10 Apoloniọs onenititiin̄ ebi ofifi ido mè owuwa urum akọn̄ isa ijibi akọn̄ inan̄a me Sameria inu me Ijeren. 11 Mgbọ Judas onọbe, isisibi isi ikweek Apoloniọs, mè itim ikpan̄, mè ikpan̄ ọmọ. Owuwa ebi kan̄ ebeben unan, mè ikwaan̄ irurọn̄ọ, ebi ìnwọnwọnọ elililim. 12 Ema ebọbọkọ inu ebi ife cha efumbe; Judas obọbọkọ oge akọn̄ kè Apoloniọs, mè isa ikitim akọn̄ otutuuk ugwem kan̄.

13 Serọn, ogwu ibot akọn̄ ebi Siria, oneninọ ibe ke Judas îtitiin̄ ikpele urum akọn̄, ìrere ebi akọn̄ ìgbegbe utoon̄-ejit, mè ikeke inye melek kan̄. 14 Inenibe, “Mârọ ibe erieen̄ n̄a itaan̄ etip, mè ikaan̄ si umin me ido. Mâsi itim akọn̄ me lek kè Judas melek otutuuk ebi melek kan̄ cha ebi ìkpakpaka ibot me lek ikan ogwu ubọọn̄.” 15 Inenititiin̄ ikpele urum akọn̄ ebi kperiọọn̄ Awaji, urum akọn̄ ya înye lek enenen. Ife cha enenigọọk ọmọ isi, inyi esi esulu ebi Ijeren osusut me useen̄ mkpaka-ibot kiban̄.

16 Mgbọ îrebe osiki ijọn̄ utibi ogoon̄ me Bet Oron, Judas osasa sọntiik urum akọn̄ isibi isi ikweek ọmọ. 17 Ire, mgbọ ebi akọn̄ kè Judas emun̄be ikpele urum akọn̄ òkinin̄ ema lek, ema enenibe Judas, “Mọmọ ubọk eji, ene inen mè inen gaalek, ebekọt ikeke ida ikpele urum akọn̄ òwawa ene ikeyi, mè inye lek? Ògak ge, efuuk îta eji me owot isan̄a, mije, eji kpechak inu geege me otu otuuk chereyi.”

18 Judas ofọfọọk ema ibe, “Îfet ene inen mè inen ititim ikpan̄ owuwa ene. Mije, me chieen̄ Awaji òkup me emen inyọn̄, ntim-mkpan̄ ìre ntim-mkpan̄, mè ìre ìje me ubọk owuwa ene, mè ìre ìje me ubọk ene inen mè inen. 19 Ititim ikpan̄ me akọn̄, ìkarie me lek otu ifuk ebi akọn̄, mije, unye ìkinan̄a me Emen Inyọn̄. 20 Ema esa me ikpele unyechieen̄ mè ekariọọn̄ge Ikan Awaji inu akọn̄ me lek kiji, ibenikpan̄ eji mè ebi nwa kiji mè bọn kiji isan̄a kpai, mè ifum inu eji ekaan̄be. 21 Ire, eji ekitim akọn̄ me ibot ugwem kiji melek Ikan Awaji kiji. 22 Awaji me lek kan̄ obokpukpuku ema iriọk me chieen̄ kiji. Eya orọ, ikafieek owot me lek kiban̄.”

23 Itutumu ikọ ya isan̄a, ema ejijibi akọn̄ inin̄ lek kè Serọn melek urum akọn̄ kan̄ me uwuuk-lek, mè itun̄ ema imem. 24 Judas melek ebi kan̄ egọgọọk ema bene me Bet Oron ikwala isibi igwook me lek òla ijọn̄. Efit ene jeeta me etete kiban̄ ekwakwaan̄, ebibilọ elilim inin̄ ido Filisia. 25 Ebi ene ebebene ikitet ukpook me lek kè Judas mè ebi ngwan̄, urimi oninin̄ me lek otutuuk ebi ofifi ido cha ìluluk ikana ema. 26 Etip kan̄ otataan̄ ire utọn̄ ogwu ubọọn̄ Antiọkus, ebi ofifi ido cha geelek ekekitumu ikọ ofolek kè Judas mè akọn̄ îkitim.

27 Mgbọ ogwu ubọọn̄ Antiọkus onọbe otutuuk inu chi, inanaan̄ ejit enenen. Ineninyi ida ibe etitiin̄ otutuuk urum akọn̄ geelek òkup me irak mkpulu kan̄; ikpele urum akọn̄ ònyenye lek enenen otititiin̄. 28 Inenichili uwu ikpoko kan̄, mè ikpe ebi urum akọn̄ kan̄ cha mkpukpe otutuuk acha ge, mè ibe ema ebem lek ekekpọ inu geelek òbosibi me agam. 29 Inenimun̄ ibe ke ikpoko òsisik me emen akpa ìkawa, ke otitip mkpulu òkinan̄a me ido geelek inu îgele, bak me lek wọlọwọlọ mè ùrioon̄ îtobe me ido, mije îgwakbe ikan cha òkukup akarake akat. 30 Ibebene ikaan̄ ukpook ibe ke ikpoko ìkposo eyi ọmọ obofiat, mè eyi ọmọ obokigwọ iche kubọk îkiche, mije, ọmọ îkiche uche inyi ene iwa enenen igak ike ebi ìdadasi ire ubọọn̄ me isi kan̄ ekiche. 31 Inu ya osisisaak ọmọ me ejit enenen, inenitumu ifieek ibe ke ọmọ môsi ido Pesia isi ibọkọ otitip mkpulu, inyi ọmọ ikaan̄ ikpoko òwawa enenen.

32 Sabum Antiọkus onije, itoto Lisias, ene ilile ònan̄a me owot ubọọn̄, ibe ikikpọ chieen̄ me lek inu ogwu ubọọn̄ ibene me lek okwaan̄ Yuferetis isi ire okike otubọk ijọn̄ ebi Ijipiti, 33 mè ibe ikikpọ si chieen̄ me lek kè Antiọkus, gwun̄ kan̄, mege ọmọ môkabe. 34 Antiọkus ocheche urum akọn̄ kan̄ irek iba, mè isa agan̄ ge melek ebi akọn̄ inyọn̄ eniin̄ inyi Lisias, mè inyi ida ofolek inu îdọmọbe ibe erọ. Òfo me lek ebi ìluk me Judia mè Jeruselem, 35 ìbe Lisias iria ebi akọn̄ isi, inyi ejijaka ema mè ekpukpuku unye ebi Ijeren mè ebi ìsisik me Jeruselem egwook, ufuna ekayaka ìnọnọ inu geege òfo me lek kiban̄ me ere ya ofifi, 36 mè ikpulu ebi ichen isi igwook ichit otutuuk lek ijọn̄ ebi Ijeren, mè iroon̄ nriroon̄ isa iche ijọn̄ kiban̄ inyi ebi ichen cha eluk. 37 Ogwu ubọọn̄ Antiọkus osasa okpọkọ urum akọn̄ ge òsisik ijibi ije inan̄a me Antiọk, ama ibot ido kan̄, me acha eyi òso efit mè akọp ini mè jaaba. Îsaba okwaan̄ Yuferetis itoon̄, mè ikije itibi ido agan̄ inyọn̄ echi ọmọ okikpulu.

38 Lisias onenigobo Tolemi gwun̄ kè Dorimenes, mè Nikanọ, mè Gọgiyas, ebi unye me etete ebi Unene Ogwu Ubọọn̄, 39 mè iniria ema melek akọp obop ebi akọn̄ ukot ukot ini mè obop ebi akọn̄ inyọn̄ inyinya jaaba, ibe esi akọn̄ me ido Juda, mè ejijaka egwook, ike ogwu ubọọn̄ onyibe ida. 40 Ebi ife cha esasa otutuuk urum akọn̄ kiban̄ ijibi ije, mgbọ ema erebe, ema egwugwugwuun̄ uwu ọfọ kiban̄ me agba lek ama Emayọs me lek òla ijọn̄.

41 Mgbọ ebi mbit ebi ido ya enọbe inu ofolek ebi ife cha, ema esisibi inu me orieen̄ akọn̄ ya, mè isa ogbogbo alata araran̄ mè alata okuket, mè mgba-mfiik ikaan̄ me ubọk, mè iben me ejit ibe ke ema mênilep ebi Ijeren me usun̄. Urum akọn̄ ebi Siria mè ebi Filisia enunu inigọọk ebi urum akọn̄ ya igbaan̄ itim akọn̄.

42 Judas mè ebi ngwan̄ emumun̄ ibe ke ufialek ìkpọkpọ ikimin, ke urum akọn̄ cha si mîrieen̄ akọn̄ me inyọn̄ ijọn̄ kiban̄. Ema mîriọọn̄ si ibe ke ogwu ubọọn̄ ìnyi ida ibe ejijijaka ebi Ju esan̄a kpai. 43 Ema enenitumu inyi lek kiban̄ ge ge ibe, “Eji ekpọk enama ido kiji òkakana ǹrioon̄, mè etim akọn̄ me ibot ebi kiji mè ibot Uwu Mbuban.” 44 Eya orọ, urum ebi kiban̄ etititiin̄ ibenineen̄ lek akọn̄, mè iriaak uriaak ibeek Awaji ibe irọ ema nsan, mè ito ema njijin.

46 Ema enenititiin̄, mè ijibi ije isi ama Mijipa, òkikpọ Jeruselem, mije, Mijipa ìwuwuuk lek ire ere ebi Ijeren ekisi iriaak uriaak. 47 Ema ejijin otu me usen ya, mè itap ofọnti ufieejit, mè igwọ ntọn̄ igwook ichit ibot, mè igwak ofọnti me lek kiban̄. 48 Ema enenichili ikpa Ikan ikiweek ibe Awaji ijeen̄ ema oniin̄, kubọk ebi ofifi ido ekisi lek mkpọmfaka awaji ataak kiban̄ ikisi ido ido-inu. 49 Ema mîsa ofọnti ebi ngwugwa inu, mè isa si adasi mfut, mè uche irek ge me akọp irek inu. Ema enenigween̄ ebi ìnyanyan̄a ibot ikukup ọkpọkpọ inyi Okumugwem, ebi mgbọ kiban̄ osobe, ititiin̄. 50 Ema enenibene ida itaan̄ ukpo igwen Awaji òkup me emen inyọn̄ ibe,

54 Ema ewuwut otita, mè idimi ukpo ònyenye. 55 Eya itata, Judas ototo ebi ibot ebi akọn̄, ebi ibot obop ene, mè ebi ibot efit ene, mè ebi ibot akọp ene go, mè ebi ibot akọp ene. 56 Inenitumu inyi ebi ìkaan̄ ikwaan̄ inama-uwu me ubọk, mè ebi ìbedo nwa, mè ebi ìkiwowop uko gerep me ubọk, mè ebi ukpook owot, ibe efon uwu kiban̄, kubọk Ikan otọbe. 57 Ebi urum akọn̄ cha enenijibi ije, mè isi irieen̄ akọn̄ me agan̄ osiki me lek ama Emayọs.

58 Judas otutumu inyi ema ibe, “Ìkpulu nroon̄ akọn̄ kinyi ìkwaan̄ me lek, mè ìtet ejit ìnye. Ìbem lek ititim akọn̄ me ewelegwe me lek ebi ofifi ido chi ìgbagbaan̄ itọbọ ibenijijaka eji mè Uwu Mbuban kiji isan̄a. 59 Mônwọn ibe eji ekwaan̄ isan̄a me akọn̄, igak eji imumun̄ ido kiji mè Uwu Mbuban kiji ojijakabe ita kpai. 60 Ire, inu geelek òrere nkeek Awaji òkup me emen inyọn̄, eya ke ìborọ.”