikeme ebi Ju cha igwook. Otutuuk ebi ìnwọnwọnọ me ubọk kiban̄ elilim isi lek ebi ofifi ido cha isi itap ibot. 45 Matatiyas mè ebi melek kan̄ ekekikana ere ikigbugbọ ntook ife cha enamabe igwook. 46 Otutuuk nsabọn irieen̄ geelek ekafieekge afi me lek ijọn̄ ebi Ijeren, ema etetet otutuuk kiban̄ me unye ifieek afi iso. 47 Ema eweweek ebi ugumulek cha, mè ikpan̄ ema isan̄a, ikwaan̄ ya si orereke me ubọk kiban̄. 48 Ema enenibọkọ Ikan Awaji isibi me ubọk ebi ofifi ido mè ebi ubọọn̄ kiban̄. Kpeyaka ichieek ibe ubọk ogwu ijo ene ya inye igak ema.
Òta ikọ mè mkpa kè Matatiyas
49 Mgbọ mgbọ Matatiyas obokwu okigele igbet, inenitumu inyi bọn ebirieen̄ kan̄ ibe, “Ubenelek melek ochak îra ikaan̄ unye enenen, mgbọ keyi ìre mgbọ jakajaka mè ijo unaan̄-ejit. 50 Mgbọ yi, bọn n̄a, ìjeen̄ uga ulọk me lek Ikan Awaji, mè ìbem lek isasa ugwem kinyi inyi me ibot inyan̄a-ibot Awaji onyan̄abe melek ebi nte nte kiji.
51 “Ìkeek inu ebi nte nte kiji erọbe, kpa ogwu me ukot eyi kan̄, inyi enyi mêkaan̄ ikpele umin mè itaan̄ etip ire mgbọ geelek. 52 Me atikọ, Ebereyam îkeke inye me ichechieek mgbọ Awaji otọbe ọmọ ikpọ, Awaji osasa me lek keya ifuk ọmọ kubọk ogwu ata irọrọ. 53 Josefu îkup me emen ufialek kan̄ itet ikan inye, mè isa me ikeya ikana ogwu ibot mkpulu me Ijipiti. 54 Fineyas, nte nte kiji, îjeen̄ uga ulọk me lek Ikan Awaji, mije keya, Awaji onyanyan̄a ibot inyi ibe ke môre ogwu ngwugwa ire mgbọ geelek. 55 Josuwa îrọ inu Awaji onyibe ida ibe irọ, sa me ikeya, ikakana ogwu oyerebet me Ijeren. 56 Kelep îtumu atikọ me isi ntitiin̄ ama, mè isa me ikeya ibọkọ ijọn̄ me ìrot. 57 Debit îkaan̄ ata ejit, mè isa me ikeya ibọkọ ogboon̄ ubọọn̄ eyi mkpulu ikakaan̄ge itata me ìrot. 58 Ilaija îkaan̄ ikpele ulọk me lek Ikan Awaji, mije keya, ebeben ọmọ ifo emen inyọn̄. 59 Ananiya mè Ajariya mè Misayen mîchieek me lek Awaji, mije keya, Awaji onyanyan̄a ema isibi me emen ukan̄. 60 Danien ìre ogwu òkekeke inye me lek Awaji, mije keya, Awaji onyanyan̄a ọmọ isibi me otu egbe àtat.
61 “Eya orọ, ìriọọn̄ ubọk ìkeek, me ukot me ukot, ebi geelek ìtotoon̄ ejit me lek Awaji, lek kiban̄ ìkakiwọ. 62 Ìkatet ukpook me lek ikọ ebi ijo ife chi ìkiriak lek, uja kiban̄ ìbokana ifin anam mè mkput ikike. 63 Cherekeyi ke ema ekitaan̄ etip, iyakwut kpebeyaka imun̄ lek kiban̄, mije, ema mêgwu ikom ifon achiaan̄ ya ema enan̄abe me lek inu; ijo otitọt kiban̄ geelek môkakana ikike. 64 Bọn n̄a, ìkat ejit, mè ìkeke ìnye me lek Ikan Awaji, ke enyi mêsa me lek kan̄ ikaan̄ umin.
65 “Kpọ Simiọn ngwan̄ kinyi ire ogwu, emi nriọọn̄ ibe ke ọmọ îriọọn̄ inu. Ìkigban̄ utọn̄ ìnyi ọmọ mgbọ geelek; ọmọ obokana ute inyi enyi. 66 Judas Makabiyọs ìre ikpele ogwu usọ akọn̄ òkakaan̄ ejit bene me karake ijija kan̄. Ọmọ obore ogwu ibot akọn̄ inyi enyi, ọmọ obosa enyi isi akọn̄ me lek ebi ofifi ido. 67 Ìgween̄ ebi geelek ìkisun̄ Ikan Awaji ìsọkọ me lek kinyi, mè ìrọ ebi ife chi useen̄ inu ema erọbe ebi kinyi. 68 Ìkpe ebi ofifi ido cha mkpukpe òjot òjot, mè ìrọ inu Ikan Awaji otọbe ibe erọ.”